“Si Abinadi kag si Haring Noe,” Mga Sugilanon sa Libro ni Mormon (2023)
Si Abinadi kag si Haring Noe
Mensahe halin sa propeta
Ginapamunoan ni Haring Noe ang mga Nefinhon nga nagaistar sa kadutaan sang Nefi. Ginapahatag ni Noe ang iya katawhan sang madamo kaayo nga kuwarta sa iya kag ginagasto ini sa manami nga mga butang para sa iya kaugalingon. Nagtawag sia sang mga pari nga mga bugalon para magbulig sa iya sa pagpamuno. Wala ginasunod ni Noe ang mga kasugoan sang Dios. Sa baylo, kadamo sang ginapanghimo niya nga kalainan.
Ginpangunahan ni Noe ang iya katawhan nga mangin malain man. Wala sila nagasunod sa Ginuo.
Isa ka propeta sang Dios nga ang ngalan Abinadi ang nagaistar sa lugar. Ginpadala sang Ginuo si Abinadi para hambalon si Noe kag ang iya katawhan nga maghinulsol.
Ginhambalan ni Abinadi ang mga tawo nga gusto sang Ginuo nga maghinulsol sila. Kon indi sila maghinulsol, tugotan sang Ginuo ang ila mga kontra nga magkadto sa ila lugar kag sakupon sila. Himuon sang ila mga kontra nga mabudlay kaayo ang kabuhi ni Noe kag sang iya katawhan.
Nangakig ang mga tawo kay Abinadi tungod sa iya ginhambal. Gusto nila nga patyon sia, pero ginprotektahan sang Ginuo si Abinadi kag ginbuligan sia nga makapalagyo.
Gusto man ni Noe nga patyon si Abinadi. Wala nagapati si Noe sa Ginuo. Sia kag ang iya katawhan wala maghinulsol.
Duha ka tuig ang nagligad, ginpabalik sang Ginuo si Abinadi para paandaman ang mga tawo. Ginhambalan ni Abinadi ang mga tawo nga ang ila mga kontra magasakop sang kadutaan tungod wala sila naghinulsol. Nangakig ang mga tawo kay Abinadi. Siling nila wala sila sang ginahimo nga malain kag indi sila maghinulsol. Ginhigtan nila si Abinadi kag gindala kay Noe.
Nagplano si Haring Noe kag ang iya mga pari. Gintinguhaan sang mga pari nga patalangon si Abinadi nga maghambal sang sala paagi sa madamo nga mga pamangkot. Pero maisog ini nga ginsabat ni Abinadi. Nakibot ang mga pari sa mga sabat ni Abinadi. Indi nila sia maintoan. Ginhambalan ni Abinadi ang mga pari nga mas ginaulikdan pa nila ang kuwarta sangsa maghimo sang insakto.
Ginsugo ni Noe ang iya mga pari nga patyon si Abinadi. Pero ginpaandaman sila ni Abinadi nga indi sia pagtandugon. Nagsilak ang iya guya tungod sa gahum sang Dios. Siling ni Abinadi nga wala ginatudlo sang mga pari ang mga kasugoan sang Dios. Gintudloan sila ni Abinadi nga matawo si Jesucristo, mapatay para sa aton, kag mabanhaw. Siling niya nga patawaron sila ni Jesus kon maghinulsol sila.
Gintapos ni Abinadi ang mensahe nga ginsugo sang Ginuo nga iya ihambal. Akig gihapon si Noe. Ginhambalan niya ang iya mga pari nga kuhaon si Abinadi kag patyon.
Isa ka pari, si Alma, nagpati kay Abinadi. Gintinguhaan ni Alma nga luwason si Abinadi. Pero nangakig naman karon si Noe kay Alma kag pilit sia nga ginpahalin.
Ginhambalan sang mga pari si Abinadi nga buhion nila sia kon ihambal niya nga indi husto ang iya gintudlo. Pero siling ni Abinadi nga kamatuoran ang iya gintudlo. Nangakig liwat si Noe kag ang iya mga pari. Ginpatay nila si Abinadi paagi sa pagsunog sa iya. Gintinguhaan man sang mga gwardya ni Noe nga patyon si Alma. Pero nanago si Alma kag ginsulat ang tanan nga pinanghambal ni Abinadi.