ဩဝါဒနှင့် ပဋိညာဉ်များ ၂၇

အပိုဒ်ငယ် ၂၇

၁၈၃၀ ခု၊ ဩဂုတ်လ၊ ဟာမိုနီ၊ ပန်ဆယ်လ်ဗေးနီးယား၌ ပရောဖက်ဂျိုးဇက်စမစ်သို့ ပေးတော်မူခဲ့သည့် ဗျာဒိတ်တော်။ ပွဲတော်မုန့်နှင့် စပျစ်ရည်ကို စီမံဆောင်ရွက်ရာ ဘာသာရေးအစည်းအဝေးတွက် ပြင်ဆင်စဉ်တွင်၊ ဂျိုးဇက်စမစ်သည် စပျစ်ရည်ရရှိဖို့ သွား၏။ သူသည် ကောင်းကင်ဘုံရှင်တမန်တော်နှင့်တွေ့ ၍၊ ဤဗျာဒိတ်တော်ကို လက်ခံရရှိ၏။ ထိုဗျာဒိတ်တော်၏ တစ်စိတ်တစ်ပိုင်းကို ထိုအချိန်၌ရေးလေပြီး၊ ကျန်ကြွင်းသည့်အရာကို နောက်လ စက်တင်ဘာလတွင် ရေး၏။ အသင်းတော်၏ပွဲတော်အစည်းအဝေးများ၌၊ ယခုတွင် စပျစ်ရည်အစား၊ ရေကို အသုံးပြုကြ၏။

၁–၄၊ ပွဲတော်ကို စားသုံးရာ၌ အသုံးပြုရမည့် အထိမ်းအမှတ်များကို ဖော်ပြ၏။ ၅–၁၄၊ ခရစ်တော်နှင့် သာသနာအားလုံးမှ သူ၏ကျွန်တို့သည် ပွဲတော်ကို သုံးဆောင်ကြလိမ့်မည်။ ၁၅–၁၈၊ ဘုရားသခင်၏ ချပ်ဝတ်တန်ဆာအစုံကို ဝတ်ဆင်ကြလော့။

၁ သင်တို့၏ကိုယ်တော်ရှင်၊ သင်တို့၏ဘုရားသခင်၊ ထို့အတူ သင်တို့၏ရွေးနုတ်ရှင်၊ ယေရှုခရစ်တော်၏ အသံကို နားထောင်လော့။ သူ၏စကားသည် ရှင်သန်၍ တန်ခိုးကြီး၏။

၂ အကြောင်းမူကား၊ ရှုလော့၊ သင်တို့ကို ငါဆိုသည်ကား၊ သင်တို့သည် ပွဲတော်ကို စားသုံးသောအခါ၊ ငါ၏ဘုန်းတော်ထင်ရှားဖို့ကိုသာ မျက်စိစူးစိုက်မှုဖြင့် ခမည်းတော်ရှေ့၌ သင်တို့၏အပြစ်များမှ လွှတ်ခြင်းအတွက်၊ သင်တို့အဖို့ စွန့်ခဲ့သည့် ငါ့ကိုယ်ခန္ဓာ၊ သွန်းခဲ့သည့်ငါ့အသွေးကို အောက်မေ့လျက်၊ ထိုအမှုကို ဆောင်ရွက်လျှင်—သင်တို့အဘယ်သို့စားရမည် သို့မဟုတ် သင်တို့အဘယ်သို့သောက်ရမည်ဟူသည်မှာ အရေးမကြီး။

၃ သို့ဖြစ်၍၊ ပညတ်တော်တစ်ခုကို သင်တို့အား ငါပေး၏။ သင်တို့၏ရန်သူများထံမှ စပျစ်ရည်ကိုသော်လည်းကောင်း၊ သေရည်သေရက်ကိုသော်လည်းကောင်း သင်တို့မဝယ်ကြစေကြောင်းပေတည်း။

၄ သို့ဖြစ်၍၊ သင်တို့၌၊ ထိုမှတစ်ပါး၊ မြေကြီးပေါ်မှာတည်ဆောက်မည့် ငါ့ခမည်းတော်၏ဤနိုင်ငံတော်၌ အသစ်ပြုလုပ်ထားသောအရာမဟုတ်လျှင်၊ အဘယ်အရာကိုမျှသင်တို့မသုံးဆောင်ရ။

၅ ရှုလော့၊ ဤအရာသည် ငါ့အထဲ၌ရှိသည့် ဉာဏ်ပညာတော်ဖြစ်၏။ သို့ဖြစ်၍၊ အံ့ဩခြင်းမရှိနှင့်၊ အကြောင်းမူကား၊ ငါသည် မြေကြီးပေါ်၌ စပျစ်ရည်ကို သင်နှင့်အတူ၊ ထာဝရတည်မြဲသောဧဝံဂေလိတရားတော်အပြည့်အစုံ ပါဝင်သည့် မော်မုန်ကျမ်းကို ဖော်ပြစေဖို့ သင့်ထံသို့ ငါစေလွှတ်တော်မူလေသည့်သူတည်းဟူသော ဧဖရိမ်တုတ်မှတ်တမ်းသော့များကို ငါအပ်နှံလေသူ မော်ရော်နိုင်းနှင့်အတူသောက်မည့် အချိန်နာရီသည် ကျရောက်လာ၏။

၆ နောက်ဆုံးသောကာလနှင့်စပ်လျဉ်း၍၊ ကမ္ဘာဦးကတည်းက သန့်ရှင်းသောပရောဖက်အပေါင်းတို့၏နှုတ်အားဖြင့် ဟောပြောထားသည့် ခပ်သိမ်းသောအရာတို့အား ပြန်လည်ဆောင်ယူခြင်းကို ဖြစ်ပေါ်စေသည့်သော့များကို ငါအပ်နှံလေသူ ဧလိုင်ယနှင့်လည်းအတူသောက်မည်။

၇ ဇာခရိ၏သား ယောဟန်နှင့်လည်း အတူသောက်မည်။ ထိုဇာခရိကို သူ (ဧလိုင်ယ) အကြည့်အရှုကြွရောက်ပြီး၊ သားတစ်ယောက်ရမည်ဟု ကတိပေး၍၊ အမည်မှာ ယောဟန်ဖြစ်ရမည်။ သူသည်လည်း ဧလိုင်ယ၏ဝိညာဉ်နှင့် ပြည့်စုံလိမ့်မည်။

၈ ငါ့ကျွန်များ၊ ဂျိုးဇက်စမစ်အငယ်နှင့် အော်လီဗာကောင်ဒရီ၊ သင်တို့သည် အာရုန်ကဲ့သို့ပင် ခေါ်သွင်း၍ခန့်ထားခံရနိုင်စေကြောင်း၊ သင်တို့လက်ခံရရှိလေသည့် ပထမဦးဆုံး ယဇ်ပုရောဟိတ်အခွင့်သို့ သင်တို့ကို ခန့်ထားခြင်းငှာ၊ ထိုယောဟန်ကို ငါသည် သင်တို့ထံစေလွှတ်တော်မူ၏။

၉ မြေကြီးတစ်ခုလုံး ကျိန်ခြင်းနှင့် ဒဏ်ခတ်မခံရစေမည့်အကြောင်း၊ ဘိုးဘေးတို့၏စိတ်နှလုံးကို သားသမီးများဆီသို့လည်းကောင်း၊ သားသမီးတို့၏စိတ်နှလုံးကို ဘိုးဘေးတို့ဆီသို့လည်းကောင်း လှည့်စေသည့်တန်ခိုး၏သော့များကို ငါအပ်နှင်းလေသူ ဧလိယနှင့်လည်း အတူသောက်မည်။

၁၀ ယောသပ်နှင့် ယာကုပ်၊ ထို့အတူ ဣဇာက်၊ ထို့အတူ အာဗြဟံ၊ ကတိတော်များကို ဆက်၍တည်စေသူများဖြစ်သည့် သင်တို့ဘိုးဘေးတို့နှင့်လည်း အတူသောက်မည်။

၁၁ မိက္ခေလ၊ သို့မဟုတ် အာဒံ၊ ခပ်သိမ်းသောသူတို့၏အဘ၊ ခပ်သိမ်းသောသူတို့၏အုပ်စိုးသူ၊ ရှေးကျသူနှင့်လည်း အတူသောက်မည်။

၁၂ သင်တို့ထံ ငါစေလွှတ်လေသူ ပေတရု၊ ထို့အတူ ယာကုပ်၊ ထို့အတူ ယောဟန်တို့နှင့်လည်း အတူသောက်မည်။ ထိုသူတို့အားဖြင့်၊ ငါသည် သင်တို့ကို တမန်တော်များအဖြစ်၊ ထို့အတူ ငါ့နာမတော်အဖို့ အထူးသက်သေများအဖြစ် ငါခန့်ထား၍ အတည်ပြုလေလျက်၊ သင်တို့၏အမှုတော်ဆောင်ခြင်းနှင့် သူတို့ကို ငါဖော်ပြလေသည့် ထပ်တူထပ်မျှဖြစ်သောအရာတို့၏ သော့များကို ကိုင်ဆောင်စေ၏။

၁၃ နောက်ဆုံးသောကာလများအတွက်၊ အချိန်ကာလပြည့်စုံခြင်းအတွက်၊ ငါ့နိုင်ငံတော်၏သော့များကိုလည်းကောင်း၊ ဧဝံဂေလိတရားတော်သာသနာကိုလည်းကောင်း ငါအပ်နှံလေပြီ။ ထိုကာလ၌၊ ငါသည် ကောင်းကင်၌ရှိသောအရာ၊ ထို့အတူ မြေကြီးပေါ်မှာရှိသောအရာ နှစ်မျိုးစလုံးဖြစ်သည့် ခပ်သိမ်းသောအရာတို့ကို တစ်ခုတည်းအဖြစ် အတူတကွစုဝေးစေတော်မူမည်။

၁၄ ငါ့ခမည်းတော် လောကထဲမှယူ၍၊ ငါ့အား ပေးတော်မူသည့်သူအပေါင်းတို့နှင့်လည်း အတူသောက်မည်။

၁၅ သို့ဖြစ်၍၊ စိတ်နှလုံးရွှင်လန်းအားရလျက် ရွှင်လန်းဝမ်းမြောက်ကြလော့၊ ထို့အတူ သင်တို့၏ခါးကို စည်းလော့၊ ငါ၏ချပ်ဝတ်တန်ဆာအစုံကိုလည်း သင်တို့အပေါ်မှာ ဝတ်ဆင်ကြလော့။ သင်တို့သည် မကောင်းသောကာလကို ခံနိုင်ရည်ရှိနိုင်စေမည့်အကြောင်း၊ အလုံးစုံတို့ကို ဆောင်ရွက်လျက် သင်တို့ ခံရပ်နိုင်မည့်အကြောင်းပေတည်း။

၁၆ ထို့ကြောင့်၊ ခံရပ်ကြလော့၊ သင်တို့၏ခါးကို သစ္စာတရားနှင့်စည်းကြလော့၊ ဖြောင့်မတ်ခြင်းရင်အုပ်တန်ဆာကို ဝတ်ဆင်လျက်ရှိကြလော့၊ သင်တို့ထံအပ်နှင်းစေဖို့ ငါ၏ကောင်းကင်တမန်များကို စေလွှတ်တော်မူလေသည့် ငြိမ်းချမ်းခြင်းဧဝံဂေလိတရားတော်နှင့်ပြင်ဆင်ခြင်းတည်းဟူသော ခြေစွပ်ကိုစွပ်ကြလော့။

၁၇ ဆိုးညစ်သောသူတို့၏ မီးစက်လက်နက်အပေါင်းကို ငြိမ်းစေသည့် ယုံကြည်ခြင်းတည်းဟူသော ဒိုင်းကိုလည်း ယူဆောင်လျက်ရှိကြလော့။

၁၈ ကယ်တင်ခြင်းတည်းဟူသော သံခမောက်လုံးကိုလည်းကောင်း၊ သင်တို့အပေါ် ငါသွန်းလောင်းတော်မူမည့် ငါ၏ဝိညာဉ်တော်ဓားကိုလည်းကောင်း၊ သင်တို့ထံ ငါဖော်ပြတော်မူသည့် ငါ၏နှုတ်ကပတ်တော်ကိုလည်းကောင်း ယူဆောင်ကြလော့။ ငါ့ထံမှ သင်တို့တောင်းဆိုသမျှသောအရာအားလုံးတို့၌ သဘောတူလျက်၊ ငါကြွလာတော်မူသည့်တိုင်အောင် သစ္စာရှိကြလော့။ သင်တို့သည် ချီဆောင်ခံရသဖြင့်၊ ငါရှိရာအရပ်၌ သင်တို့သည်လည်း ရှိကြလိမ့်မည်။ အာမင်။