1 I na, e akarongo mai ki te reo o tei mou i te au mana katoatoa, ko te ka vai e mutukore e mutukore uatu, koia te Alepha e te Omega, te momua e te akaopenga.

2 I na, tika tikai te tuatua maira te Atu kia kotou, e te au ereta o taku akonoanga, tei putuputu mai ki rungaʼo i teia ngai nei, ko tei akakoreia ta kotou au ara, ka akakore oki au, ko te Atu, i te ara, e ka aroa oki au i te aronga te ka aaki mai i ta ratou ara ma te ngakau akaaka tikai;

3 I na ra, tika tikai taku e karanga atu kia kotou, kare e anoanoia teia pupu ereta katoatoa nei kia aere viviki atu na rungaʼo i te vai, mei te mea e te mate ua maira te iti tangata o nga pae i te irinaki kore.

4 Kareka ra, kua akatika au i te reira kia rauka ia kotou i te akapapu mai; i na, e manganui te kino o rungaʼo i te au vai, pera katoa tikai a muri ake;

5 Kua akaue oki au, ko te Atu, i roto i toku riri i te au kino e manganui i rungaʼo i te au vai; e i rungaʼo tikai i teia au vai nei.

6 Kareka ra, tei roto oki i toku rima te au kopapa katoatoa, e ko tei tu akarongo i rotopu ia kotou na, kare aia e mate i te au vai.

7 No reira, e mea tau rava i taku tavini ia Sidney Gilbert e taku tavini ia William W. Phelps, kia aere viviki atu i to raua tere e ta raua angaanga.

8 Kareka ra, kare au i akatika kia takake vave kotou, kia akautunga rava ia kotou no ta kotou au ara, kia riro kotou ei okotai, e kia kore oki kotou e mate i roto i te kino;

9 I na ra, i teianei, tika tikai taku e karanga atu, kua tau meitaki iaku kia takake kotou. No reira kia aere rai oki taku nga tavini ko Sidney Gilbert e William W. Phelps kia apai i to raua pupu mua rai, e kia aere viviki atu ratou kia rauka oki ia ratou kia akatupu atu i ta ratou angaanga, e na roto oki i te akarongo ka autu ratou;

10 E me vai akarongo ua atu rai ratou, ka akaoraia ratou, e ka noo oki au, ko te Atu, ki o ratou.

11 E kia apai oki te toenga i tei anoanoia no te kakau.

12 E auraka oki taku tavini a Sidney Gilbert e rave i tei kore i anoanoia nona, i taau ka akatika.

13 I teianei, i na, kua oronga atu au i tetai akaueanga ei meitaki no kotou no runga i teia au mea nei; e ka uriuri atu rai au, ko te Atu, kia kotou mei taku oki i rave ki te au tangata i taito.

14 I na, kua akameitaki oki au, ko te Atu, i te au vai i muatangana; i na ra, kia tae ki te au rā openga, kua taumaa au i te vai na roto i te vaa o taku tavini ko Ioane.

15 No reira, ka tae mai te au rā e kare rava e tangata e ora i rungaʼo i te tua o te au vai.

16 E ka karangaia oki i te au rā ki mua e kare rava e tangata e rauka kia aere atu ki te enua ko Ziona na runga i te vai, mari ra ko tei tiamā te ngakau.

17 E mei taku oki, ta te Atu, i taumaa i te enua i muatangana ra, koia katoa taku ka akameitaki i te reira i te au rā openga, i tona tuatau, ei puapinga no taku aronga tapu, kia kai oki ratou i te rito i roto i reira.

18 I teianei, te oronga atu nei au kia kotou i tetai akaueanga, e ko taku ka tuatua atu ki tetai, ka tuatua au ki te katoatoa rava, e kia na mua ake kotou i te akamatakite i to kotou au taeake no runga i teia au vai nei, e kia kore oki ratou e aere mai na runga i te reira, ko te paruparu aea to ratou akarongo, e ko te mou aea ratou ki roto i te puereere;

19 Kua akaue oki au, ko te Atu, e te aere nei te akapou na runga i te tua o te reira vai, e kare rava au e akakore i te akaue.

20 Kua riri oki au, ko te Atu, ia kotou inanai, i na ra, i teia rā nei kua kore toku riri.

21 No reira, ko te aronga taku e tuatua atu nei, kia aere viviki atu ki to ratou tere—e te karanga akaou atu nei au kia kotou e, kia aere viviki atu ratou ki to ratou tere.

22 E kare rava oki au e manamanata i muri ake i tetai taime poto, mei te mea e akatupu ratou i ta ratou angaanga, noatu e ka aere ratou na runga i te vai, me na runga i te enua; kia riro teia e kia tau ki tei akakiteia mai no to ratou au akavaanga a muri ake.

23 E teianei, no runga i taku au tavini ko Sidney Ridgon, Iosepha Timeti, Tamaiti, e Oliver Cowdery, auraka ratou e aere akaou mai na runga i te vai, mari ua ra na runga i te kanala, ka aere atu ei ki to ratou au ngutuare; me kore ra auraka oki ratou e aere akaou mai na runga i te vai, mari ua ra na runga i te kanala.

24 I na, kua akataka oki au, ko te Atu, i tetai mataara no te aereanga o taku aronga tapu; e i na, ko teia te mataara—i muri ake i to ratou akarukeanga i te kanala ka aere atu ratou na runga i te enua, mei te mea oki e kua akaueia ratou kia aere ki runga ki te enua ko Ziona;

25 E ka rave ratou mei ta te tamariki rai a Iseraela, i te patuanga i to ratou au puakapa i to ratou aerenga.

26 E, i na, ko teia akaueanga nei, ka oronga atu kotou i te reira ki to kotou ai taeake katoatoa.

27 Kareka ra oki e koai tei orongaia atu te mana kia akaue atu i te au vai, e na te Vaerua oki e oronga atu kiaia kia kite i tona au arataa katoatoa;

28 No reira, ka rave aia mei ta te Vaerua o te Atua ora i akaue mai kiaia, noatu e i runga i te enua e me kore ra i runga i te au vai, mei tei tau rai iaku i te rave a muri ake.

29 E te orongaia atu nei kia kotou i te mataara no te aronga tapu, e me kore ra te ravenga no te aronga tapu o te puakapa o te Atu, no te tereanga.

30 E pera katoa, tika tikai taku e karanga atu kia kotou, e taku au tavini e Sidney Rigdon, Iosepha Timeti, Tamaiti, e Oliver Cowdery, kare rava ratou e amama atu i to ratou au vaa i roto i te au putuputuanga o te aronga kino, kia tae rava ra ratou ki Cincinnati;

31 E i roto i taua ngai ra ratou e akateitei atu ei i to ratou reo ki te Atua no te akaapa i taua au tangata ra, ae, kiaia tei riri i to ratou tu kino, e iti tangata tei tau tikai kia takoreia.

32 E mei reira atu kia tere ratou ki te au putuputuanga a to ratou ai taeake, no te mea te inangaroia nei oki ta ratou au angaanga kia maata uatu rai ki rotopu ia ratou, auraka ra ki rotopu i te putuputuanga o te aronga kino.

33 E teianei, no runga i te au tangata e toe nei, kia tere atu ratou ma te akakite aere atu i te tuatua ki rotopu i te au putuputuanga o te aronga kino nei, kia tau ki te ka orongaia mai;

34 E me rave oki ratou i teia, ka tamā ratou i to ratou kakau, e ka tu ratou ma te titoutou kore ki mua iaku.

35 E kia aere kapiti ratou, me kore ra tatakirua, i tei tau ua ia ratou, mari ua ra ko taku tavini ko Reynolds Cahoon, e taku tavini ko Samuel H. Smith, kua mareka rava au ia raua, auraka rava raua e takake e tae ki te tuatau e oki mai ei raua ki to raua au ngutuare, e ko teia no tetai akakoroanga pakari i roto iaku.

36 E teianei, tika tikai taku e karanga atu kia kotou, e ko taku ka tuatua atu ki tetai ka tuatua au ki te katoatoa rava, kia mataora kotou, e te tamariki rikiriki; tei rotopu oki au ia kotou, e kare oki au i akangaropoina ia kotou;

37 E mei te mea e kua taakaaka kotou ia kotou uaorai ki mua iaku, no kotou tikai te au akameitakianga o te basileia.

38 E tatua i to kotou taukupu e kia matakite ma te akono meitaki, i te akaraanga atu ki mua no te aereanga mai o te Tamaiti a te Tangata, no te mea ka tae mai oki aia i te ora manako kore ia e kotou.

39 E pure putuputu uatu rai kia kore kotou e rokoia e te timataanga, kia vai mai oki kotou i te rā e aere mai ei aia, i teia oraanga nei, me i te mate. Koia ïa. Amene.