Tuanga 35
Te eeuanga tei orongaia mai kia Iosepha Timeti te Peroveta e Sidney Rigdon, i Fayette, New York, me kore ra vaitata atu ki reira, Titema 1830 (History of the Church, 1:128–131). I taua taime ra, kua rave atu te Peroveta e vaitata rai i te au rā katoa i te akaurianga i te Bibilia. Kua akamata takere ia ana te akaurianga i roto ia Tiunu 1830, e ko Oliver Cowdery e John Whitmer tei tauturu i te tataanga. No tei kapikiia raua i teia nei ki tetai angaanga ke, kua kapikiia a Sidney Rigdon na roto i te ikianga tapu ei tauturu i te Peroveta kia tata i roto i teia angaanga (akara ki te irava 20). Ei akamataanga ki tana akapapaanga no teia eeuanga nei, ko teia ta te peroveta i tata: “I roto ia Titema, kua aere mai a Sidney Rigdon mei Ohio mai kia ui atu ki te Atu, e kua aru katoa mai a Edward Partridge iaia. … I muri poto uake i te taeanga mai o teia nga taeake nei, kua tuatua te Atu” (History of the Church, 1:128).
1–2, Ka naea te tangata e riro mai ei e tamariki na te Atua; 3–7, Kua kapikiia a Sidney Ridgon kia bapetizo e kia akatinamou i te Vaerua Tapu; 8–12, Ka aru te au akairo e te au semeio i te akarongo; 13–16, Ka pāpā te au tavini o te Atu i te au iti tangata na roto i te mana o te Vaerua Tapu; 17–19, Te mou nei a Iotepa Timeti i te au taviri o te au mea muna; 20–21, Ko tei ikiia, ka noo rai e ka tiaki i te rā e aere mai ei te Atu; 22–27, Ka akaoraia a Iseraela.
1 E akarongo ki te reo o te Atu ko toou Atua, koia te Alepha e te Omega, te momua e te akaopenga, e ko tona mataara e tai rai e te mutukore uatu, kua aiteite ki to teia rā e to nanai, e tuatau uatu.
2 Ko Iesu Mesia au, te Tamaiti a te Atua, tei akasatauroia no te ara a to te ao nei, no ratou ravarai te ka irinaki mai i toku ingoa, kia riro katoa mai oki ratou ei au tamariki tamaroa na te Atua, kia okotai ki roto iaku mei iaku i okotai ki roto i te Metua, e mei te Metua i okotai i roto iaku nei, e kia riro matou ei okotai.
3 I na, tika, tika tikai taku e karanga atu ki taku tavini e Sydney, kua akara atu au kia koe e taau angaanga katoa. Kua akarongo au i taau au pure, e kua akapapa ia koe no tetai angaanga maata atu.
4 Kua akameitakiia koe, no te mea ka rave koe i tetai au mea maata rava. I na, kua tonoia koe, mei ia Ioane te tu, kia akateateamamao i te ara i mua iaku, e ki mua katoa ia Elia te peroveta te ka aere mai, e kare oki koe i kite i te reira.
5 Kua bapetizo oki koe ki te vai no te tataraara, i na ra, kare i rauka ia ratou te Vaerua Tapu;
6 I na ra, i teianei te oronga atu nei au i tetai akaueanga kia koe, kia bapetizo koe ki te vai, e ka rauka i reira ia ratou te Vaerua Tapu na roto i te tukuanga rima, mei ta te au aposetolo i taito.
7 E i na, ka tae akera tetai angaanga maata i runga i te enua, ki rotopu oki i te au Etene, no te mea ka akaariia mai ta ratou au ara e ta ratou au angaanga kikino ki mua i te mata o te au tangata katoatoa.
8 Ko te Atua au, e kare toku rima i akapotoia; e ka akaari atu au i tetai au semeio, tetai au akairo, e tetai au mea umere, ki te aronga katoatoa tei irinaki mai i toku ra ingoa.
9 E ko te ka pati mai kiaku na roto i toku ingoa ma te akarongo, ka rauka ia ratou kia tuaru i te au diabolo ki vao; ka rauka ia ratou kia akaora i te maki, ka akariro ratou kia rauka te kite i te matapo, kia akarongo te taringa turi, te murare kia tuatua, e te pirikoki kia aere.
10 E te aere viviki mai nei te tuatau, e akaariia mai ei te au mea mamaata ki te tamariki a te tangata nei;
11 I na ra, me kare e akarongo kare rava e mea e akakiteia mai, mari ua ra ko te akataneaangaia ki rungaʼo ia Babulonia, koia tei oronga i te uaina o te riri o tona akaturi ki te au iti tangata ravarai kia inu ratou.
12 E kare rava e aronga e rave i te meitaki, mari ua ra ko te aronga tei papa i te ariki mai i te kīanga o taku nei evangelia, taku i tuku atu ki teia uki nei.
13 No reira, e kapiki ana au ki te au mea paruparu o te ao nei, ki te aronga kare i apiiia ana e tei kopaeia, kia tairi poti i te au basileia na roto i te mana o toku Vaerua;
14 E ko to ratou rima ko toku rima katoa ïa, e ko au to ratou paruru e to ratou tapoki; e ka tatua au i to ratou taukupu, e ka tamaki ratou ma te ririnui tikai noku; e ka topa to ratou au enemi ki raro i to ratou au vaevae; e ka akatopa au i te koke ki raro no ratou, e na roto i toku riri maata mei te aʼi oki ka paruru au ia ratou.
15 E ka tutuia oki te evangelia ki tei ngere, e tei maru, e ka akara atu oki ratou ki te tuatau e aere mai ei au, no te mea te vaitata ua mai nei—
16 E ka kite oki ratou i te parabole o te pu suke, e teianei kua vaitata oki taua tuatau akaū ra.
17 E kua tuku atu oki au i te kīanga o taku nei evangelia na roto i te rima o taku tavini ko Iosepha; e kua akameitaki au iaia noatu e tu paruparu tona;
18 E kua oronga atu au kiaia i te au taviri o te muna no te au mea tei topiriia, koia oki, te au mea mei te akamouangaia mai te tango o te ao nei, e te au mea katoa te ka tae mai mei teia tuatau, e tae uatu ki te tuatau e oki mai ei au, me noo aia kiaku, e me kare ka tuku au i tetai ei mono i tona ngai.
19 No reira, e tiaki iaia kia kore tona akarongo e ngaro, e ka orongaia mai oki e te Akapumaana, koia te Vaerua Tapu, tei kite i te au mea katoatoa.
20 E te oronga atu nei au i tetai akaueanga kia koe—ka tata koe nona; e ka orongaia atu te au irava tapu, mei to roto tikai i toku ngakau, no te akaoraanga o tei ikiia e au;
21 Ka akarongo oki ratou i toku reo, e ka kite mai oki iaku, e kare e varea i te moe, e ka tiaki ua i te rā ka aere mai ei au; e ka tiamā ratou, mei iaku oki te tiamā.
22 I teianei, te karanga atu nei au kia koe, e noo kiaia, e ka aaere aia e koe katoa; auraka e akaruke atu iaia, ei reira ka tupu teia au mea nei.
23 E me kare koe e tata, i na, ka orongaia atu i reira kiaia kia totou mai; e ka tutu koe i taku evangelia, e ma te kapiki atu ki te au peroveta tapu kia akapapu mai i tana au tuatua, mei te ka orongaia kiaia.
24 E akono i te au akaueanga katoatoa e te au koreromotu i tapekaiaʼi koe; e ka akakeu au i te au rangi kia riro ei meitaki noou, e ka ruketekete a Satani, e ka rekareka a Ziona i runga i te au tuaivi e ka ruperupe;
25 E ka ora oki a Iseraela i toku tuatau e karangaʼi; e na roto oki i te au taviri taku i oronga atu e aratakiiaʼi ratou, e kare e mea toe ei akakore i te reira.
26 E akateitei ana i to korua ngakau ma te rekareka, te vaitata mai nei to korua akaoraanga.
27 Auraka e mataku, e te anana iti, no kotou oki te basileia e tae uatu ki te tuatau e oki mai ei au. I na, ka aere vave mai au. Koia ïa. Amene.