ဩဝါဒနှင့် ပဋိညာဉ်များ ၉

အပိုဒ်ငယ် ၉

၁၈၂၉ ခု၊ ဧပြီလ၊ ဟာမိုနီ၊ ပန်ဆယ်လ်ဗေးနီးယား၌ ပရောဖက်ဂျိုးဇက်စမစ်အားဖြင့် အော်လီဗာကောင်ဒရီသို့ ပေးတော်မူခဲ့သည့် ဗျာဒိတ်တော်။ အော်လီဗာကောင်ဒရီသည် သည်းခံဖို့ ဆုံးမခံရပြီး၊ ဘာသာပြန်ဖို့ ကြိုးစားခြင်းအစား၊ လက်ရှိအချိန်တွင်၊ ဘာသာပြန်သူ၏နှုတ်တိုက်ချပေးခြင်းကို လိုက်ရေးခြင်းဖြင့် ကျေနပ်ဖို့တိုက်တွန်းခံရ၏။

၁–၆၊ အခြားသောရှေးမှတ်တမ်းများကို ဘာသာပြန်ဖို့ ကျန်သေး၏။ ၇–၁၄၊ လေ့လာခြင်းနှင့် ဝိညာဉ်ပကတိအတည်ပြုခြင်းတို့အားဖြင့် မော်မုန်ကျမ်းကို ဘာသာပြန်၏။

၁ ရှုလော့၊ သင့်ကို ငါဆိုသည်ကား၊ ငါ့သား၊ သင်သည် ငါ့ထံ တောင်းဆိုသည့်အတိုင်း ဘာသာမပြန်၊ ထို့အတူ၊ ငါ့ကျွန်ဂျိုးဇက်စမစ်အငယ်အတွက် ရေးဖို့ တစ်ဖန်စတင်သောကြောင့်၊ သူ့ကို ငါယုံကြည်လွှဲအပ်ထားလေသည့် ဤမှတ်တမ်းပြီးဆုံးသည်အထိ ထိုကဲ့သို့ပင်၊ သင်ဆက်၍ပြုစေဖို့ ငါအလိုရှိ၏။

၂ ထို့နောက်တွင်၊ ရှုလော့၊ အခြားသောမှတ်တမ်းများ ငါ့မှာရှိ၏။ ထိုမှတ်တမ်းများကို ဘာသာပြန်ဖို့ သင်ကူညီနိုင်စေခြင်းငှာ၊ ငါသည် သင့်အား တန်ခိုးကို ပေးတော်မူမည်။

၃ သည်းခံလော့၊ ငါ့သား၊ အကြောင်းမူကား၊ ထိုအရာသည် ငါ၏ဉာဏ်ပညာတော်ဖြစ်၏။ ယခုမျက်မှောက်အချိန်၌ သင်ဘာသာပြန်ရန် မရှိမဖြစ်မလိုအပ်။

၄ ရှုလော့၊ သင်ဆောင်ရွက်စေဖို့ ခေါ်သွင်းခံရသည့်အမှုသည်ကား၊ ငါ့ကျွန်ဂျိုးဇက်အတွက် ရေးဖို့ဖြစ်၏။

၅ ထို့အတူ၊ ရှုလော့၊ သင်သည် ဘာသာပြန်ရန် အစပြုသောအခါ၊ စတင်ခဲ့သည့်အတိုင်း၊ ဆက်၍မပြုသောကြောင့်၊ ဤအခွင့်အရေးကို သင့်ထံမှ ငါနုတ်ယူလေပြီ။

၆ ညည်းညူအပြစ်တင်ခြင်းမရှိနှင့်၊ ငါ့သား၊ အကြောင်းမူကား၊ ထိုအရာသည် ငါ၏ဉာဏ်ပညာတော်အတိုင်းဖြစ်ပြီး၊ ငါသည် ဤကဲ့သို့အားဖြင့် သင်နှင့် ဆက်ဆံလေပြီ။

၇ ရှုလော့၊ သင်သည် နားမလည်လေပြီတကား၊ ငါ့ထံတောင်းဖို့မှတစ်ပါး၊ သင်မစဉ်းစားသောအချိန်မှာ၊ ထိုအခွင့်အရေးကို သင့်အား ငါပေးလိမ့်မည်ဟု သင်ထင်မှတ်လေပြီ။

၈ သို့ရာတွင်၊ ရှုလော့၊ သင့်ကို ငါဆိုသည်ကား၊ သင်သည် ထိုအရာကို သင့်စိတ်ဖြင့် လေ့လာရမည်။ ထို့နောက်တွင်၊ သင်သည် ထိုအရာမှန်မမှန် ငါ့ထံမေးလျှောက်ရမည်။ ထိုအရာမှန်လျှင်၊ ငါသည် သင့်ရင်၌ ပြင်းစွာခံစားမှုကို ဖြစ်စေမည်။ ထို့ကြောင့်၊ သင်သည် ထိုအရာမှန်ကြောင်းကို ခံစားရလိမ့်မည်။

၉ သို့ရာတွင်၊ ထိုအရာမမှန်လျှင်၊ သင်သည် ယင်းကဲ့သို့သောခံစားမှု ရှိလိမ့်မည်မဟုတ်ဘဲ၊ တွေဝေသောအတွေးရှိလိမ့်မည်ဖြစ်၍၊ သင့်အား မှားသည့်အရာကို မေ့စေလိမ့်မည်။ ထို့ကြောင့်၊ ငါ့ထံမှ သင့်အား ပေးမထားလျှင်၊ သင်သည် သန့်ရှင်းမွန်မြတ်သောအရာကို မရေးနိုင်။

၁၀ ယခုတွင်၊ သင်သည် ဤအရာကို သိခဲ့လေလျှင်၊ ဘာသာပြန်နိုင်ခဲ့လိမ့်မည်။ သို့သော်လည်း၊ သင်ယခုဘာသာပြန်ဖို့ မရှိမဖြစ်မလိုအပ်။

၁၁ ရှုလော့၊ သင်စတင်စဉ်က မရှိမဖြစ်လိုအပ်၏။ သို့ရာတွင်၊ သင်သည် ကြောက်လန့်ပြီး၊ အချိန်ကုန်လွန်သွား၏။ ယခုတွင်၊ မရှိမဖြစ်မလိုအပ်။

၁၂ အကြောင်းမူကား၊ အစားထိုးဖြည့်စွက်ရာ လုံလောက်သောခွန်အားကို ငါ့ကျွန်ဂျိုးဇက်အား ငါပေးတော်မူလေကြောင်း သင်မသိမြင်သလော။ သင်တို့ထဲမှ အဘယ်သူ့ကိုမျှ ငါအပြစ်ဒဏ်မချမှတ်။

၁၃ သင့်ကို ငါမိန့်တော်မူသည့် ဤအရာကို ပြုလော့၊ သင်သည် ကြီးပွားလိမ့်မည်။ သစ္စာရှိလော့၊ သွေးဆောင်ဖြားယောင်းခြင်းကိုလည်း အရှုံးမပေးနှင့်။

၁၄ သင့်ကို ငါခေါ်သွင်းတော်မူလေရာ အမှုတော်၌ မဆုတ်မတွန့်ရပ်တည်လော့။ သင့်ဦးခေါင်းမှ ဆံချည်တစ်မျှင်မျှ မပျောက်ဆုံးရ။ သင်သည် နောက်ဆုံးသောနေ့၌ ချီးမြှောက်တော်မူခြင်းကို ခံရလိမ့်မည်။ အာမင်။