1 Tika tikai, te tuatua maira te Atu kia kotou tei uipa mai kia ariki mai i tona anoano no runga ia kotou:

2 I na, kua riro teia ei marekaanga ki to kotou Atu, e kua rekareka oki te au angela ia kotou, kua tae te apinga aroa o ta kotou au pure ki roto i te taringa o te Atu Sabaota, e kua tataia oki ki roto i te puka o te au ingoa o tei akatapuia, koia te aronga o te ao tiretiera.

3 No reira, te tono atu nei au i tetai Akapumaana ke, ki rungaʼo ia kotou e taku au taeake, kia noo oki ki roto i to kotou au ngakau, koia te Vaerua Tapu o te taputou; e koia taua Akapumaana rai taku i taputou atu ki taku au pipi, mei tei tataia ki roto i te kite papu o Ioane.

4 Ko teia Akapumaana nei ko te taputou ïa taku e oronga atu nei kia kotou no te ora mutukore, koia te kakā o te basileia tiretiera;

5 Koia te kakā o te akonoanga a te Tama Mua, koia ta te Atua, tei tapu rava atu i te au mea katoatoa, na roto ia Iesu Mesia tana Tamaiti—

6 Koia oki ko tei oki atu ki runga, e tei eke mai ana ki raro ake i te au mea ravarai, e kua marama aia i te au mea katoatoa, e kia o aia ki roto i te au mea katoatoa e na roto i te au mea katoatoa, te mārama o te tuatua-mou;

7 Kua kakā oki taua tuatuamou ra. Ko te mārama teia o te Mesia. E tei roto katoa oki aia i te rā, e te mārama o te rā, e te mana katoa i angaiaʼi.

8 E pera katoa tei roto katoa oki aia i te marama, e koia oki te mārama o te marama, e te mana katoa i angaiaʼi;

9 E pera katoa te mārama o te au etu, e te mana katoa i angaiaʼi;

10 E pera katoa te enua nei e tona mana, e koia te one ta kotou e tu nei.

11 E ko te mārama tei kakā mai, ko tei oronga mai i te mārama kia kotou, na roto mai ïa iaia tei akamārama mai i to kotou nga mata, e ko taua mārama rai oki tei akakeu i to kotou au māramaanga;

12 E no mua mai oki taua mārama ra i te aroaro o te Atua kia akakī i te mareva tini o te ao ra—

13 E ko te mārama i roto i te au mea katoatoa, tei oronga mai i te ora ki te au mea katoatoa, e ko te reira oki te ture tei riro ei akaaere i te au mea katoatoa, koia te mana o te Atua tei noo ki runga i tona ra terono, tei vai ki roto i te vairanga mutukore, e tei rotopu oki i te au mea katoatoa.

14 E teianei, tika tikai taku e karanga atu kia koe, na roto oki i te akaoraanga tei raveia no kotou, i raukaʼi te tuakaouanga mei te mate mai.

15 Ko te vaerua oki e te kopapa e vaerua tangata ïa.

16 E ko te tuakaouanga mei te mate mai ko te akaoraanga ïa o te vaerua tangata.

17 E ko te akaoraanga o te vaerua, ka na roto oki te reira iaia tei akakeu i te au mea ravarai, e i roto mai i tona umauma i akaueia mai ei e ko te putaua e tei maru i te enua nei te ka riro ia ratou te reira.

18 No reira, kia akatapuia mei te au mea tika kore katoatoa, e kia akateateamamaoia oki no te kakā tiretiera;

19 E i muri ake e akakī ei i te au mea i angaiaʼi, ka akakoronaia te reira ki te kakā, i mua i te aroaro o te Atua te Metua;

20 Kia rauka oki teia i te au kopapa o te aronga o te basileia tiretiera e tuatau e tuatau uatu; no te mea, e no teia tumu nei oki i maaniiaʼi e i angaiaʼi, e no teia tumu katoa nei i akatapuiaʼi ratou.

21 E ko ratou tei kore i akatapuia na roto i te ture taku i oronga atu kia ratou, koia te ture a te Mesia, ka orongaia tetai basileia ke no ratou e tikaʼi, koia te basileia teretetiera, me kore ra ko te basileia tiretia.

22 E ko tei kore e rauka kia akono i te ture o te basileia tiretiera, kare rai e rauka iaia te kakā tiretiera.

23 E ko tei kore e rauka kia akono i te ture o te basileia teretetiera, kare rai e rauka iaia te kakā teretetiera.

24 E ko tei kore e rauka kia akono i te ture o te basileia tiretia, kare rai e rauka iaia te kakā tiretia; e no reira kare aia e tau ki tetai basileia kakā. No reira kia noo aia ki te basileia e kare oki i te basileia kakā.

25 E teianei, tika tikai taku e karanga atu kia kotou, te akono nei te ao nei i te ture o te basileia tiretiera, no te mea te akakī nei i te au mea i angaiaʼi, kare i aati i te ture—

26 No reira, ka akatapuia; ae, noatu e ka mate te reira, e ka akakeu akaou ia, e ka noo te reira ma te mana i akakeuiaʼi, e ka rauka oki i te aronga tuatua-tika.

27 Noatu ra oki e ka mate ratou, ka tu akaou mai ratou ma te kopapa vaerua.

28 E ko ratou e e vaerua tiretiera to ratou ka rauka rai ia ratou taua kopapa natura ra; e ka rauka katoa rai ia kotou to kotou au kopapa, e to kotou kakā ko taua kakā ra tei akakeu i to kotou au kopapa.

29 E kotou tei akakeuia ki tetai tuanga o te kakā tiretiera, ko te reira rai ta kotou ka rauka mai, ko te kīanga oki.

30 E ko tei akakeuia ki tetai tuanga o te kakā teretetiera, ko te reira rai ta ratou ka rauka mai, ko te kīanga oki.

31 E pera katoa, e ko tei akakeuia ki tetai tuanga o te kakā tiretia, ko te reira rai ta ratou ka rauka mai, ko te kīanga oki.

32 E ko ratou tei toe mai ka akakeu katoa ia rai; kareka ra, ka oki akaou ratou ki to ratou ngai tikai, ei ariki atu i ta ratou i anoano kia rauka mai, no te mea kare ratou i anoano i te ariki i te au mea tei akatakaia kia rauka mai ia ratou.

33 Eaa ra ta te tangata nei puapinga me orongaia tetai apinga aroa kiaia, e kare aia e ariki mai i te apinga aroa? I na, kare ona mataoraanga ki te reira tei orongaia atu kiaia, kare katoa e mataora atu kiaia tei oronga mai i te apinga aroa.

34 E pera katoa, tika tikai taku e karanga atu kia kotou, ko tei akaaereia e te ture ra, kua akonoia rai te reira e te ture, e kua apakore mai e kua akatapuia e ïa.

35 Ko tei aati i te ture ra, e kare e akono i te ture, i na ra, kua kimi kia riro mai ei ture kiaia uaorai, e kua anoano i te noo ki roto i te ara, e noo takiri atura ki roto i te ara, kare rava te reira e rauka kia akatapuia e te ture, e kare katoa e te aroa ua, e te tika, e kare katoa e te akavaanga. No reira, ka noo viivii ua atu rai ratou.

36 E ture to te au basileia pouroa i orongaia mai;

37 E manganui oki te au basileia; kare rava e ngai e kare e basileia; e kare rava e basileia e kare ona ngai, noatu e e basileia maata me kore ra e mea meangiti ua.

38 E ki te au basileia tatakitai, kua orongaia atu tetai ture; e ki te au ture tatakitai, e au taputouanga rai tetai e te au kotinga katoa.

39 Ko te au tangata katoatoa tei kore i akono i teia au turanga nei, kare te reira i tikaia.

40 Ka piri rai oki te kite ki te kite; e ka rauka rai i te pakari te pakari, ka takave te tuatua-mou i te tuatua-mou, ka inangaro te tiamā i te tiamā rai, ka piri rai te mārama ki te mārama, ka aroa rai te aroa ua i te aroa ua; ka aere rai te tuatua-tika ka kimi i tana uaorai; ka aere rai oki te akavaanga ki mua i te mata o tei noo ki rungaʼo i te terono e ka akaaere e ka tutara i te au mea katoatoa.

41 Kua marama aia i te au mea katoatoa, e tei mua iaia te au mea katoatoa, e kua takapini katoa iaia te au mea katoatoa, e tei rungaʼo aia i te au mea katoatoa, e tei roto oki i te au mea katoatoa, e kua na roto oki i te au mea katoa, e kua takapini ua i te au mea katoa, e nana, na te Atua te au mea katoatoa, e tuatau e tuatau uatu.

42 E pera katoa, tika tikai taku e karanga atu kia kotou, kua oronga mai oki aia i tetai ture ki te au mea katoatoa, ka tere e ka uri ei ratou i roto i to ratou uaorai au taime e to ratou au tuatau katoa;

43 E kua akamouia to ratou au akaaereanga, koia te au akaaereanga o te au rangi e te enua nei, ko tei mārama i te enua e te au etu katoatoa.

44 E kua oronga oki ratou i te mārama tetai ki tetai i roto i to ratou taime e to ratou tuatau katoa, i roto i to ratou au miniti, i to ratou au ora, i to ratou au rā, i to ratou au epetoma, i to ratou au mārama, i to ratou au mataiti—ko teia au mea katoatoa nei okotai ïa mataiti i te Atua, i na ra, kare i te tangata nei.

45 Te taka nei te enua i runga i tona nga peau, e te oronga mai nei te rā i tona mārama i te ao, e te oronga mai nei te marama i tona mārama i te po, e te oronga katoa mai nei te au etu i to ratou mārama, i to ratou takaanga na runga i to ratou peau i roto i to ratou kakā, i rotopu i te mana o te Atua.

46 Ka akaaite ra au i teia au basileia ki te aa, kia māramaʼi koe?

47 I na, e au basileia anake teia, e me kua kite ana tetai tangata i tetai mea iti o teia, kua kite rai aia i reira i te Atua e aaere ra i roto i tona ngateitei e te mana.

48 Te karanga atu nei au kia kotou, kua kite ana aia iaia; kareka ra, koia tei aere mai ki tona tikai kare oki i māramaia mai.

49 I kakā mai ana te mārama ki te poiri, kare te poiri i mārama atu; kareka ra, te vai ra te rā e māramaʼi kotou i te Atua katoa, no tei akakeuia i roto iaia e na roto iaia.

50 Ei reira kotou e kite ei e kua kite ana kotou iaku, e ko au teia, e ko au oki te mārama tika tikai tei vai ki roto ia kotou na, e tei roto oki kotou iaku; me kore ra, kare ïa kotou e mou.

51 I na, ka akatau au i teia au basileia ki tetai tangata e tana kainga, e kua tono atura aia i tona au tavini ki roto i te aua kia ko i te kainga.

52 E kua karanga atura aia ki te mea mua: E aere koe e angaanga i roto i te kainga, e me pou te ora okotai ra ka aere atu au kia koe, e ka kite oki koe i te mataora o taku mata.

53 E kua karanga atura aia ki te rua: E aere katoa koe e angaanga i roto i te kainga, e i roto i te ora rua ra ka atoro atu au ia koe na, e ka kite oki koe i toku tu mataora o taku mata.

54 E pera katoa ki te toru, kua na ko atu aia e: ka atoro au ia koe.

55 E ki te ā o te tavini mei te reira rai e tae uatu ki te ngauru ma rua o te tangata.

56 E kua aere atu te atu o te kainga ki te tavini mua i roto i te ora mua, e kua noo ki ona i taua ora katoatoa ra, e kua rekareka tikai aia i te mārama o te mata o tona pu.

57 E i reira kua akaruke atu aia i te tavini mua kia rauka oki iaia kia aere atu ki te rua, pera ki te toru, e te ā, e tae uatu ki te ngauru ma rua o te tavini.

58 Kua pera ratou i te ariki pouroa i te mārama o te mata o to ratou pu, te au tangata tatakitai ki tona uaorai ora, e ki tona taime, e tona tuatau—

59 Kua akamata oki aia mei te mea mua, e tae uatu ki te openga, e mei te mea openga ki te mea mua, e mei te mea mua ki te mea openga;

60 Te au tangata ravarai ki to ratou uaorai akanooanga, e pou uatu tona ora, e kia tau katoa rai oki ki ta tona pu i akaue mai iaia, kia akakakāia tona pu na roto iaia, e mei iaia ki tona pu, kia akakakāia ratou katoatoa.

61 No reira, ka akatau oki au i teia au basileia nei ki teia parabole nei, e te au tangata katoa i reira ra—te au basileia ravarai ki to ratou uaorai ora, e to ratou taime, e to ratou tuatau, kia tau oki ki te akaue ta te Atua i rave.

62 E pera katoa, tika tikai taku e karanga atu kia kotou, e taku au taeake, ka akaruke au i teia au tuatua kia kotou kia uriuri i roto i to kotou ngakau, ma teia akaueanga taku e oronga atu kia kotou, e kia kapiki mai kotou kiaku ko i vaitata ake au—

63 E akavaitata mai kotou kiaku e naku e akavaitata atu kia kotou; e kimi pu tikai kotou iaku e ka kitea au e kotou; e pati, e orongaia mai kia kotou, e topapa atu, e kiritiia mai kia kotou.

64 Noatu eaa ta kotou ka pati ki toku Metua ma toku nei ingoa ka orongaia atu te reira kia kotou, i tei tau no kotou;

65 E me pati kotou i tetai mea tei kore i tau no kotou, ka riro te reira ei akaapaanga ia kotou.

66 I na, ko ta kotou e rongo ana mei te reo o tetai i te kapikianga i te medebara—i roto i te medebara, no te mea kare oki kotou e kite iaia—ko toku reo, no te mea e Vaerua ua toku reo; e Vaerua tuatua-mou toku; ka noo rai oki te tuatua-mou e kare e opengaanga; e mei te mea e tei roto ia kotou na, ka maata atu te reira.

67 E me ka akara tinamou mai to kotou mata ki toku kakā, ka kī te katoaanga o to kotou au kopapa i te mārama, e kare rava i reira e poiri i roto ia kotou; e ko taua kopapa ra tei kī i te mārama ra ka kite aia i te au mea katoatoa.

68 No reira, e akatapu ia kotou uaorai kia irinaki to kotou au manako ki te Atua anake, e ka tae mai te au rā e kite ei kotou iaia; ka eeu oki aia i te arai i tona mata kia kotou, e ka rave aia i te tuatau e tau iaia, e te ravenga e tau iaia, kia tau ki tana i anoano.

69 E akamaara i te taputou maata e te openga taku i papau kia kotou; e tuaru ke mei ia kotou i to kotou au manako puapinga kore e ta kotou au kata maata.

70 E noo kotou, e noo kotou ki teia ngai, e ma te kapiki atu i tetai putuputuanga tapu, ko te au aronga mua oki i angaanga i roto i teia basileia openga.

71 E ko ratou ta ratou i ako atu i to ratou aerenga kia kapiki i te Atu, e kia akamanako meitaki i te akoanga tei rauka ia ratou ki roto i to ratou ngakau, no tetai tuatau poto.

72 I na, e i na ra, ka akono au i ta kotou au anana, e ka akatupu mai au i tetai au ereta e ka tono atu ki o ratou.

73 I na, ka akarapurapu au i taku angaanga i tona tuatau.

74 E ka oronga atu au kia kotou, e te aronga angaanga mua i roto i teia basileia openga nei, i tetai akaueanga kia uipa mai kotou ki te ngai okotai, e ma te akataokotai ia kotou uaorai, kia akateateamamao ia kotou, e ma te akatapu ia kotou; ae, e tamā i to kotou au ngakau, e ma te orei i to kotou rima e to kotou vaevae ki mua iaku, kia rauka oki iaku i te tamā ia kotou;

75 Kia rauka oki iaku i te akapapu atu ki to kotou Metua, e ki to kotou Atua, e toku Atua, e kua mā oki kotou mei te toto o teia uki tangata kino nei; kia rauka oki iaku i te akatupu i tei taputouia, teia taputou openga e te maata, taku i papau kia kotou, a te rā taku ka anoano.

76 Pera katoa, te oronga katoa atu nei au i tetai akaueanga kia pure tamou uatu rai kotou ma te akakore i te kai mei teia tuatau e aere uatu.

77 E te oronga atu nei au i tetai akaueanga kia kotou kia apii kotou tetai ki tetai i te au apiianga o te basileia.

78 E apii kotou ma te maroiroi e ka tae atu toku aroa ua kia kotou, kia akamārama meitaki ia tikai kotou i roto i te au tu kite, te tikaanga, te apiianga, te ture o te evangelia, e te au mea katoatoa e tau no te basileia o te Atua, tei tau oki kia mārama kotou;

79 No te au mea o te rangi e te enua nei, e to raro ake i te enua; te au mea tei vai ana, te au mea e vai nei, e te au mea te ka tae mai e tikaʼi; te au mea i teia enua nei, te au mea i te ngai atea; te au tamaki e te au manamanata o te iti tangata, e te akavaanga i runga i te enua, e te kite katoa o te au enua e te au basileia—

80 Kia papa kotou i te au mea katoatoa me tae ki te tuatau e tono akaou ei au ia kotou kia akamaata i te kapikianga taku i kapiki ia kotou kia rave, e te angaanga taku i akamana ia kotou.

81 I na, ka tono au ia kotou kia akapapu ma te ako atu i te tangata, e ko te au tangata katoatoa tei akoia, nana e ako atu i tona tangata tupu e tikaʼi.

82 No reira, kua vaioia ratou ma te kore e kotoeanga, e tei runga i to ratou uaorai au upoko ta ratou au ara.

83 Ko tei kimi vave mai iaku ra ka kiteaia au, e kare rava e kopaeia atu.

84 No reira, e noo kotou, ma te angaanga pakari tikai, kia apakore oki kotou i roto i ta kotou au angaanga kia aere atu ki rotopu i te au Etene no te taime openga, ko ratou ravarai ta te vaa o te Atua ka akakite mai, kia ruru ana i te ture e ma te topiri i te tuatua akakite, e ma te akapapa i te aronga tapu no te ora o te akavaanga te ka tae mai;

85 Kia oro ke oki to ratou au vaerua i te riri o te Atua, te akataneaanga o te kino e tiaki ua mai nei i te aronga kino, i teia ao nei e te ao a muri ake. Tika tikai, taku e karanga atu kia kotou, kia tika oki i te aronga kare e ko te au ereta mua kia angaanga uatu rai i roto i te aua vine e tae uatu ki te tuatau e kapiki mai ei te Atu ia ratou, kare oki i tae ake to ratou tuatau; kare to ratou kakau i mā ake mei te toto o teia uki tangata.

86 E mou piri i te rangatira i rangatiraʼi kotou; auraka kotou kia piritia ki roto i te ara, i na ra, kia mā toou rima, e tae ua mai te Atu.

87 Kare oki e maata atu ra te au rā toe e ru ei te enua nei e ka oro ki tera ngai ki tera ngai mei te tangata kona kava te tu; e ka uuna te rā i tona mata, e kare oki e akatika mai i tona mārama; e ka muramura oki te marama mei te toto te tu; e ka riri tikai te au etu, e ka akatopa oki ia ratou ki raro mei te ua suke tei topa mai mei runga i tetai pu suke.

88 E i muri ake i to kotou kite papu ka tae mai te riri maata e te makitakita ki rungaʼo i te tangata.

89 E i muri ake i to kotou kite papu ka tae mai te kite papu o te ngaruerue enua, ko te ka akatupu mai i te ngunguruanga ki rotopu iaia, e ka topa te au tangata ki runga i te one e kare e rauka akaou i te tu mai ki runga.

90 E ka tae katoa mai te kite papu o te reo o te au aruru mangungu, e te reo o te au uira, e te reo o te au matangi ririnui, e te reo o te au aruru ngaru o te tai i te aatu maataanga mai ki muao i to ratou kotinga tikai.

91 E ka turituri te au mea katoatoa; e e mea papu roa, ka akaapikepike te au pukuatu o te tangata; e ka tae oki te mataku ki te au tangata katoatoa.

92 E ka rere oki te au angela na rotopu i te mareva o te rangi, i te kapikianga ma te reo maata, ma te akatangianga i te pu a te Atua, i te na ko anga e: E akapapa kotou, e akapapa kotou, e te au tangata o te enua nei; te tae mai nei oki te akavaanga a to tatou Atua. I na, e i na ra, te aere mai nei te Tane Akaipoipo Ou; e aere atu e aravei iaia.

93 E ka tae viviki mai oki tetai akairo maata i runga i te rangi, e ka kite kapiti oki te au tangata katoatoa.

94 E ka akatangi oki tetai angela ke i tana pu, i te na ko anga e: Taua akonoanga maata ra, te metua vaine o te au mea viivii; ko tei akariro i te au pa enua ravarai kia inu i te uaina o te riri o tana ra akaturi, tei takingakino i te aronga tapu o te Atua, tei akamaringi i to ratou toto—koia katoa oki tei noo ki rungaʼo i te au vai e manganui, e ki rungaʼo i te au enua o te pa moana—I na, koia te zizania o te enua; kua ruruia; e au tapeka pakari tikai tona, e kare rava e tangata e rauka kia tatara i te reira; e no reira; kua papa aia kia tungiaia. E ka akatangi aia i tana pu kia roa te tangi maata, e ka akarongo mai te au pa enua ravarai.

95 E ka muteki te rangi mei te apa ora te roa; e i muri uake i reira ka ooraia mai te arai o te rangi, mei tetai pokaikai tuatua tei ooraia i muri ake ka pokai akaou iaʼi, e ka eeuia oki te arai i te mata o te Atu;

96 E ko te aronga tapu i te enua nei, e ora nei, ka akakeuia ratou e ka apai ravaia ki runga kia aravei atu iaia.

97 E ko ratou tei moe ki roto i to ratou au vaarua, ka tu mai ïa ki runga, e ka akatueraia oki to ratou au vaarua; e ka apaina katoa ia oki ratou kia aravei atu iaia i rotopu i te pou o te rangi—

98 No te Mesia oki ratou, te mou mua, ko ratou oki te ka mama mai ma ïa katoa i te taime mua, e ko ratou tei runga i te enua nei e tei roto i to ratou au vaarua, te ka apainaia atu kia aravei mua iaia; e ka tupu pouroa oki teia na roto i te reo o te tangi pu a te angela a te Atua.

99 E i muri ake i teia ka akatangi akaou mai tetai angela i tana, koia te rua o te pu; e ka tae mai i reira te akaoraanga o taua aronga ra o te Mesia me tae ki tona aerenga mai, ko tei rauka to ratou tuanga i roto i taua are tapekaanga tei akonoia no ratou, kia ariki oki ratou i te evangelia, e kia akavaia kia tau ki ta te tangata i te kopapa nei.

100 E pera katoa, ka akatangi katoa ia tetai pu ke, koia te toru o te pu; ka aere mai i reira te au vaerua o te tangata te ka akavaia, e kua kitea mai ratou ki raro ake i te akaapaanga;

101 E ko teia oki te katoaanga o te aronga mate, e kare oki ratou e ora akaou e pou uatu te okotai tauatini mataiti, kare rava atu, e tae uatu te openga o te enua nei.

102 E ka tangi akaou mai tetai pu ke, koia te ā o te pu, i te na ko anga e: Kua kiteaia mai i rotopu i te aronga te ka vai e tae uatu ki te rā maata e te openga, koia te openga tikai, te ka noo viivii uatu rai.

103 E ka tangi akaou mai tetai pu ke, koia te rima o te pu, koia katoa te rima o te angela ko tei apai mai i te evangelia mutukore—i te rereanga na rotopu i te mareva o te rangi, ki te au iti tangata katoa, ki te au kopu, ki te au reo, e te tangata katoatoa;

104 E ko te tangi teia o tana pu, i te na ko anga ki te tangata katoatoa, e i te rangi e te enua nei, e to raro ake i te enua—ka akarongo oki te au taringa ravarai i te reira, e ka tuturi oki te au turi ravarai, e ka aaki oki te au vaa, i to ratou rongoanga i te tangi o te pu i te na ko anga e: E mataku i te Atua, ma te akakakā atu iaia tei noo ki runga i te terono, e tuatau e tuatau uatu; te vaitata mai nei oki te ora o tana akavaanga.

105 E pera katoa, ka akatangi akaou mai tetai angela i tana pu, koia te ono o te angela, i te na ko anga e: Kua topa aia ko tei akainu i te pa enua ravarai ki te uaina o te riri o tana ra akaturi, kua topa aia, kua topa!

106 E pera katoa, ka akatangi akaou mai tetai angela i tana pu, koia te itu o te angela, i te na ko anga e: Kua oti; kua oti! Kia autu te Punua Mamoe a te Atua, e kua takatakai i te taomianga vine koia anake, koia te taomianga vine o te riri otooto o te Atua Mana Katoatoa.

107 Ei reira te au angela e akakoronaiaʼi ki te kakā o tona ririnui, e ka akakīia te aronga tapu ki tona kakā, e ka rauka mai to ratou ipukarea e ka aiteite oki kiaia.

108 Ei reira te angela mua ka akatangi akaou ei i tana pu ki roto i te taringa o te aronga ora katoatoa, e ma te eeu mai i te au angaanga muna a te tangata nei, e te angaanga ririnui a te Atua i roto i te okotai tauatini mataiti mua.

109 Ei reira te rua o te angela ka akatangi ei i tana pu, e akakite mai ei i te au angaanga muna a te tangata nei, e te au manako e te au anoano o to ratou au ngakau, e te au angaanga ririnui a te Atua i roto i te rua o te tauatini mataiti—

110 Ka pera uatu rai e tae uatu ki te itu o te angela i te akatangianga i tana pu, e ka tu aia ki runga i te enua nei e te tai katoa, e ma te taputou atu na roto i te ingoa o tei noo ki runga i te terono, kare atu oki e taime akaou; e ka tapekaia oki a Satani, taua ovi takere ra, ko tei karangaia e ko te diabolo, e kare rava e tataraia e pou uatu te okotai tauatini mataiti.

111 Ei reira, ka tukuia aia no tetai tuatau poto ua, kia rauka oki iaia kia akaputuputu i tona au nuku vaeau.

112 E ko Mikaela, te itu o te angela, koia te angela maata, ka akaputuputu aia i tona nuku vaeau, koia te urupu o te rangi.

113 E ka akaputuputu mai te diabolo i tona nuku vaeau; koia te urupu o ade, ka aere mai ei tamaki mai oki kia Mikaela e tona nuku vaeau.

114 Ei reira e tae mai ei te tamaki a te Atua ngateitei; e ka titiriia atu te diabolo e tona nuku ki roto i to ratou uaorai ngai, kia kore rava o ratou mana akaou ki rungaʼo i te aronga tapu.

115 E ka tamaki oki a Mikaela i ta ratou tamakianga, e ka autu oki aia ki rungaʼo i tei kimi i te terono o tei noo ki rungaʼo i te terono, koia te Punua Mamoe.

116 Ko te kakā teia o te Atua, e tei akatapuia; e kare oki ratou e kite akaou i te mate.

117 No reira, tika tikai taku e karanga atu kia kotou, e taku au taeake, e kapiki mai i to kotou putuputuanga tapu, mei taku i akaue atu ia kotou.

118 I te mea oki e, kare i rauka i te katoatoa te akarongo, e kimi pu tikai ma te apii tetai ki tetai i te au tuatua o te pakari; ae, e kimi ki roto i te au puka memeitaki i te tuatua o te pakari, e kimi i te kite na roto i te apiianga e te akarongo katoa.

119 E akatumu ia kotou uaorai, e akateateamamao i te au mea pouroa tei inangaroia; e ma te akatumu i tetai are, ei are pureanga, ei are akakoreanga kai, ei are akarongo, ei are apiianga, ei are kakā, ei are akanooanga, ei are no te Atua;

120 Kia riro to kotou au tomoanga mai na roto i te ingoa o te Atu; e ko to kotou au tomoanga atu ki vao kia na roto katoa i te ingoa o te Atu; e kia riro ta kotou au aroaanga ei roto i te ingoa o te Atu, ma te rima takiia ki runga ki Tei Teitei Roa ra.

121 No reira, e akamutu i ta kotou au tuatua puapinga kore, i te au kata maata, i to kotou au anoano tiamā kore, i to kotou au tu ngakau parau e te manako neneva, e ta kotou au mea tarevakē e rave ana.

122 E iki i tetai puapii i rotopu ia kotou uaorai, e auraka oki te katoatoa rava kia tuatua i te taime okotai; e tai ra ka tuatua i te taime okotai e kia akarongo te katoatoa rava ki tana e tuatua ra, e me oti te katoatoa rava i te tuatua kia akameitakiia te katoatoa rava, e kia aiteite oki te tikaanga o te au tangata.

123 E aroa kotou tetai ki tetai, auraka e morimori; e apii i te tauturu atu tetai ki tetai mei ta te evangelia i anoano.

124 Auraka e noonoo ua; e patoi atu i te au mea viivii, auraka e kimi apa atu tetai ki tetai; auraka e moeroa kia roa atu i tei anoanoia; e moe vave, kia kore oki kotou e roiroi; e tu vave ki runga, kia maroiroi te kopapa e kia māramarama te manako.

125 E ko tei maata atu i te au mea katoa nei, koia oki kia akakakau i to kotou kopapa ki te tuatua o te aroa ua, mei tetai kakau pu te tu, koia te tapeka o te tu apakore e te au.

126 E pure putuputu uatu rai, kia kore kotou e matapoiriia, e tae ua mai au. I na, e i na ra, ka aere vave ua atu au, e ka apaiia kotou ki oku ra. Amene.

127 E pera katoa, ko te akanooanga o te are tei akateateamamaoia no te ruru peresideni o te apii a te au peroveta, tei akatumuia ei akamārama ia ratou i te au mea katoatoa tei tau no ratou, e no te au aronga taonga ravarai o te akonoanga, koia oki, ko te aronga tei kapikiia ki te angaanga i roto i te akonoanga, akamata mai mei te taunga teitei, e tae uatu ki te diakono—

128 E ko teia oki te akanooanga o te are o te ruru peresideni o te apii: Ko tei ikiia ei peresideni, me kore ra ei puapii, ka kiteia aia i te tuanga ki tona uaorai ngai, ki roto oki i te are tei akateateamamaoia nona.

129 No reira, ka riro e koia a mua ki roto i te are o te Atua, ki roto i tetai ngai te ka akarongo marie mai ma te meitaki te katoatoa rava o te tangata i tana tuatua, auraka ra kia tuatua maata.

130 E me aere mai aia ki roto i te are o te Atua, e koia rai oki te ka na mua ki roto i te are e tikaʼi—i na, e manea tikai teia, kia riro oki aia ei akaraanga—

131 Kia tuku aia iaia uaorai ki roto i te pure na roto i te tuturianga ki mua i te Atua, ei tokene me kore ra ei akamaaraanga i te koreromotu mutukore.

132 E me ka aere mai tetai na muri ake iaia, kia tika i te puapii kia tu mai ki runga, e ma te taki i tona rima ki runga ki te rangi, ae, kia tika tikai ki runga, e ma te aroa atu i tona taeake, i te na ko anga e:

133 Kare ainei koe, me kare, korua, me kare, kotou, i te taeake? Te aroa atu nei au ia koe na roto i te ingoa o te Atu ko Iesu Mesia, ei tokene me kore ra ei akamaaraanga i te koreromotu mutukore, e na roto oki i taua koreromotu ra i raukaʼi iaku kia ariki ia koe, ei taeake, na roto i te pirianga tei akonoia, kia kore e ngaueue, e kia kore e tuke, kia riro ei taeake noou e ei teina katoa na roto i te aroa ua o te Atua i te tapekaanga o te aroa, kia aere na roto i te au akaueanga katoatoa a te Atua ma te kore e apa, ma te akameitakianga, e tuatau e tuatau uatu. Amene.

134 E ko tei kitea mai e kare e tau meitaki no teia aroa akaaraveianga kare ïa ona ngai i rotopu ia kotou; kare oki kotou e akatika kia akaviiviiia toku are e ïa.

135 E koia tei tomo mai ki roto ma te tu akarongo tikai ki mua iaku, e e taeake aia, me kore ra e au taeake ratou, ka aroa atu ratou i te peresideni me kore ra i te puapii na roto i te takianga i te rima ki runga ki te rangi, ma teia pure rai e te koreromotu, e me kore ra na roto i te karangaanga e Amene, ei tokene rai.

136 I na, tika tikai taku e karanga atu kia kotou, e akatauanga teia kia kotou no te tu o te aravei atu anga tetai ki tetai i roto i te are o te Atua, i roto i te apii a te au peroveta.

137 E kua kapikiia kotou kia rave i teia na roto i te pure e te akameitakianga, i ta te Vaerua ka akakite atu i roto i ta kotou au angaanga katoatoa i roto i te are o te Atu, i roto i te apii a te au peroveta, kia riro mai oki ei ngai tapu, ei nao no te Vaerua Tapu ei tamā ia kotou.

138 Auraka kotou e ariki mai i tetai i rotopu ia kotou ki roto i teia apii mari ua ra kua mā aia mei te toto o teia uki tangata nei;

139 E ka arikiia mai oki aia na roto i te angaanga oroa o te oreianga o nga vaevae, e no reira oki i akatumuiaʼi te angaanga oroa o te oreianga vaevae.

140 E pera katoa, ko te angaanga oroa o te oreianga o nga vaevae na te peresideni te reira e rave, me kore ra na te ereta akaaere o te akonoanga.

141 Kia akamataia te reira ki te pure; e i muri ake i te kaianga o te varaoa e te inuanga i te uaina, ka tatua aia iaia kia tau ki te akaraanga tei orongaia mai i roto i te pene taingauru ma toru o te tuatua akakite o Ioane no runga iaku. Amene.