နိဒါန်း

ဩဝါဒနှင့် ပဋိညာဉ်များသည် နောက်ဆုံးသောကာလ၌ မြေကြီးပေါ်တွင် ဘုရားသခင်၏ နိုင်ငံတော်ကို တည်ထောင်ခြင်းနှင့် စည်းမျဉ်းအတွက် မြင့်မြတ်သော ဗျာဒိတ်တော်များနှင့် လမ်းပြလှုံ့ဆော်သော ကြေညာချက်များ၏ ပေါင်းချုပ်တစ်ခုဖြစ်၏။ အပိုဒ်ငယ်တို့၏ အများစုမှာ ယေရှုခရစ်တော်၏ နောက်ပိုင်းကာလ သန့်ရှင်းသူများအသင်းတော်၏ အသင်းသားများသို့ ရည်ညွှန်းသော်လည်း၊ အမှာစကားများ၊ သတိပေးခြင်းများ၊ ထို့အတူ တိုက်တွန်းခြင်းများတို့သည် ခပ်သိမ်းသော လူသားတို့၏ အကျိုးအတွက် ဖြစ်ပြီး၊ နေရာတိုင်း၌ရှိသည့် ခပ်သိမ်းသောလူမျိုးတို့ထံသို့၊ သူတို့၏ ဇာတိပကတိ ကောင်းကျိုးနှင့် ထာဝရတည်မြဲသောကယ်တင်ခြင်းအတွက် ဟောပြောလျက်ရှိသည့် ကိုယ်တော်ရှင် ယေရှုခရစ်တော်၏ အသံကို နားထောင်ကြရန် ဖိတ်ခေါ်ချက်တစ်ခု ပါဝင်၏။

ဤတစ်ပေါင်းတည်းစုစည်းထားခြင်း၌ ဗျာဒိတ်တော်များမှ အများစုမှာ ဂျိုးဇက်စမစ်အငယ်၊ ယေရှု ခရစ်တော်၏ နောက်ပိုင်းကာလသန့်ရှင်းသူများ အသင်းတော်၏ ပထမဦးဆုံးပရောဖက်နှင့် ဥက္ကဋ္ဌ အားဖြင့် ရရှိခဲ့ခြင်းဖြစ်၏။ အခြားသောအရာတို့မှာ ဥက္ကဋ္ဌအဖွဲ့၌ သူ၏နောက်မှ တက်သူ အချို့ အားဖြင့် ထုတ်ပြန်ခဲ့ခြင်း ဖြစ်၏ (ဩနှင့် ပဋိ ၁၃၅၊ ၁၃၆၊ ၁၃၈၊ တရားဝင်ကြေညာချက် ၁ နှင့် ၂ တို့၏ ခေါင်းစဉ်တွင်ကြည့်ပါ)။

ဩဝါဒနှင့် ပဋိညာဉ်များကျမ်းသည် သန့်ရှင်းသောသမ္မာကျမ်း၊ မော်မုန်ကျမ်း၊ မြတ်ပုလဲကျမ်းတို့နှင့် အတူတကွရှိသည့်၊ အသင်းတော်၏စံချိန်မီ ကျမ်းစာတွဲများထဲမှ တစ်ခုဖြစ်၏။ သို့သော်လည်း၊ ဩဝါဒနှင့် ပဋိညာဉ်များသည် ရှေးမှတ်တမ်းမှတ်ရာတစ်ခု၏ ဘာသာပြန်ခြင်း မဟုတ်သောကြောင့် တစ်မူ ထူးခြား သော်လည်း ယခုခေတ် မူရင်း ဇစ်မြစ်၌ စခဲ့ပြီး၊ ဤကာလ၌ မြေကြီးပေါ်တွင် ဘုရားသခင်၏ သန့်ရှင်းသော အမှုတော်ကို ပြန်လည်ဆောင်ယူခြင်းနှင့် သူ၏ နိုင်ငံတော်ကို တည်ထောင်ခြင်းအတွက်၊ သူ၏ ရွေးကောက်ထားသော ပရောဖက်တို့အားဖြင့် ဘုရားသခင်ထံမှ ပေးထားခြင်းဖြစ်၏။ ဗျာဒိတ်တော်များ၌၊ တစ်စုံတစ်ဦးသည် အချိန်ကာလပြည့်စုံခြင်းသာသနာ၌ ကိုယ်တော်ရှင် ယေရှု ခရစ်တော်၏ အသစ်ထပ်မံ၍ ဟောပြောလျက်ရှိသည့် နူးညံ့သော်လည်း ခိုင်မာသည့် အသံကို ကြား၏။ ထို့အတူ၊ ဤနေရာ၌ အစပျိုးခဲ့သည့် အမှုတော်သည် ဒုတိယအကြိမ် ကြွလာတော်မူခြင်း အတွက် ပြင်ဆင်ရာ ဖြစ်ပြီး၊ ကမ္ဘာဦးကတည်းက ခပ်သိမ်းသော သန့်ရှင်းသည့်ပရောဖက်တို့၏စကားများကို ပြီးပြည့်စုံစေခြင်းနှင့် ညီညီညွတ်ညွတ်ရှိစေခြင်း အတွက်လည်းဖြစ်၏။

ဂျိုးဇက်စမစ်အငယ်ကို ၁၈၀၅ ခု၊ ဒီဇင်ဘာ ၂၃ ရက်တွင်၊ ဗားမောင့်၊ ဝင်ဆာခရိုင်၊ ရှာရုန်၌ မွေးဖွားခဲ့၏။ သူ့ဘဝ၏ အစောပိုင်းတွင်၊ သူသည် နယူးယောက် အနောက်ပိုင်းရှိ၊ ယနေ့မန်ချက်စတာဟုထင်ရှားသည့် နေရာသို့ သူ့မိသားစုနှင့်အတူ ရွှေ့ပြောင်းခဲ့၏။ သူ ထိုနေရာ၌ နေထိုင်စဉ် ၁၈၂၀ ခုနှစ် နွေဦး၌၊ အသက်တစ်ဆယ့်လေးနှစ် အရွယ်တွင်၊ သူ၏ပထမရူပါရုံကို တွေ့ကြုံခဲ့ရ၏၊ ထိုရူပါရုံ၌ သူသည် ဘုရားသခင်၊ ထာဝရအဘနှင့် သူ၏သားတော် ယေရှုခရစ်တော်တို့ ကိုယ်တိုင် အကြည့်အရှု ကြွရောက်သည်ကို ကြုံခဲ့ရ၏။ ဓမ္မသစ်ကာလက တည်ထောင်ခဲ့သည့်၊ ထို့အတူ ဧဝံဂေလိတရားတော် အပြည့်အစုံကို စီမံဆောင်ရွက်ခဲ့လေသည့် အသင်းတော်တည်းဟူသော ယေရှုခရစ်တော်၏ မှန်သောအသင်းတော်သည် ဤမြေကြီးပေါ်၌ မရှိတော့ကြောင်း ဤရူပါရုံ၌ သူ့ကို ပြောပြခဲ့၏။ များစွာသော ကောင်းကင်တမန်တို့အားဖြင့် သူသွန်သင်ခံရသည့် အခြားမြင့်မြတ်သော ထင်ရှားစွာပြခြင်းများ နောက်မှ ဖြစ်လာခဲ့၏။ မြေကြီးပေါ်၌ သူလုပ်ဆောင်ရန် အထူး အမှုတော်တစ်ခု ဘုရားသခင်၌ ရှိကြောင်းနှင့် သူ့အားဖြင့် ယေရှုခရစ်တော်၏ အသင်းတော်ကို မြေကြီးပေါ်သို့ ပြန်လည် ဆောင်ယူ လိမ့်မည် ဖြစ်ကြောင်း သူ့ကို ဖော်ပြခဲ့၏။

အချိန်အတန်ကြာပြီးနောက်၌၊ ဂျိုးဇက်စမစ်သည် မြင့်မြတ်သော အကူအညီအားဖြင့် မော်မုန်ကျမ်းကို ဘာသာပြန်၍ ပုံနှိပ်ထုတ်ဝေရန် စွမ်းဆောင်နိုင်ခဲ့၏။ ထိုအချိန်အတွင်း၌ သူနှင့် အော်လီဗာ ကောင်ဒရီတို့သည် ၁၈၂၉၊ မေတွင် ဗတ္တိဇံဆရာ ယောဟန်အားဖြင့် အာရုန်ယဇ်ပုရောဟိတ်အခွင့်သို့ ခန့်ထား ခံရကြ၏ (ဩနှင့် ပဋိ ၁၃ တွင် ကြည့်ပါ)၊ ထို့နောက် မကြာမီတွင် သူတို့သည် ရှေးတမန်တော်များ ဖြစ်သည့် ပေတရု၊ ယာကုပ်နှင့် ယောဟန်တို့အားဖြင့် မေလခိဇေဒက် ယဇ်ပုရောဟိတ် အခွင့်သို့ ခန့်ထားခံရကြ၏(ဩနှင့် ပဋိ ၂၇း၁၂ တွင် ကြည့်ပါ)။ မောရှေ၊ ဧလိယ၊ ဧလိုင်ယနှင့် အခြားများစွာသော ရှေးပရောဖက်တို့အားဖြင့် ယဇ်ပုရောဟိတ်အခွင့်သော့များကို အပ်နှင်းခံရသည့် အခြားဘိသိက်မင်္ဂလာတို့သည် နောက်မှဖြစ်လာခဲ့၏ (ဩနှင့် ပဋိ ၁၁၀၊ ၁၂၈း၁၈၊ ၂၁ တွင် ကြည့်ပါ)။ ဤဘိသိက်မင်္ဂလာတို့သည်၊ အမှန်အားဖြင့်၊ မြေကြီးပေါ်ရှိ လူသားထံသို့ မြင့်မြတ်သော အခွင့်အာဏာကို ပြန်လည်ဆောင်ယူခြင်း ဖြစ်၏။ ၁၈၃၀ ခု၊ ဧပြီ ၆ တွင်၊ ကောင်းကင်ဘုံရှင် လမ်းညွှန်မှု အောက်၌၊ ပရောဖက်ဂျိုးဇက်စမစ်သည် အသင်းတော်ကို ဖွဲ့စည်းခဲ့၏၊ ထိုကဲ့သို့အားဖြင့်၊ ယေရှုခရစ်တော်၏ မှန်သောအသင်းတော်သည် ဧဝံဂေလိတရားတော်ကို သွန်သင်ရန်နှင့် ကယ်တင်ခြင်းဘိသိက်မင်္ဂလာတို့ကို စီမံဆောင်ရွက်ရန် အခွင့်အာဏာနှင့်အတူ လူသားတို့၌ အဖွဲ့အစည်းတစ်ခုအဖြစ် တစ်ဖန်ပြန်၍ ဆောင်ရွက်၏။ (ဩနှင့် ပဋိ ၂၀ နှင့် မြတ်ပုလဲကျမ်း၊ ဂျိုးဇက်စမစ်—သမိုင်း ၁ တွင် ကြည့်ပါ)

ဤသန့်ရှင်းမွန်မြတ်သော ဗျာဒိတ်တော်များကို လိုအပ်သော အချိန်များ၌ ဆုတောင်းခြင်း၏ အဖြေအဖြစ် လက်ခံရရှိခဲ့၏၊ တကယ့်လူများ ပါဝင်သည့် တကယ့်ဘဝ အခြေအနေတို့မှ ထွက်ပေါ် လာခြင်းလည်း ဖြစ်၏။ ပရောဖက်နှင့် သူ၏ အပေါင်းအဖော်တို့သည် မြင့်မြတ်သောလမ်းညွှန်မှုကို ရှာခဲ့ကြပြီး၊ သူတို့ လက်ခံရရှိခဲ့ကြောင်းကို ဤဗျာဒိတ်တော်များက သက်သေပြု၏။ ဤဗျာဒိတ်တော်များ၌၊ ယေရှုခရစ်တော်၏ ဧဝံဂေလိတရားတော်ကို ပြန်လည်ဆောင်ယူခြင်းနှင့် ဖွင့်ပြခြင်း၊ ထို့အတူ အချိန်ကာလပြည့်စုံခြင်းသာသနာသို့ ဝင်ရောက်ခြင်းတို့ကို တစ်စုံတစ်ဦးမြင်ရ၏။ နယူးယောက်နှင့် ပန်ဆယ်လ်ဗေးနီးယားမှ အိုဟိုင်းရိုသို့၊ မစ်ဆိုရီသို့၊ အီလီနွိုက်သို့၊ ထို့အတူ နောက်ဆုံး၌ အမေရိကန်အနောက်ပိုင်း၏ ဇလုံကြီးသို့ အသင်းတော်၏ အနောက်ဘက်သို့ ရွေ့လျားမှုနှင့် ယခုခေတ် ကာလ၌ မြေကြီးပေါ်တွင် ဇိအုန်ကို တည်ဆောက်ရန် ကြိုးစားအားထုတ်ခြင်း၌ သန့်ရှင်းသူတို့၏ ကြီးစွာသော ရုန်းကန်မှုများကိုလည်း ဤဗျာဒိတ်တော်များ၌ ပြထား၏။

မော်မုန်ကျမ်းကို ဘာသာပြန်ခြင်းနှင့် ပုံနှိပ်ထုတ်ဝေခြင်းတို့နှင့် စပ်လျဉ်းသည့် အမှုများ အစောပိုင်း အပိုဒ်ငယ်များစွာတို့တွင် ပါဝင်၏ (အပိုဒ်ငယ် ၃၊ ၅၊ ၁၀၊ ၁၇ နှင့် ၁၉ တွင်ကြည့်ပါ)။ နောက်ပိုင်း အပိုဒ်ငယ်အချို့သည် သမ္မာကျမ်း၏ လမ်းပြလှုံ့ဆော်သော ဘာသာပြန်ခြင်းကို ပြုလုပ်ရာ၌ ပရောဖက်ဂျိုးဇက်စမစ်၏ အလုပ်ကို ဖော်ပြ၏၊ ထိုအချိန်အတွင်း၌ ကြီးစွာသော ဩဝါဒဆိုင်ရာ အပိုဒ်ငယ်များကို လက်ခံရရှိခဲ့၏ ( ဥပမာအဖြစ်၊ အပိုဒ်ငယ် ၃၇၊ ၄၅၊ ၇၃၊ ၇၆၊ ၇၇၊ ၈၆၊ ၉၁ နှင့် ၁၃၂ တို့ကို ကြည့်ပါ၊ ၎င်းတို့မှ တစ်ခုချင်းစီသည် သမ္မာကျမ်းဘာသာပြန်ခြင်းနှင့် တိုက်ရိုက်ဆက်သွယ်မှု အချို့ရှိ၏)။

ဗျာဒိတ်တော်များ၌၊ ဧဝံဂေလိတရားတော်၏ ဩဝါဒများကို ဘုရားသခင်၏ ဇာတိသဘော၊ လူသား၏ မူရင်းဇစ်မြစ်၊ စာတန်၏ အဖြစ်မှန်၊ သေခြင်းရှိရာဘဝ၏ရည်ရွယ်ချက်၊ နာခံခြင်း အတွက် မရှိမဖြစ် လိုအပ်ခြင်း၊ နောင်တရခြင်းအတွက် လိုအပ်ခြင်း၊ သန့်ရှင်းသောဝိညာဉ်တော်၏ အမှုတော်များ၊ ကယ်တင်ခြင်းနှင့် စပ်ဆိုင်သည့် ဘိသိက်မင်္ဂလာများနှင့် စီရင်ခြင်းများ၊ မြေကြီး၏ ကံကြမ္မာ၊ ရှင်ပြန်ထမြောက်ခြင်းနှင့် တရားစီရင်ခြင်း၏ နောက်၌ရှိသော လူသား၏ အနာဂတ်အခြေအနေများ၊ အိမ်ထောင်ဖက် ပြုခြင်း ဆက်ဆံရေး၏ ထာဝရဖြစ်ခြင်းနှင့် မိသားစု၏ ထာဝရသဘော ကဲ့သို့သော အခြေခံ အကြောင်းအရာတို့ အကြောင်း ရှင်းပြချက်များနှင့်အတူ ဖော်ပြထား၏။ ထိုနည်းတူပင်၊ အသင်းတော်၏ စီမံဆောင်ရွက်ခြင်း အဖွဲ့အစည်း အကြောင်း တဖြည်းဖြည်း ဖွင့်ပြခြင်းကိုလည်း၊ သင်းအုပ်များ၊ ပထမဥက္ကဋ္ဌအဖွဲ့၊ တစ်ဆယ့်နှစ်ပါးအတိုင်ပင်ခံအဖွဲ့၊ ထို့အတူ ခုနစ်ကျိပ်အဖွဲ့တို့ကို ခေါ်သွင်းခြင်း၊ အခြားဦးစီး အမှုအရာများနှင့် အဖွဲ့များ၏တည်ထောင်ခြင်းတို့နှင့်အတူ ဖော်ပြထား၏။ နောက်ဆုံး၌၊ ယေရှုခရစ်တော်အကြောင်း—သူ၏အထွတ်အမြတ်ဖြစ်ခြင်း၊ သူ၏အာနုဘော်၊ သူ၏စုံလင်ခြင်း၊ သူ၏ချစ်ခြင်းနှင့် သူ၏ရွေးနုတ်တော်မူခြင်းတန်ခိုးတော်—အကြောင်းဖော်ပြသည့် သက်သေခံချက်သည် ဤကျမ်းကို လူသားမိသားစုအတွက် ကြီးစွာသော တန်ဖိုးကို ဖြစ်စေပြီး၊ “အသင်းတော်အတွက် မြေကြီးတစ်ခုလုံး၏ စည်းစိမ်ဥစ္စာများနှင့် ထိုက်တန်”စေ၏ (ဩနှင့် ပဋိ ၇၀ ၏ ခေါင်းစဉ်တွင် ကြည့်ပါ)။

ဤဗျာဒိတ်တော်များကို မူရင်းအားဖြင့် ဂျိုးဇက်စမစ်၏ စာရေးသူအားဖြင့် မှတ်တမ်းတင်ခဲ့ပြီး၊ အသင်းတော် အသင်းသားတို့သည် လက်ရေးဖြင့် ရေးကူးထားသော စာများကို တစ်ယောက်နှင့် တစ်ယောက် စိတ်အားထက်သန်စွာ မျှဝေခဲ့ကြ၏။ ပို၍တည်မြဲသော မှတ်တမ်းတစ်ခုကို ပြုလုပ်ရန်၊ စာရေးသူတို့သည် မကြာမြင့်မီတွင်၊ ဤဗျာဒိတ်တော်များကို ပုံနှိပ်စာမူမှတ်တမ်း ကျမ်းများအဖြစ်သို့ ရေးကူး ခဲ့ကြ၏၊ ၎င်းတို့ကို အသင်းတော်ခေါင်းဆောင်တို့က ပုံနှိပ်မည့် ဗျာဒိတ်တော်များကို ပြင်ဆင်ရာ၌ အသုံးပြု ခဲ့ကြ၏။ ဂျိုးဇက်နှင့် အစောပိုင်းသန့်ရှင်းသူတို့သည် ဗျာဒိတ်တော်များကို၊ အသင်းတော်နည်းသူ ရှင်သန်စေ၊ အားကောင်းစေ၊ ထို့အတူ နောက်ထပ်ဗျာဒိတ်တော်ဖြင့် သန့်စင်စေရန် မှတ်ယူခဲ့ကြ၏။ သူတို့သည် ဗျာဒိတ်တော်များကို ရေးကူးခြင်းနှင့် ပုံနှိပ် ထုတ်ဝေခြင်း အတွက် ပြင်ဆင်ရာ လုပ်ငန်းစဉ်တစ်လျှောက်၌ မရည်ရွယ်သော မှာယွင်းမှုများ ဖြစ်ပွားကောင်းဖြစ်ပွားနိုင်ခဲ့သည်ကိုလည်း အသိအမှတ်ပြုခဲ့ကြ၏။ ထို့ကြောင့်၊ အသင်းတော်ညီလာခံတစ်ခုက ဂျိုးဇက်စမစ်အား “သန့်ရှင်းသောဝိညာဉ်တော်အားဖြင့် သူတွေ့နိုင်သော ထိုမှားယွင်းမှုများ သို့မဟုတ် အမှားအယွင်းများကို ပြင်ဆင်”ရန် ၁၈၃၁ ၌ တောင်းဆိုခဲ့ကြ၏။

ဗျာဒိတ်တော်များကို ပြန်လည်စစ်ဆေး၍ ပြင်ဆင်ပြီးနောက်တွင်၊ မစ်ဆိုရီရှိ အသင်းတော် အသင်းသားတို့သည် A Book of Commandments for the Government of the Church of Christဟု (ခရစ်တော်၏အသင်းတော်ကို အုပ်ချုပ်ခြင်းအတွက် ပညတ်တော်များကျမ်း) ခေါင်းစည်းတပ်ထားသော ကျမ်းတစ်ကျမ်း ပုံနှိပ်ခြင်းကိုအစပြုခဲ့ကြ၏၊ ထိုကျမ်းတွင် ပရောဖက်၏အစောပိုင်းဗျာဒိတ်တော်များမှ များစွာတို့ ပါဝင်၏။ သို့သော်လည်း၊ ၁၈၃၃ ခုနှစ်၊ ဇူလိုင်လ ၂၀ ရက်၊ ဂျက်ဆင်ခရိုင်၌၊ သန့်ရှင်းသူတို့၏ ပုံနှိပ်ရုံး လူဆိုးတစ်စုအားဖြင့် ဖျက်ဆီးခံရသောအခါ၊ ဗျာဒိတ်တော်များကို ပုံနှိပ်ထုတ်ဝေရန် ပထမအကြိမ် ကြိုးစားအားထုတ်ခြင်းမှာ အဆုံးသတ်ခဲ့ရ၏။

မစ်ဆိုရီပုံနှိပ်ရုံး ဖျက်ဆီးခံရခြင်းကို ကြားရပြီးနောက်၊ ဂျိုးဇက်စမစ်နှင့် အခြားအသင်းတော် ခေါင်းဆောင်တို့သည် ဗျာဒိတ်တော်များကို ကာ့တ်လန်း၊ အိုဟိုင်းရို၌ ပုံနှိပ်ထုတ်ဝေရန် ပြင်ဆင်ခြင်းများကို အစပြုခဲ့ကြ၏။ မှားယွင်းမှုများကို တစ်ဖန် ပြင်ဆင်ရန်၊ စကားလုံးအသုံးအနှုန်းကို ရှင်းလင်းစေရန်၊ အသင်းတော်ဩဝါဒနှင့် အဖွဲ့အစည်း ဖွံ့ဖြိုးမှုများကို အသိအမှတ်ပြုရန်၊ ဂျိုးဇက်စမစ်သည် ဗျာဒိတ်တော်အချို့၏ စာသားများကို ၁၈၃၅ ခု၌ Doctrine and Covenants of the Church of the Latter Day Saintsအဖြစ် (နောက်ပိုင်းကာလသန့်ရှင်းသူများ အသင်းတော်၏ ဩဝါဒနှင့် ပဋိညာဉ်များ) ပုံနှိပ်ထုတ်ဝေခြင်းအတွက် ပြင်ဆင်ရန် တည်းဖြတ်ခြင်းကို ကြီးကြပ်ခဲ့၏။ ဂျိုးဇက်စမစ်သည် ဩဝါဒနှင့်ပဋိညာဉ်များ၏ တခြားမူကို တရားဝင်ခွင့်ပြုခဲ့၏၊ ထိုတည်းဖြတ်မှုကို ၁၈၄၄ ခု၌ ပရောဖက်၏ အသက် စတေး ခံရပြီးနောက် လအတန်ကြာပြီးမှသာ ပုံနှိပ်ထုတ်ဝေခဲ့၏။

အစောပိုင်းမှ နောက်ပိုင်းကာလသန့်ရှင်းသူတို့သည် ဗျာဒိတ်တော်များကို အထူး တန်ဖိုးထားခဲ့ကြပြီး၊ ဘုရားသခင်ထံမှ အမှာစကားများအဖြစ် ကြည့်ရှုခဲ့ကြ၏။ ၁၈၃၁ ခုနှစ် နောက်ပိုင်း အချိန်တစ်ခု၌၊ အသင်းတော်၏ အသင်းလူကြီးများစွာတို့သည် ဗျာဒိတ်တော်များ၏ အမှန်တရားကို သူတို့၏ စိတ်ဝိညာဉ်များသို့ ကိုယ်တော်ရှင်သက်သေခံတော်မူခဲ့ကြောင်း လေးနက်သော သက်သေခံချက်ကို ပေးခဲ့ကြ၏။ ဤသက်သေခံချက်ကို ဩဝါဒနှင့်ပဋိညာဉ်များ ၁၈၃၅ ခုနှစ်မူ၌ တမန်တော် တစ်ဆယ့်နှစ်ပါး၏ ရေးထားသော သက်သေခံချက် အဖြစ် ပုံနှိပ်ထုတ်ဝေခဲ့၏။

ဩဝါဒနှင့် ပဋိညာဉ်များကျမ်း၏
အမှန်တရားနှင့်စပ်လျဉ်း၍ တမန်တော်တစ်ဆယ့်နှစ်ပါး၏
သက်သေခံချက်

ကိုယ်တော်ရှင်၏ပညတ်တော်များကျမ်းအတွက် သက်သေတို့၏ သက်သေခံချက်၊ ထိုပညတ်တော်များကို ဤသို့ ရရှိခြင်းရည်ရွယ်ချက်အတွက် အသင်းတော်၏ မဲဆန္ဒအားဖြင့် ခန့်အပ်ထားခံရသူ ဂျိုးဇက်စမစ်အငယ်အားဖြင့် သူ၏အသင်းတော်သို့ ပေးတော်မူခဲ့၏။

ထို့ကြောင့်၊ ကျွန်ုပ်တို့သည် လူသားတို့၏ လောကတစ်ခုလုံးသို့၊ မြေကြီး မျက်နှာပြင် ပေါ်ရှိ လူသတ္တဝါတိုင်းသို့ သက်သေခံရန် လိုလိုလားလားရှိကြောင်း ခံစားရသည်မှာ၊ ဤပညတ်တော်များ သည်ကား၊ ဘုရားသခင်၏ လမ်းပြလှုံ့ဆော်ခြင်းဖြင့် ပေးထားကြောင်း၊ ထို့အတူ ခပ်သိမ်းသော လူသားတို့ အတွက် အကျိုးရှိကြောင်း၊ ထို့အတူ အမှန်ပင် မှန်ကန်ကြောင်း ကျွန်ုပ်တို့ အပေါ် သွန်းလောင်းသည့် သန့်ရှင်းသော ဝိညာဉ်တော်အားဖြင့်၊ ကျွန်ုပ်တို့၏ စိတ်ဝိညာဉ်များသို့ ကိုယ်တော်ရှင် သက်သေခံတော်မူခဲ့ကြောင်း ပေတည်း။

ကျွန်ုပ်တို့သည် ကိုယ်တော်ရှင်ကို ကျွန်ုပ်တို့၏ ကူညီသူအဖြစ် ဤသက်သေခံချက်ကို လောကသို့ ဖော်ပြကြပါ၏။ ခမည်းတော်ဘုရားသခင်နှင့် သူ၏သားတော်၊ ယေရှုခရစ်တော်တို့၏ ကျေးဇူးတော် အားဖြင့်၊ ကျွန်ုပ်တို့သည် လောကသို့ ဤသက်သေခံခြင်း အတွက် ဤအထူး အခွင့်အရေးကို ရရှိရန် အခွင့်ပေး ခံရကြပါ၏၊ ထိုအခွင့်အရေး၌ ကျွန်ုတို့လွန်စွာရွှင်လန်းဝမ်းမြောက်ကြပြီး၊ ထိုကဲ့သို့အားဖြင့် လူသားတို့ အကျိုးရှိနိုင်ကြစေကြောင်း ကိုယ်တော်ရှင်ထံသို့ အမြဲဆုတောင်းကြပါ၏။

တစ်ဆယ့်နှစ်ပါးတို့၏ အမည်များသည်ကား

သောမတ်စ်ဘီမာ့ရှ်
ဒေးဗစ်ဒဗလျူပေတန်
ဘရင်ဂ်ဟမ်ရန်း
ဟက်ဘာစီကင်းဘောလ်
အော်ဆန်ဟိုက်
ဝီလျံအီးမက်လီလင်
ပါလီပီပရတ်
လုအက်စ်ဂျွန်ဆင်
ဝီလျံစမစ်
အော်ဆန်ပရတ်
ဂျွန်အက်ဖ်ဘွိုင်တန်
လိုင်မန်အီးဂျွန်ဆင်

ဩဝါဒနှင့် ပဋိညာဉ်များ၏ နောက်ပိုင်းမူများတွင်၊ နောက်ထပ်ဗျာဒိတ်တော်များ သို့မဟုတ် မှတ်တမ်းတင်စရာ အခြားအကြောင်းအရာတို့ကို အသင်းတော်၏ ကျွမ်းကျင်သူ အစုအဝေးများ သို့မဟုတ် ညီလာခံများ ရရှိပြီး လက်ခံခဲ့သည့်အတိုင်း ပေါင်းထည့်ခဲ့၏။ ၁၈၇၆ ခုနှစ်မူကို၊ ဘရင်ဂ်ဟမ်ရန်း၏ လမ်းညွှန်မှုအောက်၌ အသင်းလူကြီး အော်ဆန်ပရတ်က ပြင်ဆင်ခဲ့ပြီး၊ ဗျာဒိတ်တော်များကို ကာလအလိုက် အစီအစဉ်အတိုင်း စီစဉ်၍၊ သမိုင်းဆိုင်ရာ နိဒါန်း ခေါင်းစဉ် အသစ်များဖြင့် ဖြည့်စွက်ခဲ့၏။

၁၈၃၅ ခုနှစ် မူမှစ၍၊ ဘာသာရေးသင်ခန်းစာ ခုနစ်တွဲကိုလည်း ထည့်သွင်းခဲ့၏။ ဤအရာတို့ကို Lectures on Faith (ယုံကြည်ခြင်းအကြောင်းပို့ချချက်များ) ဟု ခေါင်းစည်းတပ်ခဲ့၏။ ဤအရာတို့ကို ၁၈၃၄ ခုနှစ်မှ ၁၈၃၅ ခုနှစ်အထိ ကာ့တ်လန်း၊ အိုဟိုင်းရိုရှိ ပရောဖက်တို့၏ကျောင်း၌ အသုံးပြုခြင်းအတွက် ပြင်ဆင်ခဲ့၏။ ဩဝါဒနှင့် သွန်သင်ချက်အတွက် အကျိုးရှိနိုင်သော်လည်း၊ ဤပို့ချချက်များမှာ အသင်းတော် တစ်ခုလုံးအတွက် ဗျာဒိတ်တော်များအဖြစ် ပေးမထား သို့မဟုတ် ဖော်ပြ မထား သောကြောင့် ဩဝါဒနှင့် ပဋိညာဉ်များ၌ ၁၉၂၁ မူမှစ၍ ချန်လှပ် ထားခဲ့၏။

၁၉၈၁ ခုနှစ် ဩဝါဒနှင့် ပဋိညာဉ်များ အင်္ဂလိပ်မူ၌၊ မှတ်တမ်းမှတ်ရာသုံးခုကို ပထမအကြိမ်အဖြစ် ထည့်သွင်းခဲ့၏။ ဤအရာတို့သည်ကား၊ သေသူတို့၏ ကယ်တင်ခြင်းအတွက် အခြေခံ သဘောတရားများကို ဖော်ပြထားသည့် အပိုဒ်ငယ် ၁၃၇ နှင့် ၁၃၈၊ ထို့အတူ အသင်းတော်၌ ခပ်သိမ်းသော ထိုက်တန်သူ အမျိုးသား အသင်းသားတို့သည် မျိုးနွယ်နှင့် အသားအရောင်အပေါ် စဉ်းစားစရာ မလိုဘဲ ယဇ်ပုရောဟိတ်အခွင့်သို့ ခန့်ထားခံရနိုင်ကြောင်း ကြေညာသည့် တရားဝင် ကြေညာချက် ၂ တို့ဖြစ်၏။

ဩဝါဒနှင့်ပဋိညာဉ်များ၏ မူသစ်တစ်ခုစီ၌ လွန်ခဲ့သော အမှားအယွင်းများကို ပြင်ဆင်၍၊အထူး သဖြင့် အပိုဒ်ငယ်ခေါင်းစဉ််များ၏ သမိုင်းဆိုင်ရာအပိုင်းတို့၌ အချက်အလက် အသစ်ကို ပေါင်းထည့် ခဲ့၏။ လက်ရှိမူ၌ ရက်စွဲများနှင့် နေရာအမည်များကို ထပ်၍စစ်ပြီး၊ အခြား ပြင်ဆင်ချက်များကို ပြုလုပ်၏။ အကြောင်းအရာကို အတိကျဆုံး သမိုင်းအချက်အလက်နှင့် ကိုက်ညီစေရန် ဤပြောင်းလဲမှုများကို ပြုထားပေ၏။ ဤနောက်ဆုံးမူ၏ အခြား ထူးခြားသော အင်္ဂါရပ်များ၌ ဗျာဒိတ်တော်များကို လက်ခံရရှိခဲ့သည့် အဓိကပထဝီဝင်နေရာများကို ဖော်ပြသည့် စိစစ်ထားသော မြေပုံများနှင့်အတူ အသင်းတော်သမိုင်းဆိုင်ရာ နေရာတို့၏ မွမ်းမံထားသော ဓာတ်ပုံများ၊ အပြန်အလှန် အညွှန်းများ၊ အပိုဒ်ငယ်ခေါင်းစဉ်များ၊ ထို့အတူ အကြောင်းအရာ အကျဉ်းချုပ်များ ပါဝင်၏၊ ထိုခပ်သိမ်းသော အရာတို့မှာ စာဖတ်သူတို့အား ဩဝါဒနှင့် ပဋိညာဉ်များ၌ ပေးထားသည့် ကိုယ်တော်ရှင်၏ အမှာစကား၌ နားလည်ကြစေရန်နှင့် ရွှင်လန်း ဝမ်းမြောက်ကြ စေရန် ကူညီခြင်းငှာ စီစဉ်ထားခြင်း ဖြစ်၏။ အပိုဒ်ငယ်ခေါင်းစဉ်များ အတွက် အချက် အလက်များကို အသင်းတော်၏ သမိုင်းပုံနှိပ်စာမူ၊ ပုံနှိပ်ထုတ်ဝေထားသော History of the Church (အသင်းတော်၏သမိုင်း) (ဂျိုးဇက်စမစ်၏ သမိုင်းမှာကဲ့သို့ ခေါင်းစဉ်များ၌ စုပေါင်း၍ ရည်ညွှန်းထား၏)နှင့် Joseph Smith Papersမှ (ဂျိုးဇက်စမစ်၏စာရွက်များ) ကောက်နုတ်ထား၏။