ဩဝါဒနှင့် ပဋိညာဉ်များ ၈၂

အပိုဒ်ငယ် ၈၂

၁၈၃၂ ခု၊ ဧပြီ ၂၆၊ အင်ဒီပန်းဒင့်၊ ဂျက်ဆင်ခရိုင်၊ မစ်ဆိုရီ၌ ပရောဖက်ဂျိုးဇက်စမစ်သို့ ပေးတော်မူခဲ့သည့် ဗျာဒိတ်တော်။ ထိုအချိန်မှာ အသင်းတော်၏ယဇ်ပုရောဟိတ်မင်းများနှင့် အသင်းလူကြီးတို့၏ အစည်းအဝေးတစ်ခုဖြစ်၏။ ထိုအစည်းအဝေးတွင်၊ ဂျိုးဇက်စမစ်သည် ယခင်က ၁၈၃၂ ခု၊ ဇန္နဝါရီ ၂၅၊ အမ်းဟက်၊ အိုဟိုင်းရို၌ ယဇ်ပုရောဟိတ်မင်း၊ အသင်းလူကြီးများနှင့် အသင်းသားတို့၏ညီလာခံတွင် ခန့်ထားခံခဲ့ရလေသည့် အမှုအရာဖြစ်သည့် ယဇ်ပုရောဟိတ်မင်းအခွင့် ဥက္ကဋ္ဌအဖြစ် ထောက်မခံရ၏ (အပိုဒ်ငယ် ၇၅ ၏ ခေါင်းစဉ်တွင် ကြည့်ပါ)။ ဤဗျာဒိတ်တော်သည် အစောပိုင်းဗျာဒိတ်တော် (အပိုဒ်ငယ် ၇၈) တွင် ပေးထားသည့်—စည်းလုံးညီညာစီးပွားရေးလုပ်ငန်း (ဂျိုးဇက်စမစ်၏လမ်းညွှန်မှုအောက်၌၊ “အသင်း”ဟူသောစကားရပ်ဖြင့် နောက်ပိုင်းတွင် “စီးပွားရေးလုပ်ငန်း” ကို အစားထိုးခဲ့၏) ဟု ထင်ရှားသည့်—စီးပွားရေးလုပ်ငန်းတစ်ခုကို တည်ထောင်ရန်၊ အသင်းတော်၏ကူးသန်းရောင်းဝယ်ရေးနှင့် ပုံနှိပ်ထုတ်ဝေခြင်းအားထုတ်မှုများကို အုပ်ချုပ်ရန် သွန်သင်ချက်များကို ထပ်၍ဖော်ပြ၏။

၁–၄၊ များစွာအပေးခံရရာနေရာ၌ များစွာလိုအပ်၏။ ၅–၇၊ မှောင်မိုက်ခြင်းသည် လောကထဲ၌ အုပ်စိုး၏။ ၈–၁၃၊ ကျွန်ုပ်တို့သည် ကိုယ်တော်ရှင်မိန့်တော်မူသည့်အတိုင်း ပြုကြသည့်အခါ သူ့၌ တာဝန်ရှိ၏။ ၁၄–၁၈၊ ဇိအုန်သည် တင့်တယ်ခြင်းနှင့် သန့်ရှင်းခြင်း၌ တိုးပွားရမည်။ ၁၉–၂၄၊ လူတိုင်းသည် မိမိနှင့်စပ်ဆိုင်သောသူ၏ကောင်းကျိုးကို ရှာရမည်။

၁ သင်တို့ကို ငါအမှန်၊ အမှန်ဆိုသည်ကား၊ ငါ့ကျွန်များတို့၊ သင်တို့သည် သင်တို့၏လွန်ကျူးခြင်းများကို တစ်ယောက်ကို တစ်ယောက်ခွင့်လွှတ်ကြသမျှ၊ ထိုကဲ့သို့ပင်၊ ငါ၊ ကိုယ်တော်ရှင်သည် သင်တို့ကို ခွင့်လွှတ်တော်မူ၏။

၂ သို့သော်လည်း၊ သင်တို့အထဲ၌ လွန်စွာအပြစ်ပြုလေသူများရှိ၏။ ထိုမှတစ်ပါး၊ သင်တို့အားလုံးသည် အပြစ်ပြုကြလေပြီ။ သို့ရာတွင်၊ သင်တို့ကို ငါအမှန်ဆိုသည်ကား၊ သင်တို့၏ဦးခေါင်းပေါ်သို့ ပြင်းထန်သောတရားစီရင်တော်မူခြင်းများ မကျရောက်စေခြင်းငှာ၊ ယခုမှစ၍ သတိပြုကြလော့၊ အပြစ်ကို ရှောင်ကြဉ်ကြလော့။

၃ အကြောင်းမူကား၊ များစွာအပေးခံရသောသူထံမှ များစွာလိုအပ်၏။ သာ၍ကြီးစွာသော အလင်းကို ဆန့်ကျင်၍ အပြစ်ပြုသောသူသည် သာ၍ကြီးစွာသော ပြစ်ဒဏ်ချမှတ်ခြင်းကို ရရှိလိမ့်မည်။

၄ သင်တို့သည် ဗျာဒိတ်တော်များအတွက် ငါ၏နာမတော်ကို ပတ္ထနာပြုကြ၏၊ ငါသည်လည်း သင်တို့အား ထိုအရာတို့ကို ပေးတော်မူ၏။ သင်တို့ကို ငါပေးတော်မူသည့် ငါ၏စကားများကို သင်တို့သည် စောင့်ထိန်းခြင်းမရှိကြသမျှ၊ လွန်ကျူးသောသူများဖြစ်လာကြ၏။ တရားတော်မူခြင်းနှင့် တရားစီရင်တော်မူခြင်းတို့သည် ငါ၏ဥပဒေနှင့် ဆက်စပ်လျက်ရှိသည့် ပြစ်ဒဏ်ဖြစ်၏။

၅ ထို့ကြောင့်၊ တစ်ယောက်သောသူအား ငါဆိုသည့်အရာကို ခပ်သိမ်းသောသူတို့အား ငါဆို၏။ စောင့်ကြည့်ကြလော့၊ အကြောင်းမူကား၊ မာရ်နတ်သည် သူ၏အစိုးရခြင်းကို ဖြန့်ကြက်၏၊ မှောင်မိုက်ခြင်းသည်လည်း အုပ်စိုး၏။

၆ မြေကြီးပေါ်မှာနေထိုင်သူတို့တစ်ဖက်၌ ဘုရားသခင်အမျက်ထွက်တော်မူ၏။ အဘယ်သူမျှ ကောင်းသောအကျင့်ကို မကျင့်၊ အကြောင်းမူကား၊ ခပ်သိမ်းသောသူတို့သည် လမ်းလွဲကြလေပြီ။

၇ ယခုမူကား၊ သင်တို့ကို ငါအမှန်ဆိုသည်မှာ၊ ငါ၊ ကိုယ်တော်ရှင်သည် အဘယ်အပြစ်ကိုမျှ သင်တို့၌ စွဲချက်တင်မည်မဟုတ်၊ ကိုယ့်လမ်းကို သွားလော့၊ အပြစ် မပြုတော့နှင့်။ သို့ရာတွင်၊ အပြစ်ပြုသောသူထံ ယခင်အပြစ်ပြန်လာမည်ဟု သင်တို့၏ ဘုရားသခင်ကိုယ်တော်ရှင် မိန့်တော်မူ၏။

၈ ထိုမှတစ်ဖန်၊ သင်တို့ကို ငါဆိုသည်ကား၊ သင်တို့နှင့်စပ်လျဉ်းသည့် ငါ၏အလိုတော်ကို သင်တို့နားလည်နိုင်ကြစေခြင်းငှာ ငါသည် သင်တို့အား ပညတ်တော်အသစ်ကို ပေး၏။

၉ သို့မဟုတ်၊ တစ်နည်းအားဖြင့်၊ ငါ့ရှေ့၌ သင်တို့အဘယ်သို့ ပြုနိုင်ကြောင်းလမ်းညွှန်ချက်များကို သင်တို့အား ငါပေး၏၊ ထိုသို့ပြုခြင်းအားဖြင့် သင်တို့၏ကယ်တင်ခြင်းအတွက် သင်တို့အဖို့ ဖြစ်လာနိုင်စေခြင်းငှာပေတည်း။

၁၀ သင်တို့သည် ငါမိန့်တော်မူသည့်အတိုင်း ပြုကြသည့်အခါ၊ ငါ၊ ကိုယ်တော်ရှင်၌ တာဝန်ရှိ၏။ သို့ရာတွင်၊ သင်တို့သည် ငါမိန့်တော်မူသည့်အတိုင်း ပြုခြင်းမရှိကြသည့်အခါ၊ ကတိမတည်ကြ။

၁၁ ထို့ကြောင့်၊ သင်တို့ကို ငါအမှန်ဆိုသည်ကား၊ ငါ့ကျွန်များဖြစ်သည့် အက်ဒဝါ့ပါ့ထရစ်ဂ်ျနှင့် နီဝယ်လ်ကေဝှစ်တနီ၊ အေဆစ်ဒနီဂီလ်ဗာ့နှင့် ဆစ်ဒနီရစ်ဂဒွန်၊ ထို့အတူ ငါ့ကျွန်ဂျိုးဇက်စမစ်၊ ထို့အတူ ဂျွန်ဝှစ်တမာနှင့် အော်လီဗာကောင်ဒရီ၊ ထို့အတူ ဒဗလျူဒဗလျူဖဲလပ်စ်နှင့် မာတင်ဟဲရစ်တို့သည် ခံဝန်ချုပ်တစ်ခုအားဖြင့်၊ ထို့အတူ လွန်ကျူးခြင်းအားဖြင့် မချိုးဖောက်နိုင်သောပဋိညာဉ်အားဖြင့် အတူတကွချည်နှောင်ခံရဖို့ လိုအပ်၏၊ သို့မဟုတ်လျှင် တရားစီရင်တော်မူခြင်း ချက်ချင်းကျရောက်လာလိမ့်မည်၊ သင်တို့၏အမျိုးမျိုးသောတာဝန်ခံအရာများ၌—

၁၂ ဆင်းရဲသားတို့၏အမှုအမျိုးမျိုးကို၊ ထို့အတူ ဇိအုန်ပြည်နှင့် ကာ့တ်လန်းမြေနှစ်ခုစလုံးရှိ သင်းအုပ်နှင့်အတိုင်ပင်ခံအဖွဲ့နှင့် စပ်ဆိုင်သည့်အရာခပ်သိမ်းတို့ကို စီမံစေခြင်းငှာပေတည်း။

၁၃ အကြောင်းမူကား၊ ငါ၏ကာလအချိန်တန်သောအခါ အမြင့်ဆုံးသောဘုရား၏ သန့်ရှင်းသူတို့အကျိုးအတွက်၊ ထို့အတူ၊ ဇိအုန်အတွက် ပန္နက်အဖြစ် ကာ့တ်လန်းမြေကို ငါရည်စူးထားတော်မူလေပြီ။

၁၄ အကြောင်းမူကား၊ ဇိအုန်သည် တင့်တယ်ခြင်းနှင့် သန့်ရှင်းခြင်း၌ တိုးပွားရမည်။ မိမိနယ်နိမိတ်တို့ကို ကျယ်စေရမည်။ မိမိပန္နက်တို့ကိုလည်း ခွန်းအားဖြည့်ပေးစေရမည်။ ထိုမှတစ်ပါး၊ သင်တို့ကို ငါအမှန်ဆိုသည်ကား၊ ဇိအုန်သည် ထ၍ မိမိ၏တင့်တယ်သော အဝတ်တန်ဆာတို့ကို ဝတ်ဆင်ရမည်။

၁၅ ထို့ကြောင့်၊ သင်တို့ကိုယ်သင်တို့ ဤပဋိညာဉ်အားဖြင့်ချည်နှောင်ကြစေခြင်းငှာ ငါသည် သင်တို့အား ဤပညတ်တော်ကို ပေး၏၊ ကိုယ်တော်ရှင်၏ဥပဒေများအတိုင်း ဆောင်ရွက်ရမည်။

၁၆ ရှုလော့၊ ဤအရာ၌ သင်တို့ကောင်းကျိုးအတွက် ငါ့၌ဉာဏ်ပညာရှိ၏။

၁၇ သင်တို့သည် ညီမျှရမည်၊ သို့မဟုတ် တစ်နည်းအားဖြင့်၊ သင်တို့သည် ဥစ္စာပစ္စည်းများကို ညီမျှသောခံယူနိုင်ခွင့်ရှိရမည်။ သင်တို့တာဝန်ခံအရာကိစ္စများ စီမံခြင်း၏အကျိုးအတွက်ပေတည်း၊ လူတိုင်းသည် မိမိအလိုရှိသောအရာမှာ တရားမျှတသမျှ၊ မိမိအလိုရှိသောအရာများနှင့် မိမိလိုအပ်ချက်အတိုင်းရှိရမည်—

၁၈ ခပ်သိမ်းသော ဤအရာတို့သည်ကား အသက်ရှင်တော်မူသောဘုရားသခင်၏ အသင်းတော်အကျိုးအတွက် ဖြစ်၏၊ လူတိုင်း မိမိဥစ္စာကို တိုးပွားနိုင်စေကြောင်း၊ လူတိုင်း အခြားဥစ္စာများကို ရရှိနိုင်စေကြောင်း၊ အမှန်စင်စစ်၊ အဆတစ်ရာကို ကိုယ်တော်ရှင်၏ ဘဏ္ဍာတိုက်ထဲသို့ သွင်းချ၍၊ အသင်းတော်တစ်ခုလုံး၏ အများပိုင်ဥစ္စာပစ္စည်းဖြစ်လာစေခြင်းငှာ၊

၁၉ လူတိုင်းသည် မိမိနှင့်စပ်ဆိုင်သောသူ၏ ကောင်းကျိုးကို ရှာလျက်၊ ဘုရားသခင်၏ ဘုန်းတော်ထင်ရှားဖို့ကိုသာ မျက်စိစူးစိုက်မှုဖြင့် ခပ်သိမ်းသောအရာတို့ကို ပြုကြရမည်။

၂၀ သင်တို့သည် အပြစ်ကို ပြုခြင်းမရှိကြသမျှ၊ ဤအသင်းကို သင်တို့အဖို့၊ သင်တို့၏နောင်လာနောက်သားတို့အဖို့ ထာဝရတည်မြဲသော အသင်းတစ်ခုအဖြစ် ငါခန့်အပ်ထားတော်မူလေပြီ။

၂၁ ဤပဋိညာဉ်ကို ဆန့်ကျင်၍ အပြစ်ပြုပြီး၊ မိမိစိတ်နှလုံးကို မာကျောစေသောသူသည် ငါ့အသင်းတော်၏ ဥပဒေများအတိုင်းစီမံခံရမည်၊ ရွေးနုတ်ခြင်းနေ့ရက်တိုင်အောင် စာတန်၏ညှဉ်းပန်းနှိပ်စက်ခြင်းသို့လည်း လွှဲအပ်ခံရလိမ့်မည်။

၂၂ ယခုမူကား၊ သင်တို့ကို ငါအမှန်ဆိုသည်မှာ၊ ဤအရာသည် ဉာဏ်ပညာဖြစ်၏၊ သင်တို့သည် မတရားမှုလောကီစည်းစိမ်အားဖြင့် သင်တို့ကိုယ်တိုင်အဖို့ မိတ်ဆွေများရစေလော့၊ ထိုသူတို့သည် သင်တို့ကို ဖျက်ဆီးမည်မဟုတ်။

၂၃ တရားစီရင်တော်မူခြင်းကို ငါနှင့်သာရှိစေလော့၊ အကြောင်းမူကား၊ ထိုအမှုသည် ငါ၏အမှုဖြစ်၍၊ ငါဆပ်ပေးမည်။ ငြိမ်းချမ်းခြင်းသည် သင်တို့နှင့်အတူရှိစေသော်။ ငါ၏ကောင်းချီးမင်္ဂလာများသည် သင်တို့နှင့်အတူ ဆက်၍ရှိစေသော်။

၂၄ အကြောင်းမူကား၊ သင်တို့၏မြဲမြံခြင်းမှ သင်တို့လဲကျခြင်းမရှိလျှင်၊ အမှန်စင်စစ် နိုင်ငံတော်သည် သင်တို့အရာဖြစ်လျက်၊ ကာလအစဉ်အဆက်ဖြစ်လိမ့်မည်။ ထိုကဲ့သို့ပင်တည်း။ အာမင်။