Tuanga 63
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te pae openga o te marama ko Aukete 1831 (History of the Church, 1:206–211). Kua tae atu te Peroveta, Sidney Rigdon, e Oliver Cowdery ki Kirtland i te rā 27 o Aukete, mei to ratou tere ki Missouri. I mua ake i tana tataanga i teia eeuanga, kua tata te Peroveta: “I roto i teia au rā ou nei o te Akonoanga, te vai ra tetai anoanoanga maata kia ariki mai i te tuatua a te Atu no runga i te au tumu tuatua katoatoa tei tau i te akaoraanga; e i te mea oki e, ko te enua ko Ziona te mea puapinga maata rava atu i te pae kopapa nei, kua ui atu au ki te Atu no tetai au akamāramaanga no runga i te akaputuputuanga o te aronga tapu, e te okoanga mai o te enua, e tetai au mea ke atu” (History of the Church, 1:207).
1–6, E rā riri otooto te ka tae mai ki rungaʼo i te aronga kino; 7–12, Ka tupu te akairo na roto i te akarongo; 13–19, Ko tei akaturi i roto i te ngakau, ka patoi i te akarongo e ka uriia ratou ki roto i te roto aʼi; 20, Ka rauka te nooanga o te aronga akarongo ki roto i te enua tei akatukeia; 21, Ko te kīanga tikai o te au mea tei tupu ki runga i te Maunga o te Akatukeanga, kare te reira i eeuia mai ake; 22–23, Ka rauka i tei akono tikai te au muna o te basileia; 24–31, Kia okoia mai te au ngai nooanga i Ziona; 32–35, Ka akakite papu te Atu i te au tamaki, e ka tā te aronga kino i te aronga kino; 36–48, Ka akaputuputu oki te aronga tapu ki Ziona, e ka oronga mai i te au moni no te akatuanga i te reira; 49–54, Kua akapapuia te au akameitakianga no te aronga akarongo i te Oki Rua Anga Mai, i roto i te tuakaouanga, e i roto katoa i te Aunuingangare; 55–58, E rā akamatakiteanga teia; 59–66, Kua apai puapinga kore ua ia te ingoa o te Atu e ratou tei taangaanga i te reira ma te kore e tikaanga.
1 E akarongo mai, e te au tangata, ma te akatuera i to kotou au ngakau, e uri mai i te taringa mei mamao mai; e akarongo mai, ko kotou tei karanga ia kotou uaorai e e au tangata no te Atu, e akarongo mai ki te tuatua a te Atu e tana i anoano no kotou.
2 Ae, tika tikai, taku e karanga atu, e akarongo mai i te tuatua a tei riri atu ki te aronga kino e te marokiakia;
3 Ko tei anoano i te apai i tana i manako i te apai, e tei akaora i te oraanga o tana i anoano i te akaora;
4 Ko tei akatu i tona uaorai anoano e te rekareka; e ma te takore atu me inangaro aia, e tei rauka katoa oki i te titiri i te vaerua ki roto ia ade.
5 I na, ko au, ko te Atu, te tuatua nei i toku reo e ka akonoia te reira.
6 No reira, tika tikai taku e karanga atu, kia akarongo mai te aronga kino, e kia mataku oki ma te ruketekete katoa tei marokiakia; e kia topiri tei kore i irinaki i to ratou ngutu, no te mea ka tae mai te rā o te riri ki rungaʼo ia ratou mei te matangi puaioio te tu, e ka kite oki te au kopapa katoatoa e ko au te Atua.
7 E ko tei kimi i te au akairo, ka kite aia i te au akairo, i na ra, auraka no te akaoraanga.
8 Tika tikai taku e akakite atu kia kotou, te vai ra tetai aronga i rotopu ia kotou te kimi ra i tetai au akairo, e te vai ra taua aronga mei muatangana mai rai;
9 I na ra, kare te akarongo e rauka mai na roto i te akairo, tera ra, ka aru te akairo i te aronga tei irinaki tikai.
10 Ae, e ka rauka mai te akairo na roto i te akarongo, e kare e na roto i te anoano o te tangata ua nei, na roto ra i te anoano o te Atua.
11 Ae, ka rauka mai te akairo na roto i te akarongo, na roto i te angaanga maata, me kare oki e akarongo kare te Atua e mareka mai i te tangata nei; e ko ta te Atua i riri, kare rai aia e mareka; e no reira, kare aia e akaari mai i te akairo, mari ra na roto i tona riri ki to ratou akaapaanga.
12 No reira, kare au, ko te Atu, e mareka ki tetai pae ia kotou tei kimi i te au akairo e te umeremere no te akarongo, e kare oki no te meitaki o te tangata nei ki toku kakā.
13 Kareka ra, ka oronga atu au i te au akaueanga, e manganui oki tei uri ke mei taku au akaueanga, e kare i akono atu i te reira.
14 Te noo ra i rotopu ia kotou tetai au tane e tetai au vaine akaturi, e ko tetai pae o ratou kua aere ke mei ia kotou, e ko tetai pae te noo nei rai kia kotou, ko te ka eeuia atu oki kia kotou a muri ake.
15 Kia matakite ratou e kia tataraara viviki, ko te tae viviki mai aea te akavaanga ki rungaʼo ia ratou mei te pakati, e ka akaariia mai oki ta ratou angaanga neneva, e ka aru oki ta ratou angaanga ia ratou i roto i te mata o te au tangata.
16 E tika tikai taku e karanga atu kia kotou, mei taku rai oki i tuatua atu ana i mua ana e, ko tei akara atu ki runga i tetai vaine e kua akatupu i te inangaro kiaia, me kore ra me ka akaturi tetai i roto i tona ngakau, kare e rauka ia ratou te Vaerua, te patoi ra i te akarongo e ka mataku katoa.
17 No reira, kua karanga atu au, ko te Atu, e koia tei mataku, e tei kore i irinaki, e te aronga pikikaa katoatoa, e ko tei anoano atu e kua tuatua i te tuatua pikikaa, e te aronga akaturi, e te purepure, e tuanga rai to ratou i roto i te roto aʼi e te teio e kā ua ra, koia te rua o te mate.
18 Tika tikai taku e karanga atu, kare o ratou tuanga i roto i te tuakaouanga mua.
19 E teianei, i na, te karanga atu nei au, ko te Atu, kia kotou e kare kotou i tika ake, no te mea tei rotopu teia au mea nei ia kotou.
20 Kareka ra, ko tei akakoromaki marie e tae uatu ki te openga i roto i te akarongo ma te rave i toku anoano, ko ratou rai ka autu, e ka rauka to ratou ipukarea i te enua nei me tae mai te rā o te akatukeanga;
21 Me akatukeia ake te enua nei, kia tau oki ki te tutu tei akaariia ana ki taku au aposetolo i runga i te maunga; e kare oki i rauka ake ia kotou te kīanga tikai o te akakiteanga.
22 E teianei, tika tikai taku e karanga atu kia kotou, mei taku rai i tuatua atu ana e ka akakite atu au i toku anoano kia kotou, e i na ka akakite atu rai au i te reira kia kotou, kare e na roto i te tu o te akaueanga, no te mea e manganui oki tei kore i akono i taku au akaueanga.
23 I na ra, ko tei akono i taku au akaueanga ka oronga atu au i te au mea muna o toku basileia, e ka vai rai oki ki roto iaia tetai punavai ora i te puipuianga mai e tae uatu ki te ora mutukore.
24 E teianei, i na, ko te anoano teia o to kotou Atu ko te Atua no runga i tona aronga tapu, kia uipa oki ratou ki te ngai okotai ki te enua ko Ziona, auraka e na roto i te rapurapu, ko te tupu mai aea te tauetonoanga, ko te ka akatupu mai i te makimate.
25 I na, ko te enua ko Ziona—te mou nei au, ko te Atu, i te reira ki roto i toku rima;
26 Kareka ra, ka oronga atu au, ko te Atu, i ta Kaisara au apinga kia Kaisara.
27 No reira, te anoano nei au ko te Atu kia oko mai kotou i te au enua, kia rauka oki ia kotou te manuia o te ao nei, kia rauka mai oki ta kotou i te ao nei, kia kore oki ratou e akaririia.
28 Na Satani oki i tuku i te reira ki roto i to ratou ngakau kia riri mai ratou ia kotou, e te akamaringianga toto.
29 No reira, kare te enua ko Ziona e rauka mai, mari ra na roto i te okoanga mai, me kore ra na roto i te toto, e me kore oki teia, kare o kotou ipukarea.
30 E me ka okoia, i na, ka akameitakiia kotou;
31 E me ka na roto i te akamaringianga toto, mei ta kotou i akaueia e auraka kia pera, i na, ka tae mai to kotou au enemi ki rungaʼo ia kotou, e ka tāia ia kotou mei tetai oire ki tetai oire, e mei tetai sunago ki tetai sunago, e tokoiti ua ake te ka tu i tetai ipukarea.
32 Kua riri au, ko te Atu, i te aronga kino; te tapū nei au i toku Vaerua mei te au iti tangata o te enua nei.
33 Kua taumaa au na roto i te riri, e kua akaue mai i te taumaa o te tamakianga ki runga i te tua o te enua, e ka tā oki te aronga kino i te aronga kino, e ka tae mai te mataku ki te au tangata katoatoa;
34 E ka ngata oki i te aronga tapu i te oro ke; kareka ra, ei vaitata oki au, ko te Atu ia ratou, e ka eke mai oki au mei te rangi mai mei te aroaro o taku Metua ra, e ka akapou i te aronga kino ki te aʼi te ka kore rava e rauka kia tamateia.
35 E i na, kare teia i tupu ake, ka tupu ra a tetai taime.
36 No reira, i te mea oki e naku, na te Atu, i akaue atu i teia au mea katoatoa ki runga i te tua o te enua nei, te anoano nei au kia akaputuputu mai toku aronga tapu ki rungaʼo i te enua ko Ziona;
37 E kia rave oki te au tangata katoatoa i te tuatua-tika ki roto i tona rima, e te akarongo katoa ki tona taukupu, ma te akamaata i tetai reo akamatakite ki te au iti tangata i te enua; e ma te akakite atu na roto i te tuatua e na roto katoa i te tere, e ka tae mai oki te akataneaanga ki rungaʼo i te aronga kino.
38 No reira, kia tika i taku au pipi i Kirtland kia akanoonoo i ta ratou uaorai au mea tei tau ia ratou, ko tei noo ki runga i teia pāma.
39 Kia tika i taku tavini ko Titus Billings, tei riro ei tiaki o reira, kia akapou i te enua, kia teateamamao aia no te tuatau tupu ou te ka tae mai kia aere atu oki aia ki te enua ko Ziona, e kia noo ma te aronga i runga i te aro o taua enua, mari ua ko te aronga taku ka apai mai kiaku nei, e te kare oki e aere vave kia akaue rava au ia ratou.
40 E ko te au moni katoatoa te ka toe mai, kare rava au e manatā atu i te reira noatu e maata, noatu e meangiti, kia tukuia mai te reira ki te enua ko Ziona, ki te aronga oki taku i iki kia ariki mai.
41 I na, ka oronga atu au ki taku tavini ko Iosepha Timeti, Tamaiti, i te mana kia rauka iaia kia kite na roto i te Vaerua i te aronga te ka aere atu ki te enua ko Ziona, e pera katoa i taku au pipi te ka noo āo.
42 Kia noo rai taku tavini a Newel K. Whitney kia tiaki i tona are toa, koia oki, ko te are toa, no tetai tuatau poto ua.
43 Kareka ra, kia oronga atu aia i te moni katoatoa te ka rauka iaia i te oronga atu, kia tukuia atu ki te enua ko Ziona.
44 I na, tei roto teia au mea nei i tona uaorai nga rima, e kia rave aia kia tau ki te tu pakari tikai.
45 Tika tikai taku e karanga atu, kia akataongaia aia ei mata no te au pipi te ka noo āo, e kia akataongaia rai aia ki teia mana.
46 E teianei, e aere viviki atu e atoro i te au akonoanga, ma te akakite atu i teia au mea nei kia ratou, ma taku tavini ko Oliver Cowdery. I na, ko toku anoano teia, kia rauka mai te au moni e kia tau mei taku rai i akaue atu.
47 Koia tei tu akarongo ra e tae uatu ki te openga ka autu aia i te ao nei.
48 Koia tei tuku atu i te au apinga nui ki te enua ko Ziona, ka rauka ia ratou te ipukarea i roto i te ao nei, e ka aru oki tana angaanga iaia, e ka rauka oki te tutaki i te ao a muri ake.
49 Ae, ka akameitakiia tei mate, ko tei mate i roto i te Atu, mei teia nei e aere ua atu ki mua, me tae mai te Atu, ka ngaro ke te au mea takere, e ka riro te au mea katoatoa ei mea ou, e ka tuakaou mai ratou mei te mate mai e kare ratou e mate i muri ake; e ka rauka mai oki te ipukarea i mua i te Atu, i roto i te oire tapu.
50 E ko te ka ora e tae ua mai te Atu, e kua tapū marie i te akarongo, ka akameitakiia aia; kareka ra, kua ikiia kia mate aia i te uki o te tangata nei.
51 No reira, ka tupu te tamariki e tae uatu ki to ratou pakarianga; ka mate oki te aronga pakari; kare ra oki ratou e moe ki roto i te one pueu, ka akatukeia ra ratou mei te kamoanga mata te viviki.
52 No teia tumu oki i ako atu ei te au aposetolo ki to te ao nei i te tuakaouanga o tei mate.
53 Ko teia tikai te au mea ta kotou ka tatari atu; e mei ta te Atu i tuatua mai, te vaitata mai nei oki ratou, e ka tae mai oki te tuatau, koia te rā e tae mai ei te Tamaiti a te Tangata.
54 E me tae mai taua ora ra, ka tu mai tetai au paretenia auouo ki rotopu i te aronga pakari; e i taua ora rai tetai akatakakeanga i te aronga tuatua-tika e te aronga kino; e i taua rā katoa ra au e tono mai ei i taku au angela kia kiriti ki vao i te aronga kino e ka titiri atu ei ki roto i te aʼi mate kore.
55 E teianei i na, tika tikai taku e karanga atu kia kotou, kare au, ko te Atu, i mareka ki taku tavini ko Sidney Rigdon; kua akateitei aia iaia uaorai i roto i tona ngakau, e kare oki i ariki i te akoanga, kua tamamae ra i te Vaerua;
56 No reira kare tana tataanga i arikiia mai e te Atu, e ka rave akaou aia i tetai, e me kare rai te Atu e ariki mai, kare aia e noo akaou ki te taonga taku i akataka iaia.
57 E pera katoa, tika tikai taku e karanga atu kia kotou, ko te aronga tei anoano i roto i to ratou ngakau, ma te tu maru tikai, i te ako atu i te aronga ara kia tataraara, ka akataongaia ratou ki teia mana nei.
58 E rā akamatakiteanga teia, e kare i te rā tuatua maata. Auraka oki au te Atu kia aviriia i te au rā openga.
59 I na, no runga mai au, e ko toku mana te vai nei te reira i raro nei. Tei rungaʼo au i te au mea katoatoa, e tei roto oki i te katoatoa, e kua na roto oki i te katoatoa, e kua kimi i te au mea ravarai, e ka tae mai oki te rā e tukuia mai ei te au mea katoatoa ki raro iaku.
60 I na, ko au te Alepha e te Omega, koia a Iesu Mesia.
61 No reira, kia matakite te au tangata katoatoa i te taikuanga i toku ingoa i roto i to ratou vaa—
62 E i na, tika tikai taku e karanga atu, e manganui oki tei riro ki raro ake i teia akaapaanga nei, ko tei akaiki puapinga kore ua i te ingoa o te Atu ma te kore e mana.
63 No reira, kia tataraara te akonoanga i ta ratou au ara, e tei aku rai tei te Atu te tika ia ratou; me kore ra ka tipu ke ia ratou ki vao.
64 E akamaara e ko te au mea no runga mai, e au mea tapu te reira, e kia tuatuaia oki ma te matakite, e ma te tika katoa a te Vaerua; e me raveia teia kare i reira e akaapaanga, e ka ariki oki kotou i te Vaerua na roto i te pure; e no reira, me kare oki teia e raveia ka vai rai te akaapaanga.
65 Ka tika i taku nga tavini ko Iosepha Timeti, Tamaiti, e Sidney Rigdon kia kimi i tetai ngutuare no raua, mei tei apiiia kia raua na roto i te pure a te Vaerua.
66 Ka vai rai teia au mea nei kia autu oki na roto i te akakoromaki, kia rauka mai ïa te kakā teiaa e te mutukore, me kore ra, e akaapaanga maata tikai. Amene.