1 Ko te au angaanga, e te au parani, e te au akakoroanga o te Atua, kare te reira e akakoreia, e kare katoa oki ïa e riro ei mea puapinga kore.

2 Kare oki te Atua e aere na te mataara mingimingi, e kare oki aia e anga ki te tua katau, e ki te tua kaui, e kare aia e uri ke mei tana i tuatua, e tika oki tona au mataara, e ko tona mataara e tai rai e te mutukore.

3 E akamaara, e akamaara kare oki te angaanga a te Atua e kore, ko ta te tangata nei ra, ka akakoreia te reira;

4 Noatu oki e e maata te au eeuanga a te tangata nei, ma te mana katoa no te rave i tetai au semeio, i na ra, me akapaapaa aia iaia na roto i tona uaorai maroiroi e tuku ke atura i te ako a te Atua, e ma te aru atu i tana uaorai i manako e te anoano o te tangata nei, ka inga aia e tikaʼi ma te aravei atu i te au akaapa a te Atua akava-tika ki rungaʼo iaia.

5 I na, kua orongaia mai teia au mea kia koe, i na ra, kua pakari taau au akaueanga; e akamaara katoa i te au taputou tei papauia kia koe, me kare koe e akaatikau i te reira.

6 E i na, kua putuputu toou atiatianga i te au akaueanga e te au ture a te Atua, e kua aru i te peu a te tangata nei.

7 E, i na, kare tikai koe i mataku atu i te tangata nei i te Atua ra. Noatu e te akaruke nei rai te tangata i te apiianga a te Atua, e te tanoanoa nei i tana tuatua—

8 Naringa oki e kua akarongo koe kua akatoro mai aia i tona rima ei turuturu ia koe i te au tao aʼi a te diabolo; e kua vaitata rai aia ia koe i te au taime manamanata.

9 I na, ko Iosepha koe, e kua ikiia koe ei rave i te angaanga a te Atu, i na ra, no te aati ture, me kare koe e matakite ka inga koe.

10 Kareka ra e akamaara, kua kī te Atua i te aroa ua; e no reira, e tataraara i te au ara taau i rave tei patoi i te akaueanga taku i oronga atu kia koe, e kua ikiia rai koe, e kua kapiki akaou ia koe ki te angaanga;

11 E me kare koe e rave i teia, ka apai ke iatu koe, e ka aite mai koe mei te tangata ua nei, e kare e orongaanga akaou.

12 E ia koe i oronga atura i taua mea ta te Atua i oronga kia koe e akauri ma te kite e te mana, kua oronga ra koe i taua au mea tapu ra ki roto i te rima o tetai tangata kino,

13 Ko tei tanoanoa i te ako a te Atua, e kua aati i te au taputouanga tapu tikai tei akamouia ki mua i te Atua, e kua irinaki ki tona uaorai kite, e kua akapaapaa i tona uaorai pakari.

14 E ko te tumu oki teia i ngaro ei toou tikaanga no tetai tuatau—

15 No te mea, kua akatika oki koe i te ako a toou akaaere kia takatakaiia mei muatangana mai.

16 Kareka ra, ka aere ua atu rai taku angaanga ki mua, i te mea oki e, kua tae te kite o te Akaora ki te ao nei, na roto i te kite papu o te ngati Iuda, e ka tae katoa mai te kite o te Akaora ki toku iti tangata—

17 Ki te ngati Niphai, e te ngati Iakoba, e ki te ngati Iotepa, e te ngati Zoroma, na roto oki i te kite papu o to ratou ai tupuna—

18 E ka tae oki teia kite papu ki te ngati Lamana, e pera katoa ki te ngati Lemuela, e te ngati Isemaela, ko tei topa ki roto i te akarongo kore, no te ara a to ratou ai metua, ta te Atu oki i akatika kia takore i to ratou ai taeake ko te ngati Niphai, no ta ratou au ara e te au angaanga viivii.

19 E ko teia tikai te akakoroanga i akonoiaʼi teia au papa nei, tei roto oki i reira teia au akapapaanga—kia akatupuia te au taputou a te Atua, tana i papau mai ki tona iti tangata;

20 Kia rauka oki i te ngati Lamana te kite o to ratou ai tupuna, e kia kite oki ratou i te au taputou a te Atu, e kia irinaki oki ratou i te evangelia ma te irinaki atu ki te takinga meitaki a Iesu Mesia, e kia akakakāia na roto i te akarongo i tona ingoa, e na roto i ta ratou tataraara e oraʼi ratou. Amene.