Tuanga 130
Te au tuanga o te apiianga tei orongaia mai e Iosepha Timeti te Peroveta, i Ramus, Illinois, i te rā 2 o Aperira, 1843 (History of the Church, 5:323–325).
1–3, Ka mama mai te Metua e te Tamaiti i to raua tu tangata ki te tangata nei; 4–7, E noo ana te au angela ki te ao tiretiera; 8–9, Ka riro te enua tiretiera mei te Urima e te Tumima maatamaata; 10–11, Ka orongaia tetai toka teatea ki te aronga katoatoa te ka tomo ki roto i te ao tiretiera; 12–17, Kare i akakiteia mai ki te Peroveta te taime o te Oki Rua Anga Mai; 18–19, Ko te kite te ka rauka i roto i teia oraanga ka vai te reira kia tatou i roto i te tuakaouanga; 20–21, Ka rauka te au akameitakianga katoatoa na roto i te kauraro ki te ture; 22–23, E kopapa kiko e te ivi to te Metua e to te Tamaiti.
1 Me mama mai te Akaora, ka kite tatou iaia i tona tu tikai. Ka kite oki tatou e e tangata tikai oki aia mei ia tatou nei rai te tu.
2 E ko taua matauanga rai tei vai tetai ki tetai ki rotopu ia tatou i konei, ka vai rai kia tatou i tera ao, mari ua ra ka kapitiia mai ki te kakā mutukore, kare oki tatou i kite ake i taua kakā ra.
3 Ioane 14:23—Ko te mamaanga mai o te Metua e te Tamaiti, i roto i taua irava ra; e aerenga mai ïa o raua tikai i te tu tangata; e ko te manako e e noo ana te Metua e te Tamaiti ki roto i te ngakau tangata, e irinakianga taito te reira no tetai au akonoanga, e kua tarevakē.
4 Ei pau atu ki te uianga nei—Kare ainei e ko te akaraanga i te taime o te Atua, te taime o te angela, to te peroveta, e te taime o te tangata nei, kia tau oki ki te ngai ta ratou e noo ra?
5 Te pau nei au e, Ae. I na ra kare atu e au angela e matuapuru na ki teia enua nei mari ra no konei rai ratou i teianei, me kore i mua ana.
6 Kare oki te au angela e noo ana ki runga i tetai ao mei te enua nei te tu;
7 I na ra, e noo ana ratou ki mua i te aroaro o te Atua, ki runga i tetai ao punupunu mei tetai iʼo e te aʼi te tu, tei reira te vaianga o te kakā o te au mea ravarai tei topa ki muri, to teia tuatau, e to te au tuatau ki mua, e ka vai tinamou ua rai ki mua i te Atu.
8 Ko te ngai e noo maira te Atua, e Urima e te Tumima maata ïa.
9 Ko teia enua nei, tei akatapuia te ka vai e tuatau uatu, ka akariroia mei te iʼo māramarama, e ka riro ei Urima e te Tumima ki te au iti tangata o reira, e no reira ko te au mea katoatoa no runga i tetai basileia akaaka mai, me kore ra te au basileia o tetai akanooanga akaaka, ka akakiteia atu rai ki te aronga e noo ki runga i reira; e ka riro teia enua nei e no te Mesia.
10 E ko te toka teatea tei taikuia mai i roto i te Apokalupo 2:17, ka riro mai ïa ei Urima e te Tumima ki te tangata tatakitaki te ka ariki mai i tetai, e ko te au mea no te basileia teitei atu ka akakiteia mai te reira;
11 E ka orongaia atu tetai toka teatea ki te au tangata tatakitai te ka aere mai ki roto i te basileia tiretiera, e ka tataia tetai ingoa ou ki runga, e kare e tangata e kite i te reira, mari ua ra ko tei ariki mai i te reira. Ko te ingoa ou ko te taviri ïa.
12 Te totou nei au, na roto i te ingoa o te Atu ko te Atua e, ko te akamataanga o te manamanata ko te ka akatupu i te akamaringianga toto maata i mua ua ake i te aerenga mai o te Tamaiti a te Tangata, ka akamata te reira ki South Carolina.
13 Penei ka tupu mai te reira na roto i te tumu tuatua no te tuikaa. Na tetai reo i akakite mai i teia kiaku, iaku e pure akatenga ra no runga i teia tumu tuatua nei, i te rā 25 o Titema 1832.
14 Te pure akatenga ra oki au kia kite au i te tuatau e tae mai ei te Tamaiti a te Tangata, i te rongoanga au i tetai reo i te tuatuaanga mai e:
15 E Iosepha, e taku tamaiti, me ka ora koe e tae ua atu ki te varu ngauru ma rima o toou mataiti, ka kite koe i te mata o te Tamaiti a te Tangata; e no reira kia rava teia auraka e tamanamanata akaou mai iaku no runga i teia mea nei.
16 Kua akaruke ua ia au ma te kore i kite e me ko teia te okianga e tuatuaia nei no runga i te akamataanga o te aunuingangare me kore ra no tetai au mamaanga i mua na, me kore ra kia mate au e kite ei au i tona mata.
17 Kua irinaki oki au e ko te aereanga mai o te Tamaiti a te Tangata kare te reira e tupu vave ake i taua taime.
18 Noatu eaa te au kite mārama te ka rauka ia tatou i teia oraanga nei, ka vai rai te reira kia tatou i roto i te tuakaouanga.
19 E me ka maata atu te kite e te mārama o tetai tangata i roto i teia oraanga nei na roto i tona uaorai maroiroi e te kauraro i to tetai ke, ka meitaki atu tona turanga i te ao a muri ake.
20 Te vai nei tetai ture tei akamouia i te rangi i mua ake ka akamouiaʼi te tango o te ao nei, e tei runga i reira te au akameitakianga i akamouiaʼi—
21 E me rauka mai ia tatou tetai au akameitakianga mei ko mai i te Atua, kua na roto ïa i te kauraroanga ki taua ture ra tei akamouia.
22 E kopapa kiko e te au ivi to te Metua mei to te tangata nei rai te tu; e pera katoa oki te Tamaiti, i na ra ko te Vaerua Tapu kare ona kopapa kiko e te au ivi, e tutu Vaerua ua ra tona. Naringa oki e kare, kare i reira e rauka i te Vaerua Tapu kia noo ki roto ia tatou.
23 Ka rauka i te tangata te Vaerua Tapu, e ka eke mai ki rungaʼo iaia, i na ra, kare oki e noo tinamou mai kiaia.