1 E akarongo mai, e to te rangi, e ariu mai to taringa, e to te enua nei, e kia rekareka oki e te au tangata o reira, ko te Atu oki te Atua, e kare atu e Akaora ke atu iaia.

2 E kite pakari maata oki tona, e te umere i tona ra au aerenga, e ko te angaanga tana e rave nei, kare rava e tangata e kite.

3 Kare tona akakoroanga e ngaro, e kare rava e tangata e rauka kia tapū i tona rima.

4 Ko tai rai ona tu e mutukore ua atu, e kare rava tona mataiti e akamutu.

5 Te tuatua maira te Atu—E Atu aroa ua au e te takinga meitaki ki te aronga tei mataku mai iaku, e ka mataora i te akangateitei atu i tei tavini iaku ma te tika e te tuatua-mou e tae uatu ki te openga.

6 E tutaki maata oki to ratou, e mutukore oki to ratou kakā.

7 E ka eeu oki au i te au muna katoatoa kia ratou, ae, ko te au muna ngaro katoatoa o toku basileia mei taito mai, e pera katoa ki te au uki ka tu mai, e ka akakite atu oki au kia ratou i te au mea memeitaki o toku anoano no runga i te au mea katoatoa o toku nei basileia.

8 Ae, pera katoa ko te au mea vavaria mutukore ka kite ratou, e ko te au mea te ka tupu ka akakite atu au kia ratou, e pera katoa ko te au mea o te au uki e manganui.

9 E ka maata oki to ratou kite, e ka tae to ratou mārama ki te rangi; e ka ngaro oki te kite o te aronga pakari ki mua ia ratou, e ka puapinga kore oki te mārama o te aronga kite.

10 Na roto oki i toku Vaerua ka akamāramaʼi au ia ratou, e na toku nei mana e akakite atu ei au i te au muna o toku nei anoano—e pera oki ki te au mea kare e kiteaia e te mata tangata, e kare oki te taringa e akarongo, e kare oki e ō ki roto i te ngakau tangata.

11 Ko maua oki, ko Iosepha Timeti, Tamaiti, e Sidney Rigdon, tei roto maua i te Vaerua i te rā tai ngauru ma ono o Peperuare, i te mataiti o to tatou Atu, e tai tauatini e varu anere e toru ngauru ma rua—

12 Na roto i te mana o te Vaerua, kua puera to maua mata, e kua maata mai to maua mārama, kia kite e kia mārama katoa i te au mea a te Atua—

13 E pera katoa te au mea mei muatangana mai no mua ake i te ao nei, tei akatakaia e te Metua na roto i tana Tamaiti Anau Tai, ko tei noo ki te umauma o te Metua, mei muatangana mai ra;

14 Ta maua e akapapu nei; e ko te tuatua ta maua e akakite nei ko te kīanga ïa o te evangelia a Iesu Mesia, koia te Tamaiti, ta maua i kite ana e ta maua oki i tuatua ana i roto i te orama no te rangi mai.

15 No te mea, ia maua e rave ra i te akaurianga, ta te Atu oki i iki ia maua, kua tae mai maua ki te irava rua ngauru ma iva o te pene rima o Ioane, ko tei orongaia mai kia maua mei teia ka aru mai—

16 I te tuatuaanga no te tuakaouanga o tei mate ra, e no runga i te aronga te ka akarongo i te reo o te Tamaiti a te Tangata:

17 E kua aere maira ki vao; tei rave ana i te meitaki ra, ei te tuakaouanga o te aronga apakore; e tei rave ana i te kino ra, ei te tuakaouanga o te aronga apa.

18 Na teia i akakeu ia maua kia umere, no te mea kua orongaia mai kia maua e te Vaerua.

19 E ia maua e uriuri ra no teia au mea nei, kua akatukia maira te Atu i te kite o to maua mata kua puera iora, e kua pini rava akera maua i te mārama o te Atu.

20 E kua kite iora maua i te kakā o te Tamaiti, ki te rima katau o te Metua, e kua ariki mai i tona kīanga tikai;

21 E kua kite atu i te au angela tapu, e ratou katoa tei akatapuia ki mua i tona terono, i te akamorianga i te Atua, e te Punua Mamoe, i te akamorianga iaia e tuatau e tuatau uatu.

22 E teianei, i muri ake i te au kite papu e manganui tei orongaia mai nona, ko teia i reira te kite openga rava atu o te katoatoa, ta maua e oronga nona: Te ora nei aia!

23 Kua kite oki maua iaia, i te rima katau o te Atua; e kua rongo oki matou i te reo i te akakiteanga mai e koia te Anau Tai a te Metua—

24 E nana oki, e na roto iaia, e nona oki, i angaiaʼi te au ao nei, e ko te au iti tangata o reira, e au tamaroa e e au tamaine anau ïa na te Atua.

25 Kua kite katoa oki maua i teia, e kua akakite, e ko tetai angela a te Atua e mana tona i mua i te aroaro o te Atua, kua patoi atu oki aia i te Tamaiti Anau Tai, ta te Metua i akaperepere e tei noo ana ki te umauma o te Metua, e kua tiriaia mai ki raro mei mua mai i te aroaro o te Atua e te Tamaiti,

26 E kua tuatuaia oki aia e ko te Mate Mutukore, kua aue oki to te rangi iaia—ko Lusifero oki aia, tetai tamaiti o te popongi.

27 E kua kite oki maua, e i na, kua inga aia! Kua inga, tetai tamaiti a te popongi!

28 E ia maua rai i roto i te Vaerua, kua akaue mai te Atu ia maua kia tata maua i teia orama nei; kua kite oki maua ia Satani, taua ovi taito, te diabolo, ko tei patoi i te Atua, e tei kimi kia apai ke i te basileia o to tatou Atua e tana Mesia—

29 No reira, kua akatupu aia i te tamaki ki te aronga tapu o te Atua, ma te koropini ia ratou e pini uake.

30 E kua kite oki maua i tetai orama i te mamae o te aronga tana i akakai tamaki atu e tei autu, e kua tae maira te reo o te Atu kia maua:

31 No reira kua tuatua maira te Atu no runga i te aronga katoatoa tei kite ana i toku mana, e kua akariroia ei aronga rave, e kua akatika ia ratou uaorai na roto i te mana o te diabolo kia autuia, e kia pikikaa i te tuatuamou ma te patoi i toku mana—

32 Ko ratou oki te au tamaroa a te mate mutukore, e kua karanga oki au e, e ngari ake ratou kia kore e anauia mai;

33 Kua riro ratou ei vairanga no te kino, tei akavaia kia mamae i te riri o te Atua, e ko te diabolo e tana au angela ka noo ratou e mutukore uatu;

34 No runga oki i taku e tuatua atu nei, kare oki e akakoreia tana ara i teia ao nei, e pera katoa ki te ao a muri ake—

35 Ko tei uuna i te Vaerua Tapu i muri ake i te raukaanga, e kua pikikaa i te Tamaiti Anau Tai a te Metua, e kua akasatauro iaia no ratou uaorai, e kua ta akama iaia ki te atea ua.

36 Ko te aronga teia te ka tiriaia atu ki roto i te roto aʼi e te teio, ma te diabolo katoa oki e tana au angela—

37 E ko te aronga anake oki teia te ka mana te rua o te mate ki runga ia ratou;

38 Ae, tika tikai, ko te aronga anake te kare e akaoraia i roto i te tuatau o te Atu, i muri ake i te mamae anga i tona riri.

39 E ko te toeanga rava, ka apainaia mai ratou na roto i te tuakaouanga o tei mate ra, na roto i te autuanga e te kakā o te Punua Mamoe, tei tāia ia, ko tei noo ana ki te umauma o te Metua, i mua ake ka angaiaʼi te au ao.

40 E ko teia te evangelia, te karere meitaki, ta te reo no roto mai i te rangi i akakite mai kia maua—

41 Koia oki, kua aere mai aia ki te ao nei, koia a Iesu, kia akasatauroia no te ao nei, e kia apai i te ara a to te ao nei, e kia akatapu i to te ao nei, e kia tamā i te reira mei te au mea tika kore ravarai;

42 E na roto oki iaia e oraʼi te au tangata ravarai ta te Metua i tuku ki tona mana, e tei angaia e ïa;

43 Ko tei akakakā i te Metua, e tei akaora i te au angaanga a tona ra rima, mari ua ra ko te au tamaroa a te mate mutukore, ko tei patoi i te Tamaiti i muri ake i to te Metua eeuanga mai iaia.

44 No reira, ka akaora aia i te katoatoa rava, mari ua ko ratou—ka aere ke ratou ki roto i te akautungaanga ope kore, koia te akautungaanga openga kore, koia te akautungaanga mutukore, kia tutara ma te diabolo e tana au angela e mutukore uatu, te ngai kare to ratou toketoke e mate, e kare oki te aʼi e mate, e ko to ratou ra mamarai te reira—

45 E ko to ratou openga, e to ratou ngai katoa, e to ratou ra mamaeanga ia, kare e tangata i kite;

46 E kare oki te reira i eeuia mai, kare ake rai, e kare rai oki e eeuia mai ki te tangata nei, mari ra kia ratou tei akariroia ei aronga raverave;

47 Kareka ra, kua akaari atu oki au, te Atu, ki tetai aronga e manganui na roto i te orama, i na ra, kua topiri akaou ia;

48 No reira, ko te ope, ko te atea, ko te teitei, e te oonu, e te mamae, kare ratou i mārama, e kare katoa oki tetai uatu tangata i kite, mari ua ra ko tei akatakaia ki teia akaapaanga nei.

49 E kua rongo oki maua i te reo i te na ko anga e: E tata i te orama, e i na, ko te openga rai teia o te orama no te mamaeanga o te aronga atua kore.

50 E i na, te akapapu akaou nei maua i te tuatua—no te mea, kua kite oki maua e kua akarongo katoa, e ko teia oki te kite papu o te evangelia a te Mesia no runga ia ratou te ka tuakaou mai i roto i te tuakaouanga o te aronga tuatua-tika—

51 Ko ratou oki teia tei ariki i te kite o Iesu, e tei irinaki ki tona ra ingoa e kua bapetizoia mei te tu o tona tanumiaanga ia, kua tanumia oki ki raro i te vai na roto i tona ingoa, e kua tau oki teia ki te akaueanga tana i oronga mai—

52 E na roto oki i te akonoanga i te au akaueanga ka oreiia e ka tamāia ratou mei ta ratou au ara, e ka ariki mai oki i te Vaerua Tapu na roto i te tukuanga rima o tei akataongaia e tei topiriia ki teia mana nei;

53 E ko tei autu na roto i te akarongo ra, e kua topiriia e te Vaerua Tapu o te taputou, ta te Metua oki e oronga mai ki te katoatoa rava tei rauka te tuatua-tika e te tuatua-mou.

54 Ko ratou oki taua aronga ra o te akonoanga a te Tama Mua.

55 E ko ratou oki taua aronga ra ta te Metua i oronga atu i te au mea katoatoa ki roto i to ratou rima—

56 Ko ratou oki taua aronga ra ko tei riro ei au taunga, ei au ariki, e tei ariki i tona kīanga tikai, e tona kakā katoa;

57 E kua riro ei au taunga na Tei Teitei Roa; i raro ake i te akanoonooanga a Melekizedeka, e i raro ake i te akanoonooanga a Enoka, e ko te akanoonooanga ïa a te Tamaiti Anau Tai.

58 No reira, mei tei tataia, e au atua ratou, koia te au tama a te Atua—

59 No reira, no ratou te au mea ravarai nei, noatu e ora me e mate, me kore ra ko te au mea i teianei, e me kore ko te au mea te ka tae mai, na ratou katoatoa ïa, e kua riro ratou no te Mesia, e ko te Mesia ra no te Atua ïa.

60 E ka autu ratou i te au mea katoatoa.

61 No reira, auraka tetai tangata e akakakā i roto i te tangata nei, kia akakakā ra aia i te Atua, ko te ka tuku i te au enemi ravarai ki raro i tona vaevae.

62 Ka noo oki teia ki mua i te aroaro o te Atua e tana Mesia e tuatau e tuatau uatu.

63 Ko teia oki te aronga tana ka apai mai, me aere mai aia na roto i te tiao rangi kia tutara ki te enua nei e ki rungaʼo i tona iti tangata.

64 E ko ratou oki teia te ka tuanga i roto i te tuakaouanga mua.

65 E ko ratou oki teia te ka tu mai i roto i te tuakaouanga o te aronga tuatua-tika.

66 E ko ratou oki teia te ka aere mai ki te Maunga ko Ziona, e ki te oire katoa o te Atua ora, te ngai tuā rangi, te ngai tapu rava atu i to te katoatoa rava.

67 E ko ratou oki teia tei tae ki tetai urupu tare kore ia o te angela, ki te ngai putuputuanga o te akonoanga a Enoka, e ta te Tama Mua.

68 E ko ratou oki teia tei tataia to ratou au ingoa ki te ao ra, e ko te Atua oki e te Mesia te akava no te katoatoa rava.

69 E ko ratou oki teia ko te au tangata tuatua-tika tei akaapakoreia na roto ia Iesu te vaa tuatua o te koreromotu ou, ko tei rave mai i teia tarangaara apakore na roto i te maringianga o tona uaorai toto.

70 E ko ratou oki teia tei rauka te kopapa tiretiera, tei rauka te kakā o te rā, koia te kakā o te Atua, te mea teitei rava atu, ko tei tataia te kakā ra o te rā e e mea matau ïa.

71 E pera katoa, kua kite akaou maua i te ao teretetiera, e i na, teia oki te aronga no te kakā o te marama, e ko to ratou kakā, e tuke rai ïa mei to te akonoanga a te Tama Mua tei ariki mai i te kīanga o te Metua, koia oki, e tuke oki te kakā o te marama mei to te rā i roto i te reva.

72 I na, ko ratou oki teia tei mate ma te kore e ture;

73 E pera katoa, ko ratou ko te au vaerua o te tangata tei vai ki roto i te are tapekaanga, ta te Tamaiti oki i atoro atu, e tei ako katoa atu oki i te evangelia kia ratou, e kia akavaia oki ratou kia aite mei to te au tangata i te kopapa nei;

74 Ko tei kore oki i ariki i te kite papu o te Mesia i te kopapa nei, i na ra, i muri akera kua ariki.

75 E ko ratou oki teia ko te au tangata pikikaa kore o te enua nei, ko tei akamatapoia na roto i te kikite o te tangata nei.

76 Ko ratou oki teia tei ariki i tona ra kakā, i na ra, kare e ko te kīanga tikai.

77 Ko ratou oki teia tei ariki i te aroaro o te Tamaiti, i na ra, kare e ko te kīanga o te Metua.

78 No reira, e au kopapa teretetiera ratou, e kare i te au kopapa tiretiera, tei tuke rai oki i te kakā, mei to te marama oki e tuke rai tona kakā mei to te rā.

79 Ko te aronga oki teia kare i maroiroi to ratou kite papu ia Iesu; no reira, kare i rauka ia ratou te korona ki rungaʼo i te basileia o to tatou Atua.

80 E teianei, ko te openga teia o te orama ta maua i kite no te teretetiera, ta te Atu oki i akaue mai ia maua kia tata, ia maua i roto rai i te Vaerua.

81 E pera katoa, kua kite maua i te kakā tiretia koia te kakā meangiti ake, koia katoa oki te kakā o te etu, e tuke tona kakā mei to te marama i roto i te reva.

82 Ko ratou oki teia tei kore i ariki mai i te evangelia a te Mesia, e pera katoa te kite papu o Iesu.

83 Ko ratou oki teia tei kore i pikikaa i te Vaerua Tapu.

84 Ko ratou oki teia tei tiriaia ki raro ia ade.

85 Ko ratou oki teia te kare e akaoraia mei te diabolo e tae uatu ki te tuakaouanga openga, e oti ua atu te angaanga a te Atu, koia te Mesia te Punua Mamoe.

86 Ko ratou oki teia tei kore i ariki i tona kīanga tikai i roto i te ao mutukore, mari ra ko te Vaerua Tapu na roto i te matuapuruanga o te teretetiera;

87 E ko te teretetiera, kua na roto ïa i te angaanga o te tiretiera.

88 E ko te tiretia kua rauka mai ia ratou na roto i te matuapuruanga a te au angela tei akatakaia ei angaanga no ratou, me kore ra tei ikiia ei au vaerua matuapuru no ratou; ko ratou oki te ka riro ei aronga tuanga no te akaoraanga.

89 No reira kua kite katoa oki maua, i roto i te orama rangi, i te kakā tiretia, ko tei takore i te au akamāramaanga;

90 E kare rava e tangata i kite i te reira, mari ua ko te tangata ta te Atua i eeu mai kiaia.

91 No reira kua kite maua i te kakā teretetiera tei turama atu i te au mea katoa i te kakā tiretia i roto katoa i te kakā, e te mana, e te ririnui, e te tutaraanga.

92 No reira kua kite katoa maua i te kakā tiretiera, tei turama i te au mea katoatoa—ko te ngai e tutaraʼi te Atua, koia te Metua, i runga i tona ra terono e tuatau e tuatau uatu;

93 E ka tupou oki te au mea ravarai ki mua i tona terono ma te akaaka e te tapu, e ma te akakakā atu iaia e tuatau e tuatau uatu.

94 Ko te ka noo ki mua i tona ra aroaro, ko te akonoanga ïa a te Tama Mua; e ka akara oki mei ta ratou i akaraia ana, e ka kite ratou mei ta ratou i kitea ana, i te mea oki e kua rauka ia ratou tona kīanga e tona aroa ua;

95 E ka akaaiteite oki aia ia ratou i roto i te mana, e i roto i te maroiroi, e i roto i te akaaereanga.

96 E ko te kakā o te basileia tiretiera, e okotai ïa, mei te kakā rai oki o te rā ra e okotai.

97 E ko te kakā o te basileia teretetiera, e okotai ïa, mei te kakā rai oki o te marama ra e okotai.

98 E ko te kakā o te basileia tiretia e okotai ïa, mei te kakā rai oki o te au etu e okotai; e tuke oki tetai etu ki tetai i te kakā, no reira, e tuke rai te kakā o tetai mei tetai i roto i te ao tiretia;

99 Ko ratou oki teia tei riro no Paulo, e no Apolo, e no Kepha.

100 Ko ratou oki teia ko tei karanga e, no tetai teia e no tetai atu tera—no te Mesia tetai pae e no Ioane tetai pae, e no Mose tetai pae, e no Elia tetai pae, e no Esaia tetai pae, e no Isaia tetai pae, e no Enoka;

101 I na ra, kare i ariki i te evangelia, e kare katoa i te kite papu o Iesu, e to te au peroveta, e pera katoa i te koreromotu mutukore.

102 E te openga iora, ko ratou pouroa teia te kare e uipaia mai ma te aronga tapu, e kare e apainaia mai ki runga ki te akonoanga a te Tama Mua, e arikiia atu i roto i te tiao.

103 E ko ratou oki teia tei pikikaa, e te purepure, te akaturi, te akavare, e te aronga katoa e anoano e kua tuatua i te tuatua pikikaa.

104 Ko ratou oki teia tei mamae i te riri o te Atua i te enua nei.

105 Ko ratou oki teia tei mamae i te akautungaanga o te aʼi matekore.

106 Ko ratou oki teia tei tiriaia ki raro ia ade e tei apai i te riri i te Atua Mana Katoatoa, e tae uatu ki te kīanga o te au tuatau, e ka tuku ei te Mesia i te au enemi ki raro ake i tona vaevae, e ka akatika oki aia i tana angaanga;

107 E ka oronga atu ei aia i te basileia, ki te Metua, ma te topata kore, i te na ko anga atu e: Kua autu au e ko au anake rai te takatakai i te taomianga vine, koia oki te taomianga vine o te riri otooto o te Atua Mana Katoatoa.

108 Ei reira aia e akakoronaiaʼi ki te korona o tona kakā, e kia noo ki rungaʼo i te terono o tona mana, e ka tutaraʼi e tuatau e tuatau uatu.

109 I na e i na ra, kua kite maua i te kakā e te au tangata katoa e noo i te ao tiretia, e kua aite tikai ratou ki te au etu o te rangi tuatini, e me kore ra mei te one taatai i te maata.

110 E kua akarongoia atu te reo o te Atu i te na ko anga e: ka tuku pouroa to ratou turi ki raro, e ka aaki te au arero ravarai kiaia tei noo ki rungaʼo i te terono e tuatau e tuatau uatu;

111 Ka akavaia oki ratou kia tau ki ta ratou au angaanga, e ka rauka mai te tutaki ki te tangata tatakitai kia tau ki tana au angaanga i rave, tona uaorai tutaraanga, te au nooanga tei akateateamamaoia;

112 E ka riro ratou ei au tavini no Tei Teitei Roa; i na ra, ko te ngai ta te Atua e te Mesia e noo ra, kare ratou e tae ki reira, e tuatatau uatu.

113 Ko te openga teia o te orama ta maua i kite, tei akaueia maua kia tata ia maua rai i roto i te Vaerua.

114 I na ra, e angaanga maata e te umere tikai ta te Atu, e te au mea muna o tona ra basileia tana i akaari mai kia maua, ko tei maata atu i te au akamāramaanga i tona kakā, te maroiroi, e te tutaraanga;

115 Kua akaue mai aia ia maua e auraka e tata i teia ia maua e noo ra i roto i te Vaerua, e kare oki e akatikaia te tangata nei kia karanga;

116 Kare katoa e rauka i te tangata nei kia akakite atu i teia, ka kitea ua ia e ka mārama katoa na roto anake i te mana o te Vaerua Tapu, ta te Atua oki i oronga mai ki te aronga tei inangaro iaia, e tei akatiamā ia ratou ki mua iaia;

117 Ki te aronga tana i oronga mai i teia tikaanga no te akara e te kite no ratou uaorai;

118 E na roto i te mana e te akakiteanga o te Vaerua, ka rauka i reira ia ratou i te kopapa nei, kia noo ki mua i tona aroaro i roto i te ao kakā.

119 Kia akakakāia te Atua e te Punua Mamoe, te ngateitei e te mana kia vai e tuatau e tuatau uatu. Amene.