“Si Eter nga Propeta,” Mga Sugilanon sa Libro ni Mormon (2023)
Si Eter nga Propeta
Ang paandam sang Ginuo sa isa ka nasyon
Gindala sang Ginuo ang utod ni Jared kag ang iya pamilya sa duta nga ginpangako. Mapainubuson sila kag nagtuman sang mga kasuguan sang Dios. Nagdako ang ila grupo sa madamo nga tinuig, kag gusto nila sang hari nga magpanguna sa ila. Ginpaandaman sila sang utod ni Jared nga ang pag-angkon sang hari magadala sang problema, pero gintugtan niya sila nga magpili sang hari
Sa ginatos ka tuig, nagaistar ang mga Jarednon sa duta nga ginpangako. Kon kaisa ginapangunahan sila sang ila mga hari nga maghimo sang maayo, pero sa iban nga panahon wala. Ginapaandaman sang mga propeta sang Dios ang mga tawo nga maghinulsol. Kon mamati sila kag magtuman sang mga kasuguan sang Dios, ginabugayan Niya sila. Ang ngalan sang ulihi nga Jarednon nga propeta amo si Eter.
Eter 7:23–27; 9:26–30; 10:16–17, 28; 11:1–8, 12–13, 20–22; 12:2
Ang mga tawo wala nagatuman sa Dios. Pero ang Espiritu sang Ginuo ara kay Eter. Gintudloan Niya sila halin sa aga hasta maggab-i. Siling niya magpati sa Dios kag maghinulsol kay kon indi, pagalaglagon sila. Kon may pagtuo sila, makalaum sila nga magpuyo liwat upod sa Dios kag makaangkon sang kusog sa paghimo sang maayo nga mga butang. Wala nagpati ang mga tawo.
Gintan-aw ni Eter ang ginahimo sang mga tawo. Nagapanago sia sa kuweba kon adlaw kag ginasulat kon ano ang iya nakita. Wala naghinulsol ang mga tawo kag nagsugod nga mag-ilinaway.
Nakita ni Eter nga ang Jarednon nga hari nga si Coriantumr, kinahanglan makig-away sa madamo nga tawo nga gusto mangin hari. Gingamit ni Coriantumr ang iya mga soldado para protektahan ang iya kaugalingon.
Isa ka adlaw, ginhambalan sang Ginuo si Eter nga paandaman si Coriantumr kag ang iya katawhan nga maghinulsol. Kon maghinulsol sila, buligan sang Ginuo ang mga tawo kag tugotan si Coriantumr nga maprotektahan ang iya ginharian. Kon indi, mapinatyanay ang mga tawo. Mabuhi si Coriantumr hasta lang gid matuman ang mga pulong sang Ginuo. Dayon mapatay man sia.
Wala maghinulsol si Coriantumr kag ang iya katawhan. Gintinguhaan sang mga tawo nga patyon si Eter, pero nalagyo si Eter sa iya kuweba. Isa ka tawo nga ang ngalan Siz nakig-away kay Coriantumr. Nagpili ang mga tawo kon bala mag-upod sa mga soldado ni Siz ukon sa mga soldado ni Coriantumr. Madamo na ang inagyan nga giyera sang duha ka grupo sang mga soldado. Madamo nga mga tawo ang nagkalamatay.
Nadumduman ni Coriantumr ang ginhambal ni Eter. Nasuboan sia nga kadamo sa iya katawhan ang napatay. Nadumduman niya nga nagpaandam na sadto ang tanan nga propeta nga matabo ini. Nagsugod sia nga maghinulsol kag nagpadala sang sulat kay Siz. Siling niya nga buy-an niya ang iya ginharian kon masalbar ang iya katawhan. Pero gusto ni Siz nga makig-away.
Nangakig ang katawhan ni Coriantumr kag gusto nga makig-away. Nangakig man ang katawhan ni Siz kag gusto nga makig-away. Wala sang gusto maghinulsol. Nakita ni Eter nga ang tagsa ka tawo naglakat sa giyera. Madamo pa gid ang nagkalamatay.
Gusto na ni Coriantumr nga untaton ang giyera. Ginpangabay niya si Siz nga kuhaon ang ginharian kag indi pagsakiton ang iya katawhan. Pero akig ang tanan. Wala sa ila ang Espiritu sang Ginuo. Nakita ni Eter nga ang tanan padayon nga nakig-away hasta nga si Coriantumr na lang gid ang nabilin nga Jarednon nga buhi. Dayon nalipong si Coriantumr.
Nakita ni Eter nga ang tanan nga ginhambal sang Ginuo nagmatuod. Gintapos ni Eter sulat ang natabo. Dayon ginsiguro niya nga makit-an sang mga tawo ang iya mga sinulatan kon wala na sia. Nagsalig si Eter sa Dios kag nagpaabot nga makaupod Niya sa pila ka adlaw.