ဩဝါဒနှင့် ပဋိညာဉ်များ ၁၄

အပိုဒ်ငယ် ၁၄

၁၈၂၉ ခု၊ ဇွန်လ၊ ဖရေးတီး၊ နယူးယောက်၌ ပရောဖက်ဂျိုးဇက်စမစ်အားဖြင့်၊ ဒေးဗစ်ဝှစ်တမာသို့ ပေးတော်မူခဲ့သည့် ဗျာဒိတ်တော်။ ဝှစ်တမာမိသားစုသည် မော်မုန်ကျမ်းဘာသာပြန်ခြင်းကို ကြီးစွာစိတ်ဝင်စားလာခဲ့လေ၏။ ပရောဖက်သည် ဘာသာပြန်ခြင်းအမှု ပြီးစီးဖို့ဆောင်ရွက်ပြီး၊ ထွက်လာမည့်ကျမ်း၏ စာမူ မူပိုင်ခွင့် ရရှိလေသည်အထိ သူနေထိုင်ရာ ပီတာဝှစ်တမာအငယ်၏အိမ်တွင်၊ သူ၏နေအိမ်အဖြစ်ပြု၍နေခဲ့၏။ ဝှစ်တမာသားသုံးဦးသည် အမှုတော်၏အစစ်အမှန်ဖြစ်ခြင်းနှင့်စပ်လျဉ်း၍၊ အယောက်တိုင်း သက်သေခံချက်ရရှိလျက်၊ သူတို့တစ်ဦးချင်းစီ၏တာဝန် အကြောင်းကိစ္စအပေါ် လေးနက်စွာအလေးထားလာခဲ့ကြ၏။ ဥရိမ်နှင့် သုမိမ်တို့အားဖြင့် မေးလျှောက်ခြင်း၏အဖြေအဖြစ် ဤဗျာဒိတ်တော်နှင့် နောက်ပါ (အပိုဒ်ငယ် ၁၅ နှင့် ၁၆) တို့ကို ပေးတော်မူခဲ့လေ၏။ ဒေးဗစ်ဝှစ်တမာသည် နောက်ပိုင်းတွင် မော်မုန်ကျမ်းအကြောင်း သက်သေသုံးဦးထဲမှ တစ်ဦးဖြစ်လာခဲ့၏။

၁–၆၊ စပျစ်ဥယျာဉ်၌ အလုပ်လုပ်ကြသောသူတို့သည် ကယ်တင်ခြင်းကို ရရှိကြလိမ့်မည်။ ၇–၈၊ ဘုရားသခင်၏ဆုကျေးဇူးများထဲတွင် ထာဝရအသက်သည် အကြီးမြတ်ဆုံးဖြစ်၏။ ၉–၁၁၊ ခရစ်တော်သည် ကောင်းကင်နှင့် မြေကြီးကို ဖန်ဆင်းတော်မူ၏။

၁ ကြီးမြတ်ပြီး၊ အံ့ဩဖွယ်ကောင်းသောအမှုသည် လူသားများသို့ ရောက်လာလုနီးပေပြီ။

၂ ရှုလော့၊ ငါသည် ဘုရားသခင်ဖြစ်၏။ ရှင်သန်၍ တန်ခိုးကြီးသော၊ အရိုးအဆစ်နှင့် ခြင်ဆီနှစ်ခုစလုံးကို အစိတ်စိတ်ကွဲစေသည့် နှစ်ဖက်သွားဓားထက် သာ၍ထက်သော ငါ၏နှုတ်ကပတ်တော်ကို ပမာဏပြုလော့။ ထို့ကြောင့် ငါ၏နှုတ်ကပတ်တော်ကို ပမာဏပြုလော့။

၃ ရှုလော့၊ လယ်ကွင်းသည် ရိတ်သိမ်းဖို့ အဆင်သင့်ဝင်းလျက်ရှိနှင့်လေပြီ။ ထိုကြောင့်၊ ရိတ်သိမ်းလိုသူမှန်သမျှအား၊ မိမိတံစဉ်ကို မိမိအစွမ်းသတ္တိဖြင့်၊ ရမ်းစေပြီး၊ အချိန်ရှိစဉ် ရိတ်စေလော့။ သူ၏စိတ်ဝိညာဉ်အတွက်၊ ဘုရားသခင်၏နိုင်ငံတော်၌ ထာဝရတည်မြဲသောကယ်တင်ခြင်းကို ထိုသူအမြတ်တနိုးသိမ်းဆည်းထားနိုင်စေကြောင်းပင်တည်း။

၄ ထိုမှတစ်ပါး၊ မိမိတံစဉ်ကို ရမ်း၍ ရိတ်မည့်သူမှန်သမျှသည် ဘုရားသခင်၏ ခေါ်သွင်းတော်မူခြင်းကို ခံရ၏။

၅ ထို့ကြောင့်၊ သင်သည် ငါ့ထံမှ တောင်းလျှင်၊ ရလိမ့်မည်။ သင်ခေါက်လျှင် သင့်အဖို့ ဖွင့်ပေးလိမ့်မည်။

၆ ငါ၏ဇိအုန်ကိုထူထောင်ပြီး၊ တည်ဆောက်ဖို့ ကြိုးစားလော့။ ခပ်သိမ်းသောအရာတို့၌ ငါ၏ပညတ်တော်များကို စောင့်ထိန်းလော့။

၇ သင်သည် ငါ၏ပညတ်တော်များကို စောင့်ထိန်းပြီး အဆုံးတိုင်အောင်တည်ကြည်လျှင်၊ ဘုရားသခင်၏ဆုကျေးဇူးအပေါင်းတို့အထဲတွင် အကြီးမြတ်ဆုံးဆုကျေးဇူးဖြစ်သည့် ထာဝရအသက်ကို ရရှိလိမ့်မည်။

၈ ဤသို့အားဖြင့် အချိန်တန်လာလတ္တံ့သောအခါ၊ သင်သည် သန့်ရှင်းသောဝိညာဉ်တော်ကို ရရှိလိမ့်မည်ဟု ယုံကြည်လျက်၊ ငါ၏နာမတော်အားဖြင့် ခမည်းတော်ထံသို့ ယုံကြည်ခြင်းဖြင့်၊ တောင်းလျှင်၊ သင် ကြားရ၊ မြင်ရမည့်အရာများနှင့်စပ်လျဉ်း၍ သက်သေတစ်ဦးအဖြစ် ရှိနိုင်စေကြောင်း၊ ထို့အတူ၊ ဤမျိုးဆက်သို့ နောင်တရခြင်းကို ဟောကြားနိုင်စေကြောင်း၊ ဟောပြောခြင်းအခွင့်ကို ထိုဝိညာဉ်ကပေး၏။

၉ ရှုလော့၊ ငါသည် ယေရှုခရစ်တော်၊ အသက်ရှင်တော်မူသည့်ဘုရားသခင်၏ သားတော်ဖြစ်၏။ ကောင်းကင်းနှင့် မြေကြီးကို ဖန်ဆင်းတော်မူသောသူဖြစ်ပြီး၊ မှောင်မိုက်၌ ကွယ်မထားနိုင်သည့် အလင်းဖြစ်၏။

၁၀ သို့ဖြစ်၍၊ ငါသည် ငါ၏ဧဝံဂေလိတရားတော်အပြည့်အစုံကို တပါးအမျိုးသားတို့ထံမှ ဣသရေလအမျိုးသားတို့ထံ ဆောင်ယူရမည်။

၁၁ ရှုဦးလော့၊ သင်သည် ဒေးဗစ်ဖြစ်၏၊ ကူညီဖို့ ခေါ်သွင်းခံရ၏။ သင်သည် ထိုအမှုကိုပြုလျက် သစ္စာရှိလျှင်၊ ဝိညာဉ်ပကတိနှင့် ဇာတိပကတိနှစ်ခုစလုံး၌ ကောင်းချီးခံစားရလိမ့်မည်။ သင်၏အကျိုးကျေးဇူးသည်လည်း ကြီးလိမ့်မည်။ အာမင်။