Tuanga 60
Te eeuanga tei orongaia mai na roto ia Iosepha Timeti te Peroveta, i Jackson County, Missouri, i te rā 8 o Aukete, 1831 (History of the Church, 1:201–202). I teia atianga nei, kua inangaro te au ereta tei ikiia kia oki atu ki te Itinga kia kite e ka akapeea ratou me akamata, e ka aere oki ratou naea.
1–9, Kia ako te au ereta i te evangelia ki rotopu i te au putuputuanga o te aronga kino; 10–14, Auraka ratou e akapou puapinga kore i to ratou taime, e auraka katoa e tanu i ta ratou au taleni; 15–17, Ka tika ia ratou kia ruru i te repo i to ratou vaevae ei kite papu ki te aronga tei patoi i te evangelia.
1 I na, te tuatua maira te Atu ki te au ereta o tana akonoanga, ko te ka oki viviki atu ki te enua no reira mai ratou: I na, kua mareka au no tei aere mai kotou;
2 Kareka tetai pae, kare au i mareka rava, no te mea kare oki ratou e amama i to ratou vaa, i na ra, kua uuna ua ratou i te taleni taku i oronga atu kia ratou, no te mataku i te tangata. Aue oki ratou, kua maata tikai toku riri ia ratou.
3 E ka tae akera, me kare akera ratou e akamaata i te akarongo kiaku, ka rave ke ia mei ia ratou, koia te au mea tei rauka ia ratou.
4 Ko au oki, ko te Atu tei tutara i runga nei i te rangi, e ki rotopu katoa i te au nuku o te enua nei; e i taua rā e akaari mai ei au i taku au mea puapinga tikai, ka kite i reira te tangata katoatoa e eaa tikai teia mana o te Atu.
5 I na ra, tika tikai, ka tuatua atu au kia kotou no runga i to kotou tere ki te enua no reira mai kotou. Kia maaniia tetai pai, me kore ra e oko mai i tetai i tei tau meitaki ia kotou, kare au e manatā atu, e ka aere viviki atu ei kotou ki te ngai tei karangaia e ko St. Louis.
6 E mei reira atu, kia aere atu toku au tavini a Sidney Rigdon, Iosepha Timeti, Tamaiti, e Oliver Cowdery ki to ratou tere ki Cincinnati;
7 E i roto i teia ngai ka akateitei ei ratou i to ratou reo, i te akakite i taku tuatua ma te reo maata, ma te kore e riri e te ekoko, i te takianga i te rima tapu ki rungaʼo ia ratou. Ka rauka iaku kia akatapu ia kotou, e kua akakoreia ta kotou au ara.
8 E kia aere atu te toenga mei St. Louis, tatakirua, ma te tutu i te tuatua, auraka e rapurapu ua, i rotopu i te uipaanga a te aronga kino, e tae atu ki te taime e oki ei ratou ki te akonoanga no reira mai ratou.
9 E meitaki pouroa teia no te au putuputuanga o te akonoanga; no teia akakoroanga i tono ei au ia ratou.
10 E kia oronga taku tavini ko Edward Partridge i tetai tuanga o te moni taku i oronga atu kiaia ki taku au ereta tei akaueia kia oki mai;
11 E ko te ka rauka, kia akaoki atu i te reira na roto i te mata; e me kore ra e rauka, kare aia e maroia.
12 E teianei te tuatua nei au no runga i te toenga te ka aere mai ki teia enua.
13 I na, kua tonoia ratou kia tutu i taku evangelia ki roto i te putuputuanga o te aronga kino; no reira, te oronga nei au i tetai akaueanga kia ratou, koia oki: Auraka e kaimoumou ua i to kotou taime ma te kare e angaanga, auraka e tanu i ta kotou taleni kia kore e kitea.
14 E i muri ake i to kotou taeanga ki te enua ko Ziona, e kua tutu i taku tuatua, e oki viviki atu kotou ei akakite i taku tuatua ki rotopu i te uipaanga a te aronga kino, auraka e rapurapu, auraka e riri, auraka katoa e karo atu.
15 E ka ruru atu ei i te one o to kotou vaevae ei akapapuanga ki te aronga tei kore i ariki mai ia kotou, auraka ra i mua i to ratou mata, kia kore kotou e akariri atu ia ratou, ei roto ra i te ngai muna; e orei ei kotou i to kotou vaevae, ei akapapuanga na kotou ia ratou kia tae ki te rā o te akavaanga.
16 I na, kua rava teia no kotou, e te anoano nona tei tono ia kotou.
17 E na roto i te vaa o taku tavini ko Iosepha Timeti, Tamaiti, ka akakiteia atu ei no runga ia Sidney Rigdon e Oliver Cowdery. Te toenga a muri ake. Koia ïa. Amene.