1 E kua tuatua maira te Atu kiaku: e Ioane, e taku akaperepere, eaa toou anoano? No te mea, noatu eaa taau ka pati mai, ka orongaia atu te reira kia koe.

2 E kua karanga atu au kiaia: E te Atu, e oronga mai i te mana kia autu au ki rungaʼo i te mate, kia ora au e apai mai ei i te au vaerua kia koe.

3 E kua tuatua maira te Atu kiaku: Tika, tika tikai taku e karanga atu kia koe, no te mea oki e kua pati mai koe i teia, ka noo mai koe e tae ua mai au i roto i toku kakā, e ka totou koe ki mua i te au iti tangata, te au kopu, te au reo, e te au tangata katoa.

4 No reira te Atu i tuatuaʼi kia Petero: Me ka anoano au e kia noo mai aia e tae ua mai au, Eaa taau i reira? I na, kua anoano oki aia iaku, e kia apai mai aia i te au vaerua kiaku, ko koe ra, kua inangaro koe i te oki viviki mai kiaku i roto i toku basileia.

5 Te karanga atu nei au kia koe e Petero, e anoano meitaki tikai teia; i na ra, kua anoano taku akaperepere e kia maata ake tana ka rave, koia oki, e angaanga maata atu tana e rave i rotopu i te au tangata, i tana i rave ana i mua ana.

6 Ae, kua akamata oki aia i te angaanga maata atu; no reira ka akariro au iaia mei te aʼi mura e ei angela matuapuru; nana oki e apii i te aronga e noo nei i te enua e e tuanga to ratou i te akaoraanga.

7 Ka akariro au ia koe ei tauturu nona e no toou taeake ko Iakobo; e te oronga atu nei au i teia mana e te au taviri o teia angaanga tapu kia kotou toko toru, e tae ua mai au.

8 Tika tikai taku e karanga atu kia korua e ka rauka ïa ia korua kia tau ki ta korua e anoano ra, e ka mataora korua i ta korua i anoano ra.