1 Tikai tikai, te tuatua maira te Atu kia koe, e taku tavini e Iosepha Timeti, kua mareka tikai au i taau atinga e te au tauturuanga, taau i rave; no reira oki au i akatupu mai ei ia koe ki runga, kia akaari atu au i toku pakari na roto i te au mea paruparu o te enua nei.

2 Kua ariki meitaki au i taau pure; e ei pauanga ki te reira au mea te tuatua atu nei au kia koe, e te kapiki viviki ia nei kia rave koe i tetai akakiteanga tapu o taku evangelia, e no teia titi tei tanumia e au ei toka tīavā no Ziona, te ka akakanapanapaia ki te manea kia aite ki te are ariki.

3 Ko teia akakiteanga ki te au ariki o te ao nei, ki nga pore e ā o te reira, ki te peresideni ngateitei tei ikiia uake, e te au kavana manako ngateitei o te enua e nooia nei e koe, e ki te au pa enua katoatoa o te ao nei tei totoa ki vao.

4 E mea tau kia tataia na roto i te vaerua maru e te mana o te Vaerua Tapu, te ka noo ki roto ia koe i te atianga e tata ai koe i te reira;

5 E ka orongaia atu te reira kia koe e te Vaerua Tapu kia kite i toku anoano no runga i taua au ariki ra e te aronga mana, e ko te ka tae kia ratou i te tuatau e tae ei.

6 E, i na, te aere nei tikai au ka kapiki ia ratou kia akara mai ki te mārama e te kakā o Ziona, no te mea kua tae te tuatau kia aroa iaia.

7 No reira, e kapiki atu ia ratou, ma te reo maata, ma taau tuatua papu, auraka e mataku atu ia ratou, mei te ngangaere rai oki ratou, e to ratou kakā pouroa mei te tiare ïa kare e roa atu kua topa ki raro, kia kore rava a ratou kotoeanga—

8 E kia aere atu au i te atoro ia ratou i te rā atoroanga, e kiriti ei au i te tapoki o toku mata, kia akataka i te tuanga a te aronga pikikaa, tei reira oki te pakatianga nio, me patoi mai ratou i toku au tavini e taku tuatua papu taku i eeu atu kia ratou.

9 E pera katoa, ka atoro au e ka akaparuparu i to ratou au ngakau, e maata oki ratou ei meitaki no kotou, kia kitea aroa ia mai kotou i roto i to ratou au mata, kia aere mai ratou ki te mārama o te tuatua-mou, e te au Etene ki te akangateiteianga me kore i te takinaanga o Ziona ki runga.

10 Te viviki mai nei te rā o toku atoroanga atu, i te ora manako kore ia e kotou; e teiea i reira te ngai e oraʼi toku iti tangata, e te akaruruanga o te aronga te ka toe mai ia ratou?

11 E ara, e te au ariki o te enua nei! Aere mai, e aere mai, ma ta kotou auro e ta kotou ario, no te tauturu i toku iti tangata, ki te ngutuare o te au tamaine a Ziona.

12 E pera katoa, tika tikai taku e karanga kia koe, kia tauturu mai rai taku tavini ko Robert B. Thompson ia koe i te tataanga i teia tuatua akakite, no te mea kua mareka rava au iaia, e kia noo mou aia kia koe;

13 Kia akarongo mai aia i reira i taau akoakoanga, e naku e akamaata i tona au akameitakianga; kia riro katoa aia ei tangata akarongo mou e te tuatua-tika i te au mea ravarai mei teianei atu, e maata aia i reira i mua i toku mata;

14 I na ra, e akamaara katoa aia e ko tana tavinianga taku ka umuumu atu mei roto i tona nga rima.

15 E pera katoa, tika tikai taku e karanga atu nei kia koe, kua akameitakiia taku tavini ko Hyrum Smith; e inangaro maata tikai toku, to te Atu, iaia no te tiamā o tona ngakau, e no te mea oki e kua inangaro tikai aia i te tuatua-tika i mua iaku, te tuatua maira te Atu.

16 Pera katoa, kia tauturu rai taku tavini ko John C. Bennett ia koe i roto i taau angaanga i te tonoanga i taku tuatua ki te au ariki e te au tangata o te enua nei, e kia tu ki te pae ia koe, koia oki koe e taku tavini e Iosepha Timeti, i roto i te ora o te tumatetenga; e kare tana tutaki e kore me ariki aia i te akoakoanga.

17 E no tona inangaro ka maata aia, e naku rai aia me rave aia i teia, te tuatua maira te Atu. Kua kite ana au i te angaanga tei raveia e ïa, e kua ariki au me rave tamou ua rai aia, e ka akakorona au iaia ki te au akameitakianga e te kakā maata rava atu.

18 E pera katoa, te tuatua atu nei au kia koe e ko toku anoano teia i taku tavini ia Lyman Wight kia rave tamou uatu rai aia i te apiianga no Ziona, na roto i te vaerua o te maru, i te aakianga iaku i mua i to te ao; e ka rave au iaia ki runga mei te mea rai e tei runga i nga peau aito ra; e ka rauka iaia te kakā e te ngateitei nona uaorai e no toku ingoa.

19 E me oti tana angaanga kia ariki au iaia kiaku nei, mei taku i rave ki taku tavini kia David Patten, tei aku nei aia i teianei, pera katoa taku tavini ko Edward Partridge, e pera katoa taku tavini pakari ko Iosepha Timeti, Metua, e noo ra ma Aberahama ki tona rima katau, kua akameitakiia aia e kua tapu, e naku oki aia.

20 E pera katoa, tika tikai taku e karanga atu kia koe, ko taku tavini ko George Miller kare ana pikikaa; kia irinakiia aia no te mea e ngakau tiamā tona; e no tona inangaro ki taku tuatua akapapu, kua inangaro rava au, ko te Atu, iaia.

21 No reira te karanga atu nei au kia koe, te topiri nei au i te taonga o te ruru episekopo ki rungaʼo i tona upoko, mei taku tavini rai ko Edward Partridge, kia rauka iaia te akatapuanga o toku ngutuare, kia rauka iaia kia oronga i te au akameitakianga ki runga i te au upoko o te au putaua o toku au tangata, te tuatua maira te Atu. Auraka rava tetai tangata e akavaavaa i taku tavini ia George, ka akangateitei oki aia iaku.

22 Kia akatu oki taku tavini ko George, e taku tavini ko Lyman, e taku tavini John Snyder, e pera katoa tetai pae, kia akatu i tetai are no toku nei ingoa, mei ta taku tavini ko Iosepha te ka akaari atu kia ratou, e i te ngai tana ka akaari atu kia ratou.

23 E ka riro te reira ei are tapaeanga, ei are akangaroianga no te au tangata mei te au ngai mamao mai; no reira ei are meitaki tikai, tu katau no te katoatoa kia noo, e kia akangaroi meitaki e kia matutu mai te tangata roiroi mei te ara mai iaia e manakonako ra i te tuatua a te Atu; e te toka tīavā taku i iki no Ziona.

24 E ka riro teia are ei nooanga matutu me patuia ki toku ingoa, e mei te mea e kare te kavana tei ikiia no te reira ngai e akatika i tetai taviiviianga ki reira. Ka tapu te reira, me kore ra kare te Atu to kotou Atua e noo ki reira.

25 E pera katoa, tika tikai taku e karanga atu kia koe, e tuku mai i toku aronga tapu i te atea ke kia aere mai.

26 E tono atu koe i te au karere viviki, ae, ei karere ikiia, e kia tuatua atu kia ratou; aere mai ma ta kotou au auro, ta kotou au ario, ta kotou au toka manea, e ta kotou au apinga taito rava; e te aronga e kite to ratou no te au mea taito, te ka aere mai, kia aere mai, kia apai mai i te tumu rakau tatura, e te rakau peruti, e te paina, e te au rakau memeitaki pouroa o te enua nei;

27 E ma te auri, te kapa, te veo, e te tiniki, e ma ta kotou au mea manea katoatoa o te enua nei; ei akatu i tetai are no toku nei ingoa ei nooanga no Tei Teitei Roa.

28 Kare oki e ngai i kitea i te enua nei e aere mai ei aia kia akaoki akaou mai i tei ngaro ia koe, me kore ra tana i rave ke mai, koia te kīanga o te kautaunga.

29 Kare oki e ngai bapetizoanga o runga i te enua nei, kia raukaʼi ia ratou, i toku aronga tapu, kia bapetizoia no te aronga i mate—

30 Ko teia angaanga oroa nei ei roto ïa i toku are, kare rava e arikiia e au, mari ua i te au rā o to kotou ngereanga, me kare takiri e rauka kia akatuia tetai are noku.

31 I na ra te akaue nei au ia kotou, e toku aronga tapu, kia akatu i tetai are noku; ka oronga atu au kia rava te taime no kotou kia akatu i tetai are noku; e i roto i teia taime nei ka ariki au i ta kotou au bapetizo.

32 E i na, kia tae ki te openga o te rā tei akatakaia kare ta kotou au bapetizoanga no to kotou i mate e arikiia e au; e me kore kotou e rave i teia au mea nei i te openga o te rā tei akatakaia e au ka akarukeia atu kotou ei akonoanga, ma to kotou i mate, te tuatua maira te Atu to kotou Atua.

33 Tika tikai taku e karanga atu nei kia kotou, me orongaia atu kia rava te taime no kotou kia akatu i tetai are noku, no te raveanga i reira i te angaanga oroa o te bapetizoanga no tei mate, e kua teateamamaoia teia i muake ka angaiaʼi te ao nei, i muri ake kare ta kotou au bapetizoanga no to kotou i mate e arikiia e au;

34 I roto oki i reira te au taviri o te kautaunga tapu e akataongaiaʼi, e raukaʼi ia kotou te kakā e te ngateitei.

35 E muri ake i teia taime, ko ta kotou au bapetizo no te mate, tei raveia e te aronga i te au ngai mamao, kare au e ariki i te reira, te tuatua maira te Atu.

36 Kua akataongaia oki e i Ziona, e i roto i tona au titi, pera katoa i Ierusalema, koia te au ngai taku i iki ei akaruruanga, ko te au ngai te reira no kotou kia bapetizo i to kotou tei mate.

37 E pera katoa, tika tikai taku e tuatua atu kia kotou, ka naea ta kotou au tamāanga e arikiiaʼi ki mua iaku, mari ra kia rave kotou i te reira ki roto i te are ta kotou i akatu no toku ingoa?

38 E, no teia tumu i akaue ei au ia Mose kia akatu i tetai puakapa, kia apai ratou i te reira i roto i te medebara, e kia akatu i tetai are ki te enua taputou, kia eeuia mai taua au angaanga oroa ra i uunaia i mua ake i te ao nei.

39 No reira, tika tikai taku e tuatua atu kia kotou, kia riro to kotou au akatainuanga, e to kotou au tamāanga, e to kotou au bapetizoanga no tei mate, e to kotou au putuputuanga tapu, e ta kotou au akamaaraanga i te atinga a te au tamaroa a Levi, e te au eeuanga kia kotou mei te au ngai tapu rava atu, e tuatuaʼi kotou, e ta kotou au ture e te au akavaanga, no te akamataanga o te au eeuanga e te tango o Ziona, no te kakā, te ngateitei, e te orongaanga tapu o te iero no tona katoatoa, kua akataongaia na roto i te oroa o toku are tapu, mei tei akaueia ua ana rai ki toku au tangata kia akatu no toku ingoa tapu.

40 E tika tikai taku e karanga atu kia kotou, kia akatuia teia are ki toku ingoa, kia rauka iaku kia eeu au i taku angaanga oroa ki reira no toku au tangata;

41 Kua tika iaku kia eeu ki taku akonoanga i te au mea tei uunaia e au i mua ake i te akatumuanga o teianei ao, te au mea no runga i te tuatau o te kīanga o te au tuatau.

42 Ka akaari au ki taku tavini kia Iosepha i te au mea katoatoa no runga i teia are, e te kautaunga o reira, e te ngai e akatuia ai.

43 E ka akatu kotou ki runga i te ngai taau i tamanako kia akatuia, ko te ngai oki te reira taku i iki kia akatu kotou.

44 Me angaanga kotou ma toou maroiroi katoa, ka akatapu au i te reira ngai ei ngai tapu tikai.

45 E me ka akarongo mai toku au tangata ki toku reo, e ki te reo o taku au tavini tei ikiia e au ei arataki i toku au tangata, i na, tika tikai taku e karanga atu kia kotou, kare rava ratou e akaateaia mei to ratou ngai.

46 I na ra, me kore ratou e akarongo mai ki toku reo, me kore ra ki te reo o teia au tangata nei taku i iki, kare ratou e akameitakiia, no te mea kua akaviivii i toku au enua tapu, e taku au angaanga oroa tapu, te au papa ture, e taku au tuatua tapu tei orongaia e au kia ratou.

47 E ka tae akera e me akatu akera kotou i tetai are no toku ingoa, e kare i rave i te au mea taku i tuatua, kare au e rave i te tia taku i papau kia koe, kare katoa e akatupu i te au taputou taau i manako mei roto atu i toku rima, te tuatua maira te Atu.

48 No ta kotou uaorai angaanga, kare i reira o kotou au akameitakianga mari ra e au taumaaanga, te riri, te otootoanga-riri, e te au akavaanga ki runga i to kotou uaorai au upoko, no ta kotou au tarevakē, e ta kotou au angaanga viivii katoatoa, ta kotou i rave i mua iaku, te tuatua maira te Atu.

49 Tika, tika tikai taku e karanga atu kia kotou, me ka oronga au i tetai akaueanga ki tetai uatu o te au tamaroa a te tangata nei kia rave i tetai angaanga no toku nei ingoa, e kia rave taua au tamaroa a te tangata nei ma to ratou maroiroi e to ratou puapinga katoa i te angaanga, e ma te aruaru tikai, e kia aere mai to ratou au enemi kia tamanamanata kia kore e oti ta ratou angaanga, i na, e mea tau iaku kia kore e tapapa atu i taua angaanga mei roto mai i te rima o te au tamaroa a te tangata, e kia ariki ra i ta ratou au atinga.

50 E ko tei ara e tei aati i taku au ture tapu e te au akaueanga, e ratou tei arai i taku au angaanga, ka akautuanga au ia ratou ki te toru e te ā o te uki, me kare ratou e tataraara, e me makitakita mai iaku, te tuatua maira te Atu.

51 No reira, ko tetai tumu teia i ariki ei au i te atinga a te aronga taku i akaue kia akatu i tetai oire e tetai are no toku nei ingoa, i Jackson County, Missouri, tei tamanamanataia e to ratou au enemi, te tuatua maira te Atu.

52 E naku e tutaki atu i te akavaanga, te riri, te otootoangariri, te aueanga, te mamaeanga, e te pakatianga nio ki rungaʼo i to ratou upoko, kia tae ki te toru e te ā o te uki, me kare ratou e tataraara, ma te makitakita mai iaku, te tuatua maira te Atu.

53 Ka riro teia ei akaraanga na kotou, ei akapumaana no kotou ravarai tei akaueia kia rave i te angaanga e kua tamanamanataia e te rima o to ratou au enemi, e na roto i te maro, na te Atu ei.

54 Ko au te Atu toou Atua, te ka akaora i toou ra au taeake tei mā te ngakau, e tei tāiaia i te enua ko Missouri, te tuatua maira te Atu.

55 E pera katoa, tika tikai taku karanga atu nei kia kotou, e te akaue akaou nei au ia kotou kia akatu i tetai are no toku ingoa, ki teia ngai nei, ei akapapu mai anga kiaku e te tu akarongo nei kotou i te au mea ravarai taku i akaue atu kia kotou, e kia akameitaki au ia kotou, e kia akakorona au ia kotou ki te ngateitei, te kopapa mate kore, e te ora mutukore.

56 E teianei te tuatua atu nei au kia kotou, no runga i toku are tapaeanga taku i akaue atu ia kotou kia akatu ei nooanga no te au manuiri, kia akatuia te reira no toku ingoa, kia tataia toku ingoa ki runga i te reira, e kia riro rai tetai ngai no taku tavini no Iosepha e tona ngutuare, mei tetai uki ki tetai uki.

57 Kua tuku au i teia akatainuanga ki runga i tona upoko, kia tuku katoa ia teia akameitakianga ki runga i te upoko o tona uanga i muri ake iaia.

58 Mei taku i tuatua atu kia Aberahama no runga i te au kopu tangata o te enua nei, mei te reira katoa au i te tuatuaanga ki taku tavini ko Iosepha: Ia koe e i taau uanga e akameitakiiaʼi te ao nei.

59 No reira, e oronga kotou i tetai ngai i roto i teia are no taku tavini no Iosepha e tana uanga mei tera uki ki tera uki, e tuatau e tuatau uatu, te tuatua maira te Atu.

60 E kia tapaia te ingoa o taua are ra ko te Are Nauvoo; e kia riro te reira ei nooanga mataora no te tangata, e ei akangaroianga no te tangata teretere tei roiroi, kia akamanako aia i te kakā o Ziona, e te kakā o teia, te toka kapeutara;

61 E kia rauka katoa iaia te apiianga mei ko mai ia ratou taku i tuku ei rakau rongonui, e ei au tiaki i runga i te au patu.

62 I na, tika tikai taku e karanga atu nei kia kotou, kia riro taku tavini ko George Miller, e taku tavini Lyman Wight, e taku tavini John Snyder, e taku tavini Peter Haws kia akapupu ia ratou, e kia iki i tetai ia ratou ei peresideni i to ratou pupu no te akakoroanga o te akatuanga o taua are ra.

63 E kia akamou ratou i tetai ture, e raukaʼi ia ratou tetai au titoki no te akatu i taua are ra.

64 E kare i raro ake i te rima ngauru tara ta ratou tuanga titoki o taua are ra, e ka tikaia tetai ia ratou kia rauka mai te tai ngauru ma rima tauatini tara apinga mei te tangata okotai no te titoki i roto i taua are ra.

65 I na ra kare ratou e tikaia e kia tere atu i te ngauru ma rima tauatini tara o te titoki mei tetai tangata okotai.

66 E kare oki ratou e tikaia kia ariki mai i raro ake i te rima ngauru tara no te tuanga titoki mei tetai uatu tangata i roto i taua are ra.

67 E kare ratou e tikaia kia ariki i tetai tangata, ei mou titoki ki roto i taua are ra, mari ua kia tutaki aia i tana titoki ki to ratou rima i te reira taime e raukaʼi tana;

68 E na roto i te maata o tana tuanga titoki e tutaki ki roto i to ratou rima e raukaʼi tana tuanga i roto i taua are; i na ra me kare ana i tutaki ki roto i to ratou rima kare rai ana titoki e rauka mai mei roto i taua are ra.

69 E me tutakiia tetai titoki ki roto i to ratou rima ka riro te reira titoki no taua are, nona uaorai e no tona uki a muri atu iaia, mei tetai uki ki tetai uki, kia vai rai iaia e tana uanga, me kare e oko me kore ra e oronga ke atu na roto i to ratou uaorai manako e te angaanga, me rave koe i taku i anoano, te tuatua maira te Atu toou Atua.

70 E pera katoa, tika tikai taku e karanga atu nei kia koe, e me ka rauka i taku tavini ia George Miller, e taku tavini ko Lyman Wight, e taku tavini ko John Snyder, e taku tavini ia Peter Haws, tetai titoki ki roto i to ratou rima, mei te moni, me kore ra ei apinga kia aiteite te puapinga i roto i te au moni, e auraka oki ratou e oronga i tetai uatu tuanga o taua titoki no tetai uatu akakoroanga, mari ua no te are.

71 E me ka oronga ratou i tetai tuanga titoki ki tetai uatu ngai ke, mari ra ki roto i taua are, ma te kore e tika a tetai e tuanga titoki tana, e kare e tutakitaki e ā taime na runga ake no te titoki ta ratou i rave ke, mari ra ei roto i taua are, ka taumaaia ratou, e ka akaatea ke ia atu ratou mei to ratou ngai, te tuatua maira te Atu te Atua; ko au te Atu te Atua, e kare oki e aviriia i roto i teia au mea nei.

72 Tika tikai taku e karanga atu kia kotou, kia tutaki taku tavini a Iosepha i te titoki ki roto i to ratou rima no te akatuanga o taua are, me kua meitaki rava iaia; i na ra kare e rauka i taku tavini ia Iosepha kia tutaki e tai ngauru ma rima tauatini tara titoki ki roto i taua are, kare rai oki i raro ake i te rima ngauru tara; kare katoa oki tetai atu tangata, te tuatua maira te Atu.

73 E te vai katoa ra tetai aronga tei anoano kia kite i toku manako no runga ia ratou, no te mea kua pati mai oki ratou mei toku nga rima.

74 No reira, te tuatua atu nei au no runga i taku tavini ko Vinson Knight, me ka rave aia i taku i anoano e tuku aia i te titoki ki roto i te are nana uaorai, e no tona uki a muri ake iaia, mei tetai uki ki tetai uki.

75 E kia tuatua maroiroi uatu rai aia, i rotopu i te tangata, i te pati kia tauturuia te putaua e te ngere; auraka aia kia apikepike, auraka oki tona ngakau e paruparu; e ka ariki au i tana atinga, e kare rava oki te reira iaku mei te atinga a Kaina, ka riro ra aia naku, te tuatua maira te Atu.

76 Kia rere ua tona kopu tangata i te rekareka ma te uri ke anga i to ratou au ngakau mei te mamaeanga; kua iki oki au e kua akatainu iaia, e ka akangateiteiia aia i roto i tona uaorai ngutuare, e ka akakore au i tana au ara, te tuatua maira te Atu. Amene.

77 Tika tikai taku e karanga atu kia kotou, kia tuku rai taku tavini ko Hyrum i te titoki ki roto i taua are me kua tau iaia, nana uaorai e na tona uki i muri ake iaia, mei tetai uki ki tetai uki.

78 E tuku rai taku tavini ko Isaac Galland i te titoki ki roto i taua are; kua inangaro tikai au, te Atu, iaia no tana angaanga i rave, e ka akakore au i tana au ara katoatoa; no reira, kia akamaaraia aia no te puapinga i roto i taua are mei tetai uki ki tetai uki.

79 E kia ikiia taku tavini a Isaac Galland i rotopu ia kotou, e kia akataongaia aia e taku tavini ko William Marks, e kia akameitaki katoa ia e ïa, e kia aere ma taku tavini ko Hyrum kia rave i te angaanga ta taku tavini ta Iosepha ka akakite kia raua, e ka akameitaki maata ia raua.

80 Kia tutaki rai taku tavini ko William Marks i te titoki ki roto i taua are, kia tau iaia, nona uaorai e tona uki, mei tetai uki ki tetai uki.

81 Kia tutaki rai taku tavini ko Henry G. Sherwood i te titoki ki roto i taua are, me kua tau iaia, nona uaorai e tana uanga i muri ake iaia mei tetai uki ki tetai uki.

82 Kia tutaki rai taku tavini ko William Law i te titoki ki roto i taua are, nona uaorai e tana uanga i muri ake iaia mei tetai uki ki tetai uki.

83 Me ka rave aia i toku manako auraka aia e apai i tona kopu tangata ki te enua i te itinga, koia a Kirtland; kareka ra, ka akatu au, te Atu, ia Kirtland, kareka ra, kua teateamamao Au, te Atu, i te papaanga no te au tangata e noo ki reira.

84 E no taku tavini ko Almon Babbitt, e manganui te au mea tei kore au i mareka; i na, te manako ra aia i te akamou i tana apiianga, auraka e ko te apiianga taku i oronga atu, koia oki te Ruru Peresideni o taku Akonoanga; kua akatu aia i tetai punua puakatoro auro ei akamorianga na toku iti tangata.

85 Auraka rava tetai tangata kia aere ke atu mei teia ngai tei aere mai no te inangaro i te akono i taku au akaueanga.

86 Me ka noo ratou ki konei, kia noo ratou kiaku; e me mate ratou kia mate ratou i roto iaku; ka akangaroiia ratou mei ta ratou au angaanga i konei, e ka rave tamou uatu rai ratou i ta ratou au angaanga.

87 No reira, e tuku mai taku tavini a William i tona irinakianga kiaku, e auraka e mataku no tona kopu tangata, no te maki oki o te enua nei. Me e inangaro to kotou iaku, e akono i taku au akaueanga; e ka riro te maki o te enua ei kakā noou.

88 Kia aere taku tavini a William e tutu atu i taku evangelia mutukore ma te reo maata, e ma te rekareka maata, mei te mea e akakeuia aia e toku Vaerua, ki tei noo ki te enua ko Warsaw, e pera katoa ki te enua ko Carthage, e tei noo ki Burlington, e pera katoa ki te iti tangata o Madison, ma te tapapa marie e te akakoromaki kia rauka mai tetai apiianga mei te uipaanga maata, te tuatua maira te Atu.

89 Me ka rave aia i toku anoano kia akarongo aia mei teianei ki te apii a taku tavini ko Iosepha, e ma tana puapinga kia tauturu i te putaua, e te nenei i te akaurianga ou o taku tuatua tapu no te aronga e noo i te enua nei.

90 Me ka rave aia i teia ka akameitaki au iaia e ki te maataanga o te au akameitakianga, kia kore rava aia e akarukeia, e kare katoa tana uanga e kitea i te patipatianga i te varaoa.

91 E pera katoa, tika tikai taku e karanga atu nei kia kotou, kia ikiia taku tavini a William, e kia akataongaia, e kia akatainuia, ei konitara no taku tavini no Iosepha, i te ngai o taku tavini ko Hyrum, kia apai taku tavini a Hyrum i te taonga o te Kautaunga e te Pateriarika, tei akatakaia ki runga iaia e tona metua, na roto i te akameitakianga e pera katoa te tikaanga;

92 Mei teianei noaʼi, ka mou aia i te au taviri o te au akameitakianga pateriarika ki rungaʼo i te upoko o toku au tangata,

93 E ko tana oki e akameitaki ra e akameitakiia ïa, e ko tana e taumaa, ka taumaaia ïa; e ko tana oki e topiri i te enua nei, e topiri katoa ïa i te rangi; e ko tana e tuku i te rangi ra, ka tuku katoa ia ïa i te enua nei.

94 E mei teia taime e aere uatu ka iki katoa au iaia ei peroveta, e ei akara e ei tangata eeu no taku akonoanga, e taku tavini katoa a Iosepha;

95 Kia angaanga meitaki aia ma taku tavini ko Iosepha; kia ariki aia i te apii mei taku tavini ko Iosepha, ta ka akaari mai kiaia i te au taviri e raukaʼi iaia kia pati, e kia akakoronaia ki taua akameitakianga, e te kakā, e te ngateitei, e te kautaunga, e te au orongaanga a te kautaunga, tei orongaia na mua ki taku tavini kia Oliver Cowdery;

96 Kia riro taku tavini a Hyrum ei akakite i te au mea taku ka akaari atu kiaia, kia akamaaraia tona ingoa ma te ngateitei mei tera uki ki tera uki, e tuatau e tuatau uatu.

97 Kia oronga katoa ia ki taku tavini kia William Law te au taviri kia rauka iaia i te pati mai i te au akameitakianga; kia akaaka ra aia ki mua iaku, e auraka e pikikaa, e ka rauka iaia toku Vaerua, koia te Akapumaana, te ka akaari kiaia i te tika o te au mea ravarai, e ka orongaia kiaia, i te ora tikai, e inangaro ei aia.

98 Ka aru oki teia au akairo iaia—ka akaora aia i te maki, ka tuaru aia i te diabolo ki vao, e ka akaoraia mai mei te aronga te ka oronga mai i te poitini mate kiaia;

99 E aratakiia aia na runga i te mataara ki te ngai e kare e rauka i te ovi poitini i te kakati i tona po avae, e ka kite aia i tetai tu na roto i tona manakoanga e mei te mea rai tei runga aia i nga peau o te aeto.

100 Me ko toku anoano teia kia akaora aia i tei mate, auraka aia e tapū i tona reo.

101 No reira, kia tuatua taku tavini a William ma te reo maata e auraka e tapū, ma te rekareka e te mataora, e ma te hosana kiaia tei noo ki runga i te terono e tuatau e tuatau uatu, te tuatua maira te Atu toou Atua.

102 I na, te tuatua atu nei au kia kotou, e angaanga taku e vai nei no taku tavini ko William, e taku tavini ko Hyrum, e no raua anake; e kia noo taku tavini a Iosepha ki te ngutuare, ka inangaroia aia ki reira. Ko te toe ka akakite atu au a muri ake. Koia ïa. Amene.

103 E pera katoa, tika tikai taku e karanga atu kia kotou, me ka angaanga taku tavini a Sidney naku e kia riro aia ei konitara no taku tavini ko Iosepha, e tu mai aia i reira e rave i te angaanga o tona taonga i kapikiiaʼi aia, ma te tu akaaka ki mua i toku aroaro.

104 E me ka oronga mai aia kiaku i tetai atinga te ka ariki au, e te au akameitakianga, e ma te noo tamou ki toku au tangata, i na, ko au, te Atu toou Atua, te ka akaora iaia e kia ora; ei reira aia e akateitei akaou ei i tona reo ki runga i te au maunga, e kia riro ei vaa tuatua ki mua i toku aroaro.

105 E aere mai aia kia akara i tona kopu tangata i rotopu i tona au taeake i te ngai i noo ei taku tavini ko Iosepha.

106 E i roto i tona au aereanga kia akateitei aia i tona reo mei te tangi pu, kia akamatakite atu i te au tangata o te enua nei, kia akaatea mai mei te riri ka tae mai.

107 E tauturu aia i taku tavini ia Iosepha, pera katoa taku tavinia William Law kia tauturu i taku tavini ia Iosepha, kia tata i tetai akakiteanga papu ki te au ariki o te ao nei, mei taku rai i tuatua takere atu ana kia kotou.

108 Me ka rave taku tavini a Sidney i taku i manako, auraka aia kia apai ke i tona kopu tangata ki te au enua i te itinga, i na ra, kia aere ratou ki tetai ngutuare ke mei taku i akakite atu kiaia.

109 I na, kare e ko toku anoano teia kia aere aia kia kimi i tetai ngai ei akaruru i vao ake i te oire taku i akataka no kotou, koia a Nauvoo.

110 Tika tikai taku e karanga atu kia kotou, i teia nei oki, me ka akarongo aia i toku reo, ka meitaki aia. Koia ïa. Amene.

111 E pera katoa, tika tikai taku e karanga atu kia kotou, kia tutaki mai taku tavini a Amos Davies i tana moni ki te rima o te aronga taku i akataka ei akatu i tetai are nooanga, koia te Are Nauvoo.

112 Ko teia tana ka rave me ka rauka mai tona puapinga; kia akarongo aia i te apii a taku tavini a Iosepha, e kia angaanga tikai aia ma tona nga rima kia rauka iaia te irinakianga o te tangata.

113 E me akapapu mai aia i tona tu akarongo ki te au mea katoatoa te ka tukuia atu kiaia, ae, noatu e au mea iti ua, ka riro aia ei tutara ki te manganuianga;

114 E mea tau iaia i reira kia taakaaka iaia uaorai e raukaʼi kia akateiteiia. Koia ïa. Amene.

115 E pera katoa, tika tikai taku e karanga atu kia kotou, me ka akarongo taku tavini a Robert D. Foster i toku reo, kia akatu aia i tetai are no taku tavini ko Iosepha, kia tau ki te koreromotu tei papauia kiaia, e ka akatueraia atu te ngutupa kiaia mei tera taime ki tera taime.

116 Kia tataraara aia i tona au tarevakē, ma te kakau iaia uaorai ki te aroa ua; e kia akamotu i te rave kino, e kia akaruke i tana au tuatua taukore;

117 Ma te tutaki katoa i te titoki ki roto i te rima o te pupu o te Are Nauvoo, nona e no tona uki i muri ake iaia, mei tetai uki ki tetai uki;

118 E akarongo i te ako a taku au tavini a Iosepha, e Hyrum, e William Law, e ki te au aronga mana tei kapikiia e au kia akamou i te tango o Ziona; e ka meitaki aia e tuatau e tuatau uatu. Koia ïa. Amene.

119 E pera katoa, tika tikai taku e karanga atu kia kotou, auraka rava tetai tangata e tutaki titoki ki te pupu o te Are Nauvoo mari ua e irinaki aia ki te Puka a Momoni, e te au eeuanga taku i oronga atu kia kotou, te tuatua maira te Atu to kotou Atua;

120 Ko tei maata ra me kore ra tei iti i teia e kino ïa, ka tupu te au taumaaanga e kare i te au akameitakianga, te tuatua maira te Atu to kotou Atua. Koia ïa. Amene.

121 E pera katoa, tika tikai taku e karanga atu kia kotou, e mea tau i te pupu o te Are Nauvoo kia tutakiia ki tetai moni tau no te au angaanga katoatoa ta ratou ka rave i te akatuanga i te Are Nauvoo; kia akatikatika ratou i to ratou tutaki i rotopu ia ratou uaorai, kia tau te reira.

122 E ko te au tangata tatakitai me e titoki tana, kia oronga aia no to ratou tutakianga, me ka anoanoia ei tauturu ia ratou, na te Atu ei; me kore ra, ka akairoia ta ratou au angaanga ei titoki i roto i taua are. Koia ïa. Amene.

123 Tika tikai taku e karanga atu kia kotou, te oronga atu nei au kia kotou i te au tangata taonga no roto i taku Kautaunga, kia raukaʼi ia kotou kia mou i te au taviri o te reira, koia te Kautaunga o te akanooanga o Melekizedeka, koia oki te akanooanga o taku Tamaiti Anau Tai.

124 Te mua, te oronga nei au ia Hyrum Smith ei pateriarika no kotou, kia mou i te au akameitakianga o te topirianga o taku akonoanga, koia te Vaerua Tapu o te taputou, e raukaʼi kia topiriia kotou e tae uatu ki te rā o te akaoraanga, kia kore kotou e inga me tae mai te ora o te timataanga ki rungaʼo ia kotou.

125 Te oronga atu nei au kia kotou i taku tavini ko Iosepha ei ereta akaaere i taku akonoanga, ei akauri tuatua, ei akara, ei peroveta.

126 Te oronga atu au i nga konitara nona, taku tavini ko Sidney Rigdon, e taku tavini ko William Law, kia akatupuia te pupu o te Ruru Peresideni Mua, kia rauka te au eeuanga no te akonoanga katoatoa.

127 Te oronga atu nei au kia kotou i taku tavini ia Brigham Young ei peresideni ki rungaʼo i te Ngauru Ma Rua pupu konitara tutaka;

128 Tei teia Tino Ngauru Ma Rua te au taviri kia akatuera i te mana o toku basileia ki nga akoko e ā o te ao nei, e muri ake i te reira kia tono i taku tuatua ki te au mea ora katoatoa.

129 Ko teia i reira ratou ko Heber C. Kimball, Parley P. Pratt, Orson Pratt, Orson Hyde, William Smith, John Taylor, John E. Page, Wilford Woodruff, Willard Richards, George A. Smith;

130 Ko David Patten taku ïa i tapū mai kiaku; i na, ko tona kautaunga kare te tangata e rave ke mei iaia; i na ra, tika tikai taku e karanga atu kia kotou, ka ikiia mai tetai ki taua kapikianga rai.

131 E pera katoa, te karanga atu nei au kia kotou, ka oronga atu au kia kotou i tetai pupu konitara teitei, ei toka tīavā no Ziona—

132 Tera te ingoa: Samuel Bennett, Henry G. Sherwood, George W. Harris, Charles C. Rich, Thomas Grover, Newel Knight, David Dort, Dunbar Wilson—e ko Seymour Brunson, tei aku aia; kare e tangata e rave i tona kautaunga, i na ra ka ikiia tetai ki taua kautaunga rai ei mono i tona ngai; e tika tikai taku e karanga atu kia kotou, kia akataongaia mai taku tavini a Aaron Johnson ki teia kapikianga i tona ngai—David Fullmer, Alpheus Cutler, William Huntington.

133 E pera katoa, te oronga atu nei au ia Don C. Smith ei peresideni ki rungaʼo i te pupu o te au taunga teitei;

134 Ko teia angaanga oroa ei akatupu i te akakoroanga no te aronga tei tukatau kia ikiia ratou ei au peresideni tinamou, me kore ra ei au tavini i roto i te au titi i vao mai;

135 Ka rauka ia ratou kia tutaka me ka inangaro ratou, i na ra, kia ikiia ei au peresideni tinamou; ko to ratou au taonga teia i kapikiiaʼi, te tuatua maira te Atu to kotou Atua.

136 Te oronga atu nei au kiaia ia Amasa Lyman e Noah Packard ei nga konitara nona, kia riro raua ei upoko akaaere ki runga ake i te pupu o te au taunga teitei o taku akonoanga, te tuatua maira te Atu.

137 E pera katoa, te karanga atu nei au kia kotou, ka oronga atu au ia John A. Hicks, Samuel Williams, e Jesse Baker, tei mou i te kautaunga upoko akaaere i runga ake i te pupu o te au ereta, ko to ratou pupu oki kua akatakaia ei orometua tiaki; kareka ra e tikaia kia tutaka ratou, kareka ko to ratou taonga e orometua tiaki ki taku akonoanga, te tuatua maira te Atu.

138 E pera katoa, te oronga atu nei au ia Joseph Young, Josiah Butterfield, Daniel Miles, Henry Herriman, Zera Pulsipher, Levi Hancock, James Foster, ei upoko akaaere i rungaʼo i te pupu o te itu ngauru;

139 Ko te au pupu oki teia tei akatakaia ei ereta tutaka kia akakite i toku ingoa ki te ao nei, te au ngai uatu ta te pupu konitara teitei ka aere, na taku au aposetolo e tono ia ratou kia akateateamamao i te matara ki mua i toku aroaro.

140 Ko te tuke i rotopu i teia pupu e te pupu o te au ereta koia e tai ka tutaka ua rai ratou, e ko e tai ko te upoko akaaere ki runga i te akonoanga mei tera taime e tera taime; e ko e tai kare ana tuanga no te akaaere, te tuatua maira te Atu to kotou Atua.

141 E pera katoa, te karanga atu nei au kia kotou, te oronga atu nei au kia kotou, ia Vinson Knight, Samuel H. Smith, e Shadrach Roundy, me ka ariki mai aia kia akaaere ki rungaʼo i te ruru episekopo; e akamāramaanga tetai tei orongaia atu kia kotou no taua ruru episekopo i roto i te puka no te Apiianga e te Au Koreromotu.

142 E pera katoa, te tuatua atu nei au kia kotou, e ko Samuel Rolfe e tona nga konitara no te taunga ïa, e te peresideni o te au puapii e tona nga konitara, pera katoa te peresideni o te au diakono e tona nga konitara, pera rai te peresideni o te titi e tona nga konitara.

143 Ko teia au taonga i runga nei taku i oronga kia kotou, e te au taviri katoa oki, ei tauturu e no te au akaaereanga, no te angaanga orometua e te akamakoanga i toku aronga tapu.

144 E oronga atu au i tetai akaueanga kia kotou, kia akakīkī pouroa kotou i teia au taonga ma te ariki meitaki i teia au ingoa taku i taiku atu, me kore ra e patoi atu ia ratou i roto i taku uipaanga maata;

145 E kia akateateamamao kotou i tetai au ngai no teia au taonga i roto i toku are me akatu ake kotou no toku ingoa, te tuatua maira te Atu to kotou Atua. Koia ïa. Amene.