ဩဝါဒနှင့် ပဋိညာဉ်များ ၅၆

အပိုဒ်ငယ် ၅၆

၁၈၃၁ ခု၊ ဇွန်လ ၁၅ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဤဗျာဒိတ်တော်က အယ်ဇရာသဲရာကို သူနေထိုင်ရာ ဖရက်ဒရစ်ခ်ဂျီဝီလျံ၏လယ်ကွင်း၌ သူ၏တာဝန်များနှင့် စပ်လျဉ်း၍ သဲရာကို သွန်သင်သည့်၊ သူ့အတွက် ဂျိုးဇက်စမစ်လက်ခံရရှိခဲ့သည့် ယခင်ဗျာဒိတ်တော် (အခန်းငယ် ၈ ၌ ရည်ညွှန်းသည့်”ပညတ်တော်”) ကို မနာခံခြင်းကြောင့် ဒဏ်ခတ်၏။ အောက်ပါဗျာဒိတ်တော်ကလည်း သဲရာအား သောမတ်စ်ဘီမာ့ရှ်နှင့် မစ်ဆူရီသို့ အတူသွားဖို့ ခေါ်သွင်းခြင်းကို ပယ်ဖျက်၏ (အပိုဒ်ငယ် ၅၂း၂၂ တွင်ကြည့်ပါ)။

၁–၂၊ သန့်ရှင်းသူတို့သည် ကယ်တင်ခြင်းကို ရရှိရန် မိမိတို့လက်ဝါးကပ်တိုင်ကို ထမ်း၍ ကိုယ်တော်ရှင်နောက်သို့ လိုက်ရမည်။ ၃–၁၃၊ ကိုယ်တော်ရှင်သည် မိန့်တော်မူပြီး၊ ပယ်ဖျက်၏၊ မနာခံသော သူတို့သည် စွန့်ပစ်ခံရ၏။ ၁၄–၁၇၊ ဆင်းရဲသားတို့ကို မကူညီမည့် ကြွယ်ဝသော သူတို့သည် အမင်္ဂလာရှိကြ၏၊ စိတ်နှလုံး မကျိုးပဲ့သည့် ဆင်းရဲသားတို့သည်လည်း အမင်္ဂလာရှိကြ၏။ ၁၈–၂၀၊ စိတ်နှလုံးစင်ကြယ်သော ဆင်းရဲသားတို့သည် မင်္ဂလာရှိကြ၏၊ အကြောင်းမူကား၊ သူတို့သည် မြေကြီးကို အမွေခံကြရလိမ့်မည်။

၁ စေ့စေ့နားထောင်ကြလော့၊ ငါ၏နာမတော်ကို ဝန်ခံသည့်သူများတည်းဟူသော အို အသင်လူမျိုးတို့၊ သင်တို့၏ဘုရားသခင်ကိုယ်တော်ရှင် မိန့်တော်မူသည်မှာ၊ အကြောင်းမူကား၊ ရှုလော့၊ ငါသည် ပုန်ကန်သောသူတို့ကို အမျက်ထွက်၏၊ ပြည်သားတို့အပေါ် ကြည့်ရှုစီရင်ရာနှင့် အမျက်တော်ကာလ၌ ငါ၏လက်ရုံးတော်နှင့် ဒေါသကို သူတို့သိကြလိမ့်မည်။

၂ မိမိလက်ဝါးကပ်တိုင်ကို ထမ်း၍၊ ငါ့နောက်သို့မလိုက်၊ ငါ၏ပညတ်တော်များကိုလည်း မစောင့်ထိန်းသောသူသည် ကယ်တင်ခြင်းသို့ မရောက်ရ။

၃ ရှုလော့၊ ငါ၊ ကိုယ်တော်ရှင်၊ မိန့်တော်မူ၏။ ငါမိန့်တော်မူလေပြီး၊ ပညတ်တော် ကျိုးပေါက်ပြီးနောက် မနာခံမည့်သူသည် ငါ၏ကာလ အချိန်တန်သော အခါ၌ ပယ်ရှင်းခံရလိမ့်မည်။

၄ သို့ဖြစ်၍၊ ငါ၊ ကိုယ်တော်ရှင်သည် ကောင်းမြတ်သည်ဟု မှတ်ယူသည့်အတိုင်း၊ မိန့်တော်မူပြီး၊ ပယ်ဖျက်၏။ ခပ်သိမ်းသောဤအရာတို့သည်လည်း ပုန်ကန်သောသူတို့၏ ဦးခေါင်းပေါ်သို့ ကျရောက်စေဖို့ဖြစ်သည်ဟု ကိုယ်တော်ရှင်မိန့်တော်မူ၏။

၅ သို့ဖြစ်၍၊ ငါ့ကျွန်များဖြစ်သည့် သောမတ်စ်ဘီမာ့ရှ်နှင့် အယ်ဇရာသဲရာတို့အား ပေးထားလေသည့် ပညတ်တော်ကို ငါပယ်ဖျက်၏၊ ငါ့ကျွန်သောမတ်စ်အား၊ မစ်ဆိုရီပြည်သို့ အလျင်အမြန်ခရီးသွားရမည့်အကြောင်းနှင့်၊ ငါ့ကျွန် ဆီလာ့ဂျေဂရစ်ဖင်ကိုလည်း သူနှင့်အတူသွားရမည့်အကြောင်း ပညတ်တော်အသစ်ကို ပေး၏။

၆ အကြောင်းမူကား၊ ရှုလော့၊ ငါ့ကျွန်များဖြစ်သည့် ဆီလာ့ဂျေဂရစ်ဖင်နှင့် နီဝယ်လ်နိုက်တို့အား ပေးထားလေသည့် ပညတ်တော်ကို သောင်ပဆင်၌ရှိကြသည့် ငါ့လူမျိုးတို့၏ လည်ပင်းခိုင်မာခြင်းနှင့် သူတို့ပုန်ကန်ခြင်း၏ အကျိုးဆက်အဖြစ်၊ ငါပယ်ဖျက်၏။

၇ သို့ဖြစ်၍၊ ငါ့ကျွန်နီဝယ်လ်နိုက်ကို သူတို့နှင့်အတူ ဆက်၍နေစေလော့။ ငါ့ရှေ့၌ ကြေကွဲသည့် သွားလိုသူမှန်သမျှ၊ သွားနိုင်ကြပေ၏၊ ငါခန့်အပ်ထားလေသည့် ပြည်သို့ သူ့အားဖြင့် ပို့ဆောင်ခံကြရလိမ့်မည်။

၈ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်အယ်ဇရာသဲရာသည် သူ၏မာနမှလည်းကောင်း၊ သူ၏တစ်ကိုယ်ကောင်းဆန်ခြင်းမှလည်းကောင်း နောင်တရရမည်၊ သူနေထိုင်သည့်နေရာအကြောင်း သူ့အား ငါပေးလေသည့် ယခင်ပညတ်တော်ကိုလည်း နာခံရမည်။

၉ သူသည် ဤသို့ပြုမည်ဆိုလျှင်၊ ထိုပြည်ပေါ်၌ ပိုင်းခြားခြင်းကို မပြုကြရသဖြင့်၊ မစ်ဆိုရီပြည်သို့ သွားရန် ခန့်အပ်ခံရလျက် ရှိနေပေဦးမည်။

၁၀ သို့မဟုတ်လျှင်၊ သူပေးလေသည့် ငွေကို သူရရှိလိမ့်မည်၊ ထိုနေရာမှလည်း ထွက်ခွာရမည်၊ ငါ၏ အသင်းတော်မှလည်း ပယ်ရှင်းခံရလိမ့်မည်ဟု ကောင်းကင်ဗိုလ်ခြေကိုယ်တော်ရှင်ဘုရားသခင် မိန့်တော်မူလေ၏။

၁၁ ကောင်းကင်နှင့်မြေကြီး၊ ကွယ်ပျောက်သွားသော်လည်း၊ ဤစကားများ ကွယ်ပျောက်သွားလိမ့်မည်မဟုတ်ဘဲ၊ ပြီးပြည့်စုံစေလိမ့်မည်။

၁၂ ငါ့ကျွန်ဂျိုးဇက်စမစ်အငယ်သည်လည်း ငွေပေးဖို့ လိုအပ်လျှင်၊ ရှုလော့၊ ငါ၊ ကိုယ်တော်ရှင်သည် ထိုငွေကို သူ့အား မစ်ဆိုရီပြည်၌ တစ်ဖန်ပေးတော်မူမည်၊ သူ့ကို ရရှိစေမည့်သူတို့အား သူတို့ပြုကြသည့်အတိုင်း တစ်ဖန်အကျိုးကျေးဇူးရရှိနိုင်ကြစေကြောင်းပေတည်း။

၁၃ အကြောင်းမူကား၊ သူတို့ပြုကြသည့်အတိုင်း၊ သူတို့၏အမွေခံရာမြေများအဖြစ်ပင် သူတို့ရရှိကြလိမ့်မည်။

၁၄ ရှုလော့၊ ငါ၏လူမျိုးတို့ကို ကိုယ်တော်ရှင်မိန့်တော်မူသည်ကား—သင်တို့၌ ပြုစရာနှင့် နောင်တရစရာများစွာ ရှိကြ၏၊ အကြောင်းမူကား၊ ရှုလော့၊ သင်တို့၏ အပြစ်များသည် ငါ့ထံသို့ တက်လာကြပေ၏၊ သင်တို့သည် ကိုယ့်လမ်းကိုယ်လိုက်၍ တိုင်ပင်ရန် ကြိုးစားအားထုတ်ကြသောကြောင့် ချမ်းသာခွင့်လည်းမရကြ။

၁၅ သင်တို့၏စိတ်နှလုံးသည် အမွတ်မပြေကြ။ သင်တို့သည် သမ္မာတရားကို မနာခံကြဘဲ၊ မတရားမှု၌ နှစ်သက်ကြ၏။

၁၆ သင်တို့၏ဥစ္စာကို ဆင်းရဲသားများသို့ မပေးမည့်သူတည်းဟူသော အသင် ကြွယ်ဝသောသူတို့သည် အမင်္ဂလာရှိကြ၏။ အကြောင်းမူကား၊ သင်တို့၏စည်းစိမ်ဥစ္စာများသည် သင်တို့ဝိညာဉ်ကို လှိုက်စားလိမ့်မည်။ ရိတ်သိမ်းချိန် ကုန်လွန်သွားပြီ၊ နွေရာသီပြီးဆုံးပြီ၊ ငါ၏စိတ်ဝိညာဉ်သည်လည်း ကယ်တင်ခြင်းသို့မရောက်ဟု ကြည့်ရှုစီရင်ရာ၊ တရားစီရင်ရာ၊ ဒေါသကာလ၌ ဤသို့အားဖြင့် သင်တို့၏ငိုကြွေးမြည်တမ်းခြင်း ဖြစ်လိမ့်မည်။

၁၇ မကျိုးပဲ့သည့် စိတ်နှလုံးရှိသောသူများ၊ မကြေကွဲသည့် စိတ်ဝိညာဉ်ရှိသောသူများ၊ မဝသည့်ဝမ်းရှိသောသူများ၊ အခြားသောသူတို့၏ပစ္စည်းများကို စွဲကိုင်ခြင်းမှ မရှောင်ကြဉ်သည့်လက် ရှိသောသူများ၊ လောဘကြီးခြင်းနှင့်ပြည့်သည့် မျက်လုံးရှိသောသူများ၊ သင်တို့ကိုယ်တိုင်၏လက်ဖြင့် အလုပ်မလုပ်လိုသည့် အသင်ဆင်းရဲသားတို့သည် အမင်္ဂလာရှိကြ၏။

၁၈ သို့ရာတွင်၊ ကျိုးပဲ့သည့် စိတ်နှလုံးရှိသောသူများ၊ ကြေကွဲသည့် စိတ်ဝိညာဉ်ရှိသောသူများဖြစ်သည့် စိတ်နှလုံးစင်ကြယ်သော ဆင်းရဲသားတို့သည် မင်္ဂလာရှိကြ၏၊ အကြောင်းမူကား၊ သူတို့ကို ကယ်လွှတ်ဖို့ တန်ခိုးတော်အရှိန်နှင့် ကြီးစွာသောဘုန်းတော်ဖြင့် ကြွလာတော်မူသည့် ဘုရားသခင်၏ နိုင်ငံတော်ကို သူတို့မြင်ကြရလိမ့်မည်။ မြေကြီး၏ဆီဥသည် သူတို့၏အရာဖြစ်လိမ့်မည်။

၁၉ အကြောင်းမူကား၊ ရှုလော့၊ ကိုယ်တော်ရှင်ကြွလာတော်မူလိမ့်မည်၊ အကျိုးအပြစ်သည် သူနှင့်အတူရှိတော်မူလိမ့်မည်၊ သူသည် လူတိုင်းကို အကျိုးကျေးဇူးပေးလိမ့်မည်၊ ဆင်းရဲသားတို့သည် ရွှင်လန်းဝမ်းမြောက်ကြလိမ့်မည်။

၂၀ သူတို့၏မျိုးဆက်တို့သည်လည်း မြေကြီးကို လူမျိုးအစဉ်အဆက်၊ ကာလအစဉ်အဆက် အမြဲအမွေခံရကြလိမ့်မည်။ ယခုမူကား၊ ငါသည် သင်တို့အား ဟောပြောခြင်းကို လက်စသတ်၏။ ထိုကဲ့သို့ပင်တည်း။ အာမင်။