Ginbisitahan ni Jesus ang mga Tawo

Pagbulig sa tagsa ka tawo nga magpati sa Iya

pamilya nga nagatulok sa langit, kag ang iban nga mga tawo sa siyudad nagabaisay

Kadamo sang indi magpamati sa mga propeta sang Dios. Pero may mga tawo nga nagpati sa ginpangtudlo sang mga propeta. Ining mga nagatuo naghulat sa mga senyales sang pagkapatay ni Jesucristo.

3 Nefi 7:16–26; 8:1–4

kilat, mga bagyo, mga baha, mga linog, kag mga sunog nagguba sang siyudad

Pagkatapos nga napatay si Jesus sa Jerusalem, nagsugod ang mga senyales. Sa kadutaan sang Amerika, may mga bagyo, mga linog, kag mga sunog sa sulod sang tatlo ka oras. Nagkalaguba ang mga siyudad, kag madamo nga tawo ang nagkalamatay. Dayon dulom-dulom kaayo sa sulod sang tatlo ka adlaw.

3 Nefi 8:5–19, 23

may nagtilaw nga magpasiga sang kalayo, pero indi ini magsiga kag kadulom gid sa bilog nga palibot

Kadamol kaayo sang kadulom nga indi makita sang mga tawo ang adlaw, bulan, ukon mga bituon. Indi gani sila makasindi sang kalayo ukon kandila.

3 Nefi 8:20–23

madulom gihapon, ang mga tawo nagbuligay nga makagwa sa guba nga bilding, kag may tawo nga nagahibi kag nagapangamuyo

Madamo sa mga nabuhi ang ginsubuan kag nahadlok kaayo. Naghibi sila kag nanugonan nga waay sila dayon naghinulsol.

3 Nefi 8:24–25

madulom gihapon, ang mga tawo nagatulok sa langit, kag ang tawo nga nagapangamuyo nag-untat na sa paghibi

Gulpi lang, nakabati sila sang tingug. Si Jesus nga nagahambal sa ila. Nagpromisa Sia nga paayuhon Niya ang tanan nga naghinulsol. Ginsilingan sila ni Jesus nga napatay Sia kag nabuhi liwat para buligan ang tanan nga tawo. Grabe ang pagdayaw sang mga tawo amo nga nag-untat sila sa paghibi. Nangin malinong ang palibot sa sulod sang malawig nga inoras.

3 Nefi 9; 10:1–2

ang mga pamilya nagapungko palibot kag nagayuhum, kag indi na madulom

Naghambal liwat si Jesus. Ginhambalan Niya ang mga tawo nga buligan Niya sila kon pilion nila nga sundon Sia. Nadula na ang kadulom, kag nag-untat na ang pagtay-og sang duta. Nalipay ang mga tawo kag gindayaw si Jesus.

3 Nefi 10:3–10

may dako nga grupo sang mga tawo nga nagtipon sa palibot sang templo, kag nagtangla sila sa langit sang nag-amat sanag ang madulom nga mga panganod

Mga isa ka tuig ang nagligad, madamo nga tawo ang nagkadto sa templo sa duta nga Bugana. Ginhambalan nila ang parte kay Jesus kag ang mga senyales sang Iya kamatayon. Samtang nagahambalanay sila, nakabati sila sang malinong nga tingug halin sa langit. Sang primero, indi nila ini maintiendihan. Dayon nabatian nila ini liwat.

3 Nefi 8:5; 10:18; 11:1–4

Nagpanaog si Jesucristo halin sa langit, kag ang mga tawo nalipay kag gin-abiabi Sia

Sang mabatian nila ang tingug sa ikatatlo nga beses, nagtangla sila sa langit. Ang Amay nga Langitnon gale ang nagahambal. Ginhambalan Niya ang mga tawo nga magtulok kag magpamati sa Iya Anak. Dayon nakita sang mga tawo ang lalaki nga nagabayo sang puti nga nagapanaog halin sa langit.

3 Nefi 11:5–8

Si Jesucristo nga nagatindog sa tunga sang mga tawo, kag ang mga tawo nagpalapit sa Iya kag ginhikap ang mga marka sang lansang sa Iya mga palad

Nagtindog ang tawo sa tunga sang katawhan kag nagsiling, “Ako si Jesucristo.” Nagkalatumba ang mga tawo sa duta. Ginhambal ni Jesus sa ila nga nag-antos Sia kag napatay para sa tanan. Ginhagad Niya ang mga tawo nga hikapon ang mga marka sa Iya mga kamot, tiil, kag kilid para mabal-an nila nga Sia ang Manluluwas sang kalibutan.

3 Nefi 11:8–14

Si Jesucristo nga nagapungko sa hagdanan sang templo, kag ang mga tawo nagpalapit sa Iya kag ginhikap ang mga marka sang lansang sa Iya mga palad

Nagpalapit ang mga tawo kay Jesus nga tag-isaisa. Nakita nila sa ila mismo mga mata kag nahikap sa ila mismo mga kamot ang mga marka sa Iya mga kamot, tiil, kag kilid. Nabal-an nila tanan nga Sia ang ginasiling sang mga propeta nga magaabot. Nabal-an nila nga Sia ang Manluluwas sang kalibutan. Naghalapa ang mga tawo sa tiilan ni Jesus kag nagsimba sa Iya.

3 Nefi 11:15–17