“Ang Hari sang Tanan nga Lamanhon,” Mga Sugilanon sa Libro ni Mormon (2023)
“Ang Hari sang Tanan nga Lamanhon,” Mga Sugilanon sa Libro ni Mormon
Ang Hari sang Tanan nga Lamanhon
Paghandum nga maghibalo parte sa Ginuo
Ang mga Lamanhon may hari nga mas mataas pa sa tanan nila nga hari. Sia ang tatay ni Haring Lamoni. Abi niya ang mga Nefinhon mga kaaway. Isa ka adlaw, nakita niya si Lamoni nga upod si Amon. Ginpamangkot sang hari si Lamoni kon ano ang iya ginahimo upod sa Nefinhon. Siling ni Lamoni sa hari nga pagwaon nila ang mga utod ni Amon sa prisuhan.
Naakig ang hari. Ginapamensar niya nga gusto kawatan sang mga Nefinhon ang mga Lamanhon. Ginsugo niya si Lamoni nga patyon si Amon kag mag-upod sa iya.
Indi pagpatyon ni Lamoni si Amon. Ginsugiran niya ang hari nga si Amon kag ang iya mga utod mga propeta sang Dios. Siling niya nga buligan niya ang mga utod ni Amon.
Ginkuha sang hari ang iya espada para lab-on si Lamoni, pero ginpunggan sia ni Amon. Sa baylo, gin-atake sang hari si Amon. Ginpangapinan ni Amon ang iya kaugalingon. Ginpilasan niya ang braso sang hari para indi na sia makabato. Nakulbaan ang hari tungod sa kakusog ni Amon. Ginpromisa niya nga ihatag kay Amon ang katunga sang iya ginharian kon buhion sia ni Amon.
Indi gusto ni Amon sang ginharian. Sa baylo, ginpangabay niya ang hari nga buy-an ang iya mga utod sa prisuhan. Ginpangabay man niya sa hari nga indi na mangakig kay Lamoni. Ginsiling ni Amon sa hari nga dapat pasugtan niya si Lamoni nga magpamuno sa paagi nga ginahunahuna niya nga pinakamaayo.
Nasurpresa ang hari sa kadako sang pagpalangga ni Amon kay Lamoni. Nagsugot sia nga himuon ang tanan nga ginpangayo ni Amon.
Gusto sang hari nga magtuon pa gid parte sa ginhambal ni Amon kag Lamoni sa iya parte sa Dios. Ginpatawag niya si Amon kag ang iya mga utod para tudloan sia.
Nagkadto si Amon kag Lamoni sa kadutaan sang Midoni. Didto napriso ang mga utod ni Amon. Ginhigtan sila sang mga lubid kag wala ginhatagan sang pagkaon ukon tubig. Ginkumbinsi ni Lamoni ang nagapamuno sa Midoni nga pagwaon na ang mga utod ni Amon.
Sang ginbuy-an na sila, ang mga utod ni Amon nagkadto sa tatay ni Lamoni. Nagduko sila sa hari kag nangabay nga mangin suluguon nila. Siling sang hari, indi. Sa baylo, gusto niya nga tudloan nila sia parte sa ebanghelyo. Isa sa mga utod amo si Aaron. Ginbasa niya ang balaan nga kasulatan sa hari kag gintudloan sia parte sa Dios kag kay Jesucristo.
Nagpati ang hari kay Aaron. Siling niya nga buy-an niya ang bilog niya nga ginharian para makilala ang Dios. Ginpamangkot niya si Aaron kon ano ang kinahanglan niya himuon. Siling ni Aaron sa hari nga maghinulsol kag magpangamuyo sa Dios nga may pagtuo. Naghinulsol ang hari sang tanan niya nga mga sala kag nagpangamuyo.
Natumba ang hari sa salog. Nagdalagan ang mga suluguon sang hari para sugiran ang rayna.
Nag-abot ang rayna kag nakita ang hari nga nagahigda sa salog. Abi niya ginpatay ni Aaron kag sang iya mga utod ang hari. Nangakig ang rayna.
Ginsugo sang rayna ang mga suluguon nga patyon si Aaron kag ang iya mga utod. Pero nahadlok ang mga suluguon. Siling nila nga makusog kaayo si Aaron kag ang iya mga utod. Karon nakulbaan ang rayna. Ginsugo niya ang mga suluguon nga ipahibalo sa mga tawo sa siyudad kon ano ang natabo. Gusto niya kuntani nga patyon sang mga tawo si Aaron kag ang iya mga utod.
Nahibal-an ni Aaron nga mangakig gid ang mga tawo. Nahibal-an man niya nga indi pa patay ang hari. Ginabuligan Niya ang hari nga makatindog. Nagbalik na ang kusog sang hari kag nagtindog. Nakibot ang rayna kag ang iban pa nga mga suluguon.
Gintudloan sang hari ang rayna kag mga suluguon parte kay Jesus. Tanan sila nagpati kay Jesus. Gusto sang hari nga ang tanan niya nga tinawo makatuon parte kay Jesus. Naghimo sia sang layi nga pwede na magtudlo si Aaron kag ang iya mga utod bisan diin sa iya ginharian. Gintudloan nila ang mga tawo kag nagtawag sang mga pari kag mga manunudlo sa kadutaan.