ဩဝါဒနှင့် ပဋိညာဉ်များ ၇၀

အပိုဒ်ငယ် ၇၀

၁၈၃၁ ခု၊ နိုဝင်ဘာ ၁၂ ရက်၊ ဟိုင်ရမ်၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ အထူးညီလာခံများကို နိုဝင်ဘာ ၁ မှ ၁၂ အထိ၊ အစနှင့်အဆုံးရက်များပါ ကျင်းပခဲ့၏ဟု ပရောဖက်၏သမိုင်းက ဖော်ပြ၏။ နောက်ပိုင်း၌ ပညတ်တော်များကျမ်း၊ ထို့နောက်တွင် ဩဝါဒနှင့်ပဋိညာဉ်များ အဖြစ် ပုံနှိပ်ထုတ်ဝေမည့် ကြီးစွာအရေးကြီးသည့် ဗျာဒိတ်တော်များကို ဤအစည်းအဝေးများ၏ နောက်ဆုံးတွင် ဆင်ခြင်ခဲ့ကြ၏။ ဗျာဒိတ်တော်များသည် “အသင်းတော်အဖို့ မြေကြီးတစ်ခုလုံး၏ စည်းစိမ်တမျှထိုက်တန်၏”ဟု ညီလာခံ၌ ဆန္ဒမဲပေးကြပြီးနောက် ဤဗျာဒိတ်တော်များကို ပေးတော်မူခဲ့၏။ “ကျွန်ုပ်တို့ကယ်တင်ရှင်၏ နိုင်ငံတော်နက်နဲခြင်းသော့များကို လူသားသို့ တစ်ဖန် ယုံကြည်လွှဲအပ်သည်ကို ပြသည့် ဤနောက်ဆုံးသောကာလ၌ အသင်းတော်၏အုတ်မြစ်၊ ထို့အတူ လောက၏ အကျိုး”အဖြစ် ဂျိုးဇက်စမစ်၏သမိုင်းက ရည်ညွှန်း၏။

၁–၅၊ ဗျာဒိတ်တော်များကို ပုံနှိပ်ဖို့ တာဝန်ခံများကို ခန့်အပ်၏။ ၆–၁၃၊ ဝိညာဉ်ပကတိအမှုများ၌ အလုပ်လုပ်သောသူတို့သည် မိမိတို့အခကို ခံထိုက်ပေ၏။ ၁၄–၁၈၊ သန့်ရှင်းသူတို့သည် ဇာတိပကတိအရာတို့၌ ညီမျှကြရမည်။

၁ ရှုလော့၊ စေ့စေ့နားထောင်ဦးလော့၊ အို ဇိအုန်၌ နေထိုင်ကြသူ သင်တို့၊ ထို့အတူ အဝေးမှာရှိကြသူများတည်းဟူသော ငါ့အသင်းတော်မှ အသင်လူမျိုးတို့၊ ငါ့ကျွန် ဂျိုးဇက်စမစ်အငယ်ထံသို့လည်းကောင်း၊ ငါ့ကျွန်မာတင်ဟဲရစ်ထံသို့လည်းကောင်း၊ ငါ့ကျွန်အော်လီဗာကောင်ဒရီထံသို့လည်းကောင်း၊ ငါ့ကျွန်ဂျွန်ဝှစ်တမာထံသို့လည်းကောင်း၊ ငါ့ကျွန်ဆစ်ဒနီရစ်ဂဒွန်ထံသို့လည်းကောင်း၊ ငါ့ကျွန်ဝီလျံဒဗလျူဖဲလပ်ထံသို့လည်းကောင်း ပညတ်တော်အတိုင်း သူတို့ကိုပေးသည့် ကိုယ်တော်ရှင်၏ နှုတ်ကပတ်တော်ကို ကြားနာကြလော့။

၂ အကြောင်းမူကား၊ ပညတ်တော်ကို သူတို့အား ငါပေး၏။ သို့ဖြစ်၍ စေ့စေ့နားထောင်၍ ကြားနာကြလော့၊ သူတို့ကို ကိုယ်တော်ရှင်မိန့်တော်မူသည်ကား—

၃ ငါ၊ ကိုယ်တော်ရှင်သည်၊ သူတို့ကို ခန့်အပ်လေပြီ၊ သူတို့ကို ငါပေးတော်မူလေသည့်၊ ထို့အတူ နောင်ကာလ၌လည်း သူတို့ကို ငါပေးတော်မူမည့် ဗျာဒိတ်တော်များနှင့် ပညတ်တော်များအပေါ် တာဝန်ခံများအဖြစ် ခန့်ထားလေပြီ။

၄ တရားစီရင်တော်မူရာနေ့၌ ဤတာဝန်ခံအရာအကြောင်းမှတ်တမ်းကို သူတို့ထံမှ ငါတောင်းမည်။

၅ သို့ဖြစ်၍၊ သူတို့ကို ငါခန့်အပ်ထားလေပြီ၊ ထိုပညတ်တော်များနှင့် ဗျာဒိတ်တော်များ၊ ၎င်တို့၏ အမှုကိစ္စများ၊ ထိုမှတစ်ပါး၊ ၎င်းတို့၏အကျိုးများကို စီမံဖို့မှာ ဘုရားသခင်၏အသင်းတော်၌ သူတို့၏အမှုအရေးဖြစ်၏။

၆ သို့ဖြစ်၍၊ ပညတ်တော်ကို သူတို့အား ငါပေး၏၊ သူတို့သည် ဤအရာတို့ကို အသင်းတော်သို့ မပေးရ၊ လောကသို့လည်း မပေးရ။

၇ သို့သော်လည်း၊ သူတို့သည် မိမိတို့လိုအပ်သည့် မိမိတို့၏မရှိမဖြစ်လိုအပ်ချက်များနှင့် မိမိတို့၏လိုအပ်ချက်များအတွက်ထက် ပို၍လက်ခံရရှိသမျှကို ငါ၏ဘဏ္ဍာတိုက်ထဲသို့ပေးအပ်ရမည်။

၈ အကျိုးအမြတ်တို့ကို ဇိအုန်၌ နေထိုင်ကြသူတို့အဖို့၊ ထို့အတူ သူတို့၏မျိုးဆက်တို့ နိုင်ငံတော်ဥပဒေများအတိုင်း အမွေခံသောသူများဖြစ်လာကြသမျှ သူတို့အဖို့ သီးသန့်ထားလိမ့်မည်။

၉ ရှုလော့၊ ဤအရာသည်ကား လူတိုင်းထံမှ ထိုသူ၏တာဝန်ခံအရာ၌ ကိုယ်တော်ရှင်၊ ငါ၊ ကိုယ်တော်ရှင် ခန့်အပ်လေသည့် သို့မဟုတ် နောင်ကာလ၌ အဘယ်သူ့ကိုမဆို ခန့်အပ်မည့်အတိုင်းပင် အလိုရှိသည့် အရာဖြစ်၏။

၁၀ ရှုဦးလော့၊ အသက်ရှင်တော်မူသော ဘုရားသခင်၏အသင်းတော်နှင့် ဆိုင်သောသူ အဘယ်သူမျှ ဤဥပဒေမှ လွတ်ငြိမ်းခွင့်မရ။

၁၁ အထူးသဖြင့်၊ သင်းအုပ်သည်လည်း မရ၊ ကိုယ်တော်ရှင်၏ဘဏ္ဍာတိုက်ကို ထိန်းသိမ်းသူ ကိုယ်စားလှယ်သည်လည်း မရ၊ ဇာတိပကတိအရာတို့အပေါ် တာဝန်ခံအရာ၌ ခန့်အပ်ခံရသူသည်လည်း မရ။

၁၂ ဝိညာဉ်ပကတိအရာတို့၌ စီမံဆောင်ရွက်ဖို့ ခန့်အပ်ခံရသူသည် ဇာတိကပတိအရာတို့၌ စီမံဆောင်ရွက်ဖို့ တာဝန်ခံအရာသို့ ခန့်အပ်ခံရသူတို့ကဲ့သို့ပင် မိမိအခကို ခံထိုက်၏။

၁၃ အမှန်စင်စစ်၊ သာ၍မြောက်မြားစွာပင် ခံထိုက်၏၊ သူတို့အဖို့ ထိုမြောက်မြားစွာသောအရာတို့ကို ဝိညာဉ်တော်၏ ထင်ရှားစွာပြတော်မူခြင်းအားဖြင့်ပင် ပွားများစေ၏။

၁၄ သို့သော်လည်း၊ သင်တို့၏ဇာတိပကတိအရာတို့၌ သင်တို့ ညီမျှကြရမည်၊ ဤအမှုကို နှမြောသောစိတ်နှင့် မပြုရ၊ သို့မဟုတ်လျှင် ဝိညာဉ်တော်၏ ထင်ရှားစွာပြတော်မူခြင်း မြောက်မြားစွာတို့ကို ရုပ်သိမ်းလိမ့်မည်။

၁၅ ယခုတွင်၊ ငါ၏ကျွန်များ ဆက်၍ရှိနေစဉ်မှာ သူတို့အကျိုးအတွက်၊ သူတို့ဦးခေါင်းပေါ်၌ ငါ၏ကောင်းချီးမင်္ဂလာများ ထင်ရှားစွာပြခြင်းအတွက်၊ ထို့အတူ သူတို့၏လုံ့လဝီရိယအတွက်၊ ထို့အတူ သူတို့၏လုံခြုံမှုအတွက် ဤပညတ်တော်ကို ငါ့ကျွန်တို့အား ငါပေး၏။

၁၆ စားစရာအတွက်နှင့် အဝတ်အတွက်၊ နေထိုင်စရာအတွက်၊ အိမ်များနှင့် မြေများအတွက်ဖြစ်၏၊ အဘယ်အခြေအနေ၌ဖြစ်စေ၊ ငါ၊ ကိုယ်တော်ရှင်သည်၊ သူတို့ကို ထားတော်မူမည်၊ အဘယ်အရပ်ကို ဖြစ်စေ ငါ၊ ကိုယ်တော်ရှင်သည် သူတို့ကို လွှတ်တော်မူမည်။

၁၇ အကြောင်းမူကား၊ သူတို့သည် များစွာသောအရာတို့အပေါ် သစ္စာရှိကြလေပြီ၊ သူတို့သည် အပြစ်မပြုကြလေသမျှ ကောင်းစွာပြုကြလေပြီ။

၁၈ ရှုလော့၊ ငါ၊ ကိုယ်တော်ရှင်သည် ကရုဏာကြီးတော်မူပြီး သူတို့ကို ကောင်းချီးပေးတော်မူမည်၊ သူတို့သည်လည်း ဤအရာတို့၏ဝမ်းမြောက်ခြင်းထဲသို့ ဝင်ရလိမ့်မည်။ ထိုကဲ့သို့ပင်တည်း။ အာမင်။