ဩဝါဒနှင့် ပဋိညာဉ်များ ၈၁

အပိုဒ်ငယ် ၈၁

၁၈၃၂ ခု၊ မတ် ၁၅၊ ဟိုင်ရမ်၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဖရက်ဒရစ်ခ်ဂျီဝီလျံသည် ယဇ်ပုရောဟိတ်မင်းအဖြစ်နှင့် ယဇ်ပုရောဟိတ်မင်းအခွင့် ဥက္ကဋ္ဌအဖွဲ့ တိုင်ပင်ဖက်အဖြစ် ခေါ်သွင်းခံရ၏။ ၁၈၃၂ ခု၊ မတ်လ၌ ဤဗျာဒိတ်တော်ကို လက်ခံရရှိသောအခါ၊ ဂျက်ဆီဂေါက်ကို ဥက္ကဋ္ဌအဖွဲ့၌ ဂျိုးဇက်စမစ်၏တိုင်ပင်ဖက် အမှုအရာသို့ ခေါ်သွင်းကြောင်း သမိုင်းဆိုင်ရာမှတ်တမ်းများက ဖော်ပြ၏။ သို့သော်လည်း၊ ဤရာထူးနှင့် ကိုက်ညီသည့် ပုံစံအတိုင်း ဆက်၍ထမ်းဆောင်ရန် သူပျက်ကွက်သောအခါ၊ နောက်ပိုင်းတွင်၊ ထိုတာဝန်ကို ဖရက်ဒရစ်ခ်ဂျီဝီလျံသို့ လွှဲပြောင်းပေးခဲ့၏။ (၁၈၃၂ ခု၊ မတ်လ ရက်စွဲဖြင့်ရှိသည့်) ဗျာဒိတ်တော်ကို ပထမဥက္ကဋ္ဌဖွဲ့၏ပုံမှန်အဖွဲ့အစည်းဆီသို့ အဆင့်တစ်ဆင့်အဖြစ်၊ အထူးသဖြင့်၊ ထိုအဖွဲ့၌ တိုင်ပင်ဖက်၏အမှုအရာနှင့် ရာထူးဂုဏ်သိက္ခာအကြောင်း ရှင်းပြခြင်းအဖြစ် မှတ်ယူရမည်။ ညီအစ်ကို ဂေါက်သည် အချိန်အတန်ကြာအစေခံခဲ့သော်လည်း ၁၈၃၂ ခုနှစ်၊ ဒီဇင်ဘာတွင် အသင်းတော်မှ ထုတ်ပစ်ခံခဲ့ရ၏။ ညီအစ်ကို ဝီလျံသည် ၁၈၃၃ ခု၊ မတ် ၁၈ တွင် ထိုအမှုအရာသို့ ခန့်ထားခံခဲ့ရ၏။

၁–၂၊ နိုင်ငံတော်၏သော့များကို ပထမဥက္ကဋ္ဌအဖွဲ့မှ အစဉ်အမြဲကိုင်ဆောင်ထား၏။ ၃–၇၊ ဖရက်ဒရစ်ခ်ဂျီဝီလျံသည် မိမိအမှုတော်ဆောင်ခြင်း၌ သစ္စာရှိလျှင်၊ သူသည် ထာဝရအသက်ကို ရရှိလိမ့်မည်။

၁ သင့်ကို ငါအမှန်၊ အမှန်ဆိုသည်ကား၊ ငါ့ကျွန်ဖရက်ဒရစ်ခ်ဂျီဝီလျံ၊ ဟောပြောသောသူ၏ အသံ၊ သင်၏ဘုရားသခင်ကိုယ်တော်ရှင်၏နှုတ်ကပတ်တော်ကို နားထောင်လော့၊ ငါ၏အသင်းတော်၌ ယဇ်ပုရောဟိတ်မင်းအဖြစ်နှင့်ပင်၊ ထို့အတူ ငါ့ကျွန်ဂျိုးဇက်စမစ်အငယ်အဖို့ တိုင်ပင်ဖက်အဖြစ် သင်ခေါ်သွင်းခံရသည့် ခေါ်သွင်းခြင်းကိုလည်း စေ့စေ့နားထောင်လော့။

၂ ယဇ်ပုရောဟိတ်မင်းအခွင့် ဥက္ကဋ္ဌအဖွဲ့အစဉ်အမြဲပိုင်သည့် နိုင်ငံတော်သော့များကို သူ့အား ငါပေးထားလေပြီ။

၃ ထို့ကြောင့်၊ ငါသည် သူ့ကို အသိအမှတ်ပြုပြီး၊ ကောင်းချီးပေးတော်မူမည်၊ သင်သည် အကြံပေးခြင်း၌၊ သင့်ကို ငါခန့်အပ်လေသည့် အမှုအရာ၌၊ လောကရှေ့၌လည်းကောင်း၊ မထင်ရှားသောအရပ်၌လည်းကောင်း အသံနှင့် သင်၏စိတ်နှလုံးတွင် အစဉ်အမြဲဆုတောင်းခြင်း၌၊ ထို့အတူ အသက်ရှင်သောသူတို့၏နေရာနှင့် သင်၏ညီအစ်ကိုတို့၌ ဧဝံဂေလိတရားတော်ကို ကြေညာရာအမှုတော်ဆောင်ခြင်း၌ သစ္စာရှိသမျှ၊ သင့်ကိုလည်း ကောင်းချီးပေးတော်မူမည်။

၄ ဤအရာတို့ကို ပြုခြင်းအားဖြင့် သင်သည် သင်၏အပေါင်းအဖော်များအဖို့ အကြီးဆုံးကောင်းမြတ်ခြင်းကို ပြုလိမ့်မည်၊ သင်၏ကိုယ်တော်ရှင်ဖြစ်သောသူ၏ ဘုန်းတော်ကိုလည်း ချီးမြှောက်လိမ့်မည်။

၅ သို့ဖြစ်၍၊ သစ္စာရှိလော့၊ သင့်ကို ငါခန့်အပ်ထားလေသည့်အမှုအရာကို ဆောင်ရွက်လော့။ အားနည်းသောသူတို့ကို မစလော့၊ တွဲလွဲနေသောလက်တို့ကို မြှောက်ပေးလော့၊ အားနည်းသောဒူးတို့ကို ခွန်းအားဖြည့်ပေးလော့။

၆ သင်သည် အဆုံးတိုင်အောင် သစ္စာရှိလျှင်၊ သေခြင်းမရှိရာသရဖူကို၊ ထို့အတူ ငါ့အဘ၏အိမ်၌ ငါပြင်ဆင်ထားလေသည့် နေစရာအခန်းများ၌ ထာဝရအသက်ကို ရလိမ့်မည်။

၇ ရှုလော့၊ ကြည့်ဦးလော့၊ ဤအရာတို့သည် အာလဖနှင့် ဩမေဃ၊ ယေရှုခရစ်တော်ပင်ဖြစ်သည့်သူ၏ နှုတ်ကပတ်တော်များပေတည်း။ အာမင်။