1 Tika tikai te tuatua maira te Atu kia koe e taku tavini e Thomas: Kua akarongo au i taau au pure; e kua tae mai taau au apinga aroa ei akamaaraaraanga ki mua iaku, no runga ia ratou, to au taeake, ko tei ikiia kia akakite i to ratou kite papu no toku nei ingoa, e kia ungaia atu ki rotopu i te au iti tangata, ki te au kopu, ki te au reo, e te au tangata, e kia akataongaia na roto i te angaanga a taku au tavini.

2 Tika tikai taku e karanga atu kia koe, te vai ra tetai au mea i roto i toou ngakau, e kare oki au, ko te Atu, i mareka rava i te reira.

3 Kareka ra, mei te mea e kua taakaaka koe ia koe uaorai, ka akateiteiia koe; e no reira, kua akakoreia taau au ara katoatoa.

4 Kia rekareka toou ngakau ki mua i toku mata; e ka akakite koe i te tuatua no toku nei ingoa, kare oki e ki te au Etene ua, mari ra ki te ngati Iuda katoa; e ka tuku atu koe i taku tuatua ki nga ope o te enua.

5 Kia taumaro atu koe i te au popongi ravarai; e te au rā tatakitai kia aere toou reo akamatakite; e kia tae mai te po, auraka te iti tangata o te enua nei kia moe no te tu o taau tuatua.

6 Kia kitea oki toou kainga ki Ziona, e auraka oki toou are e akaateaia; e angaanga maata oki taku, ta te Atu, kia rave koe, i te akakiteanga i toku ingoa ki rotopu i te tamariki a te tangata nei.

7 No reira, e tatua i toou au taukupu no te angaanga. E kia aaoia oki toou nga vaevae ki te tamaka, kua ikiia oki koe, e ka na roto toou aereanga i te au maunga, e ki roto i te au pa enua e manganui.

8 E na roto i taau au tuatua, e manganui te ka riro mai te aronga teitei ei aronga akaaka, e na roto oki i taau tuatua e manganui te aronga akaaka te ka akateiteiia.

9 Ka riro toou reo ei patoi i te aronga aati ture; e i roto i taau patoianga ra, kia akamotu te arero o te aronga akavaavaa i te akakino atu.

10 Kia akaaka koe; e na te Atu toou Atua e arataki ia koe na te rima, e ma te oronga atu i te pauanga ki taau au pure.

11 Kua kite au i toou ngakau, e kua akarongo au i taau au pure no runga i to au taeake. Auraka kia maata mai toou inangaro no ratou i to inangaro i tetai aronga ke, i na ra kia riro toou inangaro no ratou mei taau rai i inangaro ia koe uaorai; e kia maata toou inangaro ki te au tangata katoatoa, e ki te katoatoa tei inangaro mai i toku nei ingoa.

12 E pure no to au taeake ko te Tino Ngauru Ma Rua. Kia pakari i te ako atu ia ratou no toku nei ingoa, e kia akoia ratou no ta ratou au ara katoatoa, e kia tu akarongo tikai koe ki mua iaku nei i roto i toku ingoa.

13 E i muri ake i to ratou au timataanga, e te tumatetenga maata, i na, ka aroa oki au ko te Atu ia ratou, e me kare ratou e akaketaketa i to ratou au ngakau, e kare katoa oki e akaketaketa i to ratou au kaki kiaku nei, ka akaariuia mai ratou, e ka akaora au ia ratou.

14 I teianei, te karanga atu nei au kia koe, e ko taku e tuatua atu nei kia koe, te tuatua katoa ra au ki te katoatoa rava o te Tino Ngauru Ma Rua: E tu ki runga, e tatua i to kotou au taukupu, e amo i to kotou satauro, e aru mai iaku, e angai i taku au mamoe.

15 Auraka e akateitei ia koe uaorai; e auraka e patoi atu i taku tavini ia Iosepha; tika tikai taku e karanga atu kia koe, ei vaitata oki au iaia, e tei rungaʼo toku rima iaia; e ko te au taviri taku i oronga atu kiaia, e pera katoa kia koe na, kare rava te reira e apaina ke ia mei iaia e oki ua mai au.

16 Tika tikai taku e karanga atu kia koe, e taku tavini e Thomas, ko koe tikai oki te tangata taku i iki kia mou i te au taviri o toku basileia, kia tau ki te Tino Ngauru Ma Rua, ki vao mai i te au pa enua katoatoa—

17 Kia riro oki koe ei tavini noku i te akatueraanga i te ngutupa o te basileia i te au ngai ravarai ta taku tavini ko Iosepha, e taku tavini katoa ko Sidney, e taku tavini katoa ko Hyrum e kore e tae mai;

18 Kua tuku oki au ki rungaʼo ia ratou i te apainga o te au akonoanga katoatoa no tetai tuatau poto ua.

19 No reira, ko te ngai ta ratou ka tono ia kotou, e aere kotou, e ei vaitata ua rai au ia kotou; e noatu eaa te ngai ta kotou ka akakite i toku nei ingoa, ka tuera mai tetai ngutupa kia kotou, kia rauka oki ia ratou i te ariki mai i taku nei tuatua.

20 Ko tei ariki mai i taku ra tuatua, kua ariki mai ïa iaku, e ko tei ariki mai iaku ra, kua ariki mai ïa ratou i te Ruru Peresideni Mua, taku oki i tono atu, e te au konitara katoa oki taku i iki no toku nei ingoa ki o kotou na.

21 E pera katoa, te karanga atu nei au kia kotou, ko ta kotou ka unga na roto i toku nei ingoa, na te reo o to kotou au taeake, koia te Tino Ngauru Ma Rua, ma te akatikaia e tei akamana katoa ia e kotou, e mana i reira to ratou kia akatuera i te ngutupa o toku nei basileia ki tetai uatu pa enua noatu eaa te ngai ta kotou ka tono ia ratou—

22 Mei te mea e ka taakaaka mai ratou ki mua iaku, e ka akono i taku ra tuatua, e ma te akarongo mai ki te reo o toku nei Vaerua.

23 Tika, tika tikai, taku e karanga atu kia kotou, kua tapokiia te enua nei e te poiri, e kua akapoiriia te au manako o te tangata nei, e kua riro mai te au kopapa nei ei au mea viivii i mua i toku nei mata.

24 I na, ka tae viviki mai te kino ki rungaʼo i te tangata o te enua nei, e rā otootoanga, e rā mura aʼi, e rā akataneaanga, e te aueanga, e te evaanga, e te irieaanga; e mei te matangi puaioio rai i te aereanga mai ki rungaʼo i te tua o te enua nei, i tuatua mai ei te Atu.

25 E ka akamata oki ki toku nei ngutuare, e mei toku nei ngutuare e aere uatu, i tuatua mai ei te Atu;

26 E na mua oki kia ratou i rotopu ia kotou, te tuatua maira te Atu, ko tei tuatua e kua kite i toku nei ingoa, e kare ra i kite mai iaku, e kua akakino oki iaku i roto i toku nei ngutuare, te tuatua maira te Atu.

27 No reira, e akara e auraka oki kotou kia akamanata ia kotou no runga i te akatereanga o taku nei akonoanga i roto i teia ngai nei, te tuatua maira te Atu.

28 I na ra, kia tamā i to kotou au ngakau ki mua iaku; e ka aere atu ei kotou ki to te pa enua katoa, ei tutu i taku evangelia ki te au mea ora katoatoa tei kore i ariki ake;

29 E ko tei irinaki e kua bapetizoia ka ora ïa, ko tei kore ra i irinaki e kare katoa i bapetizoia ka akaapaia ïa.

30 Kia kotou, e te Tino Ngauru Ma Rua, e kia ratou te Ruru Peresideni Mua, tei ikiia ei au konitara ma te au arataki no kotou, e orongaia atu oki te mana o teia kautaunga nei, no te au rā openga e no te taime openga katoa, koia oki ko te kīanga o te au tuatau.

31 Koia oki te mana ta kotou e mou nei, ei topiri atu kia ratou tei rauka te orongaanga i tetai uatu tuatau mei te akamataanga mai o te kapuaanga;

32 Tika tikai taku e karanga atu nei kia kotou, ko te au taviri o te tuatau tei rauka ia kotou, kua aere mai te reira mei te au metua, e te openga oki, e mea tonoia mai te reira mei te rangi mai kia kotou.

33 Tika tikai taku e karanga atu kia kotou, e akara na i te ngateitei i to kotou kapikianga. E tamā i to kotou au ngakau e to kotou au kakau, ko te umuumuia mai aea te toto o teia uki mei roto mai i to kotou au rima.

34 Kia tu akarongo tikai kotou e tae ua mai au, no te mea ka aere vave mai au; tei aku rai taku tutaki ki te au tangata tatakitai kia tau ki tana angaanga i rave. Ko au te Alepha e te Omega. Amene.