“Si Alma, Amulek, kag Zisrom,” Mga Sugilanon sa Libro ni Mormon (2023)
Si Alma, Amulek, kag Zisrom
Pagpili nga magpati kag magtuman sa Dios
Nakita ni Alma nga kadamo sang mga miyembro sang Simbahan nga wala nagatuman sang mga kasuguan sang Dios. Gani naglibot si Alma sa tagsa ka siyudad nga nagatudlo sang pulong sang Dios. Madamo ang naghinulsol. Dayon nakalab-ot si Alma sa siyudad nga ginatawag Amonihas. Wala nagpamati sa iya ang mga tawo didto. Ginduplaan sia kag gintabog pa-gwa sa siyudad.
Nasubuan si Alma sang naghalin sia sa siyudad. Nabalaka sia sa mga tawo. Dayon may nagpakita sa iya nga anghel. Siling sang anghel nga pwede si Alma nga magkalipay kay gintuman niya ang Dios. Ginhambalan si Alma sang anghel nga magbalik sa siyudad kag paandaman ang mga tawo. Kon indi sila maghinulsol, pagagub-on sila. Nagbalik dayon si Alma.
Sang pagbalik ni Alma sa siyudad, gutom sia kaayo. Nagpuasa sia sang malawig nga inadlaw. Nangayo si Alma sang pagkaon sa tawo nga gintawag Amulek.
Ginsugid ni Amulek kay Alma ang panan-awon nga iya nakita. Sa panan-awon niya, may anghel nga naghambal kay Amulek nga si Alma isa ka propeta sang Dios. Gusto ni Amulek magbulig kay Alma.
Gindala ni Amulek si Alma sa ila balay kag ginpakaon. Nagtiner si Alma sa balay ni Amulek sing pila ka adlaw. Ginbugayan sang Dios si Amulek kag ang iya pamilya. Sang ulihi, ginsugo sang Dios si Alma kag Amulek nga hambalon ang mga tawo sa siyudad nga maghinulsol. Nagtuman si Alma kag Amulek. Ginhatagan sila sang Dios sang Iya gahum para buligan sila sa pagtudlo.
Isa sa mga nakabati sa ila nga nagatudlo amo si Zisrom. Maalam sia kaayo kag gusto niya intoon si Alma kag Amulek. Siling ni Zisrom kay Amulek nga hatagan niya sia sang madamo nga kuwarta kon isiling niya nga indi matuod ang Dios. Gusto niya nga magbinutig si Amulek para indi magpati ang mga tawo sa ginatudlo ni Amulek kag Alma.
Alma 10:29–32; 11:21–25; 12:4–6
Pero indi magbinutig si Amulek parte sa Dios. Siling niya nga matuod ang Dios. Nahibal-an ni Amulek kag Alma ang pamensaron ni Zisrom. Nakadayaw si Zisrom kag namangkot sa ila sang madamo pa nga mga pamangkot. Gintudloan nila si Zisrom nga ang Dios may plano para sa tanan nga tawo. Nagpati si Zisrom sa gintudlo ni Alma kag Amulek parte sa Dios kag kay Jesucristo.
Alma 11:23–46; 12:1–18, 24–34; 14:6–7; 15:6–7
Naghinulsol gid si Zisrom sa malain niya nga ginpanghimo sadto. Nagmasakit sia. Ginbisitahan sia ni Alma kag Amulek. Siling ni Alma nga pwede mag-ayo si Zisrom tungod sa pagtuo ni Zisrom kay Jesus. Ginpangayo ni Alma sa Dios nga paayuhon sia. Nagtindog gulpi si Zisrom. Nag-ayo na sia! Ginbunyagan sia kag nagtudlo sa mga tawo sa bilog niya nga kabuhi.