Helaman 3–6

Ang Mag-utod nga si Nefi kag Lehi

Pagpamati sa tingug halin sa langit

ang mag-utod nga Nefi kag Lehi nga nagatudlo sa mga tawo, kag ang mga soldado nga Lamanhon sa palibot

Si Nefi kag Lehi mag-utod nga gusto nga makahibalo ang tanan sang ebanghelyo ni Jesucristo. Ang mga Nefinhon kag Lamanhon nagagiyera, pero ang mag-utod padayon nga nagatudlo sa duha ka grupo. Isa ka adlaw samtang nagapanglakaton sila para magtudlo sa katawhan, ginpriso sila sang mga soldado nga Lamanhon.

Helaman 3:20–21, 37; 4:4–5, 14; 5:4–21

Lamanhon nga mga soldado nga nagalakat pakadto sa ginprisuhan kay Nefi kag Lehi.

Madamo nga adlaw ang nagligad, nagkadto ang mga soldado sa prisuhan para ipapatay si Nefi kag Lehi.

Helaman 5:22

ang nagapalibot nga kalayo kag kasanag nagaprotekta kay Nefi kag Lehi, nagkalatumba ang mga soldado, kag may nakita nga madulom nga panganod

Antes may makasakit kay Nefi kag Lehi, may kalayo nga nagtuhaw nga nagalibot sa ila. Indi sila masunog sang kalayo. Sa baylo, ginprotektahan sila sang Dios. Dayon nagtay-og ang duta. Dawsa marusdak ang mga pader sang prisuhan. Wala magdugay, natabunan sang madulom nga panganod ang tanan sa prisuhan. Nahadlok kaayo ang mga tawo.

Helaman 5:23–28

mga tawo nga nagatindog sa tunga sang madulom nga panganod nagatulok sa haligi sang kasanag

May tingug nga nabatian halin sa ibabaw sang madulom nga panganod. Malinong ini, pareho sang hutik, pero nabatyagan ini sang mga tawo sa ila mga tagipusuon. Amo ato ang tingug sang Dios. Ginhambalan sila sang Dios nga maghinulsol.

Helaman 5:29–30, 46–47

ang mga lalaki kag babayi nagatangla sa tunga sang nagabululag nga madulom nga mga panganod

Nagtay-og pa gid ang duta kag ang prisuhan. Nabatian liwat ang tingug kag nagsugo sa mga tawo nga maghinulsol. Indi makagiho ang mga tawo tungod sa panganod kag sa ila kakulba.

Helaman 5:31–34

Gintudlo ni Aminadab si Nefi kag Lehi, nga nagasilak kag nagatangla

Isa ka tawo sa kadam-an ginatawag nga Aminadab. Miyembro sia sadto sang Simbahan ni Jesucristo. Nakita niya nga ang mga guya ni Nefi kag Lehi nagsugod nga magsanag kaayo. Daw mga anghel sila tulukon. Daw may ginaistorya sila sa langit. Ginhambalan ni Aminadab ang tanan nga tulukon si Nefi kag Lehi.

Helaman 5:35–39

madamo nga lalaki kag babayi ang nagatangla sa tunga sang madulom nga mga panganod kag nagpangamuyo

Ginpamangkot sang mga tawo si Aminadab kon ano ang ila himuon para madula ang madulom nga panganod. Gin-istorya ni Aminadab ang iya nahibal-an parte sa Dios kag kay Jesus. Ginhambalan niya ang mga tawo nga maghinulsol, magpati kay Jesus, kag magpangamuyo sa Dios. Namati ang mga tawo kay Aminadab. Nangamuyo sila hasta nga nadula ang kadulom.

Helaman 5:40–42

mga tawo nga nagapangamuyo samtang ginalibutan sang kasanag kag kalayo

Ginpalibutan sang kalayo sang Dios ang tanan nga katawhan kag wala sila nasunog. Napuno ang mga tawo sang Balaan nga Espiritu kag malipayon sila kaayo. Katahum sang ila mga ginpanghambal. Nabatian liwat ang tingug. Ginhambalan sila sini nga mag-angkon sang paghidaet tungod sa ila pagtuo kay Jesus. Nag-abot ang mga anghel kag nagbisita sa mga tawo.

Helaman 5:43–49

Naggwa si Nefi kag Lehi sa prisuhan, kag nagatan-aw ang mga tawo

Si Nefi, Lehi, kag ang tanan nga katawhan naggwa sa prisuhan. Ginsugid nila sa madamo nga katawhan sa tanan nga kadutaan kon ano ang ila nakita kag nabatian sina nga adlaw. Kalabanan sang mga Lamanhon nagpati kag nagpili nga sundon si Jesus. Nag-untat sila sa pagpakig-away sa giyera. Sa baylo, ginbuligan nila ang mga tawo nga mag-angkon sang pagtuo kay Jesus kag maghinulsol.

Helaman 5:50–52; 6:1–6