1 Tika tikai te tuatua maira te Atu kia kotou, e taku tavini e Iosepha Timeti, Tamaiti, e taku tavini katoa e Sidney Rigdon, e taku tavini katoa e Hyrum Smith, e to kotou au konitara e noo nei e te ka ikiia mai a muri ake;

2 E kia koe katoa e taku tavini e Edward Partridge, e tona nga konitara;

3 E pera katoa ki taku au tavini akarongo mou o roto i te pupu konitara teitei o taku akonoanga i Ziona, ko te ka kapikiia oki, e ki te au ereta katoatoa ma te au tangata o taku Akonoanga a Iesu Mesia o te Aronga Tapu i te Au Rā i Muri Nei tei totoa ki to te ao katoa nei;

4 E ka kapikiia oki taku akonoanga i teia au rā openga nei e, ko Te Akonoanga a Iesu Mesia o te Aronga Tapu i te Au Rā i Muri Nei.

5 Tika tikai taku e karanga atu kia kotou katoatoa: E tu ki runga kia kitea mai to kotou mārama, kia riro oki to kotou mārama ei akaraanga no te au iti tangata;

6 E kia riro te akaputuputuanga ki te ngai okotai i te enua ko Ziona, e ki runga i tona ra au titi, ei ngai paruruanga, e te akaruruanga mei te uriia, e mei te riri otooto me riringiia mai ma te kore e kairoia ki rungaʼo i te enua katoa nei.

7 Kia riro oki te oire ko Far West ei ngai tapu e ei enua akatapuia kiaku; e ka kapikiia oki e ngai tapu rava atu, e ko te one oki ta kotou e tu na e ngai tapu ïa.

8 No reira, te akaue atu nei au ia kotou kia akatu i tetai are noku, no te akaputuputuangaia o toku aronga tapu, kia rauka oki ia ratou i te akamori mai iaku.

9 E kia rauka oki tetai akamataanga no teia angaanga, ma tetai tango katoa, e tetai angaanga akateateamamao katoa, a teia tuatau akaū ki mua;

10 E ko te akamataanga, kia raveia te reira i te rā ā o Tiurai ki mua nei; e mei te reira taime e aere uatu, kia angaanga toku iti tangata ma te maroiroi tikai i te akatuanga i tetai are ki toku nei ingoa;

11 E mei te okotai mataiti mei teia rā atu, kia akamata akaou ratou i te akamou i te tango o taku are.

12 E kia angaanga maroiroi ratou mei te reira taime mai e oti uatu, mei te toka tīavā mai e tae uatu ki runga rava, e auraka rava oki e mea e vai tei kore i akaotiia.

13 Tika tikai taku e karanga atu kia kotou, auraka taku tavini ko Iosepha, e pera katoa ki taku tavini ko Sidney, e taku tavini katoa ko Hyrum, kia ō akaou ki roto i te kaiou no te akatuanga i tetai are ki toku nei ingoa;

14 I na ra, kia akatuia tetai are ki toku nei ingoa kia tau ki te akaraanga taku ka akaari atu kia ratou.

15 E me kare toku iti tangata e akatu kia tau ki te akaraanga taku ka akaari atu ki to ratou ruru peresideni, kare rava au e ariki i te reira mei to ratou au rima.

16 I na ra, me ka akatu toku iti tangata kia tau ki te akaraanga taku ka akaari atu ki to ratou ruru peresideni, koia ki taku tavini ko Iosepha e tona nga konitara, i reira ka ariki au i te reira mei te rima o toku nei iti tangata.

17 E pera katoa, tika tikai taku e karanga atu kia kotou, ko toku anoano teia, kia akatu viviki ia te oire ko Far West na roto i te akaputuputuanga o toku aronga tapu;

18 E kia iki katoa ia tetai au ngai ke atu no te au titi i te reira tuanga e pini uake, te ka akakiteia atu ki taku tavini ko Iotepa, mei tetai tuatau ki tetai tuatau.

19 E i na, ei vaitata ua oki au iaia, e ka akatapu oki au iaia ki mua i te tangata; e kua oronga atu oki au kiaia i te au taviri o teia basileia e te angaanga katoa. Koia ïa. Amene.