“Ang Bandera sang Kahilwayan,” Mga Sugilanon sa Libro ni Mormon (2023)
Ang Bandera sang Kahilwayan
Pagpangapin sang kinamatarong nga magpati sa Dios
Si Amalikia dako kag makusog nga Nefinhon. Gusto niya nga mangin hari. Nagpromisa sia nga hatagan sang gahum ang mga tawo nga mabulig sa iya. Damo ang nanamian sa iya kag nagkumbinsi sa iban nga sundon sia. Gintudloan ni Amalikia ang mga tawo nga maghimo sang malain. Gusto niya kag sang iya mga sumulunod nga pamatyon ang mga tawo nga nagatudlo parte kay Jesucristo.
Si Kapitan Moroni, ang lider sang mga soldado nga Nefinhon, nagapati kay Jesus. Kahibalo sia nga ginabugayan ang mga Nefinhon tungod ginatuman nila ang mga kasuguan sang Dios. Akig sia kaayo nga ginadala ni Amalikia ang mga tawo palayo sa Dios, gusto mangin hari, kag gusto nga sakiton ang katawhan.
Gingisi ni Moroni ang iya kunop. Ginsulat niya diri nga dapat dumdumon sang katawhan ang ila Dios, ang ila kahilwayan, kag ang ila mga pamilya. Dayon ginhigot niya ini sa tukon kag gintawag ini nga bandera sang kahilwayan. Nagpangamuyo si Moroni para sa bendisyon sang Dios. Ginpakita niya sa mga Nefinhon ang bandera sang kahilwayan kag ginpangabay sila nga mag-upod sa iya sa pagpakig-away kay Amalikia.
Ginsuksok sang mga tawo ang ila taming kag nagdalagan pakadto kay Moroni. Handa sila nga makig-away para sa Dios kag sa ila mga puluy-an, mga pamilya, kag kahilwayan. Naghimo sila sang kasugtanan, ukon espesyal nga pangako, upod sa Dios nga sundon nila Sia pirme. Dayon naghanda sila sa pagpakig-away kay Amalikia.
Damo ang mga soldado ni Moroni. Hinadlukan si Amalikia. Malagyo kuntani sia upod ang iya mga sumulunod. Pero madamo sa ila ang nabalaka nga nagapakig-away si Amalikia sa sala nga mga rason. Damo ang indi na gusto magsunod sa iya. Gindakop sang mga soldado ni Moroni ang mga gusto pa magsunod kay Amalikia, pero nakapalagyo si Amalikia kag ang iban.
Nagkadto si Amalikia sa lugar sang mga Lamanhon. Gusto niya nga buligan sia sang mga Lamanhon nga makig-away sa mga Nefinhon. Dayon magadamo kag magakusog ang iya mga soldado. Ginpaakig niya ang madamo nga Lamanhon sa mga Nefinhon. Ginhambalan sang hari sang mga Lamanhon ang tanan nga Lamanhon nga maghanda sa pagpakig-away sa mga Nefinhon.
Nanamian ang hari kay Amalikia. Ginhimo niya si Amalikia nga isa sa mga lider sang mga soldado nga Lamanhon. Pero gusto ni Amalikia sang mas dako nga poder.
Naghimo si Amalikia sang plano nga pamunoan ang mga Lamanhon. Gin-agaw niya ang pagpamuno sa bilog nga kasoldaduhan nga Lamanhon. Dayon ginsugo niya ang iya mga alagad nga patyon ang hari kag ibutig kon sin-o ang naghimo sini.
Nagpakuno-kuno si Amalikia nga akig kay ginpatay ang hari. Nanamian ang mga Lamanhon kay Amalikia. Ginpangasawa niya ang rayna kag nangin bag-o nga hari. Gusto man niya nga pamunoan ang mga Nefinhon. Ginpakalain niya ang mga Nefinhon para mangakig ang mga Lamanhon sa ila. Wala magdugay, madamo nga Lamanhon ang gusto makig-away sa ila.
Samtang nagaangkon si Amalikia sang poder paagi sa binutig, ginhanda ni Moroni ang mga Nefinhon nga magsalig sa Dios. Ginbutang niya ang bandera sang kahilwayan sa kada tore sa lugar para padumdumon sila sang ila promisa. Ginhanda man sang mga soldado ni Moroni ang mga siyudad nga Nefinhon para sa giyera. Nagpatindog sila sang mga pader kag nagkutkot sang mga kanal para mangin hilway sa peligro kag mabakod ang mga siyudad.
Sang mag-abot ang mga Lamanhon para makig-away, indi sila makasulod sa mga siyudad sang Nefinhon. Ginbalabagan sila sang mga pader kag kanal nga ginhimo sang mga soldado ni Moroni. Madamo nga Lamanhon ang napatay sang gin-atake nila ang mga Nefinhon. Grabe ang kaakig ni Amalikia. Ginpangako niya nga patyon si Moroni.
Ginpasalamatan sang nga Nefinhon ang Dios sa pagbulig kag pagprotekta sa ila. Ginpabakod pa gid nila ang ila mga siyudad kag nagpatindog sang madamo pa nga mga siyudad. Ang giyera sa mga Lamanhon nagpadayon, pero ginbuligan sang Dios si Moroni kag ang iya mga soldado nga maprotektahan ang mga Nefinhon. Nalipay gid ang mga Nefinhon. Gintuman nila ang Dios kag nagapabilin nga tampad sa Iya.