1 Tika tikai, te tuatua maira te Atu kia koe e taku tavini e Iosepha, i te mea e kua ui mai koe kiaku kia kite e kia mārama e i naea au, ko te Atu, i te akatika i taku au tavini ko Aberahama, Isaaka, e Iakobo, e pera katoa a Mose, a Davida e Solomona, ei au tavini noku, i te akara atu anga i te ture e te apiianga no runga i ta ratou au vaine akaipoipo e manganui e te vaine tavini—

2 I na, e i na ra, ko au oki te Atu to kotou Atua, te ka pau atu kia koe no runga i teia tumu manako.

3 No reira, e akateateamamao i toou ngakau kia ariki e kia kauraro i te au akakiteanga taku ka oronga atu kia kotou na; ko te au tangata katoatoa tei rauka teia ture nei tei eeuia mai kia ratou, kia akono rai ratou i te reira e tikaʼi.

4 E i na, te eeu atu nei au kia kotou i tetai koreromotu ou e te mutukore; e me kare kotou e akono i taua koreromotu ra, ka akaapaia kotou i reira; no te mea kare e tangata e rauka kia patoi i teia koreromotu ka tomo atu ei ki roto i toku ra kakā.

5 Ko te au tangata katoatoa te ka rauka te akameitakianga mei toku rima atu, ka akono ratou i te ture tei akatakaia no taua akameitakianga ra, e tona tu katoa, mei tei akamouia i mua ake i te tango o te ao nei.

6 E no teia koreromotu ou nei e te mutukore, kua akamouia no te kīanga o toku nei kakā; e ko tei rauka te kīanga i reira ra, kia akono aia i taua ture ra e tikaʼi, e me kore ra ka akaapaia aia, te tuatua maira te Atu ko te Atua.

7 E tika tikai taku e karanga atu kia kotou, ko teia oki te akanooanga o teia ture nei: Ko te au koreromotu katoatoa, te au papauanga, te au tukuanga tika, te au taputou, te au tiaanga, te au raveanga angaanga, te au topirianga, te au putuputuanga, me kore ra tetai uatu mea tei kore e raveia ma te topiriia e te Vaerua Tapu o te taputou, o tei akatainuia, no teia tuatau nei e mutukore uatu, koia tei tapu rava, na roto i te eeuanga e te akaueanga o taku i akatainuia, e taku oki i iki i te ao nei kia mou i teia mana nei (e kua iki oki au i taku tavini ia Iosepha kia mou i teia mana nei i teia au rā openga nei, e kare atu oki e tangata ke mari ra e tai ua tangata i te enua nei te ka mou i teia mana nei e te au taviri o teia kautaunga nei tei orongaia mai), e kare oki o ratou tikaanga, te puapinga, me kore ra te mana i roto e i muri ake i te tuakaouanga mai mei te mate; e ko te au papauanga pouroa tei kore i raveia na roto i teia akatereanga, me mate te tangata ko tona openga rai ïa.

8 I na, ko toku are, e akanooia ïa ki te ture, te tuatua maira te Atu ko te Atua, e kare ki te tauetonoanga.

9 Ka ariki ainei au i tetai uatu orongaanga, te tuatua maira te Atu, tei kore i raveia na roto i toku nei ingoa?

10 E me ka ariki ainei au mei toou nga rima mai i tei kore i ikiia e au?

11 E ka iki ainei au i tetai no kotou na roto i teia tu, te tuatua maira te Atu, mari ua na roto i te ture, mei taku e ta taku Metua i akamana kia kotou na, i mua ake ka angaiaʼi te ao nei?

12 Ko au te Atu to kotou Atua; e te oronga atu nei au i teia akaueanga kia kotou—kare ua e tangata e tae ki te Metua mari ra iaku, me kore ra i taku nei tuatua, koia taku nei ture, te tuatua maira te Atu.

13 E ko te au mea pouroa i te ao nei me na te tangata nei i akamana, me na te au terono, na te au tama ariki, me kore na te au mana, e me kore na tetai au ingoa, e noatu e eaa, e kare e naku e me kore ra na taku nei tuatua, ka uriia te reira ki raro, te tuatua maira te Atu, e kare e vai mai i muri ake i te mateanga o te tangata nei, e kare katoa oki i muri ake i te tuakaouanga, te tuatua maira te Atu to kotou Atua.

14 E ko te au mea te ka vai mai naku ïa; e ko te au mea e kare e naku ka ruruia ki raro e ka takoreia.

15 No reira, me akaipoipo tetai tangata i tetai vaine nana i te ao nei, e kare aia i akaipoipo iaia na roto iaku, me kore ra i taku tuatua, e kua koreromotu aia kiaia i tona roa ki te ao nei, e pera katoa te vaine kiaia, kare ta raua koreromotu e to raua akaipoipoanga e vai me mate ake raua, e me tei vao ake raua i te ao nei; kare raua i reira e tapekaia e tetai uatu ture me tei vao ake raua i te ao nei.

16 No reira, me tei vao ake raua i te ao nei, kare raua e akaipoipo me kore ra kare e rauka te akaipoipo; i na ra ka ikiia raua ei angela no te rangi; koia te au tavini matuapuru, kia tavini i te aronga tei tau i te kakā maata atu, e te roa rava, e te kakā teiaa tikai.

17 Ko teia au angela oki kare ratou i akono i taku au ture; e no reira, kare e akamaataia to ratou, mari ra ka vai takake ua ratou e te okotai, e kare oki e akangateiteianga, i to ratou turanga akaoraanga, e mutukore ua atu; e kare oki e riro mai ei au atua, mari ra e au angela na te Atua e tuatau e tuatau uatu.

18 E pera katoa, tika tikai taku e karanga atu kia kotou, me akaipoipo tetai tangata i tetai vaine, e papau atura i tetai koreromotu kiaia no teia oraanga nei e mutukore uatu, e me kare oki taua koreromotu ra e naku, e na taku nei tuatua, koia taku nei ture, e kare i topiriia e te Vaerua Tapu o te taputou, na roto iaia tei akatainuia e tei ikiia e au ki teia mana nei, kare i reira e tikaanga me kore ra e mana me akaruke ake raua i te ao nei, no te mea kare oki raua i topiriia e au, te tuatua maira te Atu, e kare oki e na taku nei ture; me mate ake raua i te ao nei kare e arikiia mai i reira, no te mea kua akatakaia te au angela e te au atua ki reira, e kare oki e rauka ia raua kia na reira atu; e kare rava, no reira, e rauka toku kakā; ko toku are oki e are akanooia ïa no te ture, te tuatua maira te Atu ko te Atua.

19 E pera katoa, tika tikai taku e karanga atu kia kotou, me akaipoipo tetai tangata i tetai vaine na roto i taku nei tuatua, koia taku ture, e na roto katoa i taku koreromotu ou e te mutukore e kua topiriia kia raua e te Vaerua Tapu o te taputou, e ïa tei ikiia, e taku oki i oronga atu i teia mana nei ma te au taviri o teia kautaunga; e ka tuatuaia atu kia raua e—Ka tu akaou mai korua i roto i te tuakaouanga mua; e me i muri ake i te tuakaouanga mua, koia te rua o te tuakaouanga; e raukaʼi ia raua te au terono, te au basileia, te au tikaanga, te au mana, te au tutaraanga, te au mea teitei e te oonu—ei reira e tataiaʼi ki roto i te Puka Ora a te Punua Mamoe, e kare oki aia e tā tangata na roto i te akamaringi ua i te toto ara kore, e me akono koe i taku au akaueanga, e kare e tā tangata e te akamaringi i te toto ara kore, ka raveia kia raua i te au mea katoatoa te ka orongaia atu kia raua e taku au tavini, i teia tuatau e mutukore ua atu; e ka raveia atu rai te reira kia raua i vao ake i te ao nei; e ka na te pae raua i te au angela ma te au atua, tei akanooia ki reira, ki to raua akangateiteianga e te kakā katoa i roto i te au mea katoatoa, mei tei topiriia ki rungaʼo i to raua au upoko, e ka riro taua kakā ra ei kīanga e ei ua openga kore o te au uanga e tuatau e tuatau uatu.

20 E ka riro raua i reira ei au atua no te mea kare o raua openga; e ka vai raua ei mutukore e mutukore uatu, no te mea ka tupu uatu rai raua; e tutara raua ki rungaʼo i te katoatoa, no te mea, tei raro ake te au mea katoatoa ia raua. E ka riro mai raua i reira ei au atua, no te mea tei a raua te au mana katoatoa, e tei raro ake te au angela i ta raua akaaereanga.

21 Tika, tika tikai taku e karanga atu kia kotou, me kare kotou e akono i taku au ture kare e rauka ia kotou teia kakā.

22 Te oiti ua nei te ngutupa, e te ngata oki o te ara e tae atu ei ki te akangateiteianga e te akatinamouanga o te au oraanga, e toko iti ua ake te ka kitea e ratou, no te mea kare oki kotou i ariki mai iaku i te ao nei e kare katoa oki i kite mai iaku.

23 I na ra, me ariki mai kotou iaku i te ao nei, ka kite i reira kotou iaku, e ka rauka oki to kotou akangateiteianga, e te ngai e nooia e au ra tei reira katoa oki kotou.

24 Ko te au ora mutukore teia—kia kite i te Atua tika okotai e te pakari, e Iesu Mesia, tana i tono mai. Ko au oki ïa. E ariki mai i reira i taku au ture.

25 Te atea ua nei te ngutupa, e te pararauare nei te ara e tae atu ei ki te au mate; e manganui oki te ka aere ki reira, no te mea kare oki ratou i ariki mai iaku, e kare katoa oki i akono i taku ra au ture.

26 Tika, tika tikai taku e karanga atu kia kotou, me akaipoipo tetai tangata i tetai vaine kia tau ki taku ture, e kua topiriia raua e te Vaerua Tapu o te taputou, kia tau ki taku i akataka, e kia rave te tane me kore ra te vaine i tetai ara me kore ka aati i te koreromotu ou e te mutukore e tetai uatu, e te au tuatua kino ravarai, e me kare raua e tā tangata ma te akamaringi i te toto ara kore, ka tu mai raua i roto i te tuakaouanga mua, e ka tomo atu ki roto i to raua tupuanga mutukore; i na ra, ka mate raua i te kopapa nei, e ka tukuia atu ki te pāpāanga a Satani e tae uatu ki te rā akaoraanga, te tuatua maira te Atu ra ko te Atua.

27 Ko te akaiki puapinga kore ua i te Vaerua Tapu, ko te kare e akakoreia i te ao nei, e te ao a vao ake, ko te akamaringi ua ia i te toto ara kore, e ma te akatika i toku mateanga, i muri ake i toou arikianga mai i taku koreromotu ou e te mutukore, te tuatua maira te Atu ra ko te Atua; e ko tei kore oki e akono i teia ture nei kare rava aia e ō ki roto i toku kakā, mari ra ka akaapaia, te tuatua maira te Atu.

28 Ko au te Atu to Atua ra, e naku e oronga atu i te ture kia kotou no toku Kautaunga Tapu nei, mei tei akataongaia e au e taku Metua katoa i muake i te ao nei.

29 Kua rauka ia Aberahama te au mea katoatoa, e ko tei rauka oki iaia ra, kua na roto ïa i te eeuanga e te akaueanga, na roto i taku nei tuatua, te tuatua maira te Atu, e kua ō oki ki roto i tona akangateiteianga, e kua noo ki rungaʼo i tona ra terono.

30 Kua rauka oki ia Aberahama te au taputou no runga i tana uanga, e te uanga a tona kopu—e no roto mai oki koe i taua taukupu ra, koia taku tavini ko Iosepha—ko te ka tupu uatu rai me tei roto ïa i te ao nei; e no runga ia Aberahama e tana uanga oki, e ka tupu uatu rai ratou i vao ake i te ao nei, i roto i te ao nei e te ao a muri ake, e ka aite ratou mei te au etu i te maata, e mei te one taatai te ka kore rava e rauka kia tareia.

31 No kotou katoa teia taputou, no te mea no te uanga kotou o Aberahama, e kua raveia te taputou kia Aberahama; e na teia ture nei e tupu ei te angaanga a taku Metua, i akakakāʼi aia iaia uaorai.

32 No reira, e aere, e rave i te au angaanga a Aberahama; e tomo ki taku nei ture, e ka ora ïa kotou.

33 Me kare ra kotou e tomo ki taku ture, kare i reira e rauka ia kotou te taputou a toku Metua, tana i papau kia Aberahama.

34 Kua akaue atura te Atua ia Aberahama, e kua oronga atura a Sara ia Hagara ei vaine na Aberahama. Eaa ra a Sara i peraʼi? No te mea ko te ture teia; e manganui oki tei uangaia mai no roto ia Hagara. E kua akatupu oki teia i te taputou, e no tetai au mea ke atu.

35 Kua akaapaia ainei a Aberahama no teia? Tika tikai taku e karanga atu kia kotou, Kare; naku oki na te Atu i akaue kia pera.

36 Kua akaueia oki a Aberahama kia oronga atu i tana tamaiti ia Isaaka; kareka ra kua tataia e: Auraka rava koe e tā ua. Kare ra a Aberahama i patoi atu, e kua tuatuaia oki teia kiaia ei tuatua-tika.

37 Kua moe a Aberahama ki nga vaine tavini, e kua anau iora i te tamariki nana; e kua tuatuaia teia kiaia ei tuatua-tika, no te mea kua orongaia mai teia nga vaine nei kiaia, e kua akono oki aia i taku ture; mei Isaaka katoa, e kare oki a Iakobo mea ke i rave mari ra, ko tei akaueia kiaia, e no te mea kare a raua mea ke atu i rave mari ra ko tei akaueia mai kia raua, kua ō atu raua ki roto i to raua akangateiteianga, kia tau oki ki te au taputou, e kia noo ki runga i te au terono, e kare raua i te au angela mari ra e au atua.

38 E maata katoa oki ta Davida vaine, e te au vaine tavini, e pera katoa a Solomona e Mose ko taku au tavini, e tetai au tavini oku e manganui, mei muatangana i te kapuaanga mai e teia noaʼi; kare rava ratou e ara i teia au mea nei mari ua ra ko te au mea tei kore e no konei atu iaku nei.

39 Ko te au vaine a Davida e tana au vaine tavini naku te reira i oronga atu kiaia, na roto i taku tavini ia Natana, e tetai atu o te au peroveta tei mou i te au taviri o teia mana nei; e kare rava aia i ara i tetai o teia au mea nei mari ua ra ia Uria e tana vaine; e no reira, kua topa mai aia mei tona akangateiteianga, e kua rauka tona tuanga; e kare e rauka iaia tana au vaine ki vao i te ao nei, no te mea kua orongaia atu e au ki tetai ke, te tuatua maira te Atu.

40 Ko au to Atu ra toou Atua, e kua oronga atu au kia koe e taku tavini e Iosepha i tetai tikaanga e te akaoki mai nei i te au mea katoatoa. E pati i taau i anoano, e ka orongaia atu kia koe kia tau ki taku ture.

41 E mei taau oki i ui mai no runga i te akaturi; tika, tika tikai taku e karanga atu kia koe, me rauka i tetai tane tetai vaine i roto i teia koreromotu ou nei e te mutukore, e me noo atu taua vaine ki tetai tangata ke atu, e kare e naku i iki kia pera aia na roto i te akatainuanga tapu, kua akaturi aia e ka takoreia aia.

42 Me kare ra aia i roto i te koreromotu ou e te mutukore, e noo atura aia ki tetai tangata ke, kua akaturi rai aia.

43 E me noo atu tana tane ki tetai vaine ke, e tei raro ake aia i tetai taputouanga, kua aati aia i tana taputou e kua akaturi katoa.

44 E me kare ra te vaine i akaturi, kua tiamā ra e kare i aati i tana taputou, e kua kite tikai oki aia i te reira, e me eeu atu au kia koe, e taku tavini e Iosepha, i reira e mana toou, na roto i te mana o toku Kautaunga Tapu, kia apai iaia e oronga atu ki te tane kare i akaturi kua noo akarongo ra; e ka akariroia oki aia ei tutara ki rungaʼo i te au tangata e manganui.

45 Kua oronga atu oki au kia koe i te au taviri e te mana o te kautaunga, e kua akaoki atu oki au i te au mea e manganui, e kua akakite atu i te au mea katoatoa kia koe i te tuatau tau tikai.

46 E tika, tika tikai taku e karanga atu kia koe, ko taau e topiri i te ao nei e topiri katoa ïa i te rangi; e ko taau e akamou i te ao nei, na roto i toku nei ingoa e taku nei ture, te tuatua maira te Atu, ka vai mutukore uatu rai i te au rangi, e taau au ara ka akakore i te ao nei, ka akakore katoa ïa i te rangi ra; e ko tei ara e kua tamou koe, ka tamou katoa ïa i te rangi.

47 E pera katoa, tika tikai taku e karanga akaou atu nei, ko taau e akameitaki ra, ko taku rai ïa ka akameitaki, e ko taau ka taumaa ra, ko taku rai ïa ka taumaa te tuatua maira te Atu; ko au oki; ko te Atu to kotou Atua.

48 E pera katoa, tika tikai taku e karanga atu kia koe, e taku tavini e Iosepha, ko taau e oronga i te ao nei, e ko taau e oronga atu i tetai i te ao nei, na roto i taku nei tuatua e kia tau ki taku nei ture, ka atoroia ki te au akameitakianga e kare oki i te au taumaaanga, e ma toku mana katoa, te tuatua maira te Atu, e kare oki e akaapaanga i te enua nei e i te rangi katoa.

49 Ko au oki te Atua ra ko toou Atua, e ka noo oki ki o kotou na e tae uatu ki te openga o te ao nei, e mutukore uatu; e tika tikai, te topiri nei au ki rungaʼo ia koe i toou akangateiteianga, e te akateateamamao i tetai terono noou i roto i te basileia o taku Metua, ma Aberahama toou metua.

50 I na, kua kite ana au i taau au atinga, e ka akakore au i taau au ara; kua kite oki au i taau au atinga ma te kauraro tikai ki te au mea taku i akakite atu kia koe. E aere, e naku e akaora ia koe, mei taku i ariki i te atinga a Aberahama no tana tamaiti ko Isaaka.

51 Tika tikai taku e karanga atu kia koe: Te oronga atu nei au i tetai akaueanga ki taku tavini vaine ko Emma Smith, taau vaine, taku i oronga atu kia koe, kia noo ua aia e auraka aia e rave atu i taku i akaue atu kia koe kia oronga atu kiaia; kua rave oki au i teia, te tuatua maira te Atu, ei timataanga kia koe i te au mea katoatoa, mei taku i rave kia Aberahama, e ka anoano oki au i tetai atinga mei ia koe, na roto i te koreromotu e te atinga.

52 E kia ariki pouroa mai oki taku tavini vaine ko Emma Smith i tei orongaia atu ki taku tavini ko Iosepha, ko tei tiamā e te mā iaku; e ko te aronga kare i tiamā e kua karanga e kua tiamā ratou, ka takoreia ïa, te tuatua maira te Atu ko te Atua.

53 Ko au oki te Atu toou Atua, e kauraro mai kotou i toku nei reo; e te oronga atu nei au ki taku tavini ko Iosepha kia riro aia ei tutara ki rungaʼo i te au mea e manganui; kua tu akarongo oki aia ki rungaʼo i tetai au mea, e ka akamaroiroi atu au iaia mei teianei atu.

54 E te akaue atu nei au i taku tavini vaine ia Emma Smith, kia noo rai e kia apiri atu ki taku tavini kia Iosepha, e auraka ki tetai uatu tangata ke. I na ra, me kare aia e akono i teia akaueanga ka takoreia aia, te tuatua maira te Atu; ko au oki te Atu toou Atua, e ka takore au iaia me kare aia e akono i taku ture.

55 I na ra, me kare aia e kauraro i teia akaueanga, ka rave i reira taku tavini ko Iosepha i te au mea katoatoa nona, mei tana i tuatua mai; e ka akameitaki au iaia e ka akauanga iaia e ka oronga atu kiaia tataki anere i te ao nei, o te au metua tane e te au metua vaine, te au teina tungane e te au tuaine, te au ngutuare e te enua, te au vaine e te tamariki, e te au korona o te au ora mutukore i roto i te au ao mutukore.

56 E pera katoa, tika tikai taku e karanga atu, kia tika i taku tavini vaine kia akakore mai i te au tarevakē a taku tavini ko Iosepha; ei reira oki ta Emma au tarevakē e akakoreia mai ei, no te mea kua tarevakē aia i mua iaku nei; e ka akameitaki atu oki au ko to Atua iaia, e ka akauanga iaia, e ka akarekareka katoa i tona ngakau.

57 E pera katoa, te karanga akaou atu nei au, auraka oki taku tavini e tuku i tana au apinga ki vao, ko te aere aea mai tetai enemi ko te tamate iaia; te kimi nei oki a Satani kia takore atu; ko au oki te Atu to Atua, e e tavini oki aia noku; e i na, ei vaitata oki au iaia, mei iaku oki e Aberahama, to kotou metua, e tae uatu ki tona akangateiteianga e te kakā.

58 E teianei, no runga i te ture o te kautaunga, e manganui oki te au mea no te reira.

59 Tika tikai, me kapikiia tetai tangata e taku Metua, mei ia Aarona te tu, e toku uaorai reo, e te reo katoa o tei tono mai iaku nei, e kua oronga atu oki au kiaia i te au taviri o te mana o teia kautaunga nei, e me rave aia i tetai angaanga na roto i toku nei ingoa, e kia tau katoa ki taku nei ture e taku nei tuatua, kare aia e rave ara, e ka akatika au iaia.

60 No reira, auraka rava tetai tangata kia akaapa atu i taku tavini ia Iosepha; ka akatika oki au iaia; ka rave oki aia i te atinga taku i anoano iaia no tana au aatianga ture, te tuatua maira te Atu ra to kotou Atua.

61 E pera katoa, no runga i te ture o te kautaunga—me akaipoipo tetai tane i tetai paretenia, e anoano atura kia akaipoipo i tetai akaou, e ko te mea mua kua oronga i tana akatikaanga, e me akaipoipo aia i te rua, e nga paretenia raua ravarai, e kare i taputou ki tetai uatu tangata, kua tika aia i reira; kare aia e akaturi no te mea kua orongaia mai kiaia; kare e rauka iaia kia akaturi no teia tei orongaia kiaia, e kare ki tetai ke atu.

62 E me e tai ngauru paretenia i orongaia kiaia e teia ture nei, kare rava e rauka iaia kia akaturi, nana oki ratou, e kua orongaia ratou kiaia; e no reira kua tikaia aia.

63 I na ra, me ka riro atu tetai o te ngauru paretenia nei tana i akaipoipo ki tetai tangata ke, kua akaturi aia, e ka takoreia; kua orongaia atu oki ratou kiaia kia akauanga e kia akakī i te enua, kia tau ki taku akaueanga, e kia akatupu katoa i te taputou tei orongaia mai e taku metua i te tango o te ao nei ka akamouiaʼi, e no to ratou akangateiteianga i roto i te au ao mutukore, kia rauka ia ratou kia anau mai i te au vaerua tangata; ko te angaanga oki teia a taku Metua, kia akakakāia aia.

64 E pera katoa, tika, tika tikai, taku e karanga atu kia koe, me e vaine ta tetai tangata, e te mou nei i te au taviri o teia mana, e apii atura aia kiaia i te ture o toku nei kautaunga, tei tau ki teia au mea nei, i reira e irinaki atu aia e kia tauturu atu iaia, me kore ra ka takoreia aia, te tuatua maira te Atu toou Atua; ka takore oki au iaia; e ka akamaata oki au i toku ingoa ki rungaʼo i te aronga tei ariki e tei akono i taku ture.

65 No reira, ka tika teia i te ture iaku, me kare te vaine e ariki mai i teia ture, kia ariki mai oki te tane i te au mea katoatoa taku, ta te Atu tona Atua, ka oronga atu kiaia, no te mea e kare oki aia i irinaki e i rave katoa atu i te tauturu i tana tane kia tau ki taku tuatua; kua riro mai aia i reira ei vaine aati ture; e kua matara mai te tane i reira mei te ture a Sara, ko tei rave atu kia Aberahama kia tau ki te ture i toku akaueanga atu kia Aberahama kia rave ia Hagara ei vaine nana.

66 E teianei, kia tau ki teia ture nei, tika, tika tikai taku e karanga atu kia kotou, ka eeu akaou atu rai au kia kotou a muri ake; e no reira, kua rava ua teia no teianei. I na, ko au te Alepha e te Omega. Amene.