Tuanga 96
Te eeuanga tei orongaia mai kia Iosepha Timeti te Peroveta, i te akaarianga mai i te turanga o te oire me kore ra te titi o Ziona i Kirtland, Ohio, i te rā 4 o Tiunu, 1833. Orongaia ei akaraanga ki te aronga tapu i Kirtland (History of the Church, 1:352–353). Ko te angaanga tei tupu koia e uipaanga maata na te au taunga teitei, e ko te tumu manako maata no te akarakaraanga e te orongaanga atu i tetai au tuanga enua, tei karangaia e ko te pama Varani, tei nooia e ko te Akonoanga tei vaitata ki Kirtland. No tei kore i rava mai te tika mei roto mai i te uipaanga maata e naai e akaaere i teia pama, kua akatika te katoatoa kia ui atu ki te Atu no runga i taua mea.
1, Kia akaketaketaia te Titi o Ziona i Kirtland; 2–5, Kia tua te episekopo i te au ipukarea no te aronga tapu; 6–9, Kia riro a John Johnson ei mema no te Akanooanga Taokotai.
1 I na, te tuatua atu nei au kia kotou, teia te pakari, e kite ei oki kotou e ka akapeea me angaanga no runga i teia mea nei, kua tau rava oki iaku kia akaketaketaia teia titi nei taku i akamou ei maroiroi no Ziona.
2 No reira, kia tika i taku tavini ko Newel K. Whitney kia akaaere i taua ngai ra tei karangaia i rotopu ia kotou, taku oki i tamanako kia akatuia taku are tapu.
3 E pera katoa, kia tuaia ei au tuanga enua, kia tau ki te pakari, ei puapinga no te aronga e kimi ra i to ratou ipukarea, mei te ka ikiia i roto i te pupu konitara i rotopu ia kotou.
4 No reira e akarongo mai ma te akara mai ki teia manamanata nei, e ki te tuanga katoa oki e tau kia puapinga taku akanooanga, no te akakoroanga o te apaianga mai i taku tuatua ki te tamariki a te tangata nei.
5 E i na, tika tikai taku e karanga atu kia kotou, ko te mea tau rava atu teia i roto iaku, kia aere oki taku tuatua ki te tamariki a te tangata nei, e ko te akakoroanga oki, kia autu te ngakau o te tamariki a te tangata nei ei meitaki no kotou. Koia ïa. Amene.
6 E pera katoa, tika tikai taku e karanga atu kia kotou, e pakari e te tau kiaku, e ko taku tavini ko John Johnson taku i ariki i tana atinga, e tana pure katoa tei akarongoia e au, e kua oronga oki au i tetai taputou kiaia no te ora mutukore mei te mea e ka akono aia i taku au akaueanga mei teianei atu—
7 E uanga oki aia na Iotepa e tei aia te au akameitakianga tei taputouia mai ki tona ai metua—
8 Tika tikai taku e karanga atu kia kotou, kua tau rava oki i roto iaku kia riro mai aia ei mema no te akanooanga, kia rauka oki iaia kia tauturu mai i te apaianga i taku tuatua ki te tamariki a te tangata nei.
9 No reira ka akataonga koe iaia ki teia akameitakianga nei, e ka kimi pu tikai oki aia kia apai ke i te au apainga i runga i teia are nei tei karangaia ki rotopu ia kotou, kia noo oki aia ki roto. Koia ïa. Amene.