ဩဝါဒနှင့် ပဋိညာဉ်များ ၉၉

အပိုဒ်ငယ် ၉၉

၁၈၃၂ ခု၊ ဩဂုတ် ၂၉ ရက်၊ ဟိုင်ရမ်၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ဂျွန်မာဒေါ့ခ်သို့ ပေးတော်မူခဲ့သည့် ဗျာဒိတ်တော်။ တစ်နှစ်ကျော်အတွင်း၊ ဂျွန်မာဒေါ့ခ်သည်—၁၈၃၁ ခု ဧပြီ၌ သူ၏ဇနီး၊ ဂျူလီယာ ကလက်၊ ကွယ်လွန်ပြီးနောက် အမိမဲ့သော—သူ၏သားသမီးများ အိုဟိုင်းရိုရှိ အခြားမိသားစုများနှင့် နေထိုင်စဉ် ဧဝံဂေလိတရားတော်ကို ဟောပြောလျက်ရှိနေခဲ့၏။

၁–၈၊ ဂျွန်မာဒေါ့ခ်သည် ဧဝံဂေလိတရားတော်ကို ကြေညာရန် ခေါ်သွင်းခံရ၏၊ သူ့ကို လက်ခံသောသူတို့သည် ကိုယ်တော်ရှင်ကို လက်ခံပြီး ကရုဏာကို ရရှိကြလိမ့်မည်။

၁ ရှုလော့၊ ငါ့ကျွန်ဂျွန်မာဒေါ့ခ်ကို ကိုယ်တော်ရှင်မိန့်တော်မူသည်ကား—သင်သည် အရှေ့ပိုင်း တိုင်းပြည်များထဲသို့ တစ်ရွာမှတစ်ရွာသို့၊ ထို့အတူ တစ်အိမ်မှတစ်အိမ်သို့၊ ထို့အတူ တစ်မြို့မှတစ်မြို့သို့ သွား၍၊ ငါ၏ ထာဝရတည်မြဲသော ဧဝံဂေလိတရားတော်ကို ထိုအရပ်၌ နေထိုင်သူတို့ထံ၊ ညှဉ်းဆဲခြင်းနှင့် ဆိုးညစ်ခြင်းတို့အလယ်၌ ကြေညာရန် ခေါ်သွင်းခံရ၏။

၂ သင့်ကိုလက်ခံသောသူသည် ငါ့ကိုလက်ခံ၏။ သင်သည် ငါ၏နှုတ်ကပတ်တော်ကို ဟောကြားရန် ငါ၏သန့်ရှင်းသောဝိညာဉ်တော်၏ ဖော်ပြခြင်းအားဖြင့် တန်ခိုးကို ရလိမ့်မည်။

၃ ကလေးသူငယ်တစ်ဦးကဲ့သို့ သင့်ကို လက်ခံသောသူသည်၊ ငါ၏နိုင်ငံတော်ကို ရရှိ၏။ ထိုသူတို့သည် မင်္ဂလာရှိကြ၏၊ အကြောင်းမူကား၊ သူတို့သည် ကရုဏာကို ရရှိကြလိမ့်မည်။

၄ သင့်ကို ငြင်းဆိုသူမှန်သမျှသည် ငါ၏ခမည်းတော်နှင့် သူ၏အိမ်တော်သားတို့၏ ငြင်းဆိုခြင်းကို ခံရလိမ့်မည်။ သင်သည် သူတို့တစ်ဖက်၌ သက်သေခံချက်အဖြစ် လမ်းတစ်လျှောက် လျှို့ဝှက်သောနေရာတို့၌ သင်၏ခြေကို သန့်စင်စေလော့။

၅ ရှုဦးလော့၊ ကြည့်ဦးလော့၊ ငါသည် တရားစီရင်တော်မူခြင်းငှာ၊ ငါ့ကို ဆန့်ကျင်၍ သူတို့ကျူးလွန်လေသည့် သူတို့၏ ဘုရားမဲ့နေသော အကျင့်ခပ်သိမ်းတို့ကို နားသွင်းခြင်းငှာ ငါ့အကြောင်းကို ကျမ်းစာတွဲ၌ ရေးထားသကဲ့သို့ပင် လျင်မြန်စွာလာမည်။

၆ ယခုမူကား၊ သင့်ကို ငါအမှန်ဆိုသည်မှာ၊ သင်သည် သင်၏သားသမီးများ ထောက်ပံ့မခံရမီ၊ ထို့အတူ ဇိအုန်ရှိသင်းအုပ်ထံသို့ ကြင်နာစွာ အပို့မခံရမီ သွားခြင်းငှာမသင့်လျော်။

၇ နှစ်အနည်းငယ်ကြာပြီးနောက်တွင်၊ သင်သည် ငါ့ကို အလိုရှိလျှင်၊ သင်၏အမွေခံရာကို ပိုင်ဆိုင်ရန် ကောင်းသောမြေသို့လည်း သွားနိုင်ပေ၏။

၈ သို့မဟုတ်လျှင် သင်သည် ခေါ်ဆောင်ခြင်းခံရသည့်အချိန်အထိ ငါ၏ဧဝံဂေလိတရားတော်ကို ဆက်၍ကြေညာလျက်ရှိရမည်။ အာမင်။