“Si Alma sa mga Tubig sang Mormon,” Mga Sugilanon sa Libro ni Mormon (2023)
Si Alma sa mga Tubig sang Mormon
Ang mangin katawhan sang Dios
Si Alma pari sadto sang hari nga ang ngalan Noe. Gintinguhaan ni Alma nga luwason si Abinadi, isa ka propeta sang Dios, para indi pagpatyon ni Noe. Pero nangakig si Noe kay Alma kag gusto man ipapatay si Alma. Nalagyo si Alma kay Noe para indi sia mabutang sa delikado. Kon adlaw, nagapanago si Alma malapit sa lugar nga gintawag Mga Tubig sang Mormon
Nagpati si Alma sa gintudlo ni Abinadi parte kay Jesucristo. Ginpangayo niya sa Dios nga patawaron sia sa iya mga sala kag kasaypanan.
Nagapakigkita si Alma sa mga tawo sa tago kag gintudloan sila parte kay Jesus. Gintudloan niya ang tanan nga gusto mamati.
Madamo nga mga tawo ang nagpati kay Alma. Nagkadto sila sa Mga Tubig sang Mormon para mamati sa ginatudlo ni Alma
Gusto sang mga nagapati nga tawgon sila nga katawhan sang Dios, magbulig sa iban nga nagakinahanglan, kag sugiran ang mga tawo parte sa Dios. Gani ginhagad sila ni Alma nga magpabunyag. Paagi sa pagpabunyag, makahimo sila sang kasugtanan, ukon promisa, upod sa Dios nga magserbisyo sa Iya kag tumanon ang Iya mga kasuguan. Bilang balos, bugayan sila sang Dios sang Iya Espiritu.
Malipayon kaayo ang mga tawo. Namalakpak sila kag siling nila nga gusto nila magpabunyag. Ginbunyagan ni Alma ang kada isa sa ila sa Mga Tubig sang Mormon. Napuno sila sang Espiritu sang Dios kag nabatyagan ang pagpalangga sang Dios sa ila. Nangin mga miyembro sila sang Simbahan ni Cristo.
Nakita ni Noe nga ang iban sa iya katawhan nagagwa sa iya kadutaan. Nagpadala sia sang mga alagad para bantayan sila. Nakita sang mga alagad ang mga tawo nga nagakadto sa kadutaan sang Mormon para mamati sa ginatudlo ni Alma Grabe ang kaakig ni Noe. Ginpadala niya ang iya mga soldado para patyon si Alma kag ang mga tawo nga ginatudloan ni Alma.
Ginpaandaman sang Dios si Alma parte sa mga soldado. Sa bulig sang Dios, nakahalin si Alma kag ang iya katawhan nga wala peligro. Indi sila madakpan sang mga soldado. Naglakat sila sang walo ka adlaw sa kamingawan kag nakaabot sa matahum nga lugar. Didto sila nagpatindog sang bag-o nga mga balay. Gintudloan ni Alma ang mga tawo, kag gintuman nila ang ila promisa sa Dios.