Tuanga 14
Te eeuanga tei orongaia mai na roto ia Iosepha Timeti te Peroveta, kia David Whitmer, i Fayette, New York, Tiunu 1829 (History of the Church, 1:48–50). Kua rekareka tikai oki te kopu tangata o Whitmer no te akauriangaia o te Puka a Momoni. Kua taui atu a Iosepha i tona ngai nooanga ki te ngutuare o Peter Whitmer, Metua, e kua noo aia ki reira e tae uatu ki te tuatau i oti ei te angaanga akaurianga e i akatikaiaʼi kia neneiia teia puka. Kua rauka oki i nga tamaroa toko toru a Whitmer te kite e kua tika teia angaanga nei, e kua inangaro tikai oki ratou kia kite i ta ratou tuanga angaanga tatakitai kia rave. Ko teia eeuanga e te rua te ka aru mai (Tuanga 15 e te 16) kua orongaia mai te reira ei pau i tetai uianga na roto mai i te Urima e te Tumima. Kua riro mai a David Whitmer i muri mai e ko tetai o nga Kite Toko Toru ki te Puka a Momoni.
1–6, Te rave angaanga i roto i te kainga vine ka rauka ia ratou te akaoraanga; 7–8, Ko te oraanga mutukore, ko te orongaanga maata rava ïa i te au orongaanga a te Atua; 9–11, Na te Mesia i anga i te rangi e te ao nei.
1 E angaanga maata e te umere te ka tae mai ki rotopu i te tamariki a te tangata nei.
2 I na, ko au te Atua; e akarongo mai ki taku tuatua, e mea ora oki ïa e te ririnui, e kokoi maata oki to te reira i to te koke matarua, i te vai ia anga i rotopu i te au paupauanga e te roro o te ivi katoa; no reira e akarongo mai ki taku au tuatua.
3 I na, kua teatea te kainga e kua mou; no reira, ko tei anoano i te kokoti, kia vero aia ki tana matipi ma tona maroiroi, e kokoti koi vai ake te rā, e raukaʼi iaia kia akaputuputu no tona vaerua i te akaoraanga mutukore i roto i te basileia o te Atua.
4 Ae, ko te ka vero ki tana matipi e ka kokoti, na te Atua aia e kapiki.
5 No reira, me ka pati mai koe kiaku ka rauka ïa ia koe; me ka topapa koe, ka tueraia mai kia koe.
6 E kimi kia rauka mai, e kia akatumu i te akakoroanga o Ziona. E akono i taku au akaueanga i te au mea ravarai.
7 E, me akono koe i taku au akaueanga ma te vai maroiroi uatu rai e tae uatu ki te openga, ka rauka ia koe te ora mutukore, ko te orongaanga maata rava atu ïa i te au orongaanga katoatoa a te Atua.
8 E ka tae akera, me ka pati koe ki te Metua na roto i toku ingoa, na roto i te akarongo ma te irinakianga, ka rauka ia koe te Vaerua Tapu, ko te ka oronga mai kia koe kia tu oki koe ei kite papu no te au mea taau ka akarongo e ka akara katoa, e kia akakite katoa oki koe i te tataraara ki teia uki nei.
9 I na, ko Iesu Mesia au, te Tamaiti a te Atua ora, ko tei anga i te au rangi e te enua nei, koia te mārama kare rava oki e rauka kia uunaia ki roto i te poiri;
10 No reira, ka apai mai au i te kīanga o taku nei evangelia mei te au Etene ki te ngutuare o Iseraela e tikaʼi.
11 E i na, ko koe oki a David, e kua kapikiia oki koe kia tauturu; ko teia me ka rave koe ma te tu akarongo, ka akameitakiia koe i te pae vaerua e te pae kopapa katoa, e e tutaki maata tikai oki toou. Amene.