Tuanga 33
Te eeuanga tei orongaia mai na roto ia Iosepha Timeti te Peroveta, kia Ezra Thayre e Northrop Sweet, i Fayette, New York, Okotopa 1830 (History of the Church, 1:126–127). I roto i tona tataanga i teia eeuanga nei kua akapapu oki te Peroveta e, “kua papa takere te Atu i te akamārama mai i tei kimi tikai ma te akarongo” (History of the Church, 1:126).
1–4, Kua kapikiia te au rave angaanga kia akakite i te evangelia i te ngauru ma tai o te ora; 5–6, Kua akamouia te Akonoanga, e kia akaputuputuia mai tei ikiia; 7–10, E tataraara, te vaitata mai nei oki te basileia o te ao; 11–15, Kua patuia te Akonoanga ki runga i te papa o te evangelia; 16–18, E akateateamamao no te aereanga mai o te Tane Akaipoipo Ou.
1 I na, te karanga atu nei au kia korua e taku nga tavini e Ezra e Northrop, e akatuera i to korua nga taringa ma te akarongo ki te reo o te Atu to korua Atua, e tuatua ora oki tana e te ririnui, e kokoi maata oki to te reira i to te koke matarua, i te vai ia anga i te au paupauanga e te roro o te ivi katoa, pera te vaerua e te kopapa; e tei kite i te au manako e te au anoano oki o te ngakau.
2 Tika, tika tikai taku e karanga atu kia korua, kua kapikiia korua kia akateitei i to korua reo mei te tangi pu te tu, kia akakite i taku evangelia ki teia uki tangata piko e te maro.
3 E i na, kua teatea te kainga e kua mou; e ko te ngauru ma tai ïa o te ora, e ko te taime openga oki teia ka kapiki ei au i tetai aronga angaanga ki roto i taku kainga vine.
4 E kua viivii takiri taku kainga vine, te au mea katoatoa; e kare rava e mea rave meitaki i roto, mari ua ko tetai manga ua; e kua tarevakē ratou i te au mea e manganui, no ta ratou au angaanga taunga pikikaa, e e au manako viivii to ratou pouroa.
5 E tika, tika tikai taku e karanga atu kia korua, ko teia akonoanga oki naku i akatumu e i kapiki katoa mei roto mai i te medebara.
6 E ka akaputuputu katoa oki au i taku i iki mei nga pore e ā o te enua nei, ko ratou ravarai te ka irinaki mai iaku, e te ka akarongo mai i toku reo.
7 Ae, tika, tika tikai taku e tuatua atu nei kia kotou, kua teatea te kainga e kua mou; e no reira, e vero ki ta korua matipi, e ka kokoti ei ma to korua ririnui katoa, ma te manako, e te maroiroi.
8 E amama i to korua vaa e ka akakīia, e ka aiteia korua mei ia Niphai i taito, ko tei tere mei Ierusalema ki roto i te medebara.
9 Ae, e amama i to korua vaa e ma te kore e muteki ua i tetai, e ka tukuia tetai au ruru sitona ki runga i to korua mokotua, e i na, ei vaitata ua rai au ia korua.
10 Ae, e amama i to korua vaa e ka akakīia mai, i te na ko anga e: E tataraara, e tataraara, e akapapa i te arataa o te Atu, e akatika ua i tona ra aerenga; no te mea te vaitata mai nei oki te basileia o te ao ra;
11 Ae, e tataraara, e kia bapetizoia kotou katoatoa, no te akakoreanga i ta kotou au ara; kia bapetizoia ki te vai, e ka aru mai oki te bapetizoanga o te aʼi e te Vaerua Tapu katoa.
12 I na, tika, tika tikai taku e karanga atu kia korua, ko taku evangelia teia; e akamaara kia rauka to ratou akarongo ki roto iaku, me kore ra kare ratou e akaoraia;
13 E ki runga i teianei papa e patu ei au i taku akonoanga; ae, ei runga katoa i teia papa e akamouiaʼi korua, e me rave tamou uatu rai korua, kare te au ngutupa o ade e autu ki rungaʼo ia korua.
14 E ka akamaara oki korua i te au ture e te au koreromotu o te akonoanga ma te au taputouanga kia akono i te reira.
15 E ko tei rauka te akarongo, ka akatinamou korua ia ratou ki roto i taku akonoanga, na roto i te tukuanga rima, e ka tuku atu au i te orongaanga o te Vaerua Tapu ki runga ia ratou.
16 E ko te Puka a Momoni e te au irava tapu, naku te reira i oronga atu ei apii ia kotou, e na te mana o toku vaerua e akakeu i te au mea katoatoa.
17 No reira, kia vai akarongo tikai, e pure putuputu uatu rai, e ma te akakā i ta korua au lamepa, e apai katoa i tetai inu na korua kia papa oki korua me tae mai te Tane Akaipoipo Ou—
18 E i na, tika, tika tikai taku e karanga atu kia korua, ka aere vave mai au. Koia ïa. Amene.