1 Tika tikai taku e karanga atu kia kotou e aku au taeake, auraka e mataku, kia pumaana to kotou au ngakau; ae, e kia rere ua i te rekareka, e kia akameitaki i te au mea katoatoa;

2 I te tiaki marieanga i te Atu, kua tae rava oki ta kotou pure ki roto i te taringa o te Atu Sabaota, e kua tataia ma teia topirianga e te taputou—e kua papau e kua akaue mai te Atu e ka akatikaia mai te reira.

3 No reira, kua oronga mai aia i teia taputou kia kotou, ma tetai koreromotu tika tikai te ka tupu; e ko te au mea pouroa tei tukia kia kotou, ka angaanga kapiti te reira ei meitaki no kotou, e ei kakā ki toku ra ingoa, te tuatua maira te Atu.

4 E teianei, tika tikai taku e karanga atu kia kotou no runga i te au ture o te enua, ko toku anoano teia kia akono toku iti tangata i te au mea ravarai taku ka akaue atu kia ratou.

5 E ko taua papa ture o te enua ra, i te turuanga i taua tikaanga o te au na roto i te akatinamouanga i te tu rangatira e te tikaanga, no te au tangata katoatoa te reira, e kua tika rava oki te reira ki mua iaku.

6 No reira, kua akatika au, ko te Atu, ia kotou, e to kotou ai taeake o taku nei akonoanga, kia ariki i teia ture koia te papa ture o te enua;

7 E kia tau oki ki te ture a te tangata nei, ko tei maata atu e tei meangiti mai i teia, no ko mai ïa i te diabolo.

8 Kua akarangatira oki au ko te Atu te Atua ia kotou, no reira kua rangatira tikai kotou i reira; e na te ture katoa oki kotou i akarangatira.

9 Kareka ra, e me tutara oki te kino, ka mii te iti tangata.

10 No reira, e kimi meitaki mai i te au tangata tiratiratū e te mārama, e ko te au tangata meitaki e te au tangata mārama kia akara kotou kia akatinamouia; no te mea ko te au mea kare e mei teia rai mei roto mai ïa i te kino.

11 E te oronga atu nei au i tetai akaueanga, kia kopae atu kotou i te au tu kino e kia mou piri mai ki te meitaki, e kia ora oki kotou kia tau ki te au tuatua ravarai tei mama mai mei roto i te vaa o te Atua ra.

12 E ka oronga mai aia ki te aronga akarongo i te tuatua na rungaʼo i te tuatua, te irava na rungaʼo i te irava; e ka timata oki au ia kotou ma te akapapu katoa.

13 E ko tei tuku i tona oraanga no toku nei akakoroanga, e no toku ingoa, ka rauka akaou mai tona, koia te ora mutukore.

14 No reira, auraka e mataku i to kotou au enemi, kua akamou oki au ki roto i toku ngakau, te tuatua maira te Atu, ka timata oki au ia kotou i roto i te au mea ravarai, me ka akono kotou i taku au koreromotu, e tae uatu ki te mateanga, kia kitea ra oki kotou e me te tau ra.

15 E me kare oki kotou e akono i taku ra au koreromotu, kare ïa kotou i tau iaku nei.

16 No reira, e takore i te tamaki, e akakite i te au, e ma te kimi pu tikai i te akaariuanga i te ngakau o te au tamariki ki to ratou au metua, e te ngakau o te au metua ki ta ratou au tamariki;

17 E pera katoa, te ngakau o te ngati Iuda ki te au peroveta, e to te au peroveta ki to te ngati Iuda; ko te aere aea mai au e tā i te au enua katoa nei ki te taumaa, e ka takoreia oki te au kopapa katoatoa i mua iaku.

18 Eiaa e taitaia to kotou ngakau; e manganui tikai oki te nooanga i roto i te are o taku Metua ra, e kua oti iaku i te akateateamamao i tetai ngai no kotou; e ko te ngai e nooia ra e taku Metua e au katoa, ei reira katoa oki kotou noo ei.

19 I na, kare oki au, ko te Atu, i mareka rava ki tetai pae o roto i te akonoanga i Kirtland;

20 Kare oki ratou i akaruke i ta ratou au ara, e ta ratou au peu kikino, e te parau o to ratou ngakau, e to ratou tu morimori, e to ratou au tu taukore, e kare oki i akono i te au reo o te pakari e te ora mutukore katoa taku i oronga atu kia ratou.

21 Tika tikai taku e karanga atu kia kotou, ka ako oki au, ko te Atu, ia ratou e ka rave i taku uaorai ka manako, me kare ratou e tataraara ma te akono i te au mea katoatoa taku i tuatua atu kia ratou.

22 E pera katoa te karanga akaou atu nei au kia kotou, mei te mea e ka rave kotou mei taku e akaue atu nei ia kotou, ka akaruke au, ko te Atu i te riri ia kotou, e kare oki te au ngutupa o ade e autu ki rungaʼo ia kotou.

23 I teianei, ka tuatua atu au kia kotou no to kotou au kopu tangata—me ka tā mai te tangata nei ia kotou, me kore ra i to kotou kopu tangata, e tai taime, e kua akakoromaki kotou e kare i kai tamaki atu kia ratou, e kare oki i tupau atu, ka tutakiia mai tikai kotou;

24 I na ra, me kare e rauka ia kotou i te akakoromaki tikai, ka riro i reira e ko ta kotou i rave, ko ta kotou tutaki tau rai ïa;

25 E pera katoa, me ka papaki mai to kotou enemi ia koe i te rua o te taime, e kare kotou i tutaki atu i to kotou enemi, e kua akakoromaki ua, taki tai anere ïa toou tutaki.

26 E pera katoa, me ka papaki akaou mai i te toru o te taime, e kua akakoromaki tikai kotou, ka taruaia to kotou tutaki e ā akaou taime.

27 E ka tu teia nga kite nei e toru ei patoi i to kotou enemi me kare aia e tataraara, e kare katoa oki teia kite e akakoreia.

28 E teianei, tika tikai taku e karanga atu kia kotou, me ka ora mai tena enemi mei taku akautungaanga, e kare aia e apainaia mai ki mua iaku no te akavaanga, i reira na kotou e akamatakite atu iaia na roto i toku nei ingoa, kia kore aia e aere akaou atu kia kotou, e ki to kotou au kopu tangata katoa, pera katoa te tamariki a ta kotou au tamariki e tae uatu ki te toru e te ā o te uki.

29 E reira, me ka aere mai aia kia kotou e ta kotou au tamariki, me kore ra ki te tamariki a ta kotou au tamariki e tae uatu ki te toru e te ā o te uki, kua tuku atu au i to kotou enemi ki roto i to kotou au rima;

30 E me ka akaora kotou iaia, ka tutakiia kotou no to kotou tuatua-tika; pera katoa ta kotou au tamariki e te tamariki a ta kotou au tamariki e tae uatu ki te toru e te ā o te uki.

31 Kareka ra, tei roto to kotou enemi i to kotou au rima; e me ka tutaki kotou iaia kia tau ki tana angaanga, ka tikaia kotou; me kua kimi aia i te takingakino i to kotou oraanga e rokoia atura kotou e te kino iaia, tei roto to kotou enemi i to kotou rima, e kua tikaia kotou.

32 I na, ko teia oki te ture taku i oronga atu ki taku tavini ko Niphai, e to kotou au metua, ko Iotepa, e Iakoba, e Isaaka, e Aberahama, e taku au peroveta taito katoatoa ma te au aposetolo.

33 E pera katoa, ko teia oki te ture taku i oronga atu ki toku au tangata i taito, auraka rava ratou kia tamaki atu ki tetai uatu iti tangata, tetai uatu kopu, tetai uatu reo, e te tangata uatu rai, mari ra naku oki, na te Atu, e akaue atu ia ratou.

34 E me ka inangaro tetai iti tangata, tetai iti reo ke, me kore ra tetai au tangata i te akatupu tamaki mai kia ratou, kia na mua ratou i te taki i te reva o te au ki taua au tangata, iti tangata, me kore ra iti reo ke;

35 E me kare taua aronga ra e akono mai i te orongaanga o te au, kare katoa i te rua e te toru o te taime, ka apai ratou i teia au kite nei ki mua i te Atu;

36 I reira, ka oronga atu ei au, ko te Atu, i tetai akaueanga kia ratou, ma te akatika ia ratou no te aereanga atu ki te tamaki i taua iti tangata, taua reo ra, me kore ra i taua au tangata ra.

37 E naku oki, na te Atu, e tamaki i ta ratou tamaki; e te tamaki a ta ratou au tamariki, e ta te tamariki a ta ratou au tamariki e pou uatu ia ratou i te tutaki i to ratou au enemi, e tae uatu ki te toru e te ā o te uki.

38 I na, e akaraanga teia ki te au tangata katoatoa, te tuatua maira te Atu, to kotou Atua, no te akatikaanga ki mua iaku.

39 E pera katoa, tika tikai taku e karanga atu kia kotou, mei te mea e i muri ake i aere mai ei to kotou enemi kia koe no te taime mua, kua tataraara aia ma te pure kia koe no taau akakoreanga, kia akakore rai koe iaia, auraka oki e tamou mai i te reira ei kite i te patoi atu i to kotou au enemi—

40 E ka pera uatu e tae rava atu ki te rua e te toru o te taime; e te maata o to te enemi tataraaraanga i te ara i araʼi aia kia koe, ka akakore atu koe iaia, e itu ngauru taime i te ngauruanga.

41 Me rave aia i te tarevakē kia koe e kare e tataraara i te taime mua, kareka ra ka akakore atu rai koe iaia.

42 E me tarevakē mai aia kia koe i te rua o te taime, e kare e tataraara, kareka ra ka akakore atu rai koe iaia.

43 E me tarevakē mai aia kia koe i te toru o te taime, e kare e tataraara, e akakore atu rai koe iaia.

44 I na ra, me tarevakē mai aia i te ā o te taime auraka rava koe e akakore atu iaia, i na ra, ka apai mai i teia au kite ki mua i te Atu; e kare rava te reira kite e takoreia atu, kia tataraara rava aia ma te tutaki mai ia koe e tataki ā taime i roto i te au mea ravarai i araʼi aia ia koe na.

45 E me rave aia i teia, e akakore atu koe iaia ma to ngakau katoa; e me kare aia e rave i teia, naku, na te Atu, e tutaki atu i to enemi e tai anere taime;

46 Ki tana tamariki, e te tamariki a tana au tamariki katoatoa tei makitakita mai iaku, e tae uatu ki te toru e te ā o te uki.

47 I na ra, me ka tataraara te au tamariki, e me kore ra te tamariki a ta ratou tamariki, e ka ariu mai ki te Atu to ratou Atua, ma to ratou ngakau katoa e to ratou maroiroi katoa, te manako, e te ririnui, e ma te akaoki mai e ā taime no ta ratou au ara katoatoa i araʼi ratou, me kore ra i araʼi to ratou au metua, me kore ra te metua o to ratou au metua, i reira ka akatakakeiaʼi to kotou riri;

48 E kare te tamaki e tae akaou ki runga ia ratou, te tuatua maira te Atu to kotou Atua, e kare rava ta ratou au ara e apaina akaou ia mai ei kite ki mua i te Atu no ratou. Amene.