ဩဝါဒနှင့် ပဋိညာဉ်များ ၅၀

အပိုဒ်ငယ် ၅၀

၁၈၃၁ ခု၊ မေလ ၉ ရက်၊ ကာ့တ်လန်း၊ အိုဟိုင်းရို၌၊ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဂျိုးဇက်စမစ်၏သမိုင်းက ဖော်ပြသည်ကား၊ အသင်းလူကြီးများထဲမှ အချို့သည် မြေကြီးပေါ်မှာ ပျံ့နှံ့နေသည့် ခြားနားသောဝိညာဉ်များ၏ ထင်ရှားစွာပြခြင်းကို နားမလည်ကြကြောင်းနှင့် ဤဗျာဒိတ်တော်မှာ၊ ထိုအမှုအကြောင်း သူ၏အထူးမေးလျှောက်ခြင်း အတွက် အဖြေ အဖြစ် ပေးတော်မူခဲ့ကြောင်းဖြစ်၏။ ဝိညာဉ်ပကတိထူးခြားဖြစ်စဉ်များဟု ခေါ်သောအရာများသည် အသင်းသားများ၌ တွေ့ရခဲသောအရာများမဟုတ်၊ သူတို့အထဲမှ အချို့သောသူများက ရူပါရုံများနှင့် ဗျာဒိတ်တော်များ လက်ခံရရှိကြသည်ဟု ဆိုကြ၏။

၁–၅၊ မိစ္ဆာဝိညာဉ်တို့သည် မြေကြီးပေါ်မှာ ပျံ့နှံ့ကြ၏။ ၆–၉၊ သူတော်ကောင်းယောင်ဆောင်သော သူများနှင့် အသင်းတော်မှ ပယ်ရှင်းခံရသော သူများသည် အမင်္ဂလာရှိကြ၏။ ၁၀–၁၄၊ အသင်းလူကြီးတို့သည် ဝိညာဉ်တော်အားဖြင့်၊ ဧဝံဂေလိတရားတော်ကို ဟောပြောရမည်။ ၁၅–၂၂၊ ဟောပြောသူနှင့် ကြားနာသူနှစ်မျိုးစလုံးတို့သည် ဝိညာဉ်တော်အားဖြင့်အလင်းသို့ရောက်ဖို့ လိုအပ်၏။ ၂၃–၂၅၊ မတည်ဆောက်သောအရာသည် ဘုရားသခင်ထံမှမဟုတ်။ ၂၆–၂၈၊ သစ္စာရှိသောသူများသည် ခပ်သိမ်းသောအရာတို့ကို ပိုင်ဆိုင်သူများဖြစ်၏။ ၂၉–၃၆၊ စင်ကြယ်စေပြီးသောသူတို့၏ ဆုတောင်းခြင်းများကို ဖြေကြား၏။ ၃၇–၄၆၊ ခရစ်တော်သည် ကောင်းသောသိုးထိန်းနှင့် ဣသရေလအမျိုး၏ကျောက်ဖြစ်၏။

၁ စေ့စေ့နားထောင်ကြလော့၊ အို ငါ့အသင်းတော်မှ အသင် အသင်းလူကြီးတို့၊ အသက်ရှင်တော်မူသော ဘုရားသခင်၏ အသံကို နားညောင်းကြလော့။ အသင်းတော်နှင့်၊ ထို့အတူ မြေကြီးပေါ်မှာ ပျံ့နှံ့လေသည့် ဝိညာဉ်တို့နှင့် စပ်လျဉ်း၍ သင်တို့ညီညွတ်လျက် မေးလျှောက်သည့်အတိုင်း သင့်တို့ကို ပေးမည့် ဉာဏ်ပညာစကားကို မှတ်ယူကြလော့။

၂ ရှုလော့၊ သင်တို့ကို ငါအမှန်ဆိုသည်ကား၊ မိစ္ဆာဝိညာဉ်များဖြစ်သည့်၊ လောကကို လှည့်စားလျက်၊ မြေကြီးပေါ်မှာ ထွက်သွားလေသည့် များစွာသောဝိညာဉ်များရှိ၏။

၃ စာတန်ကလည်း သင်တို့ကို အနိုင်ရနိုင်ခြင်းငှာ၊ သင်တို့ကို လှည့်စားဖို့ ကြိုးစားအားထုတ်လေပြီ။

၄ ရှုလော့၊ ငါ၊ ကိုယ်တော်ရှင်သည်၊ သင်တို့ကို ကြည့်၍၊ ငါ၏နာမတော်ကို ဝန်ခံသည့်အသင်းတော်၌ စက်ဆုပ်ရွံရှာဖွယ်အမှုများကို မြင်ရလေပြီ။

၅ သို့ရာတွင်၊ သစ္စာရှိ၍တည်ကြည်သောသူများသည် အသက်ရှင်သည်ဖြစ်စေ၊ သေသည်ဖြစ်စေ မင်္ဂလာရှိကြ၏၊ အကြောင်းမူကား၊ သူတို့သည် ထာဝရအသက်ကို အမွေခံကြရလိမ့်မည်။

၆ သို့ရာတွင်၊ လှည့်စားသောသူများနှင့် သူတော်ကောင်းယောင်ဆောင်သောသူများသည် အမင်္ဂလာရှိကြ၏။ အကြောင်းမူကား၊ ကိုယ်တော်ရှင်မိန့်တော်မူသည်မှာ၊ ငါသည် ထိုသူတို့ကို တရားစီရင်တော်မူခြင်းသို့ ဆောင်ယူတော်မူမည်။

၇ ရှုလော့၊ သင်တို့ကို ငါအမှန်ဆိုသည်ကား၊ သင်တို့အထဲ၌ သူတော်ကောင်းယောင်ဆောင်သော သူများရှိ၏၊ သူတို့သည် မာရ်နတ်အား အစိုးရခြင်းကို ပေးလေသည့် အချို့သောသူများကို လှည့်စားကြလေ၏။ သို့ရာတွင်၊ ရှုလော့၊ ထိုကဲ့သို့သောသူများသည် ပြန်လည်ခေါ်ဆောင်ခြင်းကို ခံကြရလိမ့်မည်။

၈ သို့ရာတွင်၊ သူတော်ကောင်းယောင်ဆောင်သောသူတို့သည် အသက်ရှင်သည်ဖြစ်စေ၊ သေသည်ဖြစ်စေ၊ ငါအလိုရှိသည့် အတိုင်းပင် စုံစမ်းခံရပြီး၊ ပယ်ရှင်းခံရကြလိမ့်မည်။ ငါ၏အသင်းတော်မှ ပယ်ရှင်းခံရသောသူများသည် အမင်္ဂလာရှိကြ၏၊ အကြောင်းမူကား ထိုသူတို့သည် လောကအားဖြင့် အနိုင်ခံရ၏။

၉ သို့ဖြစ်၍၊ လူတိုင်း ငါ့ရှေ့မှာ သမ္မာတရားနှင့် ဖြောင့်မတ်ခြင်းတို့၌ မရှိသည့်အရာကို မပြုစေခြင်းငှာ သတိပြုစေလော့။

၁၀ ယခုမူကား၊ လာကြလော့၊ ကိုယ်တော်ရှင်က၊ ဝိညာဉ်တော်အားဖြင့် သူ့အသင်းတော်မှ အသင်းလူကြီးများကို မိန့်တော်မူသည်ကား၊ သင်တို့နားလည်နိုင်ကြစေခြင်းငှာ ငါတို့အတူတကွ ဆွေးနွေးကြကုန်အံ့။

၁၁ လူသည် အချင်းချင်းမျက်နှာချင်းဆိုင်၍ ဆွေးနွေးသကဲ့သို့ပင် ငါတို့ဆွေးနွေးကြကုန်အံ့။

၁၂ ယခုတွင်၊ လူသည် လူကဲ့သို့ပင် ဆွေးနွေးသောကြောင့်၊ သူဆွေးနွေးသောအခါ၊ သူ့ကို အခြားလူက နားလည်၏။ သင်တို့နားလည်နိုင်ကြစေခြင်းငှာ၊ ငါ၊ ကိုယ်တော်ရှင်သည် ထိုကဲ့သို့ပင် သင်တို့နှင့် ဆွေးနွေးတော်မူမည်။

၁၃ သို့ဖြစ်၍၊ ငါကိုယ်တော်ရှင်သည် သင်တို့အား ဤမေးခွန်းကို မေး၏—မည်သည့်အရာသို့ သင်တို့ကို ခန့်ထားလေသနည်း။

၁၄ ဝိညာဉ်တော်အားဖြင့်၊ သမ္မာတရားကို သွန်သင်စေခြင်းငှာ၊ စေလွှတ်ခံရလေသည့် နှစ်သိမ့်စေသောသူ အားဖြင့်ပင်၊ ငါ၏ဧဝံဂေလိတရားတော်ကို ဟောပြောစေဖို့ဖြစ်၏။

၁၅ ထို့နောက်တွင်၊ သင်တို့နားမလည်နိုင်သည့် ဝိညာဉ်များကို သင်တို့လက်ခံကြ၏၊ ဘုရားသခင်ထံမှ လာသကဲ့သို့ပင် ၎င်းတို့ကို လက်ခံကြ၏။ ဤအမှု၌ သင်တို့ကို အပြစ်ကင်းစေသလော။

၁၆ ရှုလော့၊ သင်တို့သည် ဤမေးခွန်းကို သင်တို့ဘာသာသင်တို့ ဖြေကြရမည်။ သို့သော်လည်း၊ ငါသည် သင်တို့ကို ကရုဏာကြီးတော်မူမည်။ သင်တို့အထဲ၌ အားနည်းသောသူကို နောင်ကာလ၌ အားကြီးစေမည်။

၁၇ သင်တို့ကို ငါအမှန်ဆိုသည်ကား၊ ငါအားဖြင့် ခန့်ထားခံရပြီး၊ နှစ်သိမ့်စေသောသူအားဖြင့်၊ သမ္မာတရားဝိညာဉ်တော်အားဖြင့် သမ္မာတရားနှုတ်ကပတ်တော်ကို ဟောပြောစေဖို့ စေလွှတ်ခံရသောသူသည် သမ္မာတရားဝိညာဉ်တော်အားဖြင့်၊ သို့မဟုတ် အခြားသောနည်းတစ်စုံတစ်ခုအားဖြင့် ဟောပြောသလော။

၁၈ အခြားသောနည်းတစ်စုံတစ်ခုအားဖြင့် ဖြစ်လျှင်၊ ဘုရားသခင်ထံမှမဟုတ်။

၁၉ ထိုမှတစ်ဖန်၊ သမ္မာတရားနှုတ်ကပတ်တော်ကို ရရှိသောသူသည် သမ္မာတရားဝိညာဉ်တော်အားဖြင့်၊ သို့မဟုတ် အခြားသောနည်း တစ်စုံတစ်ခုအားဖြင့် ရရှိသလော။

၂၀ အခြားသောနည်းတစ်စုံတစ်ခုအားဖြင့်ဖြင့်လျှင်၊ ဘုရားသခင်ထံမှမဟုတ်။

၂၁ ထို့ကြောင့်၊ သမ္မာတရားဝိညာဉ်တော်အားဖြင့် နှုတ်ကပတ်တော်ကို ရရှိသောသူသည် သမ္မာတရားဝိညာဉ်တော်အားဖြင့် ဟောပြော၍ရရှိသကဲ့သို့ဖြစ်လေကြောင်းကို သင်တို့အဘယ်ကြောင့် နားမလည်နိုင်ကြ၊ မသိနိုင်ကြသနည်း။

၂၂ သို့ဖြစ်၍၊ ဟောပြောသူနှင့် ရရှိသူတို့သည် တစ်ယောက်ကိုတစ်ယောက် နားလည်ကြ၏၊ နှစ်ဦးစလုံးသည် တည်ဆောက်ကြပြီး၊ အတူတကွရွှင်လန်းဝမ်းမြောက်ကြ၏။

၂၃ မတည်ဆောက်သောအရာသည် ဘုရားသခင်ထံမှမဟုတ်၊ မှောင်မိုက်ဖြစ်၏။

၂၄ ဘုရားသခင်ထံမှအရာသည် အလင်းဖြစ်၏။ အလင်းကို လက်ခံရရှိ၍၊ ဘုရားသခင်၌ ဆက်၍တည်သောသူသည် သာ၍များသောအလင်းကို လက်ခံရရှိ၏။ ထိုအလင်းသည် စုံလင်သောနေ့သို့ ရောက်သည့်တိုင်အောင် တောက်ပသည်ထက်ပို၍ တောက်ပလာ၏။

၂၅ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ သမ္မာတရားကို သင်တို့သိနိုင်ကြစေကြောင်း၊ သင်တို့အထဲမှ မှောင်မိုက်ကို သင်တို့နှင်ထုတ်နိုင်ကြစေကြောင်း၊ သင်တို့ကို ငါဆို၏။

၂၆ ဘုရားသခင်အားဖြင့် ခန့်ထားတော်မူပြီး စေလွှတ်ခံရသောသူသည် အငယ်ဆုံးသောသူသော်လည်းကောင်း၊ ခပ်သိမ်းသောသူတို့၏ ကျွန်သော်လည်းကောင်း ဖြစ်သော်ငြားလည်း အကြီးမြတ်ဆုံးသောသူအဖြစ် ခန့်အပ်ခံရ၏။

၂၇ သို့ဖြစ်၍၊ ထိုသူသည် ခပ်သိမ်းသောအရာတို့ကို ပိုင်ဆိုင်သူဖြစ်၏။ အကြောင်းမူကား၊ ခမည်းတော်၏အလိုတော်ကြောင့်၊ သူ၏သားတော် ယေရှုခရစ်တော်အားဖြင့်၊ စေလွှတ်သည့် အသက်နှင့် အလင်း၊ ဝိညာဉ်တော်နှင့် တန်ခိုးတော်၊ ကောင်းကင်နှင့် မြေကြီးရှိ၊ ခပ်သိမ်းသောအရာတို့သည် ထိုသူ၏ဩဇာခံများဖြစ်ကြ၏။

၂၈ သို့ရာတွင်၊ အကြင်သူသည် ခပ်သိမ်းသောအပြစ်များမှ စင်ကြယ်ခြင်းသို့ မရောက်၍၊ သန့်စင်ခြင်းသို့ မရောက်လျှင် ခပ်သိမ်းသောအရာတို့ကို ပိုင်ဆိုင်သူမဟုတ်။

၂၉ သင်တို့သည် ခပ်သိမ်းသောအပြစ်များမှ စင်ကြယ်ခြင်းသို့ ရောက်၍၊ သန့်စင်ခြင်းသို့ ရောက်လျှင်၊ သင်တို့အလိုရှိ၍၊ ယေရှု၏နာမတော်အားဖြင့်တောင်းသမျှကို ပေးလိမ့်မည်။

၃၀ သို့ရာတွင်၊ ဤအမှုကို သိကြလော့၊ သင်တို့တောင်းသည့်အရာကို သင်တို့အား ပေးလိမ့်မည်။ သင်တို့ကို အကြီးအကဲအရာ၌ ခန့်အပ်ထားသဖြင့်၊ ဝိညာဉ်များသည် သင်တို့၏ဩဇာခံများ ဖြစ်လိမ့်မည်။

၃၁ သို့ဖြစ်၍၊ အချိန်တန်လာလတ္တံ့သောအခါ၊ သင်တို့နားမလည်နိုင်သည့်အရာကို ဝိညာဉ်က ထင်ရှားစွာပြ၍၊ ထိုဝိညာဉ်ကို သင်တို့လက်ခံရရှိခြင်း မရှိလျှင်၊ သင်တို့သည် ယေရှု၏နာမတော်အားဖြင့်၊ ခမည်းတော်ထံသို့ တောင်းကြလော့။ သူက ထိုဝိညာဉ်ကို သင်တို့အား ပေးခြင်းမရှိလျှင်၊ ၎င်းသည် ဘုရားသခင်ထံမှ မဟုတ်ကြောင်း သင်တို့သိနိုင်ကြပေ၏။

၃၂ ထိုဝိညာဉ်ကို နိုင်စေခြင်းငှာ သင်တို့ကို အခွင့်ပေးလိမ့်မည်။ သင်တို့သည် သည်လည်း ထိုဝိညာဉ်ကို ဆန့်ကျင်လျက်၊ ၎င်းသည် ဘုရားသခင်ထံမှမဟုတ်ကြောင်း ကျယ်သောအသံနှင့် ကြေညာကြလိမ့်မည်—

၃၃ ကဲ့ရဲ့စွာသောပြစ်တင်ခြင်းနှင့် မပြုရ၊ သင်တို့ အနိုင်မခံရစေကြောင်းပေတည်း၊ ၎င်းအားဖြင့် သင်တို့ဖမ်းဆီးမခံကြရစေခြင်းငှာ၊ ဝါကြွားခြင်းနှင့် မပြုရ၊ ရွှင်လန်းဝမ်းမြောက်ခြင်းနှင့်လည်း မပြုရ။

၃၄ ဘုရားသခင်ထံမှ လက်ခံရရှိသောသူအား၊ ရရှိသည့်အရာကို ဘုရားသခင်ထံမှ ဖြစ်သည်ဟု ပမာဏပြုစေလော့။ လက်ခံရရှိဖို့ ထိုက်တန်သည်ဟု ဘုရားသခင်ပမာဏပြုသည်ကိုလည်း ထိုသူ ရွှင်လန်းဝမ်းမြောက်စေလော့။

၃၅ သင်တို့လက်ခံရရှိလေသည့်၊ ထို့အတူ၊ နောင်ကာလ၌ သင်တို့လက်ခံရရှိမည့် ဤအရာတို့ကို ပမာဏပြုခြင်းနှင့် ပြုလုပ်ခြင်းအားဖြင့်—ခမည်းတော်သည် သင်တို့အား နိုင်ငံတော်ကိုလည်းကောင်း၊ သူခန့်မထားသည့် အရာမှန်သမျှကို အောင်နိုင်စေဖို့ တန်ခိုးကိုလည်းကောင်း သင်တို့အား ပေးထား၏—

၃၆ ရှုဦးလော့၊ သင်တို့ကို ငါအမှန်ဆိုသည်ကား၊ ယခုတွင်၊ ငါ့ကျွန်၏နှုတ်မှ ငါ့ဤနှုတ်ကပတ်တော်တို့ကို ကြားလျက်ရှိသောသင်တို့သည် မင်္ဂလာရှိကြ၏။ အကြောင်းမူကား၊ သင်တို့၏အပြစ်များကို ခွင့်လွှတ်၏။

၃၇ ငါအလွန်နှစ်သက်တော်မူရာ၊ ငါ့ကျွန်ဂျိုးဇက်ဝိတ်ဖီးလ်ဒ်၊ ထို့အတူ ငါ့ကျွန်ပါလီပီပရတ်တို့အား အသင်းတော်များသို့ ထွက်သွားစေပြီး၊ တိုက်တွန်းသောစကားဖြင့် ထိုသူတို့အား ခွန်အားဖြည့်ပေးစေကြလော့။

၃၈ ငါ့ကျွန်ဂျွန်ကော်ရီးလ်ကိုလည်း၊ သို့မဟုတ် ဤအမှုအရာသို့ ခန့်ထားသည့် ငါ့ကျွန်မှန်သမျှတို့ကို စပျစ်ဥယျာဉ်ထဲ၌ အလုပ်လုပ်ကြစေလော့။ သူတို့ကို ငါခန့်အပ်ထားလေသည့်အရာကို ပြုလုပ်ရာ၌ သူတို့ကို အဘယ်သူမျှ မဆီးတားစေနှင့်။

၃၉ သို့ဖြစ်၍၊ ဤအရာ၌ ငါ့ကျွန်အက်ဒဝါ့ပါ့ထရစ်ဂ်ျသည် အပြစ်ကင်းစေခြင်းမရှိရ။ သို့သော်လည်း၊ သူ့ကို နောင်တရစေလော့၊ သူသည် အပြစ်လွတ်လိမ့်မည်။

၄၀ ရှုလော့၊ သင်တို့သည် ကလေးသူငယ်များဖြစ်၍၊ ယခုတွင်၊ ခပ်သိမ်းသောအရာတို့ကို သည်းမခံနိုင်ကြ။ သင်တို့သည် ကျေးဇူးတော်၌လည်းကောင်း၊ သမ္မာတရားကို သိခြင်း၌လည်းကောင်း ကြီးထွားကြရမည်။

၄၁ ကြောက်ခြင်းမရှိနှင့်၊ ကလေးသူငယ်တို့၊ အကြောင်းမူကား၊ သင်တို့သည် ငါ၏လူများဖြစ်ပြီး၊ ငါသည် လောကကို အောင်နိုင်လေပြီ။ သင်တို့သည် ငါ့အား ငါ့ခမည်းတော်ပေးတော်မူသည့်အထဲမှ ဖြစ်၏။

၄၂ ငါ့အား ငါ့ခမည်းတော်ပေးတော်မူသည့်သူတို့အထဲမှ အဘယ်သူမျှ မပျောက်ဆုံးရ။

၄၃ ခမည်းတော်နှင့် ငါသည် တစ်လုံးတစ်ဝတည်းဖြစ်၏။ ငါသည် ခမည်းတော်၌ ရှိပြီး၊ ခမည်းတော်သည် ငါ၌ ရှိတော်မူ၏။ သင်တို့သည် ငါ့ကို လက်ခံကြလေသမျှ၊ ငါ၌ ရှိကြပြီး၊ ငါသည် သင်တို့၌ ရှိ၏။

၄၄ သို့ဖြစ်၍၊ ငါသည် သင်တို့အလယ်၌ ရှိ၏၊ ငါသည် ကောင်းသောသိုးထိန်းနှင့် ဣသရေလအမျိုး၏ကျောက်ဖြစ်၏။ ဤကျောက်ပေါ်မှာ တည်ဆောက်သောသူသည် အဘယ်တော့မျှ မကျရှုံးရ။

၄၅ ငါ၏အသံကို သင်တို့ကြားရမည့်၊ ငါ့ကို မြင်ရမည့်၊ ထို့အတူ ငါရှိကြောင်းသိရမည့်နေ့သည် ကျရောက်လာ၏။

၄၆ ထို့ကြောင့်၊ သင်တို့သည် အဆင်သင့်ဖြစ်နိုင်ကြစေခြင်းငှာ၊ စောင့်ကြည့်ကြလော့။ ထိုကဲ့သို့ပင်တည်း။ အာမင်။