“Si Alma kag Amulek sa Prisuhan,” Mga Sugilanon sa Libro ni Mormon (2023)
Si Alma kag Amulek sa Prisuhan
Pagtuo sa Ginuo sa tiyempo sang kabudlayan
Nagtudlo si Alma kag Amulek sang ebanghelyo sa siyudad sang Amonihas. Ang iban nagpati sa Ginuo kag naghinulsol. Pero kadamo sang nangakig kay Alma kag Amulek kag gusto sila halitan. Ginhigtan sang akig nga mga tawo si Alma kag Amulek kag gindala sila nga duha sa punong hukom sang siyudad.
Wala nagpati ang punong hukom nga kinahanglan sang iya katawhan nga maghinulsol. Akig ang mga tawo kay Alma kag Amulek. Ginpahalin nila sa siyudad ang mga tawo nga nagpati sa gintudlo ni Alma kag Amulek. Dayon ginhaboy nila sa kalayo ang mga babayi kag kabataan nga nagapati sa Ginuo.
Nasubuan kaayo si Amulek sang makita niya ang mga tawo nga ginasakitan. Ginpangabay niya si Alma nga gamiton ang gahum sang Dios para luwason sila. Pero siling ni Alma nga indi sia pagpasugtan sang Espiritu sang Dios. Siling niya kay Amulek nga ang mga babayi kag kabataan magaupod sa Ginuo. Hukman sang Ginuo ang mga tawo nga nagpatay sa ila.
Ginyaguta sang punong hukom si Alma kag Amulek tungod wala ginprotektahan sang Ginuo ang mga babayi kag kabataan. Ginpapriso niya si Alma kag Amulek.
Pagligad sang tatlo ka adlaw, nagkadto ang punong hukom sa prisuhan upod ang iya peke nga mga pari. Kadamo sang ila ginpamangkot. Pero wala sila ginsabat ni Alma kag Amulek.
Ginsakit sang punong hukom kag sang iya mga pari si Alma kag Amulek. Wala man nila ginhatagan si Alma kag Amulek sang pagkaon ukon tubig. Kag ginyaguta nila ang gintudlo ni Alma kag Amulek.
Nag-antos si Alma kag Amulek sang pila ka adlaw. Nagbalik liwat ang punong hukom upod ang iya mga pari. Hambal niya kay Alma kag Amulek nga kon may gahum sila sang Dios, dapat mabugto nila ang mga lubid nga nahigot sa ila. Kag mapati sia sa ila.
Nabatyagan ni Alma kag Amulek ang gahum sang Dios. Nagtindog sila. May pagtuo si Alma sa Ginuo kag nangayo sang gahum para mabugto ang mga lubid.
Nabugto ni Alma kag Amulek ang mga lubid. Kinulbaan ang punong hukom kag ang iya mga pari. Malagyo kuntani sila, pero nagsugod nga magtay-og ang duta.
Narusdak ang mga pader sang prisuhan sa punong hukom kag sa iya mga pari, kag napatay sila. Pero ginprotektahan sang Ginuo si Alma kag Amulek. Sang mabatian sang mga tawo ang gahod, nagdalagan sila para makita kon ano ang nagakatabo. Si Alma kag Amulek lang ang naggwa sa prisuhan. Grabe ang kahadlok sang mga tawo kay Alma kag Amulek amo nga nagdinalagan sila palayo.