Tuanga 54
Te eeuanga tei orongaia mai na roto ia Iosepha Timeti te Peroveta, kia Newel Knight, i Kirtland, Ohio, Tiunu 1831 (History of the Church, 1:180–181). Ko te au mema o te Akonoanga i roto i te manga i Thompson, Ohio, kua tuaia atu ratou ki tetai au uianga takake, no runga te akatapuanga apinga; Kua akaariia mai te tu karapii e te noinoi i rotopu ia ratou, e kua aati a Leman Copley i tana koreromotu kia akatapu i tona kainga tanuanga maata ei nooanga no te aronga tapu me tae atu mei Colesville, New York. Kua o katoa atu a Ezra Thayre ki roto i teia tauetonoanga. No reira, kua aere mai a Newel Knight (koia te peresideni no te manga o Thompson) e tetai au ereta ki te Peroveta i te ui atu e eaa ta ratou ka rave. Kua ui atu te Peroveta ki te Atu e kua rauka mai teia eeuanga. (Akara ki te Tuanga 56, tei reira te tupuanga o teia au manatā.)
1–6, Kia akono meitaki te aronga tapu i te koreromotu o te evangelia kia rauka te aroa ua; 7–10, Kia akakoromaki ratou i roto i te tumatetenga.
1 I na, te tuatua maira te Atu, koia te Alepha e te Omega, te momua e te akaopenga, ko tei akasatauroia no te ara a to teianei ao—
2 I na, tika, tika tikai taku e karanga atu kia koe, e taku tavini e Newel Knight, kia mou piri koe ki te taonga taku i oronga atu noou.
3 E me ka inangaro toou au taeake kia oro ke atu mei to ratou au enemi, kia tataraara ratou i ta ratou au ara katoatoa, e kia taakaaka tikai ki mua iaku ma te ngakau maru.
4 E no tei aati ratou i te koreromotu ta ratou i papau mai kiaku, kua riro oki te reira ei mea puapinga kore.
5 E aue oki aia tei rave i teia tarevakē, e ngari ake aia kia maremo atu ki raro i te takere o te tai.
6 I na ra kia akameitakiia rai oki ratou tei akono i te au koreromotu ma te kauraro i te au akaueanga, ka rauka oki ia ratou te aroa ua.
7 No reira, e oro ke atu mei teia enua, ko te autu to kotou au enemi ia kotou; e aere i to kotou tere, e ma te iki i ta kotou i manako ei arataki no kotou, ei akaaere i ta kotou au moni.
8 No reira ka aere atu kotou ki te au ngai i te pae opunga, ki te enua ko Missouri, ki te kotinga o te ngati Lamana.
9 E me oti to kotou aaereanga, i na, te karanga atu nei au kia kotou, e kimi i te oraanga mei to te au tangata rai, e oti uatu iaku i te akateateamamao i tetai ngai no kotou.
10 E pera katoa, kia akakoromaki kotou i roto i te au tumatetenga ravarai e tae ua mai au; e, i na, ka viviki mai au, e tei iaku rai oki taku ka tutaki atu, e ko te aronga tei kimi vave mai iaku, ka rauka ia ratou te akangaroianga no to ratou vaerua. Koia ïa. Amene.