1 I na, kua kapikiia koe e kua ikiia ei tata i te Puka a Momoni, e ki taku angaanga tapu katoa; e kua akatu katoa mai oki au ia koe ki runga mei roto mai i toou au manamanata, e kua ako atu oki ia koe, e kua matara mai oki koe mei roto mai i toou au enemi, e kua matara mai oki koe mei roto mai i te mana o Satani e mei te poiri katoa!

2 Kareka ra, kare oki aau kotoeanga i roto i taau au aatianga ture; kareka ra, e aere i toou aereanga e auraka e ara akaou.

3 E akamaata atu i te angaanga o toou taonga; e i muri ake i toou ruruanga i te ua ki toou kainga e kua meitaki te reira, e aere viviki atu ki te akonoanga i Colesville, i Fayette, e i Manchester, e na ratou e tauturu mai ia koe; e ka akameitaki atu au ia ratou i te pae vaerua e te pae kopapa katoa;

4 I na ra, me kare ratou e ariki mai ia koe, ka tuku atu au i tetai taumaaanga ki rungaʼo ia ratou e kare i te akameitakianga.

5 E ka kapiki putuputu ua atu rai koe ki te Atua na roto i toku nei ingoa, e ma te tata katoa i te au mea te ka orongaia atu kia koe e te Akapumaana, e te akamārama katoa anga i te au irava tapu katoatoa ki te akonoanga.

6 E ka orongaia atu oki kia koe i taua taime rai i taau ka tuatua e taau katoa ka tata, e ka akarongo mai oki ratou i te reira, me kore ra, ka tono atu au i tetai taumaaanga kia ratou, e kare oki i te akameitakianga.

7 E ka oronga oki koe i taau au angaanga katoatoa no Ziona; e na roto i teia e raukaʼi ia koe te maroiroi.

8 Kia akakoromaki i roto i te taime manamanata, e manganui oki te reira te ka tae kia koe; i na ra e akakoromaki i te reira, no te mea tei vaitata ua rai au ia koe e tae uatu ki te openga o toou au puke rā.

9 E i te angaanga o te pae kopapa kare oou maroiroi, kare e ko toou kapikianga ïa. Kia akamaata koe i te angaanga i kapikiiaʼi koe ki toou taonga, e kia akamārama i te au irava tapu katoatoa, e ma te rave uatu rai i te tukuanga rima e te akatinamouanga i te au akonoanga.

10 E ka rave uatu rai oki toou taeake ko Oliver i te akakite atu i toku ingoa ki mua i to te ao nei, e pera katoa ki te akonoanga. Auraka aia e manako e ka rava tana tuatua noku nei; e i na, tei vaitata oki au iaia e tae uatu ki te openga.

11 Ka rauka iaia te kakā na roto iaku, e auraka oki e nana anake ua, me i roto i te tu apikepike, me kore ra i roto i te tu maroiroi, me i roto i te tuikaaanga, me kore ra i te au;

12 E i te au taime katoatoa, e i te au ngai katoatoa, ka amama aia i tona vaa, e ka akakite i taku evangelia mei te reo rai o te pu, i te po e te ao. E ka oronga au i te maroiroi kiaia, koia tei kore rava i kiteaia ana i rotopu i te tangata nei.

13 Auraka e pati i te au semeio, mari ua kia akaue rava au ia koe, ko taau ka rave ua, ko te tuaru i te au diabolo, te akaoraanga i te maki, e te patoianga atu i te au ovi poitini, e te au poitini mate katoa;

14 E ko teia au mea nei, auraka rava koe e rave, mari ra kia patiia koe e te aronga tei anoano ia koe kia rave, kia tupu oki ta te au irava tapu; e ka rave oki koe kia tau ki tei tataia ra.

15 E noatu eaa te ngai taau ka tomo atu, e kare ratou e ariki mai ia koe no toku nei ingoa, e akaruke koe i tetai taumaaanga ki reira e kare i te akameitakianga, na roto i te ruruanga i te repo o toou vaevae kia ratou ei kite, e ma te tamā i toou vaevae na te pae arataa.

16 E ka tae akera e ko tetai uatu te ka tuku mai i to ratou rima ki rungaʼo ia koe ma te riri, e akaue atu koe kia tamateia na roto i toku nei ingoa; e, i na, ka tamate au ia ratou kia tau ki taau au tuatua, i roto i te tuatau tei tau iaku.

17 E ko te ka aru atu ia koe ki te ture, ka taumaaia aia e te ture.

18 Auraka rava koe e apai i tetai pute moni me kore te pute manga, auraka katoa nga tokotoko, e auraka katoa te pereue e rua, no te mea ka oronga atu te akonoanga i te reira taime i taau i anoano no te kai e no te kakau, no nga tamaka e te moni, e te pute manga.

19 Kua kapikiia oki koe kia topetope i taku kainga vine ma te pakotianga ririnui, ae, no te taime openga; e pera katoa ko te aronga pouroa taau i akataonga, e ka rave katoa oki ratou kia tau ki teia akaraanga. Amene.