ဩဝါဒနှင့် ပဋိညာဉ်များ ၆၂

အပိုဒ်ငယ် ၆၂

၁၈၃၁ ခု၊ ဩဂုတ်လ ၁၃ ရက်၊ မစ်ဆိုရီမြစ်ကမ်း၊ ချာရီတန်၊ မစ်ဆိုရီ၌ ပရောဖက်ဂျိုးဇက်စမစ်အားဖြင့်၊ ပေးတော်မူခဲ့သည့် ဗျာဒိတ်တော်။ ဤနေ့တွင်၊ အင်ဒီပန်းဒင့်မှ ကာ့တ်လန်းသို့ သွားနေကြသည့် ပရောဖက်နှင့် သူ့အဖွဲ့သည် ဇိအုန်မြေသို့သွားနေကြသည့် အသင်းလူကြီးအသီးသီးကို တွေ့ခဲ့ကြ၏၊ ထို့အတူ၊ ဝမ်းမြောက်ဖွယ်နှုတ်ဆက်ခြင်းများပြီးလေပြီးနောက်၊ ဤဗျာဒိတ်တော်ကို လက်ခံရရှိခဲ့၏။

၁–၃၊ သက်သေခံချက်များကို ကောင်းကင်ဘုံ၌ မှတ်တမ်းတင်ထား၏။ ၄–၉၊ အသင်းလူကြီးတို့သည် ဝေဖန်ပိုင်းခြားနိုင်စွမ်းအတိုင်းနှင့် ဝိညာဉ်တော်အားဖြင့် လမ်းညွှန်သည့်အတိုင်း ခရီးသွား၍ ဟောပြောရမည်။

၁ ရှုလော့၊ ထို့အတူ စေ့စေ့နားထောင်ကြလော့၊ အို ငါ့အသင်းတော်မှ အသင် အသင်းလူကြီးတို့၊ လူသား၏အားနည်းချက်ကိုလည်းကောင်း၊ သွေးဆောင်ဖြားယောင်းခံရသောသူတို့အား အဘယ်သို့မစရမည်ကိုလည်းကောင်း သိတော်မူသည့်သူတည်း ဟူသော သင်တို့၏လျှောက်လဲသူ၊ ယေရှုခရစ်တော်ပင်ဖြစ်သည့် သင်တို့၏ဘုရားသခင်ကိုယ်တော်ရှင်မိန့်တော်မူ၏။

၂ ဇိအုန်မြေသို့ တက်မသွားလေသေးသည့်သူတို့ကို ငါကြည့်ရှုနေတော်မူ၏။ သို့ဖြစ်၍၊ သင်တို့၏သာသနာပြုခြင်းသည် မပြီးပြည့်စုံသေး။

၃ သို့သော်လည်း၊ သင်တို့သည် ကောင်းချီးခံစားရ၏၊ ကောင်းကင်တမန်များ ကြည့်ရှုရန်အတွက်၊ သင်တို့ခံလေသည့် သက်သေခံချက်ကို ကောင်းကင်ဘုံ၌ မှတ်တမ်းတင်ထား၏။ သင်တို့နှင့်စပ်လျဉ်း၍၊ သူတို့သည်လည်း ရွှင်လန်းဝမ်းမြောက်ကြ၏၊ သင်တို့၏အပြစ်များကိုလည်း ခွင့်လွှတ်၏။

၄ ယခုမူကား၊ သင်တို့၏ခရီးကို ဆက်ကြလော့။ ဇိအုန်မြေပေါ်၌ သင်တို့ကိုယ်သင်တို့ စည်းဝေးကြလော့။ အစည်းအဝေးတစ်ခုကျင်းပပြီး အတူတကွရွှင်လန်းဝမ်းမြောက်ကြလော့၊ အမြင့်ဆုံးသောဘုရားအား ပွဲတော်ကို ပူဇော်ကြလော့။

၅ ထို့နောက်တွင်၊ သင်တို့သည် သက်သေခံဖို့၊ အထူးသဖြင့်၊ အတူတကွပင်ဖြစ်စေ၊ နှစ်ဦးချင်းစီဖြစ်စေ၊ သင်တို့ကောင်းမြတ်သည်ဟု မှတ်ယူသည့်အတိုင်း ပြန်လာနိုင်ကြပေ၏၊ ငါ့အဖို့အရေးမကြီး။ သစ္စာရှိလျက်သာနေကြေလော့၊ မြေကြီးပေါ်မှာ နေထိုင်သူတို့အား သို့မဟုတ်၊ ဆိုးညစ်သောပရိတ်သတ်တို့၌၊ ဝမ်းသာစရာသတင်းကိုလည်း ဟောကြားကြလော့။

၆ ရှုလော့၊ သင်တို့၌ရှိသည့် သစ္စာရှိသောသူများ ကာကွယ်စောင့်မ ခံရပြီး၊ မစ်ဆိုရီမြေ၌ အတူတကွ ရွှင်လန်းဝမ်းမြောက်ကြလိမ့်မည် ဟူသော ကတိတော်ကို ပြီးပြည့်စုံနိုင်စေခြင်းငှာ၊ ငါ၊ ကိုယ်တော်ရှင်သည် သင်တို့ကို အတူတကွ ဆောင်ယူတော်မူလေပြီ။ သစ္စာရှိသောသူများကို ငါ၊ ကိုယ်တော်ရှင်ကတိထားတော်မူ၏၊ မုသားမပြောနိုင်။

၇ ငါ၊ ကိုယ်တော်ရှင်သည် လိုလိုလားလားရှိတော်မူ၏၊ သင်တို့၌ တစ်စုံတစ်ယောက်သောသူသည် မြင်းပေါ်၌ဖြစ်စေ၊ လားပေါ်၌ဖြစ်စေ၊ မြင်းရထားထဲ၌ဖြစ်စေ စီးလို၍၊ ကျေးဇူးတင်တတ်သောစိတ်နှလုံးနှင့် ကိုယ်တော်ရှင်၏လက်တော်ထံမှ၊ လက်ခံရရှိလျှင်၊ ထိုသူသည် ဤကောင်းချီးမင်္ဂလာကို လက်ခံရရှိလိမ့်မည်။

၈ ဝေဖန်ပိုင်းခြားနိုင်စွမ်းနှင့် ဝိညာဉ်တော်၏ လမ်းညွှန်ချက်တို့အတိုင်း ပြုစေဖို့ ဤအရာတို့သည် သင်တို့နှင့်အတူ ဆက်၍ရှိ၏။

၉ ရှုလော့၊ နိုင်ငံတော်သည် သင်တို့အရာဖြစ်၏။ ရှုဦးလော့၊ ကြည့်ဦးလော့၊ ငါသည် သစ္စာရှိသောသူတို့နှင့်အတူ အစဉ်အမြဲရှိတော်မူ၏။ ထိုကဲ့သို့ပင်တည်း။ အာမင်။