ဩဝါဒနှင့် ပဋိညာဉ်များ ၉၄

အပိုဒ်ငယ် ၉၄

၁၈၃၃ ခု၊ ဩဂုတ်လ ၂ ရက်၊ ကာ့တ်လန်း အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဟီရမ်စမစ်၊ ရေးနိုးကာဟွန်းနှင့် ယာရက်ကာတာတို့သည် အသင်းတော် ဆောက်လုပ်ရေး အမှုဆောင်အဖွဲ့ အဖြစ်ခန့်အပ်ခံရ၏။

၁–၉၊ ဥက္ကဋ္ဌအဖွဲ့၏အမှုအတွက် အိမ်တစ်အိမ်ကို ဆောက်ခြင်းနှင့်စပ်လျဉ်း၍ ကိုယ်တော်ရှင်က ပညတ်တော်ကို ပေး၏။ ၁၀–၁၂၊ ပုံနှိပ်တိုက်ကို တည်ဆောက်ရမည်။ ၁၃–၁၇၊ အမွေခံရာအချို့ကို ခန့်အပ်၏။

၁ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ၏ အဆွေခင်ပွန်းတို့၊ ဤကာ့တ်လန်းမြေတွင်၊ ငါ၏ အိမ်တော်၌စ၍၊ ဇိအုန်ပန္နက်မြို့ အစပြုခြင်းနှင့် အုတ်မြစ်ချခြင်း အတွက် နေရာမှတ်ခြင်းနှင့် ပြင်ဆင်ခြင်းအမှုကို သင်တို့စတင်ကြရမည့်အကြောင်း ပညတ်တော်ကို သင်တို့အား ငါပေး၏။

၂ ရှုဦးလော့၊ သင်တို့ကို ငါပေးထားလေသည့် ပုံစံအတိုင်း ထိုအမှုကို ဆောင်ရွက်ရမည်။

၃ တောင်ဘက်ရှိ ပထမအကွက်ကို ဗျာဒိတ်တော်များ ရရှိရာ၌ ဥက္ကဋ္ဌအဖွဲ့၏ အလုပ်အတွက်၊ ထို့အတူ အသင်းတော်၊ နိုင်ငံတော်တို့နှင့် စပ်ဆိုင်သည့် ခပ်သိမ်းသောအရာတို့နှင့် စပ်လျဉ်း၍ ဥက္ကဋ္ဌအဖွဲ့၏ အမှုတော်ဆောင်ခြင်း အမှုအတွက် ဥက္ကဋ္ဌအဖွဲ့အဖို့ အိမ်တစ်အိမ် ဆောက်ခြင်းအတွက် ငါ့ထံသို့ ဆက်ကပ်စေလော့။

၄ သင်တို့ကို ငါအမှန်ဆိုသည်ကား၊ အတွင်းခန်း၌ အနံ ငါးဆယ့်ငါးပေ၊ အလျား ခြောက်ဆယ့်ငါးပေဖြင့် ဆောက်ရမည်။

၅ နောင်ကာလ၌ သင်တို့ကို ငါပေးတော်မူမည့် ပုံစံအတိုင်း အောက်ခန်းနှင့် အထက်ခန်းရှိရမည်။

၆ ယဇ်ပုရောဟိတ်အသင်းအတိုင်း၊ နောင်ကာလ၌ သင်တို့ကို ငါပေးတော်မူမည့် ပုံစံအတိုင်း အုတ်မြစ်မှစ၍ ကိုယ်တော်ရှင်ထံသို့ ဆက်ကပ်ရမည်။

၇ ဥက္ကဋ္ဌအဖွဲ့၏ အလုပ်အတွက် ကိုယ်တော်ရှင်ထံသို့ လုံးလုံးဆက်ကပ်ရမည်။

၈ သင်တို့သည် မစင်ကြယ်သောအရာ တစ်စုံတစ်ခုကိုမျှ ထိုအိမ်ထဲသို့ ဝင်လာစေရန် အခွင့်မပေးရ။ ငါ၏ဘုန်းတော်သည် ထိုနေရာ၌ ရှိလိမ့်မည်၊ ငါ၏မျက်မှောက်တော်သည်လည်း ထိုနေရာ၌ ရှိလိမ့်မည်။

၉ သို့ရာတွင် ထိုအိမ်ထဲသို့ မစင်ကြယ်သောအရာ တစ်စုံတစ်ခု ဝင်လာလျှင် ငါ၏ ဘုန်းတော်သည် ထိုနေရာ၌ မရှိလတ္တံ့။ ငါ၏ မျက်မှောက်တော်သည်လည်း ဝင်မလာလတ္တံ့။

၁၀ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ တောင်ဘက်ရှိ ဒုတိယအကွက်ကို ငါ၏ ကျမ်းစာတို့ကို ဘာသာပြန်ထားသောအရာများကို၊ ထို့အတူ သင်တို့ကို ငါမိန့်တော်မူမည့် အရာမှန်သမျှကို ပုံနှိပ်ခြင်း အမှုအတွက်၊ ငါ့အဖို့ အိမ်တစ်လုံး ဆောက်ခြင်းအတွက် ငါ့ထံသို့ ဆက်ကပ်ရမည်။

၁၁ ၎င်းသည် အတွင်းခန်း၌ အနံငါးဆယ့်ငါးပေ၊ အလျားခြောက်ဆယ့်ငါးပေဖြစ်ရမည်။ ထို့အတူ အောက်ခန်းနှင့် အထက်ခန်းရှိရမည်။

၁၂ သင်တို့ကို ငါမိန့်တော်မူမည့် အရာမှန်သမျှတို့ကို ပုံနှိပ်ခြင်း အမှုအတွက်၊ သန့်ရှင်းစေရန်၊ မညစ်ညူးစေရန် သင်တို့ကို ငါပေးတော်မူမည့် ခပ်သိမ်းသောအရာတို့၌ ရှိသည့်ပုံစံအတိုင်း ဤအိမ်တော်ကိုလည်း အုတ်မြစ်မှစ၍ ကိုယ်တော်ရှင်ထံသို့ လုံးလုံးဆက်ကပ်ရမည်။

၁၃ တတိယအကွက်၌ ငါ့ကျွန်ဟီရမ်စမစ်သည် သူ၏အမွေခံရာကို ရရှိလိမ့်မည်။

၁၄ မြောက်ဘက်ရှိပထမနှင့် ဒုတိယအကွက်တွင် ငါ့ကျွန်ရေးနိုးကာဟွန်းနှင့် ယာရက်ကာတာတို့သည် သူတို့အမွေခံရာကို ရရှိကြလိမ့်မည်။

၁၅ သင်တို့ကို ငါ၊ ကိုယ်တော်ရှင်၊ ဘုရားသခင်ပေးတော်မူလေသည့် ပညတ်တော်အတိုင်း အမှုဆောင်အဖွဲ့အဖြစ် သူတို့ကို ငါခန့်အပ်ထားလေသည့် အမှုကို သူတို့ ဆောင်ရွက်နိုင်ကြ စေခြင်းငှာ ပေတည်း။

၁၆ ဤအိမ်နှစ်လုံးကို ၎င်းတို့နှင့် စပ်လျဉ်းသည့် ပညတ်တော်ကို သင်တို့အား ငါမပေးမီ မဆောက်ရ။

၁၇ ယခုမူကား၊ ငါသည် သင်တို့ကို ဤအချိန်တွင် မဖော်ပြတော့။ အာမင်။