1 E akarongo mai e te au tangata o taku nei Akonoanga, te tuatua maira te Atu, to kotou Atua, e akarongo mai ki te tuatua a te Atu no runga ia kotou—

2 Ka aere poitirere ua mai te Atu ki tona iero; e ka eke mai oki te Atu ki raro i te ao nei ma te taumaa no te akavaanga; ae, ki rungaʼo oki i te au iti tangata katoatoa tei akangaropoina i te Atua, e ki rungaʼo i te aronga atua kore ravarai i rotopu ia kotou na.

3 E ka akaari mai oki aia i tona rima tapu ki mua i te mata o te au iti tangata ravarai, e ka kite oki te au ope o te enua nei i te akaoraanga a to ratou Atua.

4 No reira, e akateateamamao, e akateateamamao kotou, e taku iti tangata; e akatapu ia kotou uaorai; e uipa mai ki te ngai okotai, e te au tangata o taku nei akonoanga, i runga i te enua ko Ziona, e kotou pouroa oki tei kore i akaueia ana kia noo.

5 E aere ki vao ake ia Babulonia. Kia mā kotou, e tei apai i te ariki a te Atu.

6 E kapiki i to kotou putuputuanga tapu, e tuatua putuputu tetai ki tetai. E kia kapiki te tangata tatakitai i te ingoa o te Atu.

7 Ae, tika tikai taku e karanga akaou atu nei kia kotou, kua tae oki ki te tuatau e tae atu ei te reo o te Atu kia kotou: E akaatea mai mei Babulonia; e akaputuputu mai mei rotopu mai i te au iti tangata, mei nga vaarua matangi e ā, mei tetai ope o te rangi ki tetai.

8 E tono atu i te au ereta o taku nei akonoanga ki to te pa enua mamao; ki te au enua o te moana; e ki te au enua ke mai; e kapiki atu ki te au iti tangata katoatoa, ki te au Etene na mua, e ki te ngati Iuda i reira.

9 I na, e i na ra, ko teia ta ratou ka kapiki atu, e te reo katoa o te Atu ki te tangata katoatoa: E aere atu kotou ki te enua o Ziona, kia akamaataia oki te au kotinga o toku nei iti tangata, e kia akamaroiroiia oki tona au titi, e kia aere atu a Ziona ki mua ki te au tuanga e pini uake.

10 Ae, kia taea oki te kapiki ki te au tangata katoatoa: E ara, e tu ki runga e aere atu e aravei atu i te Tane Akaipoipo Ou; I na, e i na ra, te aere mai nei oki te Tane Akaipoipo Ou; e aere atu e aravei iaia. E akateateamamao ia kotou uaorai no te rā maata o te Atu.

11 No reira, kia matakite, kare oki kotou i kite i te rā e te ora.

12 No reira, ko ratou tei noo ki rotopu i te au Etene ra, e oro ki Ziona.

13 E ko ratou oki no te ngati Iuda ra e oro atu ki Ierusalema, ki te au maunga o te are o te Atu ra.

14 E aere ke atu mei rotopu mai i te au iti tangata, mei ia Babulonia katoa, mei rotopu mai i te aronga kino ra, koia a Babulonia vaerua.

15 I na ra, tika tikai, te tuatua maira te Atu, auraka kotou kia rapurapu me akaruke atu, i na ra, kia na mua te teateamamao i te au mea katoa ki mua ia kotou na; e ko te ka aere ra, auraka aia kia anga mai ki muri, ko te tae oki tetai mate poitirere kiaia.

16 E ariu e akarongo mai, e te au iti tangata e noo i te enua nei. E akarongo kapipiti mai e te au ereta o taku nei akonoanga, kia rongo kotou i te reo o te Atu; te kapiki nei oki aia ki te au tangata katoatoa, e te akaue katoa nei oki aia ki te au tangata katoatoa i te au ngai ravarai kia tataraara.

17 E i na, kua unga mai oki te Atu ko te Atua i te angela i te kapikianga ma te reo maata na rotopu i te mareva e: E akateateamamao i te ara o te Atu, e akatika ua i tona ra au aerenga, te vaitata mai nei oki te ora e tae mai ei aia—

18 Ei reira te Punua Mamoe e tu ei ki runga i te Maunga ko Ziona, ka kapiti katoa ia mai oki kiaia e tai anere e ā ngauru ma ā tauatini, e kua tataia ki rungaʼo i to ratou mimiti te ingoa o tona ra Metua.

19 No reira, e akateateamamao no te aerenga mai o te Tane Akaipoipo Ou; e aere, e aere atu e aravei iaia.

20 E i na, ka tu oki aia ki runga i te Maunga ko Oliveta, e ki rungaʼo i te moana ririnui koia te oonu maata, e ki runga i te au enua o te pa moana, e ki runga katoa i te enua ko Ziona.

21 E ka tuatua mai oki tona reo mei Ziona mai, e ka tuatua mai aia mei Ierusalema mai, e ka akarongoia oki tona reo ki rotopu i te au tangata ravarai;

22 E ka aite te reo mei te aruru o te au vai, e mei te aruru o te mangungu maata, te ka takore mai i te au maunga, e kare oki e kiteaia te au ō.

23 Ka akaue oki aia i te oonu maata, e ka oparaia atu te reira ki muri ki te au enua i te pae tokerau, e ka riro oki te au enua ei okotai.

24 E ko te enua ko Ierusalema, e te enua ko Ziona, ka akaokiia raua ki to raua ngai tikai, e ka aite oki te enua nei mei te tu rai i muatangana kare i akatakakeia ake.

25 E ka tu oki te Atu, koia te Akaora, ki rotopu i tona iti tangata, e ka tutara oki ki rungaʼo i te au kopapa ravarai.

26 E ko te aronga i roto i te pa enua tokerau ka akamaaraia rai ratou e te Atu; e ka akarongo oki to ratou au peroveta i tona reo; e kare oki e tapū akaou ia ratou; e ka pa oki ratou i te au toka, e ka tae ua mai te aiti ki mua i to ratou aroaro.

27 E ka akatueraia tetai mataara ki rotopu i te oonu maata.

28 E ka riro to ratou au enemi i te aruia e ratou,

29 E ka rauka mai tetai au punavai ora i roto i te medebara tanea; e kare oki te one maro e riro akaou ei enua kaki vai.

30 E ka apai mai oki ratou i ta ratou au apinga nui e te manea ki te tamariki a Epharaima, toku ra au tavini.

31 E ka ru te au kotinga o te au tuaivi mutukore i mua i to ratou aroaro.

32 Ei reira ratou e tupou ei ki raro e ka akakoronaia ki te kakā, i Ziona oki, e te au rima o te au tavini o te Atu, koia te au tamariki a Epharaima.

33 E ka akakīia oki ratou ki te au imene mataora mutukore.

34 I na, ko te akameitakianga teia o te Atua mutukore ki rungaʼo i te au kopu o Iseraela, e ko te au akameitakianga maata atu ka vai te reira ki rungaʼo ia Epharaima e tona ai taeake.

35 E pera katoa ratou te kopu o Iuda, i muri ake i to ratou mamae, ka akatapuia kia tapu tikai ki mua i te Atu, kia noo ki mua i tona aroaro i te ao e te po, e tuatau e tuatau uatu.

36 E teianei, tika tikai te tuatua maira te Atu, kia kitea oki teia au mea nei ki rotopu ia kotou, e te au tangata o te enua nei, kua unga atu oki au i taku angela na rotopu i te mareva o te ao, ma te evangelia mutukore, tei mama ana oki ki tetai pae e kua oronga atu oki ki te tangata, e ka mama atu oki ki te maataanga e noo i te enua nei.

37 E ka tutuia oki teia evangelia ki te au iti tangata katoatoa, ki te au kopu, e te au reo, e te au tangata.

38 E ka aere atu oki te au tavini o te Atua e ka tutu aere ma te reo maata: E mataku i te Atua ma te akakakā atu iaia, te vaitata mai nei oki te ora akautungaanga nana ra;

39 E akamori iaia tei anga i te rangi, e te enua, e te tai, e te au vai puipui ra—

40 I te kapikianga i te ingoa o te Atu i te po e te ao, i te na ko anga e: Me ka tika ia koe, ka vevete ake ana i te au rangi, kia eke mai koe ki raro, e kia tae a vai mai te au maunga ki mua i toou aroaro.

41 E ka pauia mai oki ki rungaʼo i to ratou au upoko; e ko te aereanga mai o te Atu mei te aʼi mura ra i te kā, e mei te aʼi e akapupu i te vai ra.

42 E te Atu, ka eke mai ana ki raro ka akakite ana i to ingoa ki te aronga patoi ia koe, e ka ruketekete oki te au iti tangata katoatoa ki mua i toou ra aroaro—

43 Me rave oki koe i tetai au mea rikarika, kare ratou i manako ana;

44 Ae, me eke mai koe ki raro nei, e te au maunga e tae ra ki mua i to aroaro, e ka aravei atu koe iaia ma tei rekareka e tei angaanga ma te tuatua-tika, e tei akamaara ia koe i roto i toou ra au aerenga.

45 E mei muatangana mai oki o te ao nei, kare ake ra te tangata nei i akarongo ake ki to ratou taringa, e kare oki i kite mata tikai, e te Atua, ko koe anake ra, i te au mea mamaata taau i akateateamamao nona ko tei tiaki iaia ra.

46 E ka tuatuaia oki e: Koai ra teia e aere mai nei mei ko mai i te Atua i te rangi ra ma te kakau tei tounaia; e mei te au ngai kitea kore ia mai, e kua aao i tona kakau kakā, e te aere ra i roto i tona ra maroiroi maata?

47 E ka karanga mai aia e: Ko au oki teia tei tuatua mai ma te tuatua-tika, e te mana kia akaora.

48 E ka kakauia oki te Atu ki te kakau muramura, e koia e tona kakau mei te tangata e takatakai ra i te vine.

49 E no te kakā maata o tona ra aroaro, ka tapoki te rā i tona mata i te akama, e ka tapū oki te marama i tona mārama, e ka tiriaia atu te au etu mei to ratou au ngai mai.

50 E ka rongoia tona reo: Kua takatakai au anake i te taomianga vine, e kua apai mai i te akautungaanga ki rungaʼo i te au tangata ravarai; e kare oki tetai iaku nei;

51 E kua takatakai oki au ia ratou i roto i toku nei riri otooto, e kua na runga ia ratou, e kua pipi oki au i to ratou toto ki runga i toku kakau, e tou rava atura toku kakau; ko te rā oki teia o toku riri akaoko tei vai ana ki roto i toku ngakau.

52 E teianei, kua tae mai te mataiti o toku aronga tei akaoraia; e ka taiku oki ratou i te aroa takinga meitaki o to ratou Atu, e te au mea katoatoa tana i oronga mai kia ratou kia tau ki tona tu meitaki, e kia tau ki tona aroa takinga meitaki, e tuatau e tuatau uatu.

53 I roto i to ratou au tumatetenga ravarai kua mamae katoa aia. E na te angela mei mua mai i tona aroaro i akaora ia ratou; e na roto i tona aroa, e tona tu tangi, kua akaora aia ia ratou, e kua turu ia ratou, e kua utuutu ia ratou mei te au rā i topa;

54 Ae, koia katoa a Enoka, e ratou katoa tei noo kiaia ra; pera te au peroveta i mua ake iaia; e pera katoa a Noa, e to mua ake iaia ra; e Mose katoa, e to mua ake iaia ra;

55 E mei ia Mose e tae rava mai kia Elia te peroveta, e mei ia Elia te peroveta kia Ioane, tei piri atu ki te Mesia i roto i tona tuakaouanga ra, e te au aposetolo tapu, ma Aberahama, Isaaka, e Iakobo, ka noo oki ratou ki mua i te aroaro o te Punua Mamoe.

56 E ka tuera oki te au vaarua o te aronga tapu, e ka aere mai oki ratou ki runga e ka tu ki te rima katau o te Punua Mamoe, me tu ake aia ki runga i te Maunga Ziona, e ki rungaʼo i te oire tapu ra, te Ierusalema Ou ra; e ka imene oki ratou i te imene o te Punua Mamoe, i te po e te ao, e tuatau e tuatau uatu.

57 E no teia tumu nei, kia akariroiaʼi te tangata nei ei au tangata ariki mai i te au kakā te ka eeuia mai, kua tuku mai oki te Atu i te kīanga o tana ra evangelia, tana koreromotu mutukore, ko tei akakite mārama ua ia mai e te mama—

58 Kia akateateamamao atu i tei apikepike no te au mea te ka tae mai ki te enua nei, e no te karere a te Atu i te rā e taakamaʼi te apike i te aronga pakari, e ka riro mai te mea meangiti ei iti tangata maroiroi, e ka tuku oki e rua tangata i te nga ngauruanga o te tauatini kia oro ke.

59 E na roto i te au mea apikepike o te enua nei e pāpāʼi te Atu i te au iti tangata ki te mana o tona ra Vaerua.

60 E no teia tumu nei i orongaia mai ei teia au akaueanga nei; kua akaueia mai e auraka e orongaia ki to te ao nei, mei te rā i orongaia mai ei, i teianei ra kia tukuia atu ki te au kopapa katoatoa—

61 E kia tau oki teia ki te manako e te anoano katoa o te Atu, tei tutara ki rungaʼo i te au kopapa katoatoa.

62 E ko tei tataraara e tei tamā iaia uaorai ki mua i te Atu, ka rauka iaia te ora mutukore.

63 E ki runga i te aronga tei kore i ariu mai ki te reo o te Atu, ka tupu oki te tuatua tei tataia e te peroveta ko Mose, kia tipu ke ia oki ratou mei rotopu i te tangata nei.

64 E pera katoa tei tataia e te peroveta ko Malaki: E, i na, te tae maira te rā te ka tu a umu i te kā anga, e te aronga ngakau parau ravarai, e te aronga katoa i rave i te kino ra, e riro ïa ei teita; e kā oki ratou i taua rā ra kia tae maira, te tuatua maira Iehova Sabaota ra, kare rava e akatoeia te tumu ma te rara katoa ra.

65 No reira, ko te pauanga teia a te Atu kia ratou:

66 Me tae ki taua rā ra e aere mai ei au ki toku tikai, kare rava tetai o kotou i ariki mai iaku, e kua tuaruia kotou ki vao.

67 Me kapiki akaou atu au, kare ua tetai o kotou i pau mai; e i na, kare ua toku rima i tapotoia kia kore oki e rauka iaku kia akaora, e kia kore oki e rauka i toku mana kia akaora mai.

68 I na, na roto i taku tuatua pakari kua maro te tai. Kua akariro au i te au kauvai ei medebara; kua aunga kino to ratou au ika, e kua mate i te kaki vai.

69 Ka akakakau au i te rangi ki te poiri kerekere e ka akariro i to ratou tapoki e kakau pute.

70 E ko ta kotou teia ka rauka mei konei atu i toku rima—e ka takoto kotou ki roto i te tumatetenga.

71 I na, e i na ra, kare oki e tangata ei akaora ia kotou; no te mea kare oki kotou i kauraro i toku reo i toku kapikianga atu ia kotou mei te rangi atu, kare oki kotou i irinaki i toku au tavini, e i te ungaia atu anga ratou kia kotou, kare kotou i ariki mai ia ratou.

72 No reira, kua topiri atu ra ratou i te kite papu e kua tapeka oki i te au ture, e kua tukuia atu oki kotou ki te poiri.

73 E aere atura ratou ki vao mai i te poiri tangotango, tei reira oki te aue, e te mii, e te pakatianga nio.

74 I na na te Atu oki to kotou ra Atua i tuatua mai i te reira. Amene.