ဩဝါဒနှင့် ပဋိညာဉ်များ ၇၄

အပိုဒ်ငယ် ၇၄

၁၈၃၀ ခုတွင်၊ ဝိန်းခရိုင်၊ နယူးယောက်၌၊ ပရောဖက်ဂျိုးဇက်စမစ်အားဖြင့်၊ ပေးတော်မူခဲ့သည့် ဗျာဒိတ်တော်။ အသင်းတော်ဖွဲ့စည်းခြင်း မတိုင်မီကပင်၊ သင့်လျော်သော ဗတ္တိဇံနည်းနာ နိဿယအကြောင်း မေးခွန်းများ တိုးပွားလာ၏၊ ထိုအကြောင်းအရာနှင့် စပ်လျဉ်း၍ အဖြေများကို ရှာရန် ပရောဖက်ကို လမ်းညွှန်၏။ ဤဗျာဒိတ်တော်သည် ကလေးသူငယ်ဗတ္တိဇံကို အပြစ်ကင်းစေရန် အကြိမ်ကြိမ်အသုံးပြုလေသော ကျမ်းစာတစ်ခုဖြစ်သည့် ကောရိန္သုဩဝါဒစာမပဌမစောင် ၇း၁၄ အကြောင်း ရှင်းပြချက်တစ်ခုဖြစ်သည်ဟု ဂျိုးဇက်စမစ်၏သမိုင်းက ဖော်ပြ၏။

၁–၅၊ ပေါလုသည် မိမိနေ့ရက်ကအသင်းတော်အား မောရှေ၏ပညတ်တရားကို မစောင့်ထိန်းဖို့ အကြံပေး၏။ ၆–၇၊ ကလေးသူငယ်တို့သည် သန့်ရှင်းကြပြီး၊ အပြစ်ဖြေခြင်းမင်္ဂလာအားဖြင့် သန့်ရှင်းစင်ကြယ်စေကြ၏။

၁ အကြောင်းမူကား၊ မယုံကြည်သောခင်ပွန်းသည် ဇနီးအားဖြင့် သန့်ရှင်းစင်ကြယ်စေ၏၊ မယုံကြည်သောဇနီးသည်လည်း ခင်ပွန်းအားဖြင့် သန့်ရှင်းစင်ကြယ်စေ၏။ သို့မဟုတ်လျှင် သင်တို့၏ သားသမီးတို့သည် မစင်ကြယ်၊ သို့ရာတွင် ယခု၌ သူတို့သည် သန့်ရှင်းကြ၏။

၂ ယခုတွင်၊ တမန်တော်တို့၏ နေ့ရက်များ၌ ယေရှုခရစ်တော်၏ဧဝံဂေလိတရားတော်ကို ယုံကြည်ခြင်းမရှိကြသည့် ခပ်သိမ်းသောယုဒလူမျိုးတို့၌ အရေဖျားလှီးခြင်းတရား ရှိလေ၏။

၃ ဤသို့အားဖြင့်အချိန်တန်လာသောအခါ၊ အရေဖျားလှီးခြင်းတရားနှင့် စပ်လျဉ်း၍ လူတို့၌ ကြီးစွာသော ငြင်းခုံခြင်း ဖြစ်ပေါ်လာ၏၊ အကြောင်းမူကား၊ မယုံကြည်သောခင်ပွန်းသည် မိမိသားသမီးများကို အရေဖျားလှီးခံစေဖို့ အလိုရှိပြီး ပြီးပြည့်စုံစေလေပြီးသော တရားဖြစ်သည့် မောရှေ၏ပညတ်တရားသို့ ဩဇာခံဖြစ်လာကြ၏။

၄ ဤသို့အားဖြင့်အချိန်တန်လာသောအခါ၊ သားသမီးတို့သည် မောရှေ၏ပညတ်တရားကို ဩဇာခံလျက် ပြုစုပျိုးထောင်ခံကြရ၍၊ သူတို့အဘများ၏ နည်းဥပဒေသတို့ကို ပမာဏပြုကြသဖြင့် ယေရှုခရစ်တော်၏ဧဝံဂေလိတရားတော်ကို ယုံကြည်ခြင်းမရှိကြ၊ ထိုကဲ့သို့အားဖြင့် သူတို့သည် မသန့်ရှင်းဘဲဖြစ်လာကြ၏။

၅ သို့ဖြစ်၍၊ ဤအကြောင်းရင်းကြောင့်၊ တမန်တော်သည် အသင်းတော်သို့ ကိုယ်တော်ရှင်ထံမှ မဟုတ်ဘဲ၊ သူကိုယ်တိုင်ထံမှ ပညတ်တော်ကို ပေးလျက် ရေးခဲ့သည်ကား၊ ယုံကြည်သောသူသည် မိမိတို့၌ မောရှေ၏ပညတ်တရား မရပ်စဲလျှင်၊ မယုံကြည်သောသူနှင့် မပေါင်းစည်းရမည့်အကြောင်း၊

၆ သူတို့၏သားသမီးများ အရေဖျားလှီးခြင်းမရှိဘဲဆက်၍ ရှိနိုင်ကြစေခြင်းငှာ၊ ကလေးသူငယ်များ မသန့်ရှင်းဟုဆိုသည့် ထိုနည်းဥပဒေသရပ်စဲသွားစေခြင်းငှာပေတည်း။ အကြောင်းမူကား၊ ယုဒလူမျိုးတို့၌ ထိုနည်းဥပဒေသရှိ၏။

၇ သို့ရာတွင် ကလေးသူငယ်တို့သည် ယေရှုခရစ်တော်၏ အပြစ်ဖြေခြင်းမင်္ဂလာအားဖြင့် သန့်ရှင်းစင်ကြယ်စေ၍၊ သန့်ရှင်းကြ၏။ ဤအရာသည်ကား၊ ကျမ်းစာဆိုလိုသည့်အရာ ဖြစ်၏။