“Parte sa Libro ni Mormon,” Mga Sugilanon sa Libro ni Mormon (2023)
Parte sa Libro ni Mormon
Si Jesucristo kag ang Iya katawhan sa kadutaan sang Amerika
Ang Libro ni Mormon isa ka balaan nga kasulatan. Nagatudlo ini sa aton parte kay Ginuong Jesucristo kag sa Iya pagbisita sa kadutaan sang Amerika sang una nga panahon. Sa Libro ni Mormon, matun-an naton ang parte sa ebanghelyo ni Jesus. Ginatudloan kita sini kon paano makabaton sang kalinong karon kag kon paano kita makapuyo upod sa Dios kag kay Jesus sa pila ka adlaw.
Tig-ulo nga pahina sang Libro ni Mormon; introduksyon sang Libro ni Mormon; 3 Nefi 11
Ang Libro ni Mormon ginsulat sang mga propeta sang Dios. Nagasulat sila sadto sa metal nga mga pahina nga ginatawag lamina. Ang ila mga istorya kag testimonya makabulig sa aton nga magtuo kay Jesus. Nagsulat sila parte sa madamo nga grupo sang mga tawo nga nag-istar sadto sa kadutaan sang Amerika.
Tig-ulo nga pahina sang Libro ni Mormon; introduksyon sang Libro ni Mormon
Isa ka grupo ang nagkadto sa kadutaan sang Amerika halin sa Jerusalem mga 600 katuig antes ginbata si Jesus. Nahimo sila nga duha ka nasyon nga gintawag mga Lamanhon kag Nefinhon.
Introduksyon sang Book of Mormon; 1 Nefi 1:4
Antes pa sina, isa pa ka grupo ang naghalin sa Tore sang Babel pakadto sa kadutaan sang Amerika. Gintawag sila nga mga Jarednon.
Introduksyon sa Libro ni Mormon; Eter 1:33–43
Ang mga propeta sang Dios nagatudlo sa mga tawo. Kon mamati ang mga tawo kag magsunod sa mga kasuguan sang Dios, ginabuligan Niya sila. Nagtudlo ang mga propeta parte kay Jesus kag nagsiling nga matawo Sia sa Jerusalem. Nahibal-an sang mga Nefinhon kag Lamanhon nga bisitahan sila ni Jesus pagkatapos Niya nga mapatay.
2 Nefi 1:20; 25:12–14; 26:1, 3, 9; Mosias 3:5–11; Alma 7:9–13; Helaman 3
Nag-abot si Jesus pareho sang ginsiling sang mga propeta. Pagkatapos nga napatay kag nabanhaw si Jesus, ginbisitahan Niya ang mga tawo. Ginpahikap Niya ang kada tawo sang agi sang mga lansang sa Iya mga kamot kag tiil. Nahibal-an nila nga si Jesus Anak sang Dios. Gintudlo Niya ang Iya ebanghelyo, kag ginsulat ini sang mga tawo. Tinuig nila nga ginhambalan ang parte sa pagbisita ni Jesus.
3 Nefi 11:7–15, 31–41; 16:4; 4 Nefi 1:1–6, 13–22
Si Mormon isa sadto ka propeta nga nabuhi pila ka gatos ka tuig pagkatapos sang pagbisita ni Jesus. Sang buhi si Mormon, wala na nagasunod ang mga tawo sa Ginuo. Ara kay Mormon ang mga sinulatan sang mga propeta nga nabuhi antes sa iya. Gintipon niya ang ila mga sinulatan sa isa ka grupo sang mga lamina. Ining mga lamina amo sang ulihi ang nangin Libro ni Mormon.
Introduksyon sa Libro ni Mormon; Mga Pulong ni Mormon 1:2–9; Mormon 1:2–4, 13–17
Antes napatay si Mormon, ginhatag niya ang mga lamina sa iya bata nga si Moroni. Sang buhi si Moroni, ang mga tawo nagahimo sang malain nga mga butang. Gusto nila ipapatay ang tanan nga nagapati kay Jesus. Gusto ni Moroni buligan ang mga tawo sa palaabuton, gani gindugangan pa niya sulat sa mga lamina, kag ginlubong ini para indi ini maano.
Introduksyon sa Libro ni Mormon; Mga Pulong ni Mormon 1:1–2; Mormon 8:1–4, 14–16; Moroni 1
Madamo nga tinuig ang nagligad, sang 1823, nagbisita si Moroni bilang anghel kay Propetang Joseph Smith. Ginsugid ni Moroni kay Joseph kon diin makita ang mga lamina. Sa bulig sang Dios, gin-translate ni Joseph Smith ang mga sinulat sa mga lamina.
Introduksyon sa Libro ni Mormon; Joseph Smith—Kasaysayan 1
Ginapadala sang Dios ang Balaan nga Espiritu para buligan ka nga mahibal-an kon ang isa ka butang matuod. Kon magbasa ka sang Libro ni Mormon, pwede ka magpangamuyo kag pamangkuton ang Dios kon matuod ini. Sa pareho nga paagi, pwede mo mahibal-an nga si Jesus amo ang imo Manluluwas kag kon palangga ka Niya.