ဩဝါဒနှင့် ပဋိညာဉ်များ ၄၈

အပိုဒ်ငယ် ၄၈

၁၈၃၁ ခု၊ မတ်လ ၁၀ ရက်၊ ကာ့တ်လန်း၊ အိုဟိုင်းရို၌၊ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ပရောဖက်သည် သန့်ရှင်းသူတို့အခြေချခြင်းအတွက်၊ မြေများဝယ်ယူခြင်း နည်းနာနိဿယနှင့်စပ်လျဉ်း၍၊ ကိုယ်တော်ရှင်ထံမေးလျှောက်ခဲ့လေ၏။ ဤအရာသည် အမေရိကန်ပြည်ထောင်စုအရှေ့ပိုင်းမှ အသင်းတော်အသင်းသားများ၊ အိုဟိုင်းရို၌ စည်းဝေးရမည်ဟူသော ကိုယ်တော်ရှင်၏ အမိန့်ကို နာခံခြင်းငှာ ရွှေ့ပြောင်းနေထိုင်ခြင်းကြောင့်၊ အရေးကြီးသောအမှုတစ်ခုဖြစ်လေ၏ (အပိုဒ်ငယ် ၃၇း၁–၃၊ ၄၅း၆၄ တွင်ကြည့်ပါ)။

၁–၃၊ အိုဟိုင်းရိုရှိသန့်ရှင်းသူတို့သည် မိမိတို့မြေများကို မိမိတို့ညီအစ်ကိုများနှင့် ဝေငှရမည်။ ၄–၆၊ သန့်ရှင်းသူတို့သည် မြေများကို ဝယ်ရမည်။ မြို့ကို တည်ဆောက်၍၊ မိမိတို့၏ဦးစီးအရာရှိတို့၏ အကြံကို လိုက်လျှောက်ရမည်။

၁ သင်တို့သည် မျက်မှောက်ကာလ၌၊ သင်တို့နေထိုင်ရာနေရာတို့၌ ဆက်၍နေရမည်။ သင်တို့၏အခြေအနေနှင့် သင့်လျော်မည်ဖြစ်သောကြောင့်ပေတည်း။

၂ သင်တို့မှာရှိသည့် မြေများကို အရှေ့ပိုင်းမှ ညီအစ်ကိုတို့အား မျှ၍ပေးရမည်။

၃ သင်တို့မှာ မြေများမရှိ၍၊ သူတို့ကို ပတ်ဝန်းကျင်ဒေသများ၌ သူတို့အတွက် ကောင်းမြတ်သည်ဟု မှတ်ယူလျှင်၊ မျက်မှောက်ကာလအတွက် ဝယ်စေလော့။ အကြောင်းမူကား၊ သူတို့သည် မျက်မှောက်ကာလအတွက် နေထိုင်ရန် နေရာအလွန်လိုအပ်ပေ၏။

၄ သင်တို့သည် တတ်နိုင်သမျှ ခပ်သိမ်းသောငွေကို စုဆောင်းကြရမည်၊ ဖြောင့်မတ်ခြင်းဖြင့် သင်တို့တတ်နိုင်သမျှ ခပ်သိမ်းသောအရာတို့ကိုလည်း ရယူကြရမည်မှာ အလွန်လိုအပ်ပေ၏။ အချိန်စေ့သောအခါ၌ နေထိုင်ရာအတွက် မြေ၊ မြို့ကိုပင် ဝယ်ဖို့ သင်တို့စွမ်းဆောင်နိုင်ကြစေခြင်းငှာပေတည်း။

၅ နေရာကို မဖော်ပြရသေးပေ။ သို့ရာတွင်၊ သင်တို့၏ညီအစ်ကိုများ အရှေ့အရပ်မှ ရောက်လာပြီးနောက်တွင်၊ လူအချို့ကို ခန့်အပ်ထားရမည်။ ထိုသူတို့အား၊ နေရာကို သိဖို့ အခွင့်ပေးလိမ့်မည်၊ သို့မဟုတ် ထိုသူတို့အား ဖော်ပြလိမ့်မည်။

၆ သူတို့သည်လည်း မြေများကို ဝယ်ရန်၊ အုတ်မြစ်ကိုချဖို့ စတင်ခြင်းကို ပြုရန် ခန့်အပ်ခံရလိမ့်မည်။ ထို့နောက်တွင်၊ လူတိုင်းကိုယ့်မိသားစုအလိုက်၊ ကိုယ့်အခြေအနေအလိုက်၊ သင်တို့လက်ခံရရှိလေသည့်၊ နောင်ကာလ၌ သင်တို့လက်ခံရရှိလေမည့် ဥပဒေများနှင့် ပညတ်တော်များနှင့်အညီ ဥက္ကဋ္ဌအဖွဲ့နှင့် အသင်းတော်၏သင်းအုပ်အားဖြင့် မိမိကို ခန့်အပ်ထားသည့်အတိုင်း သင်တို့၏မိသားစုများနှင့်အတူ စုဝေးဖို့ အစပြုကြလိမ့်မည်။ ထိုကဲ့သို့ပင်တည်း။ အာမင်။