Alma 17–18

Si Amon

Mapainubuson nga alagad

Si Amon kag ang iya mga utod nga nagapaalam

Gusto ni Amon kag sang iya mga utod nga tudloan ang mga Lamanhon parte sa Ginuo. Nagkadto sila sa lugar nga ginaistaran sang mga Lamanhon. Samtang nagapakadto sila, nagpuasa sila kag nagpangamuyo para mangayo sang bulig sang Ginuo. Ginpaumpawan sila sang Ginuo. Ginhambalan Niya sila nga mangin pasensyoso kag mangin maayo nga mga ehemplo. Kada isa sa ila naglakat sa lainlain nga lugar para magtudlo.

Mosias 28:1–2; Alma 17:6–13

Si Amon nga nagaluhod sa atubang sang hari kay rayna

Nagkadto si Amon sa lugar nga gintawag Ismael. Gingapos sia sang mga tawo didto kag gindala sia sa kay Haring Lamoni. Siling ni Amon kay Lamoni nga gusto niya magpangabuhi upod sa mga Lamanhon. Nanamian si Lamoni kay Amon kag ginbuy-an sia. Gusto niya nga pangasaw-on ni Amon ang isa niya ka bata, pero mas ginpili ni Amon nga mangin suluguon ni Lamoni.

Alma 17:20–25

Si Amon nga nagabalikid sa karnero

Ginsugo ni Lamoni si Amon nga atipanon ang iya mga kasapatan. Isa ka adlaw, gindala ni Amon kag sang iban nga suluguon ang mga sapat para mag-inom. Samtang nagainom ang kasapatan, may nagpalapit nga mga kawatan kag ginpangtabog ini. Nahadlok ang iban nga suluguon nga silutan sila kay nadula ang iban nga kasapatan ni Lamoni.

Alma 17:25–28; Alma 18:7

Amon

Nahibal-an ni Amon nga tsansa na ini para ipakita ang gahum sang Ginuo. Ginhambalan niya ang iban nga suluguon nga indi magkabalaka kag ginbuligan sila nga pangitaon ang nagkaladula nga kasapatan.

Alma 17:29–32

Si Amon nga nagauyat sang panit nga tirador kag ginatudlo ang mga kawatan

Nagbalik liwat ang mga kawatan para tabugon ang kasapatan. Pero sini nga tion, ginhambalan ni Amon ang iban nga mga suluguon nga magpabilin kag bantayan ang mga sapat para indi magpalagyo.

Alma 17:33

Si Amon nga nagatindog sa atubang sang mga kawatan

Naglakat si Amon para pauntaton ang mga kawatan sa pagpangtabog sang mga karnero. Wala nahadlok ang mga kawatan kay Amon. Abi nila mas makusog sila sangsa iya. Pero wala sila kahibalo nga ginabuligan si Amon sang Ginuo.

Alma 17:34–35

Gintirador ni Amon ang mga kawatan

Ginbato ni Amon ang mga kawatan gamit ang iya tirador. Ang iban sa ila napatay. Tungod sini, nangakig ang iban nga mga kawatan, kag gusto nila patyon si Amon. Nakibot sila kay indi nila maigo si Amon sang ila mga bato. Wala sila nagpaabot nga kakusog sa iya.

Alma 17:36

Ginkuha ni Amon ang iya espada sang ginhanaan sia nga lampusan sang mga kawatan sang mga balakol

Gintinguhaan sang mga kawatan nga lampusan si Amon sang ila mga balakol. Pero kada lampos nila, ginautod ni Amon ang ila mga braso gamit ang iya espada para indi sila makabato. Wala madugayi, grabe ang ila kahadlok agud magbato pa kag nagpinalagyo.

Alma 17:37–39

Duha ka suluguon nga nagapaathag kay Haring Lamoni kon ano ang natabo

Ginsugid sang mga suluguon kay Lamoni kon paano ginluwas ni Amon ang kasapatan. Nakadayaw gid si Lamoni. Abi niya si Amon ang Dako nga Espiritu, nga may dako nga gahum kag nakahibalo sang tanan nga butang.

Alma 18:1–5, 18

Si Haring Lamoni nga daw nabalaka

Gusto nga istoryahon ni Lamoni si Amon, pero nabalaka man sia.

Alma 18:8–11

Si Amon nga nagaluhod sa atubang ni Haring Lamoni

Nakigkita si Amon kay Lamoni, pero indi kahibalo si Lamoni kon ano ang iya ihambal. Ginbuligan sang Ginuo si Amon nga mahibal-an ang ginapaminsar ni Lamoni. Siling ni Amon nga indi sia ang Dako nga Espiritu. Ginhambal niya kay Lamoni nga ang Dako nga Espiritu amo ang Dios. Gusto pa gid ni Lamoni nga magtuon parte sa Dios.

Alma 18:12–28

Si Amon nga nagahambal kay Haring Lamoni

Siling ni Amon nga ginhimo sang Dios ang kalibutan kag ang tanan nga ari diri. Dayon ginhambal ni Amon kay Lamoni nga ang Dios may plano sang kaluwasan. Bilang parte sinang plano, maabot si Jesucristo. Nagpati si Lamoni sa ginhambal ni Amon. Nangamuyo si Lamoni kag nangabay sa Dios nga kaluy-an sia kag ang iya katawhan.

Alma 18:24–36, 39–42