“Ang Kahoy sang Kabuhi,” Mga Sugilanon sa Libro ni Mormon (2023)
“Ang Kahoy sang Kabuhi,” Mga Sugilanon sa Libro ni Mormon
Ang Kahoy sang Kabuhi
Ang inspirado nga damgo ni Lehi
Isa ka gab-i, may damgo si Lehi halin sa Ginuo. Ginsugiran niya ang iya pamilya parte sa iya damgo.
Sa iya damgo, nakakita si Lehi sang tawo nga nakaputi sang bayo. Ginsilingan si Lehi sang tawo nga magsunod sa iya.
Nakita ni Lehi nga ara sia sa madulom kag bakante nga lugar. Naglakat sila sang pila ka oras. Pero wala gid madula ang kadulom. Sang ulihi, nagpangamuyo si Lehi para sa bulig.
Sang matapos si Lehi pangamuyo, nakakita sia sang malapad nga wayang. Sa wayang may kahoy nga may puti nga bunga. Napensar ni Lehi nga malipay sia sa bunga, gani ginkaon niya ini. Napuno ang iya kalag sang kalipay.
Mas manamit ang sabor sang bunga sangsa bisan ano nga prutas. Matam-is ini kag manamit. Gusto ni Lehi nga makatilaw man ang iya pamilya. Nakahibalo sia nga malipay man sila magkaon sini. Nakita ni Lehi si Saria, Sam, kag Nefi nga nagatindog malapit sa suba. Daw nagtalang sila. Gintawag sila ni Lehi sa mabaskog nga tingug. Ginpapalapit niya sila kag ginhagad nga magkaon sang bunga.
Si Saria, Sam, kag Nefi nagpalapit sa kahoy kag nagkaon sang bunga. Ginpangita ni Lehi si Laman kag Lemuel. Gusto man niya nga magkaon man sila sang bunga. Pero indi sila magpalapit para magkaon sang bunga.
Dayon nakakita si Lehi sang banas nga may salsalon nga barandilya padulong sa kahoy. Nakita niya ang madamo nga tawo nga nagalakat sa sining banas. Gulpi lang, may nag-abot nga grabe nga kadulom. Indi ka na makakita tungod sa kadulom. Ang paagi lang gid para makalab-ot sa kahoy amo ang mag-uyat sa barandilya nga salsalon.
Ang iban nga tawo naghalin sa banas kag nagkaladula. Ang iban nagpanguyapot sa barandilya nga salsalon kag nag-abante.
Sang makalab-ot sila sa kahoy, nagkaon sila sang bunga.
Nagtangla si Lehi kag nakita niya ang dako nga bilding nga madamo sing tawo. Ginkadlawan nila ang mga tawo nga nagkaon sang bunga. Ang iban nga nagkaon sang bunga naglain ang buot sang ginkadlawan sila sang iban, gani naghalin sila sa kahoy. Nagtalang-talang sila kag wala na makabalik.
Sa iya nga damgo, nakita ni Lehi ang mas madamo nga tawo nga nagapanguyapot sing hugot sa barandilya nga salsalon. Amat-amat sila nga nagaabante hasta nakalab-ot sila sa kahoy. Dayon nagluhod sila malapit sa kahoy kag nagkaon sang bunga. Wala nila ginpamatian ang mga tawo sa bilding. Ginpili nila nga magtiner sa kahoy.
Sang magbugtaw si Lehi, nabalaka sia sa ila ni Laman kag Lemuel. Wala sila magkaon sang bunga sa iya damgo. Palangga ni Lehi si Laman kag Lemuel. Nagahandum sia nga magpabilin sila nga malapit sa Ginuo. Gin-imbitar niya sila nga sundon ang mga kasuguan sang Dios.