“Ang Pagtuo sang isa ka Rayna,” Mga Sugilanon sa Libro ni Mormon (2023)
“Ang Pagtuo sang isa ka Rayna,” Mga Sugilanon sa Libro ni Mormon
Ang Pagtuo sang isa ka Rayna
Pag-angkon sang kalipay kay Jesucristo
Isa ka rayna nga Lamanhon ang nagpamuno upod sa iya bana nga si Haring Lamoni. Ginpangabay sang hari ang Nefinhon nga si Amon nga tudloan sia parte sa Ginuo. Nagpati ang hari sa gintudlo ni Amon sa iya. Nagluhod ang hari para mangamuyo kag nangayo sa Ginuo nga patawaron sia. Samtang nagapangamuyo sia, natumba ang hari sa duta. Kon tulukon daw napatay sia.
Gindala sang mga suluguon ang hari sa rayna. Ginbutang nila sia sa iya hiligdaan. Naghigda sia didto nga wala giho-giho sang duha ka adlaw kag duha ka gab-i.
Sina nga oras, ang rayna kag ang iya kabataan nasubuan kaayo. Nagtiner sila upod sa hari kag ginhibian sia. Siling sang iban nga tawo nga dapat ilubong na ang hari. Pero gusto sang rayna nga istoryahon niya anay si Amon. Nakabati sia nga may gahum sia sang Dios. Ginpangabay sang mga suluguon sang rayna si Amon nga kadtuhan ang rayna.
Ginsugiran sang rayna si Amon nga bati niya propeta sia sang Dios. Ginpangabay niya si Amon nga tan-awon ang hari. Nahibal-an ni Amon nga buhi ang hari. Ang gahum sang Dios ang nagpatulog sa hari. Ginhambalan ni Amon ang rayna nga mabugtaw ang iya bana pagkabwas.
May salig ang rayna kay Amon kag dako ang iya pagtuo sa Dios. Nagpati sia nga mabugtaw ang iya bana pagkabwas. Siling ni Amon nga ginabugayan sia tungod sang dako niya nga pagtuo. Ginsilingan niya ang rayna nga mas dako pa ang iya pagtuo sangsa pagtuo sang iya mismo katawhan. Wala naghalin ang rayna kag ginbantayan ang iya bana bilog nga gab-i.
Pagkabwas, nagbugtaw ang hari. Ginsugid niya sa rayna nga nakita niya si Jesucristo. Nahibal-an sang rayna kag hari kon daw ano sila kapalangga ni Jesus, kag napuno sila sang kalipay.