ဩဝါဒနှင့် ပဋိညာဉ်များ ၈၈

အပိုဒ်ငယ် ၈၈

၁၈၃၂ ခု၊ ဒီဇင်ဘာ ၂၇နှင့် ၂၈ ရက်၊ ထို့အတူ ၁၈၃၃ ခု၊ ဇန္နဝါရီ ၃ ရက် ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ပရောဖက်သည် ထိုဗျာဒိတ်တော်ကို “ အတိသုခဘုံအပင်မှခူးသည့် ‘သံလွင်ရွက်’၊ ကျွန်ုပ်တို့အဖို့ ကိုယ်တော်ရှင်၏ငြိမ်းချမ်းခြင်း သတင်းစကား” ဟု ဖော်ပြခဲ့၏။” ဇိအုန်တည်ဆောက်ခြင်းနှင့် စပ်လျဉ်း၍ ကိုယ်တော်ရှင်၏အလိုတော်ကို ကျွန်ုပ်တို့ထံ ဖော်ပြတော်မူရန် တစ်ဦးချင်းနှင့် အသံထွက်၍ သူ့ထံသို့” ယဇ်ပုရောဟိတ်မင်းများ ညီလာခံတစ်ခု၌ ဆုတောင်းပြီးနောက် ဗျာဒိတ်တော်ကို ပေးခဲ့၏။

၁–၅၊ သစ္စာရှိသောသန့်ရှင်းသူတို့သည် ထာဝရအသက်၏ကတိဖြစ်သည့် ထိုနှစ်သိမ့်ရှင်ကို လက်ခံကြ၏။ ၆–၁၃၊ ခပ်သိမ်းသောအရာတို့ကို ခရစ်တော်၏အလင်းဖြင့် ထိန်းချုပ်ပြီး အုပ်ချုပ်၏။ ၁၄–၁၆၊ ရှင်ပြန်ထမြောက်ခြင်းသည် ရွေးနုတ်ခြင်းအားဖြင့် ဖြစ်လာ၏။ ၁၇–၃၁၊ ဆီလက်ရှယ်လ်၊ ထီရက်စ်ထရီရယ်လ်နှင့် ထီလက်စ်ရှယ်လ်ဥပဒများကို နာခံခြင်းသည် လူသားတို့ကို သက်ဆိုင်ရာ နိုင်ငံတော်အသီးသီးနှင့် ဘုန်းအသရေအတွက် ပြင်ဆင်၏။ ၃၂–၃၅၊ အပြစ်၌ နေထိုင်လိုသူတို့သည် ဆက်၍ညစ်ညမ်းလျက်ရှိကြ၏။ ၃၆–၄၁၊ နိုင်ငံတော်အားလုံးကို ဥပဒေဖြင့်အုပ်ချုပ်၏။ ၄၂–၄၅၊ ဘုရားသခင်သည် ခပ်သိမ်းသောအရာတို့အဖို့ ဥပဒေတစ်ခုကို ပေးထား၏။ ၄၆–၅၀၊ လူသားသည် ဘုရားသခင်ကိုပင် နားလည်လိမ့်မည်။ ၅၁–၆၁၊ မိမိကျွန်တို့ကို လယ်ကွင်းထဲသို့စေလွှတ်ပြီး၊ တစ်ယောက်ပြီးတစ်ယောက် အကြည့်အရှုသွားသောသူအကြောင်း ပုံဆောင်စကား။ ၆၂–၇၃၊ ကိုယ်တော်ရှင်ထံသို့ ချဉ်းကပ်လော့၊ သင်တို့သည် သူ၏မျက်နှာတော်ကို မြင်ရလိမ့်မည်။ ၇၄–၈၀၊ သင်တို့ကိုယ်သင်တို့ သန့်ရှင်းစင်ကြယ်စေကြပြီး၊ နိုင်ငံတော်အကြောင်းဩဝါဒများကို တစ်ယောက်ကိုတစ်ယောက် သွန်သင်ပေးကြလော့။ ၈၁–၈၅၊ သတိပေးခံရလေပြီးသောသူတိုင်းသည် ကိုယ်နှင့်စပ်ဆိုင်သောသူကို သတိပေးရမည်။ ၈၆–၉၄၊ နိမိတ်လက္ခဏာများ၊ လောကဓာတ်အုံကြွခြင်း၊ ကိုယ်တော်ရှင်ကြွလာတော်မူခြင်းအတွက် ကောင်းကင်တမန်များ လမ်းကို ပြင်ဆင်၏။ ၉၅–၁၀၂၊ ကောင်းကင်တမန်တို့၏တံပိုးတို့က သေသူတို့ကို အစဉ်အတိုင်းခေါ်၏။ ၁၀၃–၁၁၆၊ ကောင်းကင်တမန်တို့၏တံပိုးတို့က ဧဝံဂေလိတရားတော်ပြန်လည်ဆောင်ယူခြင်း၊ ဗာဗုလုန်ကျဆုံးခြင်းနှင့် ကြီးမြတ်တော်မူသောဘုရားသခင်၏တိုက်ပွဲများကို ကြေညာ၏။ ၁၁၇–၁၂၆၊ သင်ယူခြင်းကို အားထုတ်လော့၊ ဘုရားသခင်၏အိမ်တော် (ဗိမာန်တော်တစ်ခု) ကို တည်ဆောက်လော့၊ သင်တို့ကိုယ်သင်တို့ မေတ္တာအနှောင်အဖွဲ့ဖြင့် ဝတ်ဆင်လော့။ ၁၂၇–၁၄၁၊ ခြေဆေးခြင်းဘိသိက်မင်္ဂလာအပါအဝင်၊ ပရောဖက်တို့၏ကျောင်းစနစ်ကို ရှင်းပြ၏။

၁ သင်တို့နှင့်စပ်လျဉ်းသည့် ကိုယ်တော်ရှင်၏အလိုတော်ကို လက်ခံရန် သင်တို့ကိုယ်သင်တို့ အတူတကွစည်းဝေးကြလေသည့် သင်တို့ကို သူအမှန်မိန့်တော်မူသည်ကား၊

၂ ရှုလော့၊ ဤအမှုသည် သင်တို့၏ ကိုယ်တော်ရှင်ကို နှစ်သက်စေ၏၊ ကောင်းကင်တမန်တို့ကလည်း သင်တို့နှင့်စပ်လျဉ်း၍ ရွှင်လန်းဝမ်းမြောက်ကြ၏။ သင်တို့၏ ဆုတောင်းခြင်းအလှူသည် ကိုယ်တော်ရှင်ဆာဘုတ်၏ နားသို့ တက်လာလေပြီး၊ သန့်ရှင်းစင်ကြယ်စေထားသော သူတို့၏၊ အမှန်စင်စစ်၊ ဆီလက်ရှယ်လ်လောကသားတို့၏ အမည်များ စာအုပ်၌ မှတ်တမ်းတင်ထား၏။

၃ သို့ဖြစ်၍၊ ငါသည် ယခုတွင်၊ သင်တို့ထံသို့၊ အမှန်စင်စစ် ငါ၏အဆွေခင်ပွန်းတို့ ထံသို့ တခြားသောနှစ်သိမ့်ရှင်ကို စေလွှတ်တော်မူ၏၊ အထူးသဖြင့်၊ ကတိတော်နှင့်ယှဉ်သော သန့်ရှင်းသောဝိညာဉ်တော်ကို သင်တို့စိတ်နှလုံး၌တည်နိုင်စေခြင်းငှာပင်တည်း။ ထိုအခြားသော နှစ်သိမ့်ရှင်သည် ယောဟန်၏သက်သေခံချက်၌ မှတ်တမ်းတင်ထားသည့် အတိုင်း ငါ၏တပည့်တော်တို့ထံ ငါကတိပေးထားသည့်အရာနှင့် အတူတူပင်ဖြစ်၏။

၄ ဤနှစ်သိမ့်ရှင်သည် သင်တို့ကို ငါပေးသည့်ထာဝရအသက်၏ကတိတော်၊ ဆီလက်ရှယ်လ်နိုင်ငံတော်၏ ဘုန်းအသရေပင် ဖြစ်၏။

၅ ထိုဘုန်းအသရေသည် သားဦး၏အသင်းတော်၏၊ အထူးသဖြင့် ခပ်သိမ်းသောသူတို့၏ အသန့်ရှင်းဆုံး ဘုရားသခင်၏ဘုန်းအသရေဖြစ်ပြီး၊ သားတော်ယေရှုခရစ်တော်အားဖြင့် ရရှိကြ၏—

၆ သူသည် အထက်သို့ တက်သွားတော်မူ၏၊ ထိုကဲ့သို့ပင် အောက်အရပ်ခပ်သိမ်းသောအရာတို့ ဆီသို့လည်း ဆင်းသက်တော်မူ၏၊ ထိုကဲ့သို့အားဖြင့်၊ သူသည် ခပ်သိမ်းသောအရာတို့ကို နားလည်၍၊ ခပ်သိမ်းသောအရာတို့၌လည်းကောင်း၊ ခပ်သိမ်းသောအရာတို့အားဖြင့်လည်းကောင်း သမ္မာတရားအလင်း အဖြစ်ရှိနိုင်စေခြင်းငှာပေတည်း။

၇ ထိုသမ္မာတရားသည် တောက်ပ၏။ ဤအရာသည် ခရစ်တော်၏အလင်း ဖြစ်၏။ သူ၏တန်ခိုးသည်လည်း နေသို့၊ ထို့အတူ နေ၏အလင်းသို့၊ ထို့အတူ ၎င်း၏တန်ခိုးသို့ ရောက်၏၊ ထိုတန်ခိုးအားဖြင့် ၎င်းကို ဖန်ဆင်းထားပေ၏။

၈ သူ၏တန်ခိုးသည်လည်း လသို့၊ ထို့အတူ လ၏အလင်းသို့၊ ထို့အတူ ၎င်း၏တန်ခိုးသို့ ရောက်၏၊ ထိုတန်ခိုးအားဖြင့် ၎င်းကို ဖန်ဆင်းထားပေ၏။

၉ ကြယ်တို့၏အလင်းသို့၊ ထို့တူ ၎င်းတို့၏တန်ခိုးသို့လည်း ရောက်၏၊ ထိုတန်ခိုးအားဖြင့် ၎င်းတို့ကို ဖန်ဆင်းထားပေ၏။

၁၀ မြေကြီးသို့၊ ထို့အတူ ၎င်း၏တန်ခိုးသို့၊ အမှန်စင်စစ်၊ သင်တို့ရပ်ရာမြေကြီးသို့ ရောက်၏။

၁၁ တောက်ပသည့်အလင်း၊ သင်တို့ကို အလင်းပေးသည့် ထိုအလင်းသည် သင်တို့မျက်စိများကို အလင်းသို့ရောက်စေသည့် သူအားဖြင့် ပေးသည့် အလင်းဖြစ်၏၊ ထိုအရာသည် သင်တို့၏ နားလည်ခြင်းကို ရှင်သန်စေသည့် အလင်းနှင့် တူသောအလင်းဖြစ်၏။

၁၂ ထိုအလင်းသည် အတိုင်းမသိကျယ်သောနေရာကို ပြည့်စေရန် ဘုရားသခင်၏ မျက်မှောက်တော်မှ ထွက်လာ၏—

၁၃ ခပ်သိမ်းသောအရာတို့၌ ရှိသည့်အလင်းသည် ခပ်သိမ်းသောအရာတို့အား အသက်ကို ပေးသည့် အလင်း၊ ခပ်သိမ်းသောအရာတို့ အုပ်ချုပ်ခံရရာဥပဒေ၊ အထူးသဖြင့်၊ မိမိပလ္လင်တော်ပေါ်မှာထိုင်သည့် ဘုရားသခင်၊ ထာဝရကာလ၏ ရင်၌ရှိသူ၊ ခပ်သိမ်းသောအရာတို့၏ အလယ်၌ ရှိသောသူ၏ တန်ခိုးတော်ပင်ဖြစ်၏။

၁၄ ယခုတွင်၊ သင်တို့ကို ငါအမှန်ဆိုသည်ကား၊ သင်တို့အတွက် ပြုထားသည့် ရွေးနုတ်ခြင်းသည် သေသူတို့မှ ရှင်ပြန်ထမြောက်ခြင်းကို ဖြစ်ပေါ်စေ၏။

၁၅ စိတ်ဝိညာဉ်နှင့် ကိုယ်ခန္ဓာသည် လူသား၏ ဝိညာဉ်ဖြစ်၏။

၁၆ သေသူတို့မှ ရှင်ပြန်ထမြောက်ခြင်းသည် ဝိညာဉ်၏ရွေးနုတ်ခြင်းဖြစ်၏။

၁၇ ဝိညာဉ်၏ ရွေးနုတ်ခြင်းသည် ခပ်သိမ်းသောအရာတို့ကို ရှင်သန်စေသောသူအားဖြင့် ဖြစ်လေပြီး၊ မြေကြီး၌ ရှိသည့် ဆင်းရဲသားတို့နှင့် သိမ်မွေ့အောက်ကျို့သောသူတို့သည် သူ၏ရင်၌ စီရင်ခံကြရ၏။

၁၈ ထို့ကြောင့်၊ ခပ်သိမ်းသောမတရားမှုမှ သန့်ရှင်းစင်ကြယ်စေရန် လိုအပ်၏၊ ဆီလက်ရှယ်လ်ဘုန်းအသရေအတွက် ပြင်ဆင်ထားနိုင်စေခြင်းငှာပေတည်း။

၁၉ အကြောင်းမူကား၊ ၎င်း၏ဖန်ဆင်းခြင်းရည်ရွယ်ချက်ကို ပြီးပြည့်စုံစေလေပြီ၊ ဘုန်းအသရေနှင့်၊ အမှန်စင်စစ်၊ ခမည်းတော်ဘုရားသခင်၏မျက်မှောက်တော်နှင့် ချီးမြှင့်ခံရလိမ့်မည်၊

၂၀ ဆီလက်ရှယ်လ်နိုင်ငံတော်၌ ရှိသောသူတို့ မြေကြီးကို ကာလအစဉ်အဆက်အမြဲ ပိုင်ဆိုင်နိုင်ကြစေခြင်းငှာပေတည်း။ အကြောင်းမူကား၊ ဤရည်ရွယ်ချက်အတွက် ဖန်ဆင်းထားလေပြီး၊ ဤရည်ရွယ်ချက်အတွက် သူတို့ကို သန့်ရှင်းစင်ကြယ်စေ၏။

၂၁ သင်တို့ကို ငါပေးထားလေသည့် ဥပဒေ၊ ခရစ်တော်၏ ဥပဒေအားဖြင့် သန့်ရှင်း စင်ကြယ်စေထားခြင်း မရှိသောသူများသည် တခြားသောနိုင်ငံတော်ဖြစ်သည့် ထီရက်စ်ထရီရယ်လ်နိုင်ငံတော် သို့မဟုတ် ထီလက်စ်ရှယ်လ်နိုင်ငံတော်ကိုပင် အမွေခံကြရမည်။

၂၂ အကြောင်းမူကား၊ ဆီလက်ရှယ်လ်နိုင်ငံတော်၏ ဥပဒေကို နာခံရန် မတတ်နိုင်သောသူသည် ဆီလက်ရှယ်လ်ဘုန်းအသရေ၌ မတည်တံ့နိုင်။

၂၃ ထီရက်စ်ထရီရယ်လ်နိုင်ငံတော်၏ ဥပဒေကို နာခံရန် မတတ်နိုင်သောသူသည်လည်း ထီရက်စ်ထရီရယ်လ် ဘုန်းအသရေ၌ မတည်တံ့နိုင်။

၂၄ ထီလက်စ်ရှယ်လ်နိုင်ငံတော်၏ ဥပဒေကို နာခံရန် မတတ်နိုင်သောသူသည်လည်း ထီလက်စ်ရှယ်လ် ဘုန်းအသရေ၌ မတည်တံ့နိုင်။ ထို့ကြောင့်၊ ဘုန်းအသရေနိုင်ငံတော်နှင့် မထိုက်တန်။ ထို့ကြောင့်၊ ဘုန်းအသရေနိုင်ငံတော်မဟုတ်သည့် နိုင်ငံတော်၌ နေထိုင်ရမည်။

၂၅ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ မြေကြီးသည် ဆီလက်ရှယ်လ်နိုင်ငံတော်၏ ဥပဒေကို နာခံရမည်၊ အကြောင်းမူကား၊ ၎င်း၏ ဖန်ဆင်းခြင်းရည်ရွယ်ချက်ကို ပြီးပြည့်စုံစေလေပြီ၊ ဥပဒေကို လွန်ကျူးခြင်းမရှိ—

၂၆ သို့ဖြစ်၍၊ ၎င်းကို သန့်ရှင်းစင်ကြယ်စေလိမ့်မည်။ ထိုမှတစ်ပါး၊ သေလိမ့်မည် ဖြစ်သော်ငြားလည်း တစ်ဖန်ရှင်သန်လိမ့်မည်၊ ရှင်သန်ရာတန်ခိုးဖြင့် တည်တံ့လိမ့်မည်၊ ဖြောင့်မတ်သောသူတို့က ၎င်းကို အမွေခံကြလိမ့်မည်။

၂၇ သူတို့သည် သေကြသော်ငြားလည်း၊ ဝိညာဉ်ပကတိကိုယ်ခန္ဓာအဖြစ် တစ်ဖန် ထမြောက်ကြလိမ့်မည်။

၂၈ ဆီလက်ရှယ်လ်စိတ်ဝိညာဉ်ရှိသောသူတို့သည် ပကတိကိုယ်ခန္ဓာဖြစ်လေသည့် ကိုယ်ခန္ဓာနှင့်တူသော ကိုယ်ခန္ဓာကို ရရှိလိမ့်မည်။ အမှန်စင်စစ်၊ သင်တို့သည် သင်တို့၏ ကိုယ်ခန္ဓာများကို ရရှိလိမ့်မည်၊ သင်တို့၏ဘုန်းအသရေသည်လည်း သင်တို့၏ကိုယ်ခန္ဓာများကို ရှင်သန်စေသည့် ဘုန်းအသရေဖြစ်လိမ့်မည်။

၂၉ ဆီလက်ရှယ်လ်ဘုန်းအသရေ၏ တစ်စိတ်တစ်ပိုင်းအားဖြင့် ရှင်သန်ရသောသင်တို့သည် ထို့နောက်တွင်၊ တူသောအရာကို၊ ပြည့်စုံခြင်းကဲ့သို့ပင် ရရှိလိမ့်မည်။

၃၀ ထီရက်စ်ထရီရယ်လ်ဘုန်းအသရေ၏ တစ်စိတ်တစ်ပိုင်းအားဖြင့် ရှင်သန်ရသော သူတို့သည်လည်း ထို့နောက်တွင်၊ တူသောအရာကို၊ ပြည့်စုံခြင်းကဲ့သို့ပင် ရရှိလိမ့်မည်။

၃၁ ထီလက်စ်ရှယ်လ်ဘုန်းအသရေ၏ တစ်စိတ်တစ်ပိုင်းအားဖြင့် ရှင်သန်ရသော သူတို့သည်လည်း ထို့နောက်တွင်၊ တူသောအရာကို၊ ပြည့်စုံခြင်းကဲ့သို့ပင် ရရှိလိမ့်မည်။

၃၂ ဆက်၍ကျန်ရှိသောသူတို့သည်လည်း ရှင်သန်ရလိမ့်မည်။ သို့သော်လည်း၊ သူတို့သည် ရရှိနိုင်ခဲ့လေမည့်အရာနှင့် ပျော်မွေ့ရန် လိုလိုလားလားမရှိကြသောကြောင့်၊ ရရှိရန် လိုလိုလားလားရှိသည့်အရာနှင့် ပျော်မွေ့ရန် မိမိတို့နေရာသို့ တစ်ဖန်ပြန်လာကြလိမ့်မည်။

၃၃ အကြောင်းမူကား၊ လူသည် မိမိအား ဆုကျေးဇူးပေးသော်လည်း ထိုဆုကျေးဇူးကို လက်ခံခြင်းမရှိလျှင် အဘယ်အကျိုးရှိသနည်း။ ရှုလော့၊ ထိုသူသည် မိမိအား ပေးသည့် အရာ၌ ရွှင်လန်းဝမ်းမြောက်ခြင်း မရှိ၊ ဆုကျေးဇူးကို ပေးသောသူ၌လည်း ရွှန်လန်းဝမ်းမြောက်ခြင်းမရှိ။

၃၄ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ဥပဒေဖြင့် အုပ်ချုပ်ခံရသောအရာသည် ဥပဒေဖြင့် ထိန်းသိမ်းစောင့်ရှောက်ခံရပြီး၊ တူသောအရာဖြင့်ပင် စုံလင်စေပြီး၊ သန့်ရှင်းစင်ကြယ်စေရ၏။

၃၅ ဥပဒေကို ချိုးဖောက်သော၊ ဥပဒေကို မနာခံသော၊ သို့ရာတွင် မိမိကိုယ်တိုင်အတွက် ဥပဒေဖြစ်လာစေရန် ကြိုးစားသော၊ အပြစ်၌ နေထိုင်လိုသော၊ အပြစ်၌ လုံးဝနေထိုင်သောသူကို ဥပဒေအားဖြင့်သော်လည်းကောင်း၊ ကရုဏာအားဖြင့် သော်လည်းကောင်း၊ တရားမျှတခြင်းအားဖြင့် သော်လည်းကောင်း၊ တရားစီရင်ခြင်းအားဖြင့်သော်လည်းကောင်း သန့်ရှင်းစင်ကြယ်စေခြင်းမရှိနိုင်။ ထို့ကြောင့်၊ သူတို့သည် ဆက်၍ညစ်ညမ်းလျက်ရှိကြ၏။

၃၆ ခပ်သိမ်းသောနိုင်ငံတော်တို့၌ ပေးထားသော ဥပဒေရှိ၏။

၃၇ နိုင်ငံတော်များစွာရှိ၏။ အကြောင်းမူကား၊ နိုင်ငံတော်မရှိသည့်နေရာမရှိ။ နေရာမရှိသည့်နိုင်ငံတော်လည်းမရှိ။ သာ၍ကြီးသော သို့မဟုတ် သာ၍ငယ်သောနိုင်ငံတော်မရှိ။

၃၈ နိုင်ငံတော်တိုင်းသို့ ဥပဒေကို ပေးထား၏။ ထို့အတူ၊ ဥပဒေတိုင်း၌ ကန့်သတ်ချက်အချို့နှင့် ပြဌာန်းချက်များလည်း ရှိ၏။

၃၉ ထိုပြဌာန်းချက်များကို လိုက်နာခြင်းမရှိသောသူအပေါင်းသည် အပြစ်မကင်းစေရ။

၄၀ အကြောင်းမူကား၊ အသိဉာဏ်သည် အသိဉာဏ်၌ စွဲမြဲ၏။ ဉာဏ်ပညာက ဉာဏ်ပညာကို လက်ခံ၏။ သမ္မာတရားက သမ္မာတရားကို လှိုက်လှိုက်လှဲလှဲလက်ခံ၏။ ကိုယ်ကျင့်သီလက ကိုယ်ကျင့်သီလကို ချစ်၏။ အလင်းသည် အလင်း၌ စွဲမြဲ၏။ ကရုဏာက ကရုဏာကို သနားပြီး မိမိလူတို့အပေါ်သက်ရောက်၏။ တရားမှုသည် မိမိလမ်းကြောင်းကို ဆက်၍သွားပြီး၊ မိမိလူတို့အပေါ် သက်ရောက်၏။ ပလ္လင်ပေါ်မှာထိုင်ပြီး၊ ခပ်သိမ်းသောအရာတို့ကို စီရင်သည့်သူ၏မျက်နှာရှေ့၌ တရားစီရင်ခြင်းသွား၏။

၄၁ သူသည် ခပ်သိမ်းသောအရာတို့ကို နားလည်၏၊ ထို့အတူ ခပ်သိမ်းသောအရာတို့သည် သူ့ရှေ့၌ရှိ၏၊ ထို့အတူ ခပ်သိမ်းသောအရာတို့သည် သူ့ပတ်ဝန်းကျင်၌ ရှိ၏။ ထို့အတူ သူသည် ခပ်သိမ်းသောအရာတို့ အထက်၌၊ ထို့အတူ ခပ်သိမ်းသောအရာတို့အထဲ၌၊ ထို့အတူ ခပ်သိမ်းသောအရာတို့ တစ်လျှောက်၌၊ ထို့အတူ ခပ်သိမ်းသောအရာတို့ပတ်ဝန်းကျင်၌ ရှိ၏။ ထို့အတူ ခပ်သိမ်းသောအရာတို့သည် သူ့အားဖြင့်၊ ထို့အတူ သူ့ထံမှ၊ အမှန်စင်စစ် ဘုရားသခင်ထံမှနေ၍ ကာလအစဉ်အဆက် အမြဲဖြစ်လေ၏။

၄၂ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ သူသည် ခပ်သိမ်းသောအရာတို့အဖို့ ဥပဒေတစ်ခုကို ပေးထား၏၊ ၎င်းအားဖြင့် မိမိတို့အချိန်များ၊ မိမိတို့ရာသီများအတိုင်း ရွေ့လျားကြ၏။

၄၃ ၎င်းတို့၏လမ်းကြောင်းများ၊ ကောင်းကင်နှင့်မြေကြီး၏လမ်းကြောင်းများ အတည်တကျဖြစ်ရာတွင် မြေကြီးနှင့် ခပ်သိမ်းသောဂြိုဟ်များ ပါဝင်၏။

၄၄ ၎င်းတို့သည် မိမိတို့အချိန်များအတိုင်း၊ မိမိတို့ရာသီများအတိုင်း၊ မိမိတို့မိနစ်များအတိုင်း၊ မိမိတို့နာရီများအတိုင်း၊ မိမိတို့နေ့များအတိုင်း၊ မိမိတို့သီတင်းပတ်များအတိုင်း၊ မိမိတို့လများအတိုင်း၊ မိမိတို့နှစ်များအတိုင်း တစ်ခုနှင့်တစ်ခု အလင်းကို ပေးကြ၏—ခပ်သိမ်းသောဤအရာတို့မှာ ဘုရားသခင်အနေဖြင့် တစ်နှစ်ဖြစ်၏၊ လူသားအနေဖြင့်မဟုတ်။

၄၅ ဘုရားသခင်၏ တန်ခိုးတော်အလယ်၌၊ မြေကြီးသည် မိမိအတောင်များဖြင့် လည်၏၊ နေသည် နေ့၌ မိမိအလင်းကိုပေး၏၊ လသည်လည်း ည၌ မိမိအလင်းကို ပေး၏၊ ကြယ်တို့သည်လည်း မိမိတို့ဘုန်းအသရေ၌ မိမိတို့အတောင်များဖြင့် လည်စဉ်တွင် မိမိတို့အလင်းကို ပေးကြ၏။

၄၆ ရှုလော့၊ သင်တို့နားလည်နိုင်ကြစေခြင်းငှာ ဤနိုင်ငံတော်တို့ကို အဘယ်အရာနှင့် ငါနှိုင်းယှဉ်ပြရမည်နည်း။

၄၇ ရှုလော့၊ ခပ်သိမ်းသောဤအရာတို့သည် နိုင်ငံတော်များဖြစ်ကြ၏၊ ဤအရာတို့အထဲမှ တစ်စုံတစ်ခု သို့မဟုတ် အနည်းငယ်ကို မြင်ရသူ အဘယ်သူမဆို ဘုရားသခင်သည် သူ့အာနုဘော်နှင့် တန်ခိုးတော်ဖြင့် ရွေ့လျားတော်မူလျက်ရှိကြောင်းကို မြင်ရလေပြီ။

၄၈ သင်တို့ကို ငါဆိုသည်ကား၊ သူ့ကို မြင်လေပြီ။ သို့သော်လည်း၊ မိမိလူမျိုးတို့ဆီသို့ လာသောသူသည် လက်ခံခြင်းကို မရ။

၄၉ အလင်းသည် မှောင်မိုက်၌ တောက်ပသော်လည်း မှောင်မိုက်သည် ၎င်းကို နားလည်ခြင်းမရှိ၊ အမှန်စင်စစ် ဘုရားသခင်ကို သင်တို့နားလည်ပြီး၊ သူ့၌လည်းကောင်း၊ သူ့အားဖြင့်လည်းကောင်း ရှင်သန်စေလျက်ရှိသည့်နေ့ ကျရောက်လာလိမ့်မည်။

၅၀ ထို့နောက်တွင်၊ သင်တို့သည် ငါ့ကို မြင်ရလေကြောင်း၊ ငါ ဖြစ်တော်မူကြောင်း၊ ငါသည် သင်တို့၌ ရှိသည့် မှန်သောအလင်း ဖြစ်တော်မူကြောင်း၊ ထို့အတူ သင်တို့သည် ငါ၌ ရှိကြလေကြောင်း သိကြလိမ့်မည်။ သို့မဟုတ်လျှင်၊ သင်တို့မကြွယ်ဝနိုင်ခဲ့ကြ။

၅၁ ရှုလော့၊ ငါသည် ဤနိုင်ငံတော်တို့ကို လယ်ကွင်းရှိသောသူတစ်ဦးနှင့် နှိုင်းယှဉ်ပြမည်၊ ထိုသူသည် မိမိကျွန်များကို လယ်ကွင်းထဲ၌ တူးဆွကြစေရန် လယ်ကွင်းထဲသို့ စေလွှတ်၏။

၅၂ ထိုသူက ပထမဦးဆုံးလူကို ဆိုလေသည်ကား၊ သင်သည် လယ်ကွင်းထဲသို့ သွား၍ အလုပ်လုပ်လော့၊ ပထမဦးဆုံးနာရီတွင် ငါသည် သင့်ထံသို့ လာမည်၊ သင်သည်လည်း ငါ၏မျက်နှာထား ဝမ်းမြောက်ခြင်းကို မြင်ရလိမ့်မည်။

၅၃ ထိုသူက ဒုတိယလူကို ဆိုလေသည်ကား၊ သင်သည်လည်း လယ်ကွင်းထဲသို့သွားလော့၊ ဒုတိယနာရီတွင် ငါသည် သင့်ထံသို့ ငါ၏မျက်နှာထားဝမ်းမြောက်ခြင်းနှင့်အတူ အကြည့်အရှုလာမည်။

၅၄ တတိယလူကိုလည်း ဆိုလေသည်ကား၊ ငါသည် သင့်ကို အကြည့်အရှုလာမည်။

၅၅ စတုတ္ထလူကိုလည်းကောင်း၊ ထိုနည်းတူ တစ်ဆယ့်နှစ်ယောက်မြောက်သောသူအထိ ဆိုလေ၏။

၅၆ လယ်ကွင်းပိုင်ရှင်သည် ပထမဦးဆုံးလူထံသို့ ပထမနာရီတွင်သွား၍၊ ထိုနာရီတစ်ချိန်လုံး ထိုသူနှင့်အတူနေထိုင်သဖြင့် ထိုသူသည် မိမိသခင်၏မျက်နှာထားအလင်းကြောင့် ဝမ်းသာရလေ၏။

၅၇ ထို့နောက်တွင်၊ သူသည် ဒုတိယလူကိုလည်း အကြည့်အရှုသွားနိုင်ခြင်းငှာ ပထမဦးဆုံးသူထံမှ ထွက်ခွာ၏၊ ထို့အတူ တတိယလူ၊ ထို့အတူ စတုတ္ထလူ၊ ထိုနည်းတူ တစ်ဆယ့်နှစ်ယောက် မြောက်သောသူအထိ သွားလေ၏။

၅၈ ထိုကဲ့သို့အားဖြင့် သူတို့အားလုံးသည်၊ လူတိုင်း မိမိနာရီ၌၊ ထို့အတူ မိမိအချိန်၌၊ ထို့အတူ မိမိရာသီ၌ မိမိတို့သခင်၏မျက်နှာထားအလင်းကို ရရှိကြသည်ကား—

၅၉ ပထမဦးဆုံးမှစ၍၊ ထိုနည်းတူ နောက်ဆုံးအထိ၊ ထို့အတူ နောက်ဆုံးမှ ပထမဦးဆုံးအထိ၊ ထို့အတူ ပထမဦးဆုံးမှ နောက်ဆုံးအထိ ဖြစ်လေသတည်း။

၆၀ လူတိုင်း မိမိအစဉ်အလိုက်၊ မိမိနာရီပြီးဆုံးသည်အထိ၊ မိမိသခင်မိန့်မှာလေသည့်အတိုင်းပင်၊ မိမိ၌ မိမိသခင်ဘုန်းထင်ရှားနိုင်စေခြင်းငှာ၊ ထို့အတူ မိမိသခင်၌ မိမိဘုန်းထင်ရှားနိုင်စေခြင်းငှာ၊ သူတို့အားလုံး ဘုန်းထင်ရှားနိုင်ကြစေခြင်းငှာ ရှိကြလေ၏။

၆၁ ထို့ကြောင့်၊ ဤပုံဆောင်စကားဖြင့်၊ ငါသည် ဤခပ်သိမ်းသောနိုင်ငံတော်တို့ကို၊ ထိုနေရာ၌ နေထိုင်ကြသောသူတို့ကို နှိုင်းယှဉ်ပြမည်—နိုင်ငံတော်တိုင်းကို မိမိနာရီအတိုင်း၊ ထို့အတူ မိမိအချိန်အတိုင်း၊ ထို့အတူ မိမိရာသီအတိုင်း၊ ဘုရားသခင် ပြုထားလေသည့် စီရင်ချက်အတိုင်းပင် အကြည့်အရှုကြွတော်မူမည်။

၆၂ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ၏အဆွေခင်ပွန်းတို့၊ ဤစကားတို့ကို သင်တို့စိတ်နှလုံး၌ မှတ်ကျုံး၍ စဉ်းစားဆင်ခြင်ကြစေရန် သင်တို့နှင့်အတူ၊ ငါအနီး၌ရှိစဉ် သင်တို့ ငါ့ကို ပတ္ထနာပြုရကြမည့်အကြောင်း သင်တို့ကို ငါပေးသည့် ဤပညတ်တော်နှင့်အတူ ချန်ထားခဲ့၏—

၆၃ ငါ့ထံသို့ ချဉ်းကပ်ကြလော့၊ ငါသည်လည်း သင်တို့ထံသို့ ချဉ်းကပ်တော်မူမည်။ ငါ့ကို လုံ့လဝီရိယထက်သန်စွာ ရှာကြလော့၊ သင်တို့သည် ငါ့ကို တွေ့ကြလိမ့်မည်။ တောင်းကြလော့၊ သင်တို့ရကြလိမ့်မည်။ ခေါက်ကြလော့၊ သင်တို့အား ဖွင့်ပေးလိမ့်မည်။

၆၄ ငါ၏နာမတော်အားဖြင့် ခမည်းတော်ထံသို့ သင်တို့တောင်းမည့်အရာ၊ သင်တို့အတွက် သင့်လျော်သည့်အရာ မှန်သမျှကို သင်တို့အား ပေးတော်မူလိမ့်မည်။

၆၅ သင်တို့သည် သင်တို့အတွက် မသင့်လျော်သည့်အရာတစ်စုံတစ်ခုကို တောင်းကြလျှင်၊ ထိုအရာသည် သင်တို့၏ ပြစ်ဒဏ်ချမှတ်ခြင်းသို့ ရောက်လိမ့်မည်။

၆၆ ရှုလော့၊ သင်တို့ကြားသည့် အရာသည် တောရိုင်းထဲ၌ ဟစ်ကြော်သည့် အသံကဲ့သို့သောအရာ ဖြစ်၏—သူ့ကို သင်တို့မမြင်နိုင်ကြသောကြောင့်၊ တောရိုင်းထဲ၌ဟု ဆို၏—ငါ၏အသံသည် ဝိညာဉ်တော်ဖြစ်သောကြောင့်၊ ငါ၏အသံဟုဆို၏။ ငါ၏ဝိညာဉ်တော်သည် သမ္မာတရားဖြစ်၏။ သမ္မာတရားသည် တည်တံ့ပြီး အဆုံးမရှိ။ သင်တို့အထဲ၌ ထိုတရားရှိလျှင်၊ ထိုတရားတိုးပွားလိမ့်မည်။

၆၇ သင်၏မျက်စိသည် ငါ၏ဘုန်းတော် ထင်ရှားဖို့ကိုသာ စူးစိုက်လျှင်၊ သင်၏ တစ်ကိုယ်လုံးသည် အလင်းနှင့်ပြည့်လိမ့်မည်၊ သင့်အထဲ၌ မှောင်မိုက်ခြင်းလည်းမရှိလတ္တံ့။ အလင်းနှင့်ပြည့်သည့် ထိုကိုယ်ခန္ဓာသည် ခပ်သိမ်းသောအရာတို့ကို နားလည်၏။

၆၈ ထို့ကြောင့်၊ သင်တို့ကိုယ်သင်တို့ သန့်ရှင်းစင်ကြယ်စေကြလော့၊ သင်တို့စိတ်သည် ဘုရားသခင်အဖို့ စူးစိုက်လာ လိမ့်မည်၊ သူ့ကို သင်တို့မြင်ကြရမည့်နေ့များသည်လည်း ကျရောက်လာလိမ့်မည်။ အကြောင်းမူကား၊ သူသည် သူ၏မျက်နှာကို သင်တို့အား ဖွင့်ပြလိမ့်မည်၊ ထိုအမှုသည်လည်း သူ၏အချိန်ကာလ၌၊ သူ၏နည်းအတိုင်း၊ သူ၏ အလိုတော်အတိုင်း ဖြစ်လိမ့်မည်။

၆၉ သင်တို့ထံ ငါပြုတော်မူလေသည့် ကြီးမြတ်သော နောက်ဆုံးကတိတော်ကို သတိရကြလော့။ သင်တို့၏ ပျင်းရိသောအတွေးများနှင့် သင်တို့၏လွန်ကဲသောရယ်မောခြင်းတို့ကို သင်တို့ထံမှ ဝေးရာသို့ ပစ်လိုက်ကြလော့။

၇၀ သင်တို့ တည်းခိုနေကြလော့၊ ဤနေရာ၌ သင်တို့ တည်းခိုနေကြလော့၊ ဤနောက်ဆုံးနိုင်ငံတော်၌ ပထမဦးဆုံး အလုပ်လုပ်ကြသောသူတို့ကိုပင် ဓမ္မအစည်းအဝေးကိုလည်း ခေါ်ကြလော့။

၇၁ ခရီးသွားခြင်း၌ သူတို့သတိပေးလေသောသူများကိုလည်း ကိုယ်တော်ရှင်အား ပတ္ထနာပြုကြစေလော့၊ ကာလအနည်းငယ်မျှသာ သူတို့ရရှိလေသည့် သတိပေးခြင်းကိုလည်း သူတို့စိတ်နှလုံး၌ မှတ်ကျုံး၍စဉ်းစားဆင်ခြင်ကြစေလော့။

၇၂ ရှုလော့၊ ကြည့်ဦးလော့၊ ငါသည် သင်တို့၏သိုးစုများကို ဂရုစိုက်တော်မူမည်၊ အသင်းလူကြီးတို့ကိုလည်း ပေါ်ထွန်းစေပြီး ၎င်းတို့ထံ စေလွှတ်တော်မူမည်။

၇၃ ရှုလော့၊ ငါသည် ငါ၏အမှုတော်ကို သူ့အချိန်ရောက်လျှင် နှိုးဆော်တော်မူမည်။

၇၄ ဤနောက်ဆုံးနိုင်ငံတော်၌ ပထမဦးဆုံးအလုပ်လုပ်ကြသူများတည်းဟူသော သင်တို့အား သင်တို့ကိုယ်သင်တို့ အတူတကွစည်းဝေးစေကြရန်၊ ထို့အတူ သင်တို့ကိုယ်သင်တို့ စီစဉ်စေကြရန်၊ ထို့အတူ သင်တို့ကိုယ်သင်တို့ ပြင်ဆင်စေကြရန်၊ ထို့အတူ သင်တို့ကိုယ်သင်တို့ သန့်ရှင်းစင်ကြယ်စေကြ၊ ထိုမှတစ်ပါး သင်တို့စိတ်နှလုံးကို စင်ကြယ်စေကြရန်၊ ထို့အတူ ငါ့ရှေ့၌ သင်တို့လက်များနှင့် ခြေများကို သန့်စင်စေကြရန် ပညတ်တော်ကို ငါပေး၏။ ငါသည် သင်တို့အား သန့်ရှင်းစေနိုင်တော်မူခြင်းငှာပေတည်း။

၇၅ သင်တို့သည် ဤဆိုးညစ်သောမျိုးဆက်၏ အသွေးနှင့် ကင်းလွတ်ကြောင်း၊ သင်တို့၏အဘ၊ ထို့အတူ သင်တို့၏ဘုရားသခင်၊ ထို့အတူ ငါ၏ဘုရားသခင်ထံသို့ ငါသက်သေခံနိုင်ခြင်းငှာ၊ သင်တို့ထံငါပြုတော်မူလေသည့် ဤကတိတော်၊ ဤကြီးမြတ်သောနောက်ဆုံးကတိတော်ကို ငါအလိုရှိတော်မူသည့်အခါ ပြီးပြည့်စုံနိုင်စေခြင်းငှာပေတည်း။

၇၆ ထို့အတူ၊ ငါသည် သင်တို့ယခုအချိန်မှစ၍ ဆုတောင်းခြင်းနှင့် အစာရှောင်ခြင်းတို့၌ ဆက်၍ရှိနေကြရမည့်အကြောင်း သင်တို့အား ပညတ်တော်ကို ပေး၏။

၇၇ ငါသည် သင်တို့ နိုင်ငံတော်၏ဩဝါဒကို တစ်ယောက်ကိုတစ်ယောက် သွန်သင်ပေးကြရမည့် အကြောင်း သင်တို့အား ပညတ်တော်ကို ပေး၏။

၇၈ သင်တို့သည် လုံ့လဝီရိယထက်သန်စွာ သွန်သင်ကြလော့၊ ငါ၏ကျေးဇူးတော်သည် သင်တို့နှင့် အတူရှိလိမ့်မည်၊ သင်တို့သည် သဘောတရား၌၊ အခြေခံဩဝါဒ၌၊ ဩဝါဒ၌၊ ဧဝံဂေလိတရားတော်ဥပဒေ၌၊ သင်တို့နားလည်ရန် သင့်လျော်သည့်အရာများ တည်းဟူသော ဘုရားသခင်၏ နိုင်ငံတော်နှင့် စပ်ဆိုင်သည့် ခပ်သိမ်းသောအရာတို့၌ ပို၍စုံလင်စွာ သွန်သင်ခံကြရ နိုင်စေခြင်းငှာပေတည်း။

၇၉ ကောင်းကင်နှင့် မြေကြီးနှစ်ခုစလုံး၌၊ ထို့အတူ မြေကြီးအောက်၌ ရှိသောအရာများ၊ ဖြစ်လေပြီးသောအရာများ၊ ဖြစ်လျက်ရှိသောအရာများ၊ မကြာမြင့်မီဖြစ်လာရမည့်အရာများ၊ ကိုယ့်နိုင်ငံ၌ ရှိသောအရာများ၊ တခြားနိုင်ငံ၌ ရှိသောအရာများ၊ ပြည်သားတို့၏စစ်တိုက်ခြင်းများနှင့် ရှုပ်ထွေးခြင်းများ၊ ပြည်ပေါ်၌ ရှိသည့် တရားစီရင်တော်မူခြင်းများအကြောင်း၊ ထို့အတူ နိုင်ငံများနှင့် နိုင်ငံတော်များ အကြောင်း သိခြင်းလည်းပါဝင်၏—

၈၀ သင်တို့ကို ငါခေါ်သွင်းတော်မူလေရာ အမှုတော်ဆောင်တာဝန်၊ ထို့အတူ သင်တို့ကို ငါအခွင့်အရာပေးတော်မူလေရာ သာသနာပြုခြင်းကို တိုးမြှင့်ဆောင်ရွက်ရန် သင်တို့ကို ငါတစ်ဖန်စေလွှတ်မည့်အချိန်၌ သင်တို့ပြင်ဆင်ပြီးသားရှိနိုင်ကြစေခြင်းငှာပေတည်း။

၈၁ ရှုလော့၊ လူမျိုးတို့အား သက်သေခံရန်နှင့် သတိပေးရန် သင်တို့ကို ငါစေလွှတ်၏၊ သတိပေး ခံရလေပြီးသောသူတိုင်းသည်လည်း ကိုယ်နှင့်စပ်ဆိုင်သောသူကို သတိပေးရန် လိုအပ်၏။

၈၂ ထို့ကြောင့်၊ သူတို့သည် အကြောင်းပြချက်မရှိဘဲ ကျန်ရစ်ကြ၏၊ သူတို့၏အပြစ်များသည် သူတို့ဦးခေါင်းပေါ်မှာ ရှိကြ၏။

၈၃ ငါ့ကို ရှေးဦးစွာရှာသောသူသည် ငါ့ကို တွေ့လိမ့်မည်၊ စွန့်ပစ်မခံရလတ္တံ့။

၈၄ ထို့ကြောင့်၊ သင်တို့ တည်းခိုနေကြလော့၊ လုံ့လဝီရိယထက်သန်စွာ အလုပ်လုပ်ကြလော့၊ တပါးအမျိုးသားတို့၌ နောက်ဆုံးအကြိမ်အဖြစ် ထွက်သွားရန်၊ ကိုယ်တော်ရှင်၏နှုတ်တော်မှပေးမည့် အမည်မှန်သမျှတည်းဟူသော သင်တို့သည် ဥပဒေကို ထုပ်၍ သက်သေခံချက်ကို တံဆိပ်ခတ်ရန်၊ ထို့အတူ ကျရောက်လာမည့် တရားစီရင်ခြင်းနာရီအတွက် သန့်ရှင်းသူတို့အား ပြင်ဆင်ရန်ဖြစ်သည့် သင်တို့၏ အမှုတော်ဆောင်ခြင်း၌ စုံလင်နိုင်ကြစေခြင်းငှာပေတည်း။

၈၅ သူတို့စိတ်ဝိညာဉ်များ ဘုရားသခင်၏အမျက်တော်၊ ဤလောက၌လည်းကောင်း ကျရောက်လာမည့်လောက၌ လည်းကောင်း ဆိုးညစ်သောသူတို့ကို စောင့်နေသည့် စက်ဆုပ်ရွံရှာဖွယ် လူဆိတ်ညံခြင်းမှ လွတ်မြောက်နိုင်ကြစေခြင်းငှာပေတည်း။ သင်တို့ကို ငါအမှန်ဆိုသည်ကား၊ ပထမဦးဆုံးအသင်းလူကြီးများ မဟုတ်သောသူတို့အား ကိုယ်တော်ရှင်၏နှုတ်တော်မှ သူတို့ကို ခေါ်သည့်အချိန်ထိ စပျစ်ဥယျာဉ်ထဲ၌ ဆက်၍နေစေလော့၊ အကြောင်းမူကား၊ သူတို့၏အချိန်သည် မကျရောက်လာသေး။ သူတို့၏အဝတ်တန်ဆာများသည် ဤမျိုးဆက်၏အသွေးနှင့် မကင်းလွတ်။

၈၆ သင်တို့ကို လွတ်လပ်စေသော လွတ်လပ်ခြင်း၌ နေထိုင်ကြလော့၊ သင်တို့ကိုယ်သင်တို့ အပြစ်၌ ငြိတွယ်ခြင်းမရှိစေနှင့်၊ သို့ရာတွင် ကိုယ်တော်ရှင်ကြွလာတော်မူသည့်အချိန်အထိ သင်တို့လက်များကို သန့်ရှင်းစေကြလော့။

၈၇ အကြောင်းမူကား၊ ယခုအချိန်မှစ၍ များစွာသောနေ့များမကြာမီ မြေကြီးသည် တုန်လျက် ယစ်မူးသောသူကဲ့သို့ တလူးလည်လည်ရှိလိမ့်မည်။ နေသည်လည်း မိမိမျက်နှာကို ကွယ်ထားလိမ့်မည်၊ အလင်းကိုပေးဖို့လည်း ငြင်းလိမ့်မည်။ လသည်လည်း အသွေးနှင့် လွှမ်းထားလိမ့်မည်။ ကြယ်တို့သည်လည်း အလွန်အမျက်ထွက်လာကြလိမ့်မည်၊ သင်္ဘောသဖန်းပင်မှ သင်္ဘောသဖန်းသီးကြွေကျသကဲ့သို့ ခုန်ချကြလိမ့်မည်။

၈၈ သင်တို့၏သက်သေခံချက်နောက်တွင်၊ အမျက်နှင့် ဒေါသ လူမျိုးတို့အပေါ် ကျရောက်လိမ့်မည်။

၈၉ အကြောင်းမူကား၊ သင်တို့၏ သက်သေခံချက်နောက်တွင်၊ မြေကြီးလှုပ်ခြင်း၏ သက်သေခံချက် ကျရောက်လာလိမ့်မည်၊ ထိုအမှုက အလယ်၌ ညည်းတွားသံများကို ဖြစ်စေလိမ့်မည်၊ လူတို့သည်လည်း မြေကြီးပေါ်သို့လဲကျပြီး ရပ်ရန် မတတ်နိုင်ဘဲ ရှိလိမ့်မည်။

၉၀ မိုးချုန်းခြင်းတို့အသံ၏၊ ထို့အတူ လျှပ်စီးလက်ခြင်းတို့အသံ၏၊ ထို့အတူ မိုးသက်မုန်တိုင်းတို့အသံ၏၊ ထို့အတူ မိမိတို့အဆီးအကာတို့ကို ကျော်တက်လျက်ရှိသည့် ပင်လယ်လှိုင်းတံပိုးတို့အသံ၏ သက်သေခံချက် ကျရောက်လာလိမ့်မည်။

၉၁ ခပ်သိမ်းသောအရာတို့သည် ပုံကန်ခြင်း၌ ရှိလိမ့်မည်။ လူသားတို့၏ စိတ်နှလုံးသည် ထိုအရာတို့၌ ဧကန်အမှန်စိတ်ပျက်ကြလိမ့်မည်။ အကြောင်းမူကား၊ ကြောက်ခြင်းသည် ခပ်သိမ်းသောလူမျိုးတို့အပေါ် ကျရောက်လာလိမ့်မည်။

၉၂ ကောင်းကင်တမန်တို့သည်လည်း ကောင်းကင်အလယ်ကို ဖြတ်၍ပျံကြလိမ့်မည်၊ ကျယ်သောအသံနှင့် ဟစ်ကြွေးလျက်၊ ဘုရားသခင်၏ တံပိုးတော်ကို မှုတ်လျက် မြွက်ဆိုကြသည်ကား၊ သင်တို့ပြင်ဆင်ကြလော့၊ သင်တို့ပြင်ဆင်ကြလော့၊ အို မြေကြီးပေါ်မှာ နေထိုင်သူတို့။ အကြောင်းမူကား၊ ငါတို့ဘုရားသခင်၏တရားစီရင်တော်မူခြင်း ကျရောက်လာပြီ။ ရှုလော့၊ ကြည့်ဦးလော့၊ မင်္ဂလာဆောင်လုလင် လာပြီ။ သူ့ကို တွေ့ရန် သင်တို့ထွက်သွားကြလော့။

၉၃ ချက်ချင်းပင် ကောင်းကင်၌ ကြီးစွာသောနိမိတ်လက္ခဏာ ပေါ်ထွက်လာလိမ့်မည်၊ လူမျိုးအပေါင်းတို့သည်လည်း ထိုအရာကို အတူတကွမြင်ကြရလိမ့်မည်။

၉၄ တခြားသောကောင်းကင်တမန်ကလည်း မိမိတံပိုးကို မှုတ်၍ ဆိုလေသည်ကား၊ ထိုအသင်းတော်ကြီး၊ စက်ဆုပ်ရွံရှာဖွယ်အမှုတို့၏အမိ၊ မိမိမတရားသောမေထုန်ကြောင့် ရောက်စေသည့် အမျက်တော်တည်းဟူသောစပျစ်ရည်ကို လူမျိုးအပေါင်းတို့အားသောက်စေသည့်သူ၊ ဘုရားသခင်၏သန့်ရှင်းသူများကို ညှဉ်းဆဲသူ၊ သူတို့၏အသွေးကို သွန်းလောင်းသူ—များစွာသောရေတို့ပေါ်၌၊ ထို့အတူ ပင်လယ်တစ်ဖက် တစ်ကျွန်းတစ်နိုင်ငံတို့အပေါ်၌ ထိုင်သူ—ရှုလော့၊ သူမသည် မြေကြီး၌ ရှိသည့် ပေါင်းပင်ဖြစ်၏။ သူမကို အထုံးလိုက် စည်းနှောင်ထား၏။ သူမ၏ကြိုးတို့ကို ခိုင်မာစေပြီ။ အဘယ်သူမျှ ၎င်းတို့ကို မဖြေလွှတ်နိုင်။ ထို့ကြောင့်၊ သူမသည် လောင်မြိုက်ခံရဖို့ အဆင်သင့်ဖြစ်လေပြီ။ ထိုတမန်သည်လည်း မိမိတံပိုးကို ကြာကြာနှင့်ကျယ်ကျယ်မှုတ်လိမ့်မည်၊ လူမျိုးအပေါင်းတို့သည်လည်း ကြားရလိမ့်မည်။

၉၅ ကောင်းကင်၌ နာရီဝက်ကြာအောင် တိတ်ဆိတ်ခြင်း ရှိလိမ့်မည်။ ထို့နောက်ချက်ချင်းတွင်၊ စာလိပ်ကို လိပ်ပြီးနောက် ဖွင့်ပြသကဲ့သို့ ကောင်းကင်ကန့်လန့်ကာကို ဖွင့်ပြလိမ့်မည်၊ ကိုယ်တော်ရှင်၏ မျက်နှာကိုလည်း ဖော်ပြတော်မူလိမ့်မည်။

၉၆ မြေကြီးပေါ်ရှိ သန့်ရှင်းသူတို့၊ အသက်ရှင်ကြသည့် ထိုသူတို့ကို ရှင်သန်စေလိမ့်မည်၊ သူနှင့်တွေ့ရစေခြင်းငှာ ချီဆောင်တော်မူခြင်းကိုလည်း ခံကြရလိမ့်မည်။

၉၇ မိမိတို့သင်္ချိုင်းတွင်းများ၌ အိပ်ပျော်ကြလေသောသူတို့သည် ထွက်လာကြလိမ့်မည်၊ အကြောင်းမူကား၊ သူတို့၏သင်္ချိုင်းတွင်းများ ပွင့်လိမ့်မည်။ သူတို့သည်လည်း ကောင်းကင်တိုင်တို့အလယ်၌ သူနှင့်တွေ့ရစေခြင်းငှာ ချီဆောင်တော်မူခြင်းကို ခံကြရလိမ့်မည်—

၉၈ သူတို့သည်ကား၊ ခရစ်တော်၏လူများ၊ အဦးသီးများ၊ သူနှင့်အတူ ပထမဦးဆုံး ဆင်းသက်လာကြမည့်သူများ၊ မြေကြီးပေါ်၌လည်းကောင်း၊ မိမိတို့သင်္ချိုင်းတွင်းများထဲ၌လည်းကောင်း ရှိကြသူများ၊ သူနှင့်တွေ့ရစေခြင်းငှာ ပထမဦးဆုံး ချီဆောင်တော်မူခြင်းကို ခံရကြသူများပေတည်း။ ဤခပ်သိမ်းသော အရာတို့သည် ဘုရားသခင့်ကောင်းကင်တမန်၏ တံပိုးမှုတ်သောအသံအားဖြင့် ဖြစ်လိမ့်မည်။

၉၉ ဤအရာတို့နောက်တွင်၊ တခြားသောကောင်းကင်တမန်က တံပိုးမှုတ်လိမ့်မည်၊ ၎င်းသည် ဒုတိယတံပိုးဖြစ်၏။ ထို့နောက်တွင်၊ ခရစ်တော်ကြွလာတော်မူသောအခါ၌ သူ၏လူများဖြစ်သောသူတို့၏ ရွေးနုတ်ခြင်း ဖြစ်လာလိမ့်မည်။ ထိုသူတို့သည်ကား၊ ဧဝံဂေလိတရားတော်ကို ရရှိနိုင်ကြစေခြင်းငှာ၊ ထို့အတူ ဇာတိကိုယ်ခန္ဓာ၌ လူသားတို့အတိုင်း တရားစီရင်ခံကြရနိုင်စေခြင်းငှာ သူတို့အတွက်ပြင်ဆင်ထားသည့် ထိုထောင်ထဲ၌ မိမိတို့ဝေစုကို ရရှိကြလေသောသူများ ဖြစ်ကြ၏။

၁၀၀ ထိုမှတစ်ဖန်၊ တခြားသောတံပိုးကို မှုတ်လိမ့်မည်၊ ၎င်းသည် တတိယတံပိုးဖြစ်၏။ ထို့နောက်တွင်၊ တရားစီရင်ခံကြရမည့်၊ ထို့အတူ ပြစ်ဒဏ်ချမှတ်ခြင်းအောက်၌ တွေ့ရကြမည့်သူတို့၏ ဝိညာဉ်များ လာကြ၏။

၁၀၁ ဤသူတို့သည်ကား သေသူတို့မှ ကျန်ကြွင်းသောသူများ ဖြစ်ကြ၏။ သူတို့သည် အနှစ်တစ်ထောင်မကုန်မီ တစ်ဖန်အသက်မရှင်ရကြ၊ ကမ္ဘာမကုန်ဆုံးမီလည်း တစ်ဖန် အသက်မရှင်ရကြ။

၁၀၂ တခြားသောတံပိုးကိုလည်း မှုတ်လိမ့်မည်၊ ၎င်းသည် စတုတ္ထတံပိုးဖြစ်၏၊ ဆိုလေမည်ကား၊ အဆုံးပင်ဖြစ်သည့် ထိုကြီးစွာသောနောက်ဆုံးနေ့အထိ ဆက်၍ညစ်ညမ်းလျက်ရှိကြဦးမည့် ကျန်ကြွင်းကြသောသူများကြား၌ ရှိသောသူများကို တွေ့ကြရ၏။

၁၀၃ တခြားသောတံပိုးကို မှုတ်လိမ့်မည်၊ ၎င်းသည် ပဉ္စမတံပိုးဖြစ်၏၊ ထာဝရတည်မြဲသော ဧဝံဂေလိတရားတော်ကို အပ်နှံသည့် ပဉ္စမကောင်းကင်တမန်ဖြစ်၏—ခပ်သိမ်းသောပြည်သား၊ အမျိုးစု၊ အသီးသီးဘာသာစကားကို ပြောသူနှင့် လူမျိုးတို့ထံ ကောင်းကင် အလယ်ကို ဖြတ်၍ ပျံလျက်ရှိ၏။

၁၀၄ ဤအရာသည်ကား၊ ကောင်းကင်နှင့်မြေကြီးနှစ်ခုစလုံး၌ ရှိကြသည့် ခပ်သိမ်းသောလူတို့ထံ၊ ထို့အတူ မြေကြီးအောက်၌ ရှိကြသောသူတို့ထံ ဆိုလေသည့် သူ၏ တံပိုးသံဖြစ်လိမ့်မည်—အကြောင်းမူကား၊ ဘုရားသခင်ကို ကြောက်ကြလော့၊ ပလ္လင်ပေါ်၌ ကာလအစဉ်အဆက်အမြဲ ထိုင်သူကို ချီးမွမ်းကြလော့၊ သူ၏ တရားစီရင်တော်မူရာ နာရီ ကျရောက်လာပြီ ဟူသော တံပိုးသံကို ကြားရသောအခါ နားတိုင်း ကြားလိမ့်မည်၊ ထို့အတူ ဒူးတိုင်းထောက်လိမ့်မည်၊ ထို့အတူ နှုတ်တိုင်း ဝန်ခံလိမ့်မည်။

၁၀၅ ထိုမှတစ်ဖန်၊ တခြားသောကောင်းကင်တမန်သည် မိမိတံပိုးကို မှုတ်လိမ့်မည်၊ ၎င်းသည် ဆဋ္ဌမကောင်းကင်တမန်ဖြစ်၏၊ ဆိုလေသည်ကား၊ မိမိမတရားသောမေထုန်ကြောင့် ရောက်စေသည့်အမျက်တော်တည်းဟူသော စပျစ်ရည်ကို လူမျိုးအပေါင်းတို့အား သောက်စေသည့် သူမသည် ကျလေပြီတကား။ သူမသည် ကျလေပြီတကား၊ ကျလေပြီတကား။

၁၀၆ ထိုမှတစ်ဖန်၊ တခြားသောကောင်းကင်တမန်သည် မိမိတံပိုးကို မှုတ်လိမ့်မည်၊ ၎င်းသည် သတ္တမကောင်းကင်တမန်ဖြစ်၏၊ ဆိုလေသည်ကား၊ ပြီးဆုံးပြီ၊ ပြီးဆုံးပြီ။ ဘုရားသခင်၏ သိုးသငယ်သည် အောင်နိုင်၍၊ စပျစ်သီးနယ်ရာကျင်းကို၊ အနန္တတန်ခိုးရှင်ဘုရားသခင်၏ အမျက်တော်ပြင်းထန်ခြင်း စပျစ်သီးနယ်ရာကျင်းကိုပင် တစ်ယောက်တည်း နင်းနယ်လေပြီ။

၁၀၇ ထို့နောက်တွင်၊ ကောင်းကင်တမန်တို့သည် သူ့တန်ခိုးတော်ဘုန်းအသရေနှင့် ချီးမြှင့်ခံရလိမ့်မည်၊ သန့်ရှင်းသူတို့သည်လည်း ဘုန်းအသရေနှင့် ပြည့်လိမ့်မည်၊ သူတို့အမွေခံရာကို ရရှိလိမ့်မည်၊ သူနှင့် တူညီစေလိမ့်မည်။

၁၀၈ ထို့နောက်တွင် ပထမကောင်းကင်တမန်သည် မိမိတံပိုးကို အသက်ရှင်သူအပေါင်းတို့၏နား၌ မှုတ်၍၊ လူသားတို့၏ လျှို့ဝှက်သော အမှုများ၊ ထို့အတူ ပထမနှစ်တစ်ထောင်၌ ဘုရားသခင်၏ ကြီးစွာသော အမှုများကို ဖော်ပြလိမ့်မည်။

၁၀၉ ထို့နောက်တွင် ဒုတိယကောင်းကင်တမန်သည် မိမိတံပိုးကို မှုတ်၍၊ လူသားတို့၏ လျှို့ဝှက်သော အမှုများ၊ ထို့အတူ သူတို့စိတ်နှလုံး၏အတွေးများနှင့် အကြံအစည်များ၊ ထို့အတူ ဒုတိယနှစ်တစ်ထောင်၌ ဘုရားသခင်၏ ကြီးစွာသော အမှုများကို ဖော်ပြလိမ့်မည်—

၁၁၀ ထိုနည်းတူစွာပင်၊ သတ္တမကောင်းကင်တမန်အထိ မိမိတံပိုးကို မှုတ်လိမ့်မည်။ သူသည် ပင်လယ်ပေါ်မှာ၊ ကုန်းမြေပေါ်မှာ ရပ်လိမ့်မည်၊ အချိန်ရှိတော့လိမ့်မည် မဟုတ်ကြောင်း ပလ္လင်ပေါ်မှာထိုင်သည့်သူ၏ နာမတော်အားဖြင့် ကျိန်ဆိုလိမ့်မည်။ စာတန်၊ ထိုရှေးမြွေဟောင်း၊ နတ်ဆိုးဟု အခေါ်ခံရသူသည်လည်း ချည်နှောင်ခံရလိမ့်မည်၊ နှစ်တစ်ထောင် ကြာအောင်မလွတ်ရ။

၁၁၁ ထို့နောက်တွင်၊ သူ၏တပ်များကို အတူတကွစုစည်း နိုင်စေခြင်းငှာ သူ့ကို ကာလအနည်းငယ်မျှသာ လွှတ်ပေးလိမ့်မည်။

၁၁၂ မိက္ခေလ၊ သတ္တမကောင်းကင်တမန်၊ အထူးသဖြင့် ကောင်းကင်တမန်မင်းသည် မိမိတပ်များ၊ အထူးသဖြင့် ကောင်းကင်ဗိုလ်ခြေတို့ကို အတူတကွ စုစည်းလိမ့်မည်။

၁၁၃ နတ်ဆိုးသည်လည်း မိမိတပ်များ၊ အထူးသဖြင့် ငရဲဗိုလ်ခြေတို့ကိုစုစည်းလိမ့်မည်၊ ထို့နောက် မိက္ခေလနှင့် သူ၏တပ်များကို စစ်တိုက်လိမ့်မည်။

၁၁၄ ထို့နောက်တွင် ကြီးမြတ်တော်မူသောဘုရားသခင်၏ တိုက်ပွဲ ဖြစ်လိမ့်မည်။ နတ်ဆိုးနှင့် သူ၏ တပ်များသည် သူတို့နေရာသို့ ပစ်ချခံရသဖြင့်၊ သန့်ရှင်းသူတို့အပေါ် အဘယ်နည်းနှင့်မျှ အစိုးမရကြတော့။

၁၁၅ အကြောင်းမူကား၊ မိက္ခေလသည် သူတို့၏တိုက်ပွဲများကို တိုက်လိမ့်မည်၊ ပလ္လင်ပေါ်မှာထိုင်သောသူ၊ အထူးသဖြင့် သိုးသငယ်၏ပလ္လင်ကို ရှာသည့်သူကို အနိုင်ရလိမ့်မည်။

၁၁၆ ဤအရာသည် ဘုရားသခင်၏၊ ထို့အတူ သန့်ရှင်းစင်ကြယ်သူတို့၏ ဘုန်းအသရေဖြစ်၏။ သူတို့သည် သေခြင်းကို အဘယ်တော့မျှ နောက်ထပ်မတွေ့ရကြတော့။

၁၁၇ ထို့ကြောင့်၊ သင်တို့ကို ငါအမှန်ဆိုသည်ကား၊ ငါ၏အဆွေခင်ပွန်းတို့၊ ငါမိန့်တော်မူလေသည့် အတိုင်း သင်တို့၏ ဓမ္မအစည်းအဝေးကို ခေါ်ကြလော့။

၁၁၈ အားလုံး ယုံကြည်ခြင်း ရှိကြသည် မဟုတ်သောကြောင့်၊ ဉာဏ်ပညာစကားတို့ကို သင်တို့ လုံ့လဝီရိယထက်သန်စွာရှာပြီး၊ တစ်ယောက်ကို တစ်ယောက် သွန်သင်ပေးကြလော့။ ထိုမှတစ်ပါး၊ အကောင်းဆုံးစာအုပ်များမှ ဉာဏ်ပညာစကားတို့ကို သင်တို့ရှာကြလော့။ သင်ယူခြင်းကို အမှန်စင်စစ်၊ လေ့လာခြင်းအားဖြင့်၊ ထို့အတူ ယုံကြည်ခြင်းအားဖြင့်လည်း အားထုတ်ကြလော့။

၁၁၉ သင်တို့ကိုယ်သင်တို့ စီစဉ်ကြလော့။ လိုသောအရာမှန်သမျှကို ပြင်ဆင်ကြလော့။ အိမ်တစ်အိမ်၊ အထူးသဖြင့် ဆုတောင်းခြင်းအိမ်၊ အစာရှောင်ခြင်းအိမ်၊ ယုံကြည်ခြင်းအိမ်၊ သင်ယူခြင်းအိမ်၊ ဘုန်းအသရေအိမ်၊ အစီအစဉ်တကျရှိသောအိမ်၊ ဘုရားသခင်၏ အိမ်တော်ကို တည်ဆောက်ကြလော့။

၁၂၀ သင်တို့ဝင်လာခြင်းသည် ကိုယ်တော်ရှင်၏နာမတော်အားဖြင့် ဖြစ်နိုင်စေခြင်းငှာ၊ သင်တို့ထွက်သွားခြင်းသည် ကိုယ်တော်ရှင်၏နာမတော်အားဖြင့် ဖြစ်နိုင်စေခြင်းငှာ၊ အမြင့်ဆုံးသောဘုရားထံသို့ လက်ကိုမြှောက်လျက် သင်တို့၏ခပ်သိမ်းသော နှုတ်ဆက်ခြင်းတို့သည် ကိုယ်တော်ရှင်၏နာမတော်အားဖြင့် ဖြစ်နိုင်စေခြင်းငှာပေတည်း။

၁၂၁ ထို့ကြောင့်၊ သင်တို့၏ ပေါ့ပျက်သောစကားအပေါင်းတို့မှ၊ ရယ်မောခြင်းအပေါင်းတို့မှ၊ သင်တို့၏ တပ်မက်သော အလိုဆန္ဒအပေါင်းတို့မှ၊ သင်တို့၏မာနနှင့် စိတ်ပေါ့ပျက်ခြင်းအပေါင်းတို့မှ၊ ထို့အတူ သင်တို့၏ ဆိုးညစ်သောအကျင့်အပေါင်းတို့မှ ရပ်တန့်ကြလော့။

၁၂၂ သင်တို့၌ ဆရာတစ်ယောက်ကို ခန့်အပ်ကြလော့၊ ခပ်သိမ်းသောသူတို့ကို တစ်ကြိမ်တည်း စကားမပြောစေဘဲ၊ တစ်ကြိမ်တွင် တစ်ယောက်ပြောစေပြီး၊ ခပ်သိမ်းသောသူတို့အား ထိုသူ၏ စကားတို့ကို နားထောင်ကြစေလော့၊ ခပ်သိမ်းသောသူတို့ ပြောပြီးလေသောအခါ၊ ခပ်သိမ်းသောသူတို့သည် ခပ်သိမ်းသောသူတို့အားဖြင့် တည်ဆောက်ရစေကြောင်း၊ ထို့အတူ လူတိုင်း ညီမျှသော အထူးအခွင့်အရေးကို ရနိုင်ကြစေကြောင်းပေတည်း။

၁၂၃ တစ်ယောက်ကိုတစ်ယောက် ချစ်ကြလော့။ လောဘလွန်ကျူးခြင်းမှ ရပ်တန့်ကြလော့။ ဧဝံဂေလိတရားတော်က လိုအပ်သည့်အတိုင်း တစ်ယောက်ကို တစ်ယောက်မျှ၍ပေးရန် သင်ယူကြလော့။

၁၂၄ ပျင်းရိခြင်းမှ ရပ်တန့်လော့။ မစင်ကြယ်ခြင်းမှ ရပ်တန့်လော့။ အချင်းချင်း အမှားရှာခြင်းမှ ရပ်တန့်လော့။ လိုအပ်သည်ထက် ပို၍ကြာရှည်စွာအိပ်ခြင်းမှ ရပ်တန့်လော့။ ကိုယ့်အိပ်ရာသို့ စောစောဝင်လော့၊ သင်တို့မမောပန်းနိုင်ကြစေကြောင်းပေတည်း။ စောစောထလော့၊ သင်တို့၏ကိုယ်ခန္ဓာနှင့်စိတ် ဖျတ်လတ်သန်စွမ်းနိုင်စေကြောင်းပေတည်း။

၁၂၅ ခပ်သိမ်းသောအရာတို့ထက်၊ စုံလင်ခြင်းနှင့် ငြိမ်းချမ်းခြင်းအနှောင်အဖွဲ့ဖြစ်သည့် တဘက်နှင့်ကဲ့သို့ သင်တို့ကိုယ်သင်တို့ မေတ္တာအနှောင်အဖွဲ့နှင့် ဝတ်ဆင်လော့။

၁၂၆ သင်တို့သည် အားမလျော့နိုင်ကြစေခြင်းငှာ ငါကြွရောက်လာတော်မူသည်အထိ အစဉ်အမြဲဆုတောင်းကြလော့။ ရှုလော့၊ ကြည့်ဦးလော့၊ ငါသည် လျင်မြန်စွာ ကြွရောက်လာတော်မူမည်၊ သင်တို့ကို ငါ့ထံသို့ လက်ခံတော်မူမည်။ အာမင်။

၁၂၇ ထိုမှတစ်ဖန်၊ သူတို့အတွက်၊ အထူးသဖြင့် အသင်းတော်၏ အရာရှိအားလုံး၊ သို့မဟုတ် တစ်နည်းအားဖြင့်၊ ယဇ်ပုရောဟိတ်မင်းမှစ၍၊ သင်းထောက်များအထိပင်ဖြစ်သည့် အသင်းတော်၌ အမှုတော်ဆောင်ခြင်းသို့ ခေါ်သွင်းခံရသူများအတွက် လိုအပ်သောအရာမှန်သမျှကို သွန်သင်ခြင်းအတွက် တည်ဆောက်ထားသည့် ပရောဖက်တို့၏ကျောင်းဥက္ကဋ္ဌအဖွဲ့ အတွက် ပြင်ဆင်ထားသည့် အိမ်၏အစီအစဉ်မှာ—

၁၂၈ ဤအရာသည် ကျောင်းဥက္ကဋ္ဌအဖွဲ့အိမ်၏ အစီအစဉ်ဖြစ်လိမ့်မည်။ ဥက္ကဋ္ဌ၊ သို့မဟုတ် ဆရာအဖြစ် ခန့်အပ်ထားခံရသူသည် သူ့အတွက် ပြင်ဆင်ထားမည့်အိမ်ရှိ၊ သူ့နေရာ၌ နေရမည်။

၁၂၉ ထို့ကြောင့်၊ သူ၏စကားများကို အိမ်တော်ထဲမှာရှိသည့် ပရိတ်သတ်မှ ကျယ်လောင်စွာ မဟုတ်သော်လည်း၊ ဂရုစိုက်၍ ပြတ်သားစွာကြားနိုင်သည့်နေရာ တည်းဟူသော ဘုရားသခင်၏အိမ်တော်၌ သူသည် ပထမဦးဆုံးသောသူဖြစ်လိမ့်မည်။

၁၃၀ သူသည် ဘုရားသခင်၏ အိမ်တော်ထဲသို့ ဝင်ရောက်လာသောအခါ၊ အိမ်တော်ထဲ၌ ပထမဦးဆုံးသောသူဖြစ်၍—ရှုလော့၊ သူသည် ပုံသက်သေတစ်ခုဖြစ်နိုင်စေကြောင်း ဤအမှုသည် တင့်တယ်ပေ၏—

၁၃၁ ထာဝရတည်မြဲသောပဋိညာဉ််၏ လက္ခဏာသက်သေ သို့မဟုတ် သတိရခြင်းအဖြစ် ထိုသူအား ဘုရားသခင်ရှေ့၌ ဒူးထောက်၍ ဆုတောင်းခြင်းဖြင့် သူ့ကိုယ်ကို ပူဇော်စေလော့။

၁၃၂ သူ့နောက်မှ တစ်စုံတစ်ယောက် ဝင်ရောက်လာသောအခါ၊ ထိုဆရာကို ထစေပြီး၊ ကောင်းကင်သို့ လက်ကိုတည့်တည့်မြှောက်လျက်၊ ထိုမှတစ်ပါး၊ မိမိညီအစ်ကို သို့မဟုတ် ညီအစ်ကိုတို့ကို ဤစကားတို့နှင့် နှုတ်ဆက်စေလော့။

၁၃၃ သင်သည် ညီအစ်ကို တစ်ဦး သို့မဟုတ် ညီအစ်ကိုများ ဖြစ်လေသလော။ ငါသည် သင့်ကို ကိုယ်တော်ရှင် ယေရှုခရစ်တော်၏ နာမတော်အားဖြင့်လည်းကောင်း၊ ချစ်ခြင်းအနှောင်အဖွဲ့တို့၌ ဘုရားသခင်၏ကျေးဇူးတော်အားဖြင့် သင်၏အဆွေခင်ပွန်းနှင့် ညီအစ်ကိုဖြစ်ရစေခြင်းငှာ၊ အပြစ်တင်ခွင့်နှင့် ကင်းလျက် ဘုရားသခင်၏ ခပ်သိမ်းသောပညတ်တော်တို့ကို ကျေးဇူးတော်ချီးမွမ်းခြင်းဖြင့် ကာလအစဉ်အဆက် အမြဲ လိုက်လျှောက်ခြင်းငှာ၊ စွဲမြဲသော၊ မတိမ်းယိမ်းသော၊ ထို့အတူ မပြောင်းလဲတတ်သော သန္နိဋ္ဌာန်ဖြင့် မိဿဟာယဖွဲ့ရန် သင့်ကို လက်ခံရာ ပဋိညာဉ်ဖြစ်သည့် ထာဝရတည်မြဲသော ပဋိညာဉ်၏ လက္ခဏာသက်သေ သို့မဟုတ် သတိရခြင်းဖြင့် လည်းကောင်း နှုတ်ဆက်ပါ၏။ အာမင်။

၁၃၄ ဤနှုတ်ဆက်ခြင်းနှင့် မထိုက်တန်ကြောင်း တွေ့ရသူကို သင်တို့၌ နေရာမရစေနှင့်။ အကြောင်းမူကား၊ သင်တို့သည် ငါ၏အိမ်တော်ကို ထိုသူအားဖြင့် ညစ်ညူးစေဖို့ အခွင့်မပေးနှင့်။

၁၃၅ ဝင်ရောက်လာသောသူသည်၊ ငါ့ရှေ့၌ သစ္စာရှိ၍၊ ညီအစ်ကိုတစ်ဦး၊ သို့မဟုတ် သူတို့သည် ညီအစ်ကိုများဖြစ်ကြလျှင်၊ ဥက္ကဋ္ဌ သို့မဟုတ် ဆရာကို ကောင်းကင်သို့ လက်ကိုမြှောက်လျက်၊ ဤတူသောဆုတောင်းခြင်းနှင့် ပဋိညာဉ်၊ သို့မဟုတ် တူသောလက္ခဏာသက်သေဖြင့် အာမင်ဟုဆို၍ နှုတ်ဆက်ရမည်။

၁၃၆ ရှုလော့၊ သင်တို့ကို ငါအမှန်ဆိုသည်ကား၊ ဤအရာသည် ဘုရားသခင်၏အိမ်တော်၌၊ ပရောဖက်တို့၏ကျောင်း၌ တစ်ယောက်ကို တစ်ယောက် နှုတ်ဆက်ခြင်းအတွက် သင်တို့အဖို့ ပုံသက်သေတစ်ခု ဖြစ်၏။

၁၃၇ သင်တို့သည် ဤအမှုကို ဆုတောင်းခြင်းနှင့် ကျေးဇူးတော်ချီးမွမ်းခြင်းတို့ဖြင့် ပြုရန်ခေါ်သွင်း ခံကြရ၏၊ ကိုယ်တော်ရှင်၏ အိမ်တော်ထဲ၌၊ ပရောဖက်တို့၏ကျောင်းထဲ၌ သင်တို့ပြုသမျှသော အရာတို့တွင် ဝိညာဉ်တော်က ဟောပြောခြင်းအခွင့်ကိုပေးစဉ် သင်တို့၏ တည်ဆောက်ခြင်းအဖို့ ဝတ်ပြုရာနေရာတစ်ခု၊ သန့်ရှင်းသောဝိညာဉ်တော်၏ တဲတော်တစ်ခု ဖြစ်လာနိုင်စေခြင်းငှာပေတည်း။

၁၃၈ ဤမျိုးဆက်၏အသွေးနှင့် ကင်းလွတ်သူမှတစ်ပါး၊ သင်တို့၌ အဘယ်သူ့ကိုမျှ ဤကျောင်းထဲသို့ လက်မခံရ။

၁၃၉ ထိုသူကို ခြေဆေးခြင်းဘိသိက်မင်္ဂလာအားဖြင့် လက်ခံရမည်၊ အကြောင်းမူကား၊ ဤရည်ရွယ်ချက်ကြောင့် ခြေဆေးခြင်းဘိသိက်မင်္ဂလာကို တည်ထောင်ထားလေ၏။

၁၄၀ ထိုမှတစ်ဖန်၊ ခြေဆေးခြင်းဘိသိက်မင်္ဂလာကို ဥက္ကဋ္ဌ၊ သို့မဟုတ် အသင်းတော်၏ ဦးစီးအသင်းလူကြီး အားဖြင့် စီမံဆောင်ရွက်ရမည်။

၁၄၁ ဆုတောင်းခြင်းနှင့် အစပြုရမည်။ မုန့်နှင့် စပျစ်ရည်ကို သုံးဆောင်ပြီးနောက်၊ ထိုသူသည် ငါနှင့် စပ်လျဉ်း၍ ယောဟန်၏ သက်သေခံချက် အခန်းကြီးတစ်ဆယ့်သုံးတွင် ဖော်ပြထားသည့် ပုံစံအတိုင်း မိမိကိုယ်ကို စည်းရမည်။ အာမင်။