“Barko nga Magtabok sa Dagat,” Mga Sugilanon sa Libro ni Mormon (2023)
“Barko nga Magtabok sa Dagat,” Mga Sugilanon sa Libro ni Mormon
Barko nga Magtabok sa Dagat
Nagahanda nga magkadto sa duta nga ginpangako
Ang Bugana duta nga puno sang mga prutas kag dugos. Manami ini istaran. Nag-istar sila ni Lehi kag Saria sa higad sang baybay kag ara ang tanan nila nga kinahanglan.
Pagligad sang inadlaw, ginsugo sang Ginuo si Nefi nga maglakat sa bukid para magpangamuyo. Didto, ginhambalan sia sang Ginuo nga maghimo sang barko nga amo ang magdala sang iya pamilya patabok sa dagat.
Ginpakita sang Ginuo kay Nefi kon paano himuon ang barko. Pero wala makahibalo si Nefi kon diin mangita sang metal para himuon nga kagamitan. Ginpakita sang Ginuo kay Nefi kon diin magpangita sang metal.
Sang ulihi, naghimo si Nefi sang dabok para maghimo sang kagamitan. Nagtan-aw lang si Laman kag Lemuel sa ila utod nga si Nefi. Indi sila gusto magbulig sa iya sa paghimo sang barko. Ginapensar nila nga indi maayo nga magtabok sila sa dagat.
Wala nagapati si Laman kag Lemuel nga ginsugo si Nefi sang Ginuo nga maghimo sang barko. Ginpamangkot sila ni Nefi kon ngaa wala sila gihapon nagapati sa Ginuo. Ginpadumdom niya ang iya mga utod nga nakakita na sila sang anghel kag nahibal-an na nila ang gahum sang Ginuo. Grabe ang pangakig ni Laman kag Lemuel nga daw gusto nila patyon si Nefi.
Pero puno si Nefi sang gahum sang Dios. Ginpaandaman ni Nefi si Laman kag Lemuel nga indi sia pagtandugon. Ginhadlukan sila kag wala gid nila gintandog si Nefi sing madamo nga inadlaw. Dayon ginsugo sang Ginuo si Nefi nga tandugon ang iya mga utod. Sang ginlab-ot sila ni Nefi, gin-uyog sila sang gahum sang Ginuo.
Ginsimba ni Laman kag Lemuel ang Ginuo kag nagbulig sa paghimo sang barko. Madamo nga beses nga nangamuyo si Nefi sa Ginuo para sa bulig. Kanami sang barko nga ginhimo sang pamilya ni Nefi. Pagligad sang pila ka adlaw, natapos ang barko, kag nakita nila nga kanami gali sini. Nahibal-an sang pamilya ni Nefi nga ginbuligan sila sang Ginuo.