“Si Gideon, Alma, kag Nehor,” Mga Sugilanon sa Libro ni Mormon (2023)
“Si Gideon, Alma, kag Nehor,” Mga Sugilanon sa Libro ni Mormon
Si Gideon, Alma, kag Nehor
Pagpangapin sang kamatuoran paagi sa mga pulong sang Dios
Ginpili sang mga Nefinhon si Alma nga Lamharon nga mangin ila puno nga hukom. Si Alma man ang pinakamataas nga pari sang Simbahan.
May tawo nga ginatawag Nehor nga nagsugod sa pagtudlo sa mga tawo sang ginatawag niya nga pulong sang Dios. Pero ginatudlo niya sa mga tawo nga indi nila kinahanglan magtuman sa Dios ukon maghinulsol.
Kadamo sang nanamian kag nagpati sa ginahambal ni Nehor. Gusto niya nga hatagan sia sang mga tawo sang kuwarta kag dayawon sia. Pamatyag niya mas maayo sia sangsa iban nga tawo. Naghimo sia sang iya kaugalingon nga simbahan, kag kadamo sang nagapamati sa iya.
Isa ka adlaw, nakilala ni Nehor ang isa ka tigulang nga ang ngalan Gideon. Si Gideon manunudlo sa Simbahan sang Dios kag kadamo na sang maayo nga hinimuan. Gusto ni Nehor nga maghalin ang mga tawo sa Simbahan, gani nakigbais sia kay Gideon. Gingamit ni Gideon ang mga pulong sang Dios para ipakita nga wala si Nehor nagatudlo sang matuod. Nangakig si Nehor! Ginlabo niya si Gideon sang espada.
Gindala sang mga tawo si Nehor kay Alma para husgaran. Ginrasonan ni Nehor ang iya ginhimo. Indi sia gusto nga silutan.
Nagsiling si Alma nga ang mga ginatudlo ni Nehor sala kag makasakit sa mga tawo. Ginsunod ni Alma ang layi. Tungod ginpatay ni Nehor si Gideon, ginpapatay man si Nehor.
Antes sia mapatay, ginsilingan ni Nehor ang mga tawo nga nagbutig sia. Wala niya gintudlo ang pulong sang Dios. Bisan pa nga gin-ako ni Nehor nga sala sia, kadamo sang nagsunod sa iya ehemplo. Nagbinutig man sila para dayawon kag hatagan kuwarta. Pero ang iban nga tawo namati kay Alma. Gin-atipan nila ang mga imol kag gintuman ang mga kasuguan sang Dios.